108 திவ்யதேசங்கள் - பதிவு 40 சிதம்பரம்

 🌹🌹🌹 108 திவ்யதேசங்கள் - பதிவு 40 🌹🌹🌹

ஸ்ரீமந்நாராயணன் சிவபெருமானின் நடனத்தைக் காண அவதரித்த தலம்.

சைவ, வைணவ ஒற்றுமைக்கு எடுத்துக்காட்டாக விளங்கும் தலம்.

அருள்மிகு கோவிந்தராஜப் பெருமாள் திருக்கோவில் :-
திருசிதம்பரம் என்ற திருச்சித்ரகூடம்.
மூலவர்: கோவிந்தராஜன்
தாயார்: புண்டரீகவல்லி
உற்சவர்: தேவாதிதேவன்
கோலம்: சயனத் திருக்கோலம்
திசை: கிழக்கு
விமானம்: சாத்வீக விமானம்
தீர்த்தம்: புண்டரீக புட்கரணி
மங்களாசாசனம்: குலசேகராழ்வார், திருமங்கையாழ்வார்
நாமாவளி: ஸ்ரீ புண்டரீகவல்லீ ஸமேத ஸ்ரீ கோவிந்தராஜாய நமஹ.

ஊர்: சிதம்பரம்

🌺🌺 தலவரலாறு:-

நம்பினோர்க்கு அருளை வாரி வழங்கும் ஸ்ரீமந்நாராயணன் "இறைவன் சிவபெருமானின் திருநடனத்தைக் காண அவதரித்த திருத்தலம்".

பூலோக கைலாயமாக விளங்கும் தில்லை திருச்சிற்றம்பலத்தில் அமைந்துள்ள திவ்யதேசம்.

மகாதேவனான இறைவன் சிவபெருமானின் வேண்டுகோளுக்கிணங்க இங்கேயே கோவிந்தராஜப் பெருமாளாக கிடந்த கோலத்தில் காட்சி தந்து அருளுவதாகத் தலவரலாறு கூறுகிறது.

🌺🌺 சிவன் - பார்வதி திருநடனம் :-

கைலாயத்தில் ஒரு சமயத்தில் சிவனும், பார்வதியும் மகிழ்ச்சியாக இருந்த சமயத்தில் ஆனந்தமாக நடனமாடினர்.

நடனம் முடிந்த போது தங்களில் யார் நன்றாக நடனம் ஆடினர்???? என்ற சந்தேகம் அவர்களுக்குள் ஏற்பட்டது.

அவர்கள் பிரம்மனிடம் கேட்டார்கள். பிரம்மாவால் சரியான தீர்ப்பு கொடுக்க முடியவில்லை.

அவர்கள் மகாவிஷ்ணுவிடம் சென்று சரியான தீர்ப்பு சொல்லும்படி கேட்டுக் கொண்டார்கள்.

அவர் தேவசிற்பியான விஷ்வகர்மாவைக் வொண்டு இங்கு ஒரு சித்திர சபையை அமைத்து அங்கு இருவரையும் நடனம் ஆடும்படிக் கூறினார்.

சிவனுக்கும் பார்வதிக்கும் நடனப் போட்டி ஆரம்பமானது.

சிவன் தன் தாண்டவங்கள் அனைத்தையும் ஆடிக்காட்டினார். பார்வதியும் சலைக்காமல் அவருக்கு ஈடு கொடுத்து நடனமாடினார்.

ஒருவர் மிஞ்சும்படி இருவரும் ஆடிக்கொண்டிருக்க, இறுதியில் தன் வலக்காலைத் தூக்கி தலைக்கு மேல் நிறுத்தினார் சிவன்.

பார்வதியால் அவ்வாறு நடனமாட முடியவில்லை. சிவபெருமான் வெற்றி பெற்றதாக மகாவிஷ்ணு அறிவித்தார்.

பின், சிவபெருமான் இங்கு நடராஜராக எழுந்தருளி மகாவிஷ்ணுவையும் இங்கே தங்கும்படிக் கூறினார்.

மகாவிஷ்ணுவும் இங்கே பள்ளி கொண்ட கோலத்தில் தங்கினார்.

🌺🌺 நின்ற கோலத்தில் பிரம்மா :-

மகாவிஷ்ணுவின் நாபிக்கமலத்தில் இருக்கும் பிரம்மா நான்கு முகங்களுடன் அமர்ந்த கோலத்தில் இருப்பார்.

ஆனால், இங்கு வித்தியாசமாக நின்ற கோலத்தில் இருக்கிறார். இது ஓர் அதிசயமாகும்.

பஞ்சபூதங்களில் ஆகாயத்தலமான இங்கு மகாவிஷ்ணு ஆகாயத்தைப் பார்ப்பது போல் இருப்பது சிறப்பு.

🌺🌺 குலசேகராழ்வார் :-

இராமவதார நாயகனான இராமபிரான் மீது அளவற்ற பக்தி கொண்ட குலசேகராழ்வார் இத்தலத்தில் பாடிய 10 பாசுரங்களில் இராமாவதார காப்பிய வரலாற்றையே பதிவு செய்துள்ளார்.

இது இவர் மட்டுமே செய்த சிறப்பாகும்.

🌺🌺 தலச்சிறப்புகள் :-

பூலோகக் கைலாயமாகவும், திவ்யதேசமாகவும் விளங்கும் சிறப்பு வாய்ந்த திவ்யதேசம்.

சிதம்பரம் நடராஜப் பெருமான் திருக்கோவிலில் அமைந்துள்ள திவ்யதேசம்.

திருமகள் தாயார் புண்டரீகவல்லி என்ற திருநாமத்தில் காட்சி தரும் திவ்யதேசம்.

பெருமாளின் திவ்யதேசங்களில் மோட்சம் கொடுக்கும் திவ்யதேசமாகத் திகழ்கிறது.

பதஞ்சலி முனிவருக்கு மோட்சம் அருளிய திருத்தலம்.

பதஞ்சலி சுவாமிக்கு நேராக அவரை வணங்கிய நிலையில் தனிச்சன்னிதியில் இருப்பாது சிறப்பு.

குலசேகராழ்வார் 11 பாசுரம் திருமங்கையாழ்வார் 21 பாசுரம் என 32 பாசுரங்கள் பாடியருளிய திவ்யதேசம்.

🌺🌺 வழித்தடம் :-

சிதம்பரம் நகரின் மையப்பகுதியில் அமைந்துள்ளது இத்திருத்தலம்.

அருள்மிகு கோவிந்தராஜர் திருவடிகளே சரணம்.

அருமிகு புண்டரீகவல்லி தாயார் திருவடிகளே சரணம்.

🌺🌺 நாளைய பதிவில் :-

சோழ நாட்டுத் திவ்யதேசங்கள் 40 இன்றுடன் நிறைவடைகிறது.

அடுத்தது நடுநாட்டில் 2 திவ்யதேசங்கள்.

நாளை நடுநாட்டின் முதல் திவ்யதேசமான அருள்மிகு தேவநாத பெருமாள் திருக்கோவில் - திருவயிந்திரபுரம் திவ்யதேசத்தை தரிசிக்கலாம்.