சுஜாதாவின் ஓரிரு எண்ணங்கள்

 சுஜாதாவின்  ஓரிரு  எண்ணங்கள் .

*************

சுஜாதாவின்  ஆழ்ந்த அறிவிற்குக்  காரணம்  அவரது  புத்தக வாசிப்பே !

அதை  நிரூபிக்கும் வகையில் இந்தக் கட்டுரை அமைந்துள்ளது . அவர் , தான் படித்த  இரு புத்தகங்களில் இருந்து கீழ்க்கண்ட  கட்டுரையைத் தருகிறார்.

"""""""""""""""""""""""""""""""""""""""'"'""""""""""""""""'"'''''''''''''''''

சுவாரசியமான இரு புத்தகங்கள் .

Imponderables  என்கிற  வரிசையில் 

டேவிட்   ஃ பெல்டுமான்  என்பவரின்

" ஆஸ்பிரின்  எப்படி தலைவலியைக் கண்டு பிடிக்கிறது ? " என்கிற தலைப்பிட்ட புத்தகமும்  ஸ்டீபன் ஜே கோல்டு எழுதிய  " The Mismeasure of man  "   என்னும் புத்தகமும் .

வாழ்க்கையில்  நமக்கு சில வேளைகளில் வினோதமான சந்தேகங்கள் எழும் . அவைகளையேல்லாம் யாரிடம் கேட்டுத்

தீர்ப்பது என்று கூடத் தெரியாது .

உதாரணமாக  தினம் எனக்குக் காலைவேளையில்  தொப்புளில் கொஞ்சம் பஞ்சு இருக்கிறது . அது எப்படி என்று தெரியவில்லை .  யாரிடமாவது சந்தேகம் கேட்டால் அவரும் " ஆமா  சார் !  எனக்குக் கூட வருது !  இது எப்படி ? " என்று நம்மையே திருப்பிக் கேட்கிறார் .

அம்மாதிரியான  கேட்கத் துடிக்கும்  கேள்விகளைத் தொகுத்து , தகுந்த இடத்தில் விடை கேட்டுத் தெளிவு பெற்று ,  அந்த சுவாரசியமான கேள்விகளையும்  பதில்களையும்  நான்கு புத்தகங்களாகத்  தொகுத்திருக்கிறார்  ஃபெல்டுமான் .

கேள்விகளுக்குச் சில உதாரணங்கள்

இவை .

அமெரிக்காவின்  'க்ரீன்  கார்ட் '  என்பது நிஜமாகவே பச்சையா ?

( இல்லை .ஒரு காலத்தில் பச்சையாக இருந்தது . இப்போது நீலம் . )

வண்ணத்துப் பூச்சிக்கு  தும்மல் இருமல் வருமா ?

( வராது . அவைகளுக்கு மூக்கு நம்முடையது போல்  இல்லை . உடம்பு தான் மூக்கு . )

பாம்புகளுக்குத்  தும்பல் வருமா ?

( வரும் ).

மீன்கள்  ஒன்றுக்குப் போகுமா?

( போகும்.)

ஏழைக் குழந்தை களுக்கு ஏன் வயிறு பெரிதாக இருக்கிறது ?

( புரோட்டின் பற்றாக்குறையால் )

ஒரு சிலந்தி மற்றொரு சிலந்தி வலையில் அகப்பட்டால்  தப்பிக்க முடியுமா ?

( முடியாது ).

இவ்வாறான கேள்விகள் பல .

ஸ்டீபன் கோல்டு ஆங்கிலத்தில் எளிய அறிவியல் கட்டுரைகள் எழுதுவதில் முதன்மையானவர் . அவர் " Biological determinism "  என்பது பற்றி எழுதுகிறார் . சென்ற நூற்றாண்டில்  வெள்ளைக்கார  விஞ்ஞானிகள் , தம் இனத்தைச் சேர்ந்தவர்கள் , செவ்விந்திய, கருப்பர் , எஸ்கிமோ , இனங்களை விட 

உயர்ந்தவர்கள் என்று காட்ட  , எப்படி விஞ்ஞான  ஆராய்ச்சியை ஒரு கருவியாகப் பயன் படுத்தி , முடிவை முன்பே தீர்மானித்து , அதற்கேற்ப  பரிசோதனைகள் நடத்தினார்கள்  என்பதைப் ' புட்டு புட்டு ' வைக்கிறார் .

மிகவும் பிரசித்தி பெற்ற மூளை ஆராய்ச்சியாளரான , சென்ற நூற்றாண்டைச் சேர்ந்த   பால்  ப்ரோக்கா என்பவரையும்  அம்மாதிரி பார பட்ச  ஆராய்ச்சிக்குக் காய்ச்சுகிறார் .

மேலும் இந்த நூற்றாண்டில் நடத்தப்படும்

"ஐ  க்யூ "  பரிசோதனைகள் எல்லாம் உண்மையான  புத்திசாலித்தனத்தைக் கண்டு பிடிப்பதல்ல . அதை வைத்து ஒரு இனத்தை மந்தபுத்தி என்றோ , மற்றொரு  இனத்தை  உயர்ந்தது என்றோ  தீர்மானிக்க முடியாது என்பதையும்  நிலை நிறுத்துகிறார் .

அதனால் யாராவது உங்களை  " ஐ க்யூ  குறைவு " என்றால் நீங்கள் 'ஹ! 'என்று பதில் சொல்லவும் . விஞ்ஞான ஆராய்ச்சியில்  இந்த அபாயம் எப்போதும் உண்டு .முடிவைத் தீர்மானித்து விட்டு  அதற்கேற்ப  பரிசோதனைகளை நடத்தி அதன் விபரங்களைக் கூட்டிக் குறைத்து வெளியிடுவது . இதைச் சாதாரண மக்களின் பாஷையில்  ஃப்ராய்டு அல்லது 'ஹம்பக்' என்றும் ,  தூய தமிழில்  ' ஒத்லா ' என்றும் சொல்வார்கள் .

( சுஜாதாட்ஸ்லிருந்து ).

""""""""""""""""""""""""'''""""""""""""""''''""'''''""""""""""""""""""'"'"'

மிக சுவாரஸ்யமாக இருக்கிறதல்லவா ?

இப்படித்தான் சுஜாதா அவரது ஓரிரு எண்ணங்களை ஆங்காங்கே அள்ளித் தெளித்து விட்டுச் செல்வார் . ஒவ்வொரு கட்டுரையும் நம்மை ஒவ்வொரு விதத்தில்  ஈர்க்கும் . அதுதான் அவரது எழுத்தின் வலிமை .