வசந்த காலம் வருமோ?-114

 வசந்த காலம்  வருமோ?-114

By N Krishnamurthy 

மதியம் இரண்டரை  மணிக்கு மேல் ராகு காலம், யமகண்டம் இல்லாத நேரமாக பார்த்து நலங்கு நடக்க ஏற்பாடானது.

நலங்கு எதற்கு என்று மார்கரட்டும்,வந்தனாவும் சந்தானத்தை கேட்க, சந்தானம் ராஜேஸ்வரியிடம்" நீ கொஞ்சம் எக்ஸ்ப்ளைன் பண்ணக்கா" என்றான்.

ராஜேஸ்வரி அவனிடம் சிரித்துக்கோண்டே தமிழில் "இதுக்குத்தாண்டா இங்கிலீஷ்காரியை பண்ணிக்காதேன்னு அப்பவே தலப்பாடா அடிச்சிண்டேன். இப்போ அவ கேக்றதுக்கு உன்னால பதில் சொல்ல முடீல பார்"என்றாள். 

பின்னர் அவள் மார்கரட்டிடமும், வந்தனாவிடமும்      "let me give you a small preamble of nalangu. 

The morning  ceremonies are mostly religious rituals & they have made the newly married couple tired & stressed. To make them cheerful again , our ancestors have designed this nalangu which is mostly a kind of joyful exchanges between them."

என்றாள். இதைக்கேட்ட மார்கரட் "OK. Akka i undetstand " என்றாள். வந்தனா ராஜேஸ்வரியிடம் "Thanks atthai.i got it"என்றாள்.

திருமண சடங்குகள் முடிந்த நிலையில் எல்லோரும் ரிலாக்ஸ்ட் ஆக இருப்பதால் நலங்கை மிகவும் எதிர்பார்த்திருந்தனர். 

கல்யாண பையனும், பெண்ணும் சாப்பிடும் போது ஒருவொருக்கொருவர் சில ஐட்டங்களை ஊட்டி விட்டுக்கொண்டதால் இன்னும் கொஞ்சம் அன்னோன்யம் அதிகமாகி அது நலங்கில் முழுமையாக வெளிப்படும்.

இதனை அடுத்து நடக்க உள்ள முதலிரவுக்கு நலங்கு அவர்கள் மன நிலையை தயார்படுத்தும். 

மஞ்சளும், சுண்ணாம்பும் கலந்த கலவையில் சிறிது நீர் பிசைந்து கால்களில் இடுவதே நலங்கிடுவது எனப்படும்.

ம்ருதுளாவிற்கு  வசுமதி  தலை பின்னி, பூ வைத்து, விளையாடல் புடவையை உடுத்த செய்தாள்.ராஜேஸ்வரி பெண் வீட்டினரை  நலங்கிற்கு வரும்படி அழைத்தாள். 

கோலம் போட்டு அதன் மீது பாயை முழுவதுமாக விரித்து சங்கர க்ருஷ்ணனையும், ம்ருதுளாவையையும்  எதிரும், புதிருமாக கிழக்கு மேற்காக உட்கார வைத்தார்கள்.

சுற்றிலும் ஜமக்காளம் போடப்பட்டு இரு வீட்டை சேர்ந்த பலர் உட்கார்ந்து கொள்ள ஆரம்பித்தனர்.

சின்னஞ்சிறுசுகள் நடக்கப்போவதை ஆர்வத்துடன் எதிர் நோக்கினார்கள்.

அருகில் ஒவ்வொரு கிண்ணத்திலும் கொஞ்சம் அரிசி, பருப்பு,உப்பு, சந்தனம், குங்குமம். மஞ்சள் பொடி, நலங்கு கலவை, குடுமி எடுத்த மஞ்சள் தடவிய தேங்காய், 12 சுட்ட அப்பளங்கள். வெற்றிலை, பாக்கு, பழம், புஷ்பம், முகம் பார்க்கும் கண்ணாடி,சீப்பு, ஆகியவை தயாராக இருந்தன.

கோமளம், ருக்மணி ஆகியோர் ம்ருதுளாவிடம் இதை செய், அதை செய் என்று சொல்லி கொடுக்க முன் வந்தார்கள்.மரகதமும்,ராஜேஸ்வரியும் சங்கர க்ருஷ்ணனுக்கு சொல்லிக்கொடுக்க ரெடியானார்கள்.

இந்த நேரத்தில் ராதிகா  "எங்கோ பிறந்தவராம்.எங்கோ வளர்ந்தவராம். எப்படியோ என் மனதை கவர்ந்தவராம்" என்று நலுங்கு பாட்டை ஆம்பித்தாள். வசுமதியும் இதற்காகவே தான் கற்றுக்கொண்டிருந்த

"நலங்கிட வாரும் ராஜா

நாணயம் உள்ள கிருஷ்ணா

முத்திழைத்த பந்தலிலே

இரத்தின க்லோகு மாட்டிருக்கு

வந்த ஜனம் காத்திருக்க

வாரும் அய்யா நலங்கிடவே

பட்டு ஜமக்காள மெத்தை

பந்தலிலே விரித்திருக்கு

நாலு வித வாத்தியங்களும்

நாகரீகமாய் ஒலித்திடவே

நலங்கிட வாரும் ராஜா

நாணயம் உள்ள கிருஷ்ணா

எந்த ஊரு எந்த தேசம்

எங்கிருந்து இங்கு வந்தீர்"என்று பாடியதும் 

ராஜேஸ்வரி

"மோகனபுரி தனிலே

மோகினியை காண வந்தேன்,

மோகனபுரி தனிலே

ம்ருதுளா மோகினியை காண வந்தேன்.

மின்னும் அவளழகை என் கண்ணாலே

பருக வந்தேன்.

அவள் கந்தர்வ கானத்தை காதாலே கேக்க வந்தேன் " என்று எதிர்பாட்டு பாடினாள்.

(ராஜேஸ்வரியும்,வசுமதியும் ஏற்கனவே சொல்லிவைத்துக்கொண்டு இப்படி பாடினார்கள் என பலரும் அறியாததால்

இந்த போட்டி பலரது அமோக ஆதரவை பெற்றது)

எல்லோரும் பலமாக கைகளை தட்ட, நலங்கு சூடு பிடிக்க ஆரம்பித்தது.

(பெண் தனது கணவனுக்கு தாம்பூலம் கொடுக்கும் போது பெண் பாட்டு பாடியே ஆக வேண்டும். இது போல் பிள்ளையும் பாடுவான்)

ம்ருதுளா நின்ற படியும், சங்கர க்ருஷ்ணன் அமர்ந்த படியும் இருக்க , முதலில் ம்ருதுளா, சங்கர க்ருஷ்ணன்

கழுத்திலும், இரு கைகளிலும், நெற்றி யிலும், சந்தனமிட்டு, நெற்றியில் குங்குமம் இட்டு பின்னர் அவனது வலது காலை நீட்டும் படி சொல்ல, அவன் மறுக்க (அப்போது அவனது பாட்டி மரகதம்" காலை நீட்டாதேடா" என்று கூற) என்ன செய்வதென்று தெரியாமல்  ம்ருதுளா தயங்கி நிற்க கோமளா

" ம்ருது.சொன்னபடி கேக்கலேன்னா,நம்ப வேலய காட்ட வேண்டியதுதான்

மாப்பிள்ளை காலை பிடித்து இழுடி"என்றாள். அவன் காலை  ம்ருதுளா பிடித்து இழுத்து நலங்கிட்டாள்.

பெண் வீட்டார் இதற்கு பலத்த கரகோஷம் செய்தார்கள்.

இதன் பின்னர் ம்ருதுளா சங்கர க்ருஷ்ணனுக்கு தலையை சீப்பினால் வாரி விட்டு, கண்ணாடியை முதலில் திருப்பி காண்பித்தாள்.

ருக்மணி "மாப்பிள்ளை.மொகத்தை நன்னா பாத்துகோங்கோ" என்று கூற கூட்டம் சிரித்தது. பிறகு ம்ருதுளா  போனால் போகிறது என்று கண்ணாடியை சரியாக காண்பித்தாள்.  ம்ருதுளாவிடம் சிறிது அரிசியும், அவனிடம் சிறிது பருப்பும் கொடுத்து ம்ருதுளா"நான் அரிசி தறேன்.நீங்க பருப்பு தாங்கோ" என்று அவனிடம் கேட்க, அவன் காது கேட்காத மாதிரி நடிக்க, கூட்டத்தில் யாரோ ஒருவர் "மாப்பிள்ளை காது மெஷினை மறந்தூட்டாராம்"என்றார். ம்ருதுளா  மீண்டும் உரக்க கேட்டாள். 

அவள்  தனது கையிலுள்ள அரிசியில் பாதியை இடது கையில் வைத்து கொண்டு, மீதியை அவனிடம் கொடுத்து பருப்பு வாங்கி இரண்டையும் கலந்து கொண்டு, வலது கையிலும், இடது கையிலும் பாதி பாதி வைத்து கொண்டு, கைகளை மூடிய வண்ணமாக வலது கையால் இடது பக்கத்திலிருந்து வலமாகவும், இடது கையால் வலப்பக்கமிருந்து இடமாகவும், மூன்று முறை அவன் தலையை சுற்றி, அவனது பின் பக்கத்தில் போட்டாள்.

இதன் பிறகு ம்ருதுளா இரு சுட்ட உளுந்து  அப்பளங்களை இரு கைகளிலும் வைத்து கொண்டு,பிரதக்ஷிணமாக வலது கையாலும், அப்பிரதக்ஷிணமாக இடது கையாலும் சுற்றி இரு அப்பளங்களையும் நொறுக்கி விசு தலைமேல் உடைத்து அவன் பின் பக்கம் போட்டாள். இது போல அப்பளங்கள் தீரும் வரை செய்தாள்.

அவள்  செய்ததெல்லாம் அவனும் செய்ய வேண்டியதாயிற்று.

குடுமி எடுத்து மஞ்சள் தடவி வைத்த தேங்காயை மணமக்கள் உருட்டி விட்டு விளையாட வேண்டும்.

பெண் தேங்காயை இரு கைகளாலும் பிடித்து கொள்ளலாம். ஆனால் ஆண் ஒரு கையை மட்டுமே உபயோகபடுத்தலாம்.யார் முதலில் தேங்காயை பிடிக்கிறார்களோ, அவர் அந்த தேங்காயை இருவருக்கும் நடுவில் பாயில் அழுத்தி பிடித்திருக்க மற்றவர் அதை விடுவித்து எடுக்க வேண்டும். 

இவ்வாறு எடுப்பவர் பெண்ணானால் இரு கைகளால் எடுக்கலாம். ஆண் ஆனால் ஒரு கையை மட்டுமே பயன் படுத்த வேண்டும்.

இவ்வாறாக ஒவ்வொருவரும் ஒரு முறை செய்ய வேண்டும்.இந்த விளையாட்டையும் இருவரும் செய்தனர்.

இதன் பின்னர் இரண்டு வெற்றிலையை நான்காக மடித்து, அதில் ம்ருதுளா கையில் கெட்டியாக பிடித்து கொண்டு பாயின் மேல் நடுவில் வைத்திருக்க, சங்கர க்ருஷ்ணன் விள்ளாமல் முழுவதுமாக கை பற்ற முயற்சித்தான். இம்மாதிரி ம்ருதுளாவும் செய்தாள்.

ம்ருதுளாவை பாடச் சொல்லி வற்புறுத்த, அவள் "அன்றொரு நாள் இதே நிலவில் அவர் இருந்தார் என்னருகில்" என்று பாடியவுடன், ஸ்ரீவத்சன் "அவர் இருந்தார் என்று மொட்டையா சொன்னா எப்படி, எவர் இருந்தார்னு பேரை சொல்லு" என்று கேட்டான். இதற்கு பதில் கூறும் விதமாக குரலை  உயர்த்தி "கிருஷ்ணன் இருந்தார் என் அருகில் என்று முதலிலும் சங்கர க்ருஷ்ணன் இருந்தார் என் அருகில்" என்று அடுத்த வரியும் பாட எல்லோரும் பலமாக கைதட்டினர்.

ஸ்ரீவத்சன் வாயில் கை வைத்து சீட்டி அடித்தான்.நாணத்தில் ம்ருதுளாவின் முகம் குங்குமமாய் சிவந்தது.

பின்பு வசுமதி "மாப்பிள்ளையும் பாட வேண்டும்" என்று கூறினாள். இதைக் கேட்ட சிதம்பரம் "ஏம்மா, இந்த விஷ பரிட்சை. மாப்பிள்ளை பாடச்சே  கூட்டம்  கலஞ்சூட்டா  அப்புறம் என்னோட  பிரசங்கத்துக்கு கூட்டமே இராதே" என்றார். இதைக் கேட்ட ராஜேஸ்வரி பொய் கோபத்துடன்" மாமா. கேட்டேளா.என் பையனும் நண்ணா பாடுவான்.என்  மாட்டுப்பொண்ணு அளவு இல்லேன்னா  கூட  அவனும் நண்ணா பாடி, கச்சேரியெல்லாம் பண்றான் தெரியுமோ "என்றாள். " அப்போ நீ பாடீடு கிருஷ்ணா" என்றார் சிதம்பரம். சங்கர க்ருஷ்ணன் முதலில் "முகத்தில் முகம் பார்க்கலாம்" என்ற கல்யாணி ராக சினிமா பாடலை பாடினான். இதைக் கேட்டுக்கொண்டு சிதம்பரம்"  என்னப்பா ரொம்ப கர்நாடகமாக இருக்கே, வேறு ஏதாவது கொஞ்சம் இன்ட்ரஸ்டிங்கா,சூடு ஏத்ற மாரி பாடு" என்றார். இதைக் கேட்டதும் சங்கர க்ருஷ்ணன் உத்தமபுத்திரன் படத்தில் வரும் "யாரடி நீ மோகினி. கூறடி  என் கண்மணி" என்று ம்ருதுளாவை நோக்கி பாட, இதைக் கேட்ட அங்கிருந்த கூட்டத்திலிருந்தவர்கள் பெரிய கரவொலி எழுப்பி   அவனை பாராட்டினார்கள்.

பிறகு ஆரத்தி எடுக்கப்பட்டு நலங்கு ஒருவழியாக முடிந்தது. எல்லா நிகழ்ச்சியையும் ஒன்றுவிடாமல் வந்தனா வீடியோ எடுத்து தள்ளி கொண்டு இருந்தாள்.