இன்றைய கோபுரம் தரிசனம் கோடி பாவ விமோசனம்புண்ணியம் மிகவும் பழமையான தலம் திருவடி பணிந்து கோடி ஜென்ம வினைகள் தீர வேண்டிய நின்றேன்
சோழ நாடு காவிரி தென்கரைத் தலங்கள்
67 கற்குடி (உய்யக்கொண்டான்மலை, உய்யக்கொண்டான்திருமலை)
சிவஸ்தலம் பெயர்:-
கற்குடி (தற்போது உய்யக் கொண்டான் மலை என்று வழங்குகிறது)
இறைவன் பெயர்:-உஜ்ஜீவனேஸ்வரர், உஜ்ஜீவ நாதர்.
இறைவி பெயர்:-அஞ்சனாட்சி,பாலாம்பிகை.
தல விருட்சம்:-வில்வம்.
தீர்த்தம்:-பொன்னொளிர் ஓடை,குடமுருட்டி , ஞானவாவி தீர்த்தம்,எண்கோணக்கிணறு,
நாற்கோணக்கிணறு என ஐந்து தீர்த்தங்கள்.
புராண பெயர்:-கற்குடி,உய்யக்கொண்டான் திருமலை.
ஊர்:-உய்யக்கொண்டான் மலை.
தேவாரப் பாடல்கள்:-
சம்பந்தர்
வடந்திகழ் மென்முலை
அப்பர்
மூத்தவனை வானவர்க்கு
சுந்தரர்
விடையா ருங்கொடியாய்
எப்படிப் போவது:-
திருச்சியில் இருந்து தென்மேற்கே 5 கி.மி. தொலைவில் ஒரு சிறிய குன்றின் மேல் இத்தலம் அமைந்திருக்கிறது.
ஆலய முகவரி:-
அருள்மிகு உஜ்ஜீவநாதசுவாமி திருக்கோயில்
உய்யக்கொண்டான் மலை
உய்யக்கொண்டான் மலை அஞ்சல்
(வழி) சோமரசம்பேட்டை.
திருச்சி மாவட்டம்
PIN - 620102.
தொடர்புகொள்ள 9443150332
9443650493
திருவிழா:-
பங்குனியில் பிரம்மோற்ஸவம்,விநாயகர் சதுர்த்தி, நவராத்திரி, திருக்கார்த்திகை,
தைப்பூசம்.
கோவில் அமைப்பு:-
50 அடி உயரமுள்ள ஒரு சிறிய குன்றின் மீது அமைந்திருக்கிறது. குன்றின் அடிவாரத்தில் முருகப் பெருமானின் சந்நிதி உள்ளது. கிழக்கு நோக்கிய 5 நிலை இராஜகோபுரத்துடன் இவ்வாலயம் அமைந்துள்ளது. கோபுர வாயில் வழியே உள்ளே நுழைந்தால் இடதுபுறம் ஞானவாவி தீர்த்தம் உள்ளது. இத்தீர்த்தத்திற்கு எதிரே ஒரு முகப்பு வாயிலுடன் குன்றின் மேலே ஏற படிகள் தொடங்குகின்றன.
குன்றின் பாறைகளில் நன்கு அமைந்துள்ள சுமார் 65 படிகள் ஏறி ஆலயத்தை அடையலாம். படிகள் செல்லும்போது இடதுபுறம் விநாயகர் உள்ளார்.குன்றின் மீது ஒரு 3 நிலை கோபுரம், 5 பிராகாரங்களுடன் ஆலயம் அமைந்துள்ளது. இக்கோபுரம் வழியே உள்ளே நுழைந்தவுடன் எதிரே கொடிமரம், பலிபீடம், நந்தி மண்டபம் ஆகியவற்றைக் காணலாம்.குன்றின் மீது சுற்றிலும் உயர்ந்த மதிற்சுவருடன் கூடிய ஆலயம் அழகுற அமைந்திருக்கிறது.
கொடிமரம் முன்பு மார்க்கண்டனைக் காப்பதற்காக, எமனைத் தடுப்பதற்காகக் கருவறை விட்டு நீங்கி வந்து நின்ற சுவாமியின் பாதம் உள்ளது.படிகளேறி உட்சென்றால் முதலில் அஞ்சனாட்சி அம்பாள் சந்நிதி உள்ளது.மேற்கு நோக்கிய சந்நிதியில் காட்சி தரும் இவள் பழைய அம்பாள்.இத்திருமேனியின் திருக்கரத்திலுள்ள பூவின் இதழ் உடைந்து போய் உள்ளது.எனினும் அம்பாள் கனவில் வந்து உணர்த்தியவாறு இப்பழைய அம்பாளை அப்புறப்படுத்தாது அப்படியே வைத்துள்ளனர்.இதனால் புதிய அம்பாள் பாலாம்பிகை பிரதிஷ்டை செய்துள்ளனர். புதிய அம்பாள் பாலாம்பிகை சந்நிதி கிழக்கு நோக்கி அமைந்துள்ளது.இரு அம்பாளுக்கும் நித்திய பூசை நடைபெற்று வருகின்றது. அம்பிகை சந்நிதிக்கு அருகில் சண்முகர் தனி சந்நிதி அழகானது.
உள் நுழைந்ததும் நேரே கோஷ்ட தட்சிணாமூர்த்தி தரிசனம் தருகிறார். வலமாக வரும்போது நால்வர் பிரதிஷ்டையும், அம்பாளுடன் காட்சி தரும் விநாயகர் சந்நிதியும், மறுபுறம் வள்ளி தெய்வயானையுடன் சுப்பிரமணியர் சந்நிதியும் உள்ளன.கஜலட்சுமி, ஜ்யேஷ்டாதேவி, பைரவர், சூரியன், சனிபகவான் சந்நிதிகளும் உள்ளன. கோஷ்டமூர்த்தங்களாகத் தட்சிணாமூர்த்தியுடன் துர்க்கையும், பிரம்மாவும், அர்த்தநாரீஸ்வரரும் உள்ளனர். மூலவர் உஜ்ஜீவனேஸ்வரர் மேற்குப் பார்த்த சந்நிதியில் சுயம்பு மூர்த்தியாக அருள்பாலிக்கிறார்.அருகில் இறைவி அஞ்சனாட்சி சந்நிதி உள்ளது.இறைவன், இறைவி சந்நிதி தவிர பைரவர், மஹாலக்ஷ்மி, சக்திகணபதி, சூரியன், சண்டிகேஸ்வரர், நவக்கிரகங்கள் ஆகியோருக்கு சந்நிதிகள் உள்ளன.
கோவிலின் உட்புறச் சுவர்களில் சோழ மன்னர்கள் உத்தம சோழன், ராஜராஜ சோழன் ஆகியோர் அளித்த தானங்கள் பற்றிய விபரங்கள் கல்வெட்டுகளில் குறிப்பிடப்பட்டிருக்கின்றன.பல்லவ மன்னன் நந்திவர்ம பல்லவன் இக்கோவி்லுக்கு பல தானங்களும், திருப்பணிகளும் செய்திருக்கிறான். இத்தலம் நந்திவர்ம மங்கலம் என்றும் கல்வெட்டுகளில் குறிப்பிடப்பட்டுள்ளது.
தல சிறப்பு:-
இத்தலத்து இறைவன் சுயம்பு மூர்த்தியாக அருள்பாலிக்கிறார்.சிவனின்
தேவாரப்பாடல் பெற்ற சிவாலயங்களில் இது 67 வது தேவாரத்தலம் ஆகும்.
பொது தகவல்:-
தற்போது மக்கள் வழக்கில் உய்யக்கொண்டான்மலை என்று வழங்குகிறது.
விசேஷ நடராஜர்:-
மார்க்கண்டேயரின் உயிரைக் காப்பதாக வரம் கொடுத்ததால் சிவனுக்கு
"உயிர்கொண்டார்" என்ற பெயர் ஏற்பட்டது.இவரே ஜீவன்களுக்கு ஆதாரமாக இருப்பதால் உஜ்ஜீவனநாதர் என்ற பெயர் ஏற்பட்டது.
ஆடி பவுர்ணமியன்று இரவில் , மார்க்கண்டேயருக்கு சிவன் காட்சி தந்ததாக ஐதீகம்.எனவே , அந்நாளில் சிவனுக்கு சிறப்பு பூஜைகள் நடக்கும்.தவிர , பவுர்ணமிதோறும் இரவில் சிவனுக்கு தேன் , பாலபிஷேகம் நடக்கும்.
சாரமா முனிவரால் பட்டம் சூட்டப்பட்ட மன்னன் இங்கு சிவதரிசனம் செய்தபோது , சிவன் அவனுக்கு ஆனந்த தாண்டவ தரிசனம் காட்டியருளினார்.பாதத்தை மட்டுமே பிடிமானமாகக் கொண்டு,இந்த நடராஜர் சிலை விசேஷமாக வடிக்கப்பட்டுள்ளது.
சூரியபூஜை விசேஷம்:-
மலைக்கோயில் ஓம் வடிவில் அமைந்துள்ளது.உஜ்ஜீவநாதர் , அஞ்சனாட்சி அம்பாள் இருவரும் மேற்கு நேக்கியுள்ளனர் .
இவர்களது சன்னதிக்கு நடுவே கிழக்கு நோக்கி பாலாம்பிகை இருக்கிறாள் .
குழந்தைகளுக்கு ஏற்படும் பாலாரிஷ்டம் ( ஒரு வகையான தோஷம் ) நீங்க
இவளிடம் வேண்டிக்கொள்கிறார்கள்.தை மாதத்தில் ஓர்நாள் மாலையில்
சிவலிங்கம் , அஞ்சனாட்சி அம்பிகை மீது சூரிய ஒளி விழும் .அந்நாளில் இருந்து
90 நாட்களுக்கு ஒருமுறை என வருடத்தில் 4 முறை இங்கு சூரியபூஜை நடக்கும் .
பிரகாரத்தில் இடர்காத்தவர் என்ற பெயரில் சிவலிங்கம் இருக்கிறது .
திருநாவுக்கரசர் தேவாரத்தில் இத்தலத்து சிவனை , இப்பெயரில்
குறிப்பிட்டுள்ளார்.இங்குள்ள சுப்ரமணியரிடம் அருணகிரிநாதர் திருப்புகழ்
பாடும் அறிவைக்கொடு என வேண்டிப் பாடியுள்ளார்.வைகாசி விசாகத்தன்று
இவருக்கு விசேஷ பூஜை நடக்கும்.அன்று சுவாமி புறப்பாடும் உண்டு.
கந்தசஷ்டியின்போது தெய்வானையுடன் திருக்கல்யாணம் நடக்கும்.
தைப்பூசத்தன்று முருகன் , ஊருக்குள் சென்று ஐந்து கோயில் சுவாமிகள்
சந்திக்கும் வைபவம் நடக்கும்.
பிரார்த்தனை:-
பிரயாணங்களின் போது எந்தவித விபத்தும் ஏற்படாமல் இருக்க ஜேஷ்ட தேவி
வழிபாடு செய்யப்படுகிறது.இத்தலத்தை வழிபடுவோர் நீண்ட ஆயுளையும் நிறைந்த செல்வங்களையும் பெறுவார்கள் என்பது நம்பிக்கை.
குழந்தைகளுக்கு ஏற்படும் பாலாரிஷ்டம் ( ஒரு வகையான தோஷம் ) நீங்க
இவளிடம் வேண்டிக்கொள்கிறார்கள்.
நேர்த்திக்கடன்:-
ஜேஷ்டாதேவிக்கு புது வஸ்திரம் அணிவித்து வழிபடுகிறார்கள்.
தலபெருமை:-
இக்கோயிலில் ஜேஷ்டாதேவியின் சிலை வித்தியாசமான வடிவமைப்பில்
உள்ளது . இவளை " மூதேவி ' என்பார்கள். லட்சுமியின் சகோதரி இவள்.இவளைப் பார்த்தாலே காரியங்கள் நடக்காது என்பார்கள்.
இது தவறான கருத்தாகும் என சொல்லப்படுகிறது.இந்த தேவியை தரிசித்தால் விபத்துகளிலிருந்து நம்மை காப்பாற்றுவாள்.எப்போதும் விழிப்புடன் இருக்கச் செய்வாள் .நந்திவர்ம பல்லவனுக்கு இவளே குலதெய்வம்.
மேரு ( மலை )
வைத்து பூஜை செய்பவர்கள் ஒன்பது படிக்கட்டுகளை அமைப்பார்கள்.இந்த மலைகளை நவாபரணம் என சொல்வதுண்டு.
இதில் இரண்டாவது ஆபரணமாக ஜேஷ்டாதேவி விளங்குகிறாள்.
திருவானைக்காவல் அகிலாண்டேஸ்வரி கோயிலில் ஜேஷ்டாதேவிக்கு சிலை உண்டு .அதுபோல உய்யக்கொண்டான் திருமலையிலும் ஜேஷ்டாதேவி இருக்கிறாள்.ஆனால் இரு புறமும் இரண்டு குழந்தைகளை வைத்திருக்கிறாள் .
ஒரு குழந்தை நந்திகேஸ்வரர் குழந்தை வடிவத்தில் இருப்பதுபோல உள்ளது.
இவரை " மாடன் ' என்கிறார்கள்.மாடு போன்ற வடிவத்தில் உள்ளதால் மாடன்
என்ற பெயர் ஏற்பட்டதாம்.மறுபுறத்தில் அழகிய பெண் இருக்கிறாள்.இவளை
வாக்தேவதை ( சேடி ) என்கிறார்கள்.
ஆதிபராசக்தியே இங்கு ஜேஷ்டாதேவியாக இருக்கிறாள்.அவள் தனது சேடியான ( பணிப்பெண் ) வாக்தேவதையையும் அழைத்து வந்திருக்கிறாள்.மாறுபட்ட இந்த அம்பிகையை வழிபட்டு வாழ்வில் நிகழ இருக்கும் விபத்துகளை தவிர்த்துக் கொள்ளலாம்.
சிறப்பம்சம்:-
50 அடி உயர மலையில் இந்த கோயில் இருக்கிறது.கோயிலைச் சுற்றி பொன்னொளி ஓடை , குடமுருட்டி , ஞானவாவி , எண்கோண கிணறு , நாற்கோண கிணறு ஆகிய தீர்த்தங்கள் உள்ளன.தேவி அஞ்சனாட்சி என வழங்கப்பெறுகிறாள்.இவள் மை தீட்டப்பெற்ற கண்களைக் கொண்டவள்.
மற்றொரு அம்பிகை பாலாம்பிகை எனப்படுகிறாள்.இரண்டு அம்மன்களுக்கும் தனித்தனி வழிபாடு நடக்கிறது.
மார்க்கண்டேயருக்கு மீண்டும் ஜீவன் அளித்ததால் சுவாமி " உஜ்ஜீவநாதர் ' எனப்படுகிறார்.எண்ணிய விருப்பங்களை ஈடேற்றுவதால் " கற்பகநாதர் ' என்றும்
இவருக்கு பெயர் உண்டு.சுவாமி சுயம்பு வடிவில் உள்ளார்.50 அடி உயர
மலையில் பாறையில் மிக அருமையாக கட்டப்பட்டுள்ளது இந்த கோயில்
இராவணனுடைய சகோதரர்களில் ஒருவன் கரன்.இவன் இத்தல இறைவனை
வழிபட்டு அருள்பெற்றான்.இக்கோயிலுக்கு மூன்று வாசல்கள் உள்ளன.
இரண்டு தெற்கு நோக்கியும் ஒன்று கிழக்கு நோக்கியும் அமைந்துள்ளது.
தல வரலாறு:-
மிருகண்டு முனிவர் நெடுங்காலம் புத்திரப்பேறு இல்லாமல் இருந்தார்.தனக்கு
ஒரு மகன் வேண்டும் என தவம் இருந்தார்.
சிவபெருமான் அவரிடம்,உனக்கு
ஞானமற்ற அங்கஹீனம் உள்ள ஆனால் நூறு வயது வாழும் மகன் வேண்டுமா?
அல்லது அழகும் அறிவும் மிக்க 16 வயது வரையே ஜீவித்திருக்கும் மகன்
வேண்டுமா என கேட்டார்.
குழம்பிப்போன மிருகண்டு தனக்கு ஞானபுத்திரனே வேண்டும் என்றார்.
மகனும் பிறந்தான்.அவனுக்கு மார்க்கண்டேயன் என பெயரிட்டனர்.
பதினாறு வயதும் வந்தது.எமன் துரத்தினான்.மார்க்கண்டேயர் பல க்ஷேத்திரங்களுக்கும்
சென்று ஓடி ஒளிந்தார் .இறுதியாக உய்யக்கொண்டான் திருமலைக்கு வந்தார்.
தன்னை எமன் துரத்துவதை சொன்னார் . இறைவன் அந்தச்சிறுவனை
பாதுகாத்தார்.இதன்பிறகே அவர் திருவேற்காடு தலத்தில் சிரஞ்சீவி என்னும்
பட்டம் தந்தார்.
சிறப்புகள்:-
நந்திவர்ம பல்லவ மன்னனால் அமைக்கப்பெற்ற கோயில்; இப்பகுதிக்கு 'நந்திவர்ம மங்கலம் ' என்னும் பெயருண்டு.
இங்கே கரன் வழிபட்ட சிவலிங்கம் 'இடர்காத்தார் ' என்னும் பெயருடன் திகழ்கிறது.
இத்தலத்தில் உள்ள தீர்த்தங்களில் குடமுருட்டி என்பது, (தஞ்சை மாவட்டத்தில் ஓடும் ஆறு அல்ல. இது வேறு) சர்ப்பநதி, உய்யக்கொண்டான் நதி என்றும், கல்வெட்டில் வைரமேகவாய்க்கால் என்றும் உள்ளது.
கொடிமரத்தின் முன்பு, மார்க்கண்டேயனைக் காப்பதற்கு - எமனைத் தடுப்பதற்காகக் கருவறை விட்டுநீங்கி வந்து நின்ற, சுவாமியின் - பாதம் உள்ளது.
மூலவர் சுயம்பு மூர்த்தி; சதுர ஆவுடையாரில் அழகாக காட்சித் தருகிறார்.
உய்யக்கொண்டான் மலை உஜ்ஜீவநாதர் கோயில் பாடல் பெற்ற தலங்களுள் ஒன்றாகும். இது தேவாரம் பாடிய நாயன்மார்களான சம்பந்தர், அப்பர், சுந்தரர் ஆகிய மூவரதும் பாடல் பெற்ற சிறப்புப் பெற்றது. நந்திவர்ம பல்லவனால் அமைக்கப்பட்ட இது திருச்சி மாவட்டத்தில் அமைந்துள்ளது. இறைவன் மார்க்கண்டேயரைக் காப்பாற்றுவதாக உறுதியளித்த தலமென்பது தொன்நம்பிக்கை (ஐதிகம்). தேவாரப்பாடல் பெற்ற தலங்களில் காவிரி தென்கரைத் தலங்களில் அமைந்துள்ள நான்காவது சிவத்தலமாகும்.
தல வரலாறு
தற்போது இப்பகுதி மக்கள் வழக்கில் உய்யக்கொண்டான்மலை என்று பெயரிட்டு அழைக்கின்றனர்.
இறைவன் கல்லில் - மலையில் குடியிருப்பதால் கற்குடி என்னும் பெயர் பெற்றது.
இத்தலத்தில்தான் மார்க்கண்டேயரைக் காப்பாற்றுவதாக உறுதியளித்து இறைவன் அருள் புரிந்தார்.
சிறப்புக்கள்
நந்திவர்ம பல்லவ மன்னனால் அமைக்கப்பெற்ற கற்கோயில்
இத்திருக்கோவில் அமைந்த பகுதிக்கு 'நந்திவர்ம மங்கலம் ' என்னும் பெயருண்டு.
இக்கோவிலில் கரன் வழிபட்ட சிவலிங்கம் 'இடர்காத்தார் ' என்னும் பெயருடன் திகழ்கிறது.
கொடிமரத்தின் முன்பு, மார்க்கண்டேயனைக் காப்பதற்கு - எமனைத் தடுப்பதற்காகக் கருவறை விட்டு நீங்கி வந்து நின்ற, சுவாமியின் - பாதம் உள்ளது.
மூலவர் சுயம்பு மூர்த்தி, சதுர ஆவுடையாரில் அழகாக காட்சித் தருகிறார்.
கல்வெட்டு
இத்தலத்தில் உள்ள தீர்த்தங்களில் குடமுருட்டி என்பது, (தஞ்சை மாவட்டத்தில் ஓடும் ஆறு அல்ல. இது வேறு) சர்ப்பநதி, உய்யக்கொண்டான் நதி என்றும், கல்வெட்டில் வைரமேகவாய்க்கால் என்றும் உள்ளது.
இத்திருக்கோவில் கல்வெட்டில் 'நந்திவர்ம மங்கலம்','ராஜாஸ்ரய சதுர்வேதி மங்கலம்' இவ்வூர் என்றும்; இறைவன் 'உய்யக்கொண்டநாதர் ' என்றும் குறிக்கப்படுகிறது.
கி. பி. 18ஆம் நூற்றாண்டில் நடைபெற்ற கர்நாடகப் போரின்போது இக்கோயில் பிரெஞ்சுக்காரரும் ஆங்கிலேயரும் மைசூர்க்காரரும் மாறிமாறித் தங்கியிருப்பதற்குரிய யுத்த அரணாக விளங்கியதாக[1] அறியப்படுகிறது.
திருத்தலப் பாடல்கள்
இத்தலம் பற்றிய தேவாரப் பதிகங்கள் சிலவற்றைக் கீழே காணலாம்:
திருஞான சம்பந்தர் பாடிய பதிகம்
எச்சி லிளமர் ஏம நல்லூர்
இலம்பையங் கோட்டூர் இறையான் சேரி
அச்சிறு பாக்க மளப்பூர் அம்பர்
ஆவடு தண்டுறை யழுந்தூர் ஆறை
கைச்சினங் கற்குடி கச்சூர் ஆலக்
கோயில் கரவீரங் காட்டுப் பள்ளி
கச்சிப் பலதளியும் ஏகம் பத்துங்
கயிலாய நாதனையே காண லாமே.
பாடல் எண் : 9353
கற்குடி மாமலை மேலெழுந்த
கனகக் கொழுந்தினைக் கால்வளையப்
பொற்றிரள் மேருச் சிலைவளைத்த
போர்விடை யாளியைப் போற்றிசைத்து
நற்றமிழ் மாலை புனைந்தருளி
ஞானசம் பந்தர் புலங்கள்ஐ ந்தும்
செற்றவர் மூக்கீச் சரம்பணிந்து
திருச்சிராப் பள்ளிச் சிலம்பணைந்தார். (1/1)
வடந்திகழ் மென்முலை யாளைப் பாகம தாக மதித்துத்
தடந்திரை சேர்புனல் மாதைத் தாழ்சடை வைத்த சதுரர்
இடந்திகழ் முப்புரி நூலர் துன்பமொ டின்பம தெல்லாங்
கடந்தவர் காதலில் வாழுங் கற்குடி மாமலை யாரே.
திருநாவுக்கரசர் பாடிய பதிகம்
மூத்தவனை வானவர்க்கு மூவா மேனி
முதலவனைத் திருவரையின் மூக்கப் பாம்பொன்
றார்த்தவனை அக்கரவம் ஆர மாக
அணிந்தவனைப் பணிந்தடியா ரடைந்த வன்போ
தோலுந்தம்மரை யாடைசுடர்விடு
டேத்தவனை இறுவரையிற் றேனை ஏனோர்க்
கின்னமுதம் அளித்தவனை யிடரை யெல்லாங்
காத்தவனைக் கற்குடியில் விழுமி யானைக்
கற்பகத்தைக் கண்ணாரக் கண்டேன் நானே.
சுந்தரர் பாடிய பதிகம்
விடையா ருங்கொடியாய் வெறியார்மலர்க் கொன்றையினாய்
படையார் வெண்மழுவா பரமாய பரம்பரனே
கடியார் பூம்பொழில்சூழ் திருக்கற்குடி மன்னிநின்ற
அடிகேள் எம்பெருமான் அடியேனையும் அஞ்சலென்னே.
சிலையால் முப்புரங்கள் பொடியாகச் சிதைத்தவனே
மலைமேல் மாமருந்தே மடமாதிடங் கொண்டவனே
கலைசேர் கையினனே திருக்கற்குடி மன்னிநின்ற
அலைசேர் செஞ்சடையாய் அடியேனையும் அஞ்சலென்னே..
கல்வெட்டில் 'நந்திவர்ம மங்கலம்', 'ராஜாஸ்ரய சதுர்வேதி மங்கலம்' இவ்வூர் என்றும்; இறைவன் 'உய்யக்கொண்டநாதர் ' என்றும் குறிக்கப்படுகிறது.
(கி. பி. 18ஆம் நூற்றாண்டில் நடைபெற்ற கர்நாடகப் போரின்போது இக்கோயில் பிரெஞ்சுக்காரரும் ஆங்கிலேயரும் மைசூர்க்காரரும் மாறிமாறித் தங்கியிருப்பதற்குரிய யுத்த அரணாக விளங்கியது என்ற செய்தியை 'கெஜட்' வாயிலாக அறிகிறோம்.)
🙏சிவாயநம🙏
