நவ பிருந்தாவனம் - 5

 நவ பிருந்தாவனம் - 5👇

By Ramesh 

இனி நவபிருந்தாவனம் மற்றும் மந்திராலயம் அமைந்துள்ள புனித துங்கபத்ரை நதியின் சிறப்பைப் பற்றிக் காண்போமா? 

ஹிரண்ய கசிபுவின் சகோதரன் ஹிரண்யாட்சகன் ஒரு சமயம் பூமியை கடலுக்கடியில் கொண்டு ஒளித்து வைத்த போது பகவான் வராஹ அவதாரம் எடுத்து ஹிரண்யாட்சனை மாய்த்து பூமி தேவியை மேலே கொண்டு வந்தார். 

இப்படி வந்த போது அவர் சற்றே இளைப்பாறுவதற்காக ஒரு மலையின் உச்சியில் சென்று அமர்ந்தார். அந்த மலை இப்போது வராஹ மலை அல்லது வராஹ பர்வதம் என்று அழைக்கப் படுகின்றது.

 இது தற்போதய ’ஸஹ்யாத்ரி’ பகுதி இது. சிருங்கேரிக்கு தெற்கே உள்ளது இப்பகுதி. 

 அப்போது பகவானின் இடது பற்களில் ஒன்று உடைந்து அதிலிருந்து வெளிபட்ட நீர் கிழக்கு நோக்கி நதியாகப் பாய்ந்தது இதுதான் பத்ரா நதி.

 வலது புற கோரைப்பல் உடைந்து மேற்கு நோக்கிப் பாய்ந்த நீர் துங்கா நதியாகப் பாய்ந்தது. இவை இரண்டும் தான் தற்போது ஷிமோகா அருகே இனைந்து துங்க பத்ரா நதியாக பாய்கின்றது.

இந்த கூடலில்தான் பிரஹலாதர் பெருமாளின் வக்ஷ ஸ்தலத்திலிருந்து எடுத்துத் தந்த சாலக்ராமத்தால் ஆன சிந்தாமணி நரசிம்மரை பிரதிஷ்டை செய்தார். 

 சங்கு கர்ண தேவதையின் முதல் ஜென்மத்தில் 

ஸ்ரீ பிரஹலாத அவதாரத்திலும், இரண்டாவது ஜென்மத்தில் 

ஸ்ரீ வியாஸராஜ அவதாரத்திலும், மூன்றாவது ஜென்மத்தில் 

ஸ்ரீ ராகவேந்த்ர அவதாரத்திலும் துங்க பத்ரையில் அமைந்த நவ பிருந்தாவனப்பகுதி இவர்கள் அனைவரையும் ஈர்த்துள்ளது. 

இத்தனை சிறப்புடையது இந்த பகுதி. இதுவரை நவபிருந்தாவன மகான்களைப் பற்றியும், நவ பிருந்தாவனப் பகுதியின் மற்றும் துங்கபத்ரா நதியின் மகிமைகளைப் பற்றியும் கண்டோம் 

வாருங்கள் இனி யாத்திரைக்கு செல்வோமா?

ஹாஸ்பெட் புகை வண்டி நிலையத் திலிருந்து செல்லும் பாதையின் இருமருங்கும் ஹோட்டல்களாக இருப்பதை பார்க்கலாம். 

ஹோஸ்பெட் கர்நாடகாவின் பெல்லாரி மாவட்டத்தில் உள்ளது. சீனாவிற்கு தற்போது அதிகம் எற்றுமதி செய்யப் படும் இரும்புத்தாது (Iron Ore) இப் பகுதியில் கிடைக்கின்றது என்பதாலும், உருக்கு ஆலை(Steel plant) உள்ளதாலும், ஐந்து நட்சத்திர ஹோட்டல்கள் முதல் அனைத்து ரகமான தங்கும் விடுதிகளும் உள்ளன.

ஒரு காலத்தில் இந்த நகரம் விஜய நகர சாம்ராஜ் ஜியத்தின் நுழைவு வாயிலாக இருந்துள்ளது. 

இந்நகரை கிருஷ்ண தேவ ராயர் தமது அன்னையின் நினைவாக நாகலாபுரம் என்று அமைத்தார் ஆயினும் கன்னடத்தில் புதிய நகரம் என்று பொருள் படும் ஹோஸ்பெடெ என்ற பெயர் நிலைத்துவிட்டது.

 புகை வண்டி நிலையத்தின் மிக அருகிலேயே தங்கும் விடுதி ஒன்று இருக்கு.👇

SLV YATRI NIVAS, OPP To Rotary Club, Station Road, Hospet- 583201 என்ற விடுதியில் தங்கலாம். விடுதியின் தொலைப்பேசி எண் (08394-221525/26, சுரேஷ் பிரபு – 9448576148 அவர்களையும் தொடர்பு கொள்ளலாம் ) . 

இவர்களிடம் வண்டி சொல்லிவிட்டால் அவர்கள் அங்குள்ள பகுதிகள் அனைத்தையும் சுற்றி காண்பிக்க வண்டியையும் டிரைவரையும் அனுப்பி விடுவர்.

அவர்களே local guide ஆக உங்களுக்கு வழி காட்டி விடுவார்கள்..

அந்த விடுதி யிலேயே காலை உணவை முடித்துக் கொள்ளலாம். 

நவபிருந்தாவனம் செல்லும் முன் துங்கபத்ரை நதியில் குளிக்கலாம் என்பதால் அதற்குரிய துண்டு, மாற்று துணி, பூஜை சாமான்கள், புத்தகங்கள் ஆகியவற்றை மட்டும் ஒரு சிறு பையில் கொண்டு கொண்டு செல்ல வேண்டும்....

ஆனே குந்திக்கு வண்டியில் . செல்லும் வழியில் நீண்ட துங்கபத்ரை அணையை பார்க்கலாம். 

அதன் அடி வாரத்தில் ஜப்பானிய பாணியில் ஒரு அருமையான தோட்டம் உள்ளது. எப்போதும் தண்ணீர் பாயும் பூமி என்பதால் இரு மருங்கும் வாழை, தென்னை, நெல் வயல்கள் செழிப்பாக இருக்கும்... 

வாய்க்கால்கள் சாலையின் குறுக்காக ஓடுவதை பார்க்கலாம். 

கங்காவதி என்ற ஊரைக் கடந்த போது பழங்கால பாலம் ஒன்றையும் அழிந்து போன விஜயநகர சாம்ராஜ்ய நகரான ஹம்பியின் அழிவுகளையும் காணலாம். 

சுமார் ஒரு மணி நேரம் பயணத்தில் ஆனேகுந்தியை அடையலாம்.

ஒரு காலத்தில் இந்த ஆனேகுந்தி அரசனை முகமது பின் துக்ளக் தோற்கடித்து அரசனையும், அவன் குடும்பத்தாரையும் கோட்டையிலே சிறை வைத்தி ருந்தான். 

ஶ்ருங்கேரி பீடாதிபதி  ஶ்ரீ வித்யாரண்யர் வழிகாட்டுதலின் பேரில் ஹரிஹரன், புக்கராயன் என்னும் சகோதரர்கள் தந்திரத்தால் கோட்டைக்குள் நுழைந்து துக்ளக்கின் படைகளை தோற்கடித்து அரசனை விடுவித்து இந்த நகரை கைப்பற்றி, விஜய நகர சாம்ராஜ்யத்திற்க்கு வித்திட்ட இடம் இதுதான். 

விஜயநகர சாம்ராஜ்ஜியத் திற்கு அஸ்திவாரம் ஆனேகுந்திதான்.

இது என்ன ஆனேகுந்தி என்று மனதில் தோன்றுகின்றதா? 

விஜயநகர ஆட்சி காலத்தில் யானைகள் ( ஆன என்றால் கன்னடத்தில் யானை )  கட்டிய இடம் என்பதால் ஆனே கோந்தி என்பது மருவி இப்போது ஆனே குந்தி ஆகிவிட்டது. 

நவபிருந்தாவனம் தரிசனம் செய்து விட்டு திரும்பி வரும் சமயம் மதியம் ஆகி விடும் என்பதால் இங்கேயே மதிய உணவை முடித்துக் கொண்டால் அருகில் உள்ள சிந்தாமணி, அஞ்சனாத்திரி, பம்பா சரோவர் ஆகிய தலங்களை தரிசித்துக் கொண்டு பின்னர் ஹம்பி செல்லலாம் . 

எனவே அருகில் உள்ள HOOVA CAFÉ என்னும் விடுதியில் ( வீடு தான், சொல்லி விட்டு சென்றால் சமையல் செய்து வைக்கின்றனர்) மதிய சாப்பாட்டிற்கு சொல்லி விட்டு சென்றால் உணவு தயாராக இருக்கும்.

துங்கபத்ரை நதிக்கரையில் அமைந்துள்ள சிறிய கிராமம் ஆனேகுந்தி சுமார் 25 சிறு வீடுகள்தான் உள்ளன. அதிக அரசு பஸ் வசதி யில்லை ஹோஸ் பெட்டிலிருந்து அவரவர்கள் வண்டிகளில் வருவது உத்தமம். 

குக்கிராமத்தைப் போல ஆடுகள் அங்கங்கே மேய்ந்து கொண்டிருப்பதை பார்க்கலாம்.

மற்றபடி , அங்குள்ள விவசாயிகள் மாடுகளை ஓட்டிக் கொண்டு சென்று இருப்பதை காணலாம். மற்றபடி சத்தம், கூட்ட நெரிசல் ஏதும் இல்லை. 

அங்கே துங்க பத்ரா நதியை ஒட்டி உள்ள படித்துறையை நெருங்கும் பொது இடப்பக்கம் கருங்கல்லாலான ஒரு மண்டபத்தைப் பார்க்கலாம். 

அதில்  தான் ஒரு காலத்தில் யானைகளை கட்டி இருந்தார்கள்.... இப்போது வைக்கோற் போராக மாறி இருக்கிறது.

படித்துறையை அடைந்தால்  நவ பிருந்தாவன் ஹோகுத்தாரா? என்ற ஒரு குரல் கேட்கும், மோட்டார் படகுடன்  நின்று கொண்டு வருபவர்களை அழைத்துக் கொண்டிருப்பதை பார்க்கலாம். 

பரிசல் பயணம் செய்ய முடிய வில்லையே என்றால் இதில் சீக்கிரம் செல்லலாம் என்பதால் மோட்டார் படகில் செல்லலாம்.. 

ஆனால் படகு நிரம்பினால் தான் டீசல் எஞ்சின் , படகு நகரும்.

அமைதியான துங்கபத்ராவில் படகில் அமர்ந்து கொண்டே அதிக வேகம் இல்லாமல் சாந்தமாக பாயும் துங்கபத்ராவின் நீரோடத்தில் கையை வைத்து தண்ணீரை வாரி இரைத்துக் கொண்டே ஆனந்தமாக பயணம் செய்யலாம். 

அங்கு வட்டமிடும் நீர்க்காக்கைகளை பார்க்கலாம் வந்த இப்பயணத்தை மறந்துவிடக்கூடாது என்பதற்காக நீங்கள் ஃபோட்டோ எடுத்து கொள்ளலாம் 

படகில் போகும் வழியில் அறுபத்து நான்கு கால் மண்டபத்தையும்,   சிந்தாமணி என்ற  ராமர் வாலியை வதம் செய்த இடத்தையும் காணலாம்.

எதிரே, குழந்தை உருவாக்கியது போல பாறையின் மேல் பாறை அடுக்கி மலையாக உள்ளதே இது இத்தனை வருட காலம் எவ்வாறு சரிந்து விழாமல் இருக்கின்றது காலத்தின் கோலத்தினால் பெரிய பாறைகள் இவ்வாறு வெளுப் புறமாக வெடித்து இவ்வாறு உருமாறி விட்டனவா? என்று வியக்காதீர்கள். அது தான் அஞ்சனாத்ரி...

சுமார் பத்து நிமிடங்கள் பயணம் செய்து நவபிருந்தாவனத்தீவின் கரையை அடையலாம். 

நவபிருந்தாவனத் திற்கு செல்வதற்கு முன் துங்கபத்ரையில் குளிக்க வேண்டும்...... 

தூய உடைகளை அணிந்து கொண்டு தூய உள்ளத்துடன் மகான்களை தரிசிக்க செல்லவும்.

இங்கு துங்க பத்ரையானவள் சாந்தமாக ஆர்ப் பாட்டமில்லாமல் அமைதியாக ஓடுகின்றாள் அதிக ஆழமில்லை ஆனால் பாறைகள் வழுக்கும் என்பதால் கவனமாக குளிப்பது நல்லது. 

துங்கபத்ரையில் குளித்து விட்டு நவபிருந்தாவனங்களை தரிசிக்க செல்ல வேண்டும் 

இங்கே மணல் பாதை தான்..... சூரியன் உச்சிக்கு வருவதால் மணல் கொதிக்கும்.

முதலில் கண்ணில் படுவது மதில் சுவர்தான். நடுவிலே ஒரு வாயில், வாயிலின் சுவற்றிலே நவபிருந்தா வனங்களை தொடக்கூடாது என்ற எச்சரிக்கை வாசகம் மேலே தமிழிலும், கீழே கன்னடத்திலும் இருக்கும். 

சப்தம் செய்யாமல் அடி மேல் அடி வைத்து உள்ளே நுழைந்து மகான்களின் அருள் மழையில் தரிசனம் செய்ய வேண்டும். 

உள்ளே நுழைந்தவுடன் அற்புதமான அதிர்வலை, மனம் ஆனந்தத்தில் துள்ளுவதும், ஒரு இனம் புரியாத அமைதி மனதில் குடி கொள்ளும். 

நவபிருந்தாவனத்தின் தரிசனம் அடுத்த பதிவில் தொடரும்........