108 திவ்யதேசங்கள் - பதிவு 37 திருமணிக்கூடம் (திருநாங்கூர்)

 🌹🌹🌹 108 திவ்யதேசங்கள் - பதிவு 37 🌹🌹🌹

தீராத நோய்களைத் தீர்க்கும் திருத்தலம்!! சந்திரனுக்கு காட்சி கொடுத்து, சாபநிவர்த்திகொடுத்த திருத்தலம்.

அருள்மிகு வரதராஜபெருமாள் திருக்கோவில்:-

திருமணிக்கூடம் (திருநாங்கூர்)

மூலவர்: வரதராஜபெருமாள், கஜேந்திரவரதன், மணிக்கூட நாயகன்
தாயார்: திருமாமகள் நாச்சியார்
உற்சவர்: வரதராஜபெருமாள்
கோலம்: நின்ற திருக்கோலம்
திசை: கிழக்கு
விமானம்: கனக விமானம்
தீர்த்தம்: சந்திர புட்கரணி
மங்களாசாசனம்: திருமங்கையாழ்வார்
நாமாவளி: ஸ்ரீ தீருமாமகள் நாச்சியார் ஸமேத ஸ்ரீ மணிக்கூட நாயகாய நமஹ.
ஊர்: திருநாங்கூர்

🌺🌺 திருமணிக்கூடம் :-

எல்லா உலகையும் காத்தருளும் இறைவன் நாராயணர் வரமளிக்கும் வரதனாக கச்சி மாநகரில் (காஞ்சிபுரம்) காட்சி தந்து அருள்கிறார். தொண்டை நாட்டிற்கு ஒரு வரதர் போல, சோழ நாட்டிற்கு ஒரு வரதர் இவரே ஆவார். இரு தேவியருடன் காட்சி தந்து அருள்வது மற்றொரு சிறப்பாகும்.

மணிக்கூடம் அமைப்பில் இத்தலம் அமைந்துள்ளதால் "திருமணிக்கூடம்" என்பது பெயராகும். இத்தல இறைவனுக்கு மணிக்கூட நாயகன் என்று மற்றொரு திருநாமமும் உண்டு.

பெரியதிருவடி சந்திரன் இவ்விருவருக்கும் பெருமாள் இத்தலத்தில் காட்சி கொடுத்ததாக ஐதீகம் நாங்கூர் மணிக்கூடத்திலே எங்கும் தென்றல் உலவுகிறது என்றும் அந்தத் தென்றலும் மணங்கொண்டு உலவுகிறது என்றும் திருமங்கையாழ்வார் குறிப்பிடுகிறார்.

மலர் மணத்தைக் குறிப்பிடாமல் இப்பெருமாளின் தெய்வீக மணத்தைத்தான் இப்படிக் குறிப்பால் திருமங்கையாழ்வார் உணர்த்துகிறார். இத்தலத்திலுள்ள பகவானை எந்தை என்று உரிமையோடும் பாசத்தோடும் அழைக்கிறார் திருமங்கையாழ்வார்.

திருமங்கையாழ்வார் பெருமாளை அவனே குன்றம் எனவும், அவனே மண் எனவும், அவனே குளிர் புனல் எனவும் அவனே திங்கள் எனவும், அவனே வெண்சுடர் எனவும், அவனே எல்லாம் எனவும் பகவானின் அளப்பரிய தன்மையை எடுத்துரைக்கிறார்.

🌺🌺 மூலவர் :-

மூலஸ்தானத்தில் பெருமாள் கிழக்கு பார்த்து தாமரை பீடத்தின் மீது நின்ற கோலத்தில், பின் கைகளில் சங்கு சக்கரமும், முன் கைகளில் அபய, ஊரு முத்திரை காட்டியபடி சேவை சாதிக்கிறார்.

பெருமாளின் வலது புறத்தில் சதுர வடிவமான தாமரை பீடத்தின் மீது நின்றபடி இடது கரத்தில் தாமரை மலரும், வலது கரத்தினை தொங்கவிட்டபடியும் ஸ்ரீதேவி காட்சியளிக்கிறாள்.

இடது புறத்தில் பூமாதேவி வலது கரத்தில் தாமரை மொட்டும் இடது கரத்தை தொங்கவிட்டபடியும் காட்சி கொடுக்கின்றனர்.

🌺🌺 சந்திரனின் சாபநிவர்த்தி :-

தக்கனுக்கு 27 மகள்கள், இவர்கள் அனைவரும் சந்திரனை திருமணம் செய்து கொண்டார்கள். 27 பெண்களிடமும் ஒரே போல் அன்பு செலுத்துவதாக சந்திரன், தக்கனுக்கு வாக்கு கொடுத்தான். ஆனால், ரோகிணியிடம் மட்டுமே மிகுந்த காதலுடன் இருந்தான்.

இதனால் மற்ற மனைவியர்கள் தன் தந்தையிடம் முறையிட்டனர். கோபம் கொண்ட தக்கன், சந்திரனிடம் " உன் அழகும், ஒளியும் தினம் தினம் குறையட்டும்" என சாபம் இட்டான். சாபம் பலித்ததால் முழு சந்திரன் மெல்ல மெல்ல தேயத் தொடங்கினான்.

சந்திரன் சாபம் தீர்வதற்கு ஸ்ரீ ரங்கம், திருஇந்தளூர், தலைச்சங்காடு என ஒவ்வொரு கோவிலாக சென்று இறுதியில் திருமணிகூடத்திற்கு வந்தான்.

அங்கே பெருமாளிடம் சந்திரன் மனமுருகி தொழுதான். பெருமாள் சந்திரனுக்கு வரதராஜனாக காட்சி கொடுத்து வரம் அளித்தார். சந்திரனின் நோய் நீங்கியது, சாப விமோசனம் கிடைத்தது.

🌺🌺 மங்களாசாசனம் :-

""கெண்டையும் குறளும் புள்ளும் கேழலும் மரியும்
மாவும் அண்டமும் சுடரும் அல்லா ஆற்றதுமாய
எந்தை ஒண்டிறல் தென்ன னோட வடவர
சோட்டங்கண்ட திண்டிற லாளர்
நாங்கூர்த் திருமணிக் கூடத்தானே!!!"".

- திருமங்கையாழ்வார்.

🌺🌺 சிறப்புகள் :-

இறைவன் மணிக்கூட நாயகன் தாமரை பீடத்தில் நின்று காட்சி தரும் திருத்தலம்.

திருமகள் தாயார் திருமாமகள் நாச்சியார் என்ற திருநாமத்தில் காட்சி தரும் திவ்யதேசம்.

திருநாங்கூரில் நடைபெறும் புகழ் பெற்ற 11 திருத்தல கருட சேவைக்கு இத்தல இறைவனும் எழுந்தருள்வார்.

திருமங்கையாழ்வார் 10 பாசுரம் பாடியருளிய திவ்யதேசம்.

🌺🌺 வழித்தடம் :-

சீர்காழி பேருந்து நிலையத்திலிருந்து 8 கி.மீ தொலைவில் அமைந்துள்ளது இத்திருத்தலம். திருநாங்கூரிலிருந்து 1 கி.மீ தொலைவில் அமைந்துள்ள புளியன்தோப்பின் நடுவில் அமைந்துள்ளது இத்திருக்கோவில்.

அருள்மிகு வரதராஜ பெருமாள் திருவடிகளே சரணம்.

அருள்மிகு திருமாமகள் நாச்சியார் திருவடிகளே சரணம்.

🌺🌺 நாளைய பதிவில் :

அருள்மிகு அண்ணன் பெருமாள் திருக்கோவில் - திருவெள்ளங்குளம் திவ்யதேசத்தைத் தரிசிக்கலாம்.

"ஓம் நமோ நாராயணாய நம:!"