முற்பகல் செயின்..32

 முற்பகல் செயின்..32

By N Krishnamurthy 

வடகிழக்கு பருவமழை துவங்கியதால் பிரதான அருவியான குற்றால மெயின் அருவி,  புலியருவி, சிற்றருவி,செண்பகா தேவி அருவி, தேனருவி, பாலருவி, பழத்தோட்ட அருவி, ஐந்தருவி ஆகிய அருவிகளிள் நீர் ஆர்பரித்து  கொட்டிக்கொண்டிருந்தது.

குற்றாலத்தில் உள்ள மிகப்பெரிய நீர்வீழ்ச்சியாக விளங்குவது  பேரருவி.

இந்த அருவிக்கு மேலே 19 மீ ஆழத்தில் உள்ள "பொங்குமாங்கடல்" என்ற இயற்கை பள்ளம் மூலம் நீரின் ஓட்டம் கட்டுப்படுத்தப்பட்டு அருவியில் தண்ணீர் விழுகிறது. இந்தப் பள்ளம் நீர் ஓட்டத்தின் வேகத்தைக் குறைத்து நாம் குளிப்பதற்கு தகுந்த சூழ்நிலையை உருவாக்கித் தருகிறது.

இந்த அருவியில் எல்லோரும் குளித்தனர். முதலில் குளிக்கத்தயங்கிய கோமதியை வலுக்கட்டாயமாக ஆதித்யாவும், தேன் மொழியும் அருவியில் நிற்க வைத்தனர்.

குளித்து முடித்து உடலை  துவட்டு கொண்ட பிறகு மெல்ல நடக்க ஆரம்பித்தனர்.

வழி நெடுகிலும் பல மரங்கள் ,முக்கியமாக  அடர்ந்த ஆலமரங்கள் தென்பட்டன. சுப்ரமண்ய பிள்ளை " முற்காலத்தில் இந்தப் பகுதி முழுவதும் குறுகிய ஆலமரங்கள் நிறைந்து காணப்பட்டதால் குறுகிய + ஆலம் = குற்றாலம் என்ற பெயர் உண்டானதாக சொல்லப்படுகிறது" என்றார்.

குற்றாலத்தின் இயற்கை வனப்பில் தன்னை மறந்த தேன் மொழி, 

திரிகூடராசப்பக் கவிராயரின் 

திருக் குற்றாலக் குறவஞ்சி என்னும்  இசை நாடகச் சிற்றிலக்கியத்திலிருந்து

" வானரங்கள் கனிகொடுத்து மந்தியொடு கொஞ்சும்;
 மந்திசிந்து கனிகளுக்கு வான்கவிகள் கெஞ்சும்;
கானவர்கள்  விழியெறிந்து வானவரை அழைப்பார்;
கமனசித்தர் வந்து வந்து காயசித்தி விளைப்பார்;
தேனருவித் திரையெழும்பி வானின் வழி ஒழுகும்;
செங்கதிரோன் பரிக்காலும் தேர்க்காலும் வழுகும்;
கூனலிளம் பிறையணிந்த வேணியலங் காரர்
குற்றாலத் திரிகூட மலையெங்கள் மலையே".

என்ற பாடலை பாட ஆரம்பித்தாள்.

அவள் பாடி முடித்ததும் தான் அந்த அதிசயம் நிகழ்ந்தது. "உனக்கு மட்டும் தான் குற்றால குறவஞ்சி தெரியுமா?எனக்கும் தெரியும்" என்று சொல்லும் விதமாக ஆதித்யா

"செங்கையில் வண்டு கலின்கலின் என்று
செயம் செயம் என்றாட--இடை
சங்கதம் என்று சிலம்பு புலம்பொடு
தண்டை கலந்தாட--இரு
கொங்கை கொடும்பகை வென்றனம்  என்று
குழைந்து  குழைந்தாட--மலர்ப்
 பைங்கொடி நங்கை வசந்த சுந்தரி
பந்து  பயின்றாளே!"

என்று சொன்னான். "இதன் பொருள் தெரியுமா?"என்று தேன்மொழி கேட்டபோது

ஆதித்யா "உனக்கு தெரியாதென்றால் சொல்,நான் சொல்கிறேன் "என்று சொல்லி 

"அந்த சுந்தரியின்

செங்கையிலுள்ள கருவளையல்கள் கலின் கலின் என்று ஒலியெழுப்புகின்றன. அது வெற்றி, வெற்றி என்று முழக்கம் இடுவது போல்  உள்ளது. கைவளையல்களின் ஓசையோடு காலில் அணிந்துள்ள சிலம்பு, தண்டை போன்ற அணிகலன்களின் ஓசையும் கலந்து கொள்கிறது. குதித்துக் குதித்துப் பந்தடிக்கும் போது அவள் மார்பகங்கள், தாம் பந்தை வென்றதாக எண்ணிப்பெருமையோடு குழைந்து குழைந்து குதித்ததைப் போலத் தோன்றுகிறது. இவ்வாறாக மங்கை வசந்த சுந்தரி பந்தாடினாள்" என்று முடித்தான்.அவனது இவ்வுரையை கேட்ட தேன் மொழி அசந்து போனாள். ஆதித்யா அமெரிக்காவில் இருந்து கொண்டு இந்த அளவு தமிழைப்படித்திருப்பது அவளுக்கு ஆச்சர்யத்தை அளித்தது.இவனுக்கு இன்னும் என்னவெல்லாம் தெரியுமோ என்று நினைக்க ஆரம்பித்தாள்.