முற்பகல் செயின்..20

 முற்பகல் செயின்..20

By your 

பின்னர் சுதாரித்துக்கொண்ட திரு  "ஆதித்யா விவரமெல்லாம் சொல்லியிருப்பானே "என்றான். 

நமச்சிவாயம் " ஆதித்யா விவரம் சொன்னான்" என்றார்.

பின்பு திரு கோமதியிடம் பதினைந்து நிமிடம் பேசினான்.இதன் பின் நித்யா இருவரிடமும் பேசினாள்.

மூன்றாம் நாள் கிண்டியிலிருந்த ஒலிம்பியா டெக்பார்க்கில் உள்ள விப்ரோவில் வேலைக்கு சேர்ந்தான் ஆதித்யா.

வெள்ளி இரவு சாப்பாடு வேண்டாமெனவும், வருவதற்கு லேட்டாகும் என்றும் அன்று காலையிலேயே சொல்லிவிட்டு ஆபிஸ் சென்றான்.

இரவு பத்தரை மணிக்கு வீடு திரும்பினான் ஆதித்யா."வாப்பா.பால் குடிக்கறயா" என்றார்

நமச்சிவாயம். " வேண்டாம் தாத்தா.போன இடத்தில் சூப்பர் சாப்பாடு.நாளைக்கும் சேத்து  இன்னிக்கே ஒரு பிடி பிடிச்சூட்டேன் "என்றான்."எங்க போனேன்னு கேக்க மாட்டீங்களா "என்ற அவனை பார்த்து கோமதி "சரி. சொல்லு.எங்க போயிருந்த "என்றாள்.

"உங்க சம்பந்தி வீட்டுக்குதான் போயிருந்தேன்" என்றான். நமச்சிவாயம்" அங்க எல்லாரும் நலமா.உங்க தாத்தா என்ன சொல்றார் " என்றார். தாத்தாவும், பாட்டியும் ஊர்ல இருக்கற எல்லா வியாதியும் தங்களுக்கு இருக்கறதா சொல்றாங்க. என்னை அங்கே தங்கி விட சொன்னாங்க. நான் நாசூக்கா மறுத்தூட்டேன். அனேகமா இங்க இருக்கற வீட்டை வித்தூட்டு,பெங்களூர்ல வித்யா சித்தி வீட்டு கிட்ட  அபார்ட்மெண்ட் வாங்கிட்டு குடி போறதா இருக்காங்க போல" என்றான்.

மறுநாள் கோமதியை ஒரு ஆர்த்தோ சர்ஜனிடம் காண்பித்து இடுப்பில் ராட் வைத்து ஆபரேஷன் செய்வதற்கு நாள் குறித்து வந்தான்.15 நாட்களில் ஆபரேஷன் முடிந்தது.

அடுத்த ஒரு மாதத்திற்கு  தன் தோளைப்பிடித்து கோமதியை நடக்கப் பழகினான் ஆதித்யா. இரண்டே மாதத்தில் கோமதி வீட்டிற்குள்ளே நடமாட ஆரம்பித்தாள்.

இதனை அடுத்து இருவருக்கும் கண்புரை நீக்கும் ஆபரேஷனை நடத்திவைத்தான்.

நமச்சிவாயத்திற்கும்,கோமதிக்கும்

"இங்கிவனை யாம்பெறவே என்ன தவம் செய்து விட்டோம்" என பாடத்தோன்றியது.

ஆதித்யா வந்து கிட்டத்தட்ட ஒரு வருடம் ஆகியிருந்த ஒரு நாள் பகல் பதினோரு மணிக்கு, ஆதித்யா ஆபிஸ் போயிருந்த சமயத்தில், நமச்சிவாயத்தின் வீட்டு வாசலில் ஒரு படகுக்கார் வந்து நின்றது. காரிலிருந்து ஐம்பது வயது மதிக்கத்தக்க ஒரு நபரும்,நாற்பத்தைந்து வயது மதிக்கத்தக்க ஒரு  மாதும் இறங்கினார்கள்.

இரண்டு பேர் உடுத்தியிருந்த உடைகளும், அணிந்திருந்த நகைகளும் அவர்கள் பெரிய பணக்காரர்கள் என பறை சாற்றின. வந்தவர் நமச்சிவாயத்தை பார்த்து "நமச்சிவாயம் சார்வாள் ......" என்று இழுத்தார்." நமச்சிவாயம் நான்தான்" என்றார் நமச்சிவாயம்.

"உள்ளே வரலாமா" என்று சொல்லிக் கொண்டே இருவரும் உள்ளே நுழைந்தனர். வந்தவர் "என் பேர் ஆவுடையப்பன். இது என் ஒய்ப் மீனாக்ஷி." என்றார்." வாங்க.உட்காருங்க" என்ற  நமச்சிவாயத்திற்கு பல வருடங்களுக்கு முன் பெண் கொடுக்க வந்த காசிநாதன் ஞாபகம் வந்தது.