திருவதரியாச்சரமம் (பத்ரிநாத்)

 🙏  நமஸ்காரம்    

100. திருவதரியாச்சரமம் (பத்ரிநாத்)

மூலவர் - பத்ரி நாராயணன், வதரி நாராயணன்

தாயார் - அரவிந்தவல்லி

உற்சவர் - பத்ரிநாராயணன்

விமானம் - தப்த காஞ்சன விமானம்

தீர்த்தம் - தப்த குண்டம்

நாமாவளி - ஸ்ரீ அரவிந்தவல்லீ ஸமேத ஸ்ரீ பத்ரீ நாராயணாய நமஹ:

வழித்தடம்:

டில்லியிலிருந்து ஹரித்துவார் வழியாக பத்ரிநாத்திற்கு ஏராளமான பேருந்துகள் செல்கின்றன. கல்கத்தாவில் இருந்து வருபவர்கள் கல்கத்தா - டேராடூன் இரயில் மார்க்கத்தில் அமைந்துள்ள ஹரித்துவார் இரயில் நிலையத்தில் இறங்கி, அங்கிருந்து சுமார் 300 கி.மீ தொலைவில் பேருந்தில் பயணம் செய்து பத்ரிநாத்தை அடையலாம்.

பாசுரம்:

வண்டு தண்டே னுண்டு வாழும் வதரி நெடுமாலை
கண்டல் வேலி மங்கை வேந்தன் கலிய னொலி மாலை
கொண்டு தொண்டர் பாடி யாடக் கூடிடில் நீள் விசும்பில்
அண்டமல்லால் மற்ற வர்க்கோர் ஆட்சி யறியோமே 

- பெரிய திருமொழி (977)

 பெரியாழ்வாரும், திருமங்கையாழ்வாரும் 22 பாசுரங்களில் இப்பெருமானை மங்களாசாசனம் செய்துள்ளார்கள்.

பாசுரம் பதவுரை:

வண்டு - வண்டுகளானவை

தண்  தேன் உண்டு வாழும் வதரி - குளிர்ந்த தேனைப் பருகிக் களித்து வாழுமிடமான ஸ்ரீபதரியில் எழுந்தருளியிருக்கிற
நெடு மாலை - ஸர்வேச்ரன் விஷயமாக,
கண்டல் வேலி மங்கை வேந்தன் கலியன் - தாழைகளை வேலியாகக் கொண்ட திருமங்கைக்குத் தலைவரான ஆழ்வார்
ஒலி - அருளிச்செய்த
மாலை கொண்டு - இந்தச் சொல் மாலையைக் கொண்டு
தொண்டர் - பக்திமான்கள்
பாடி ஆட கூடிடில் - பாடிக்கொண்டும் ஆடிக்கொண்டும் அநுபவிக்கப் பெற்றால்
அவர்க்கு - அப்படிப்பட்ட மஹான்களுக்கு
நீள் விசும்பில் அண்டம் அல்லால் - பரமகாசத்திலேயுள்ள பரம பதத்தைத் தவிர
மற்று ஓர் ஆட்சி அறியோம் - வேறொரு லோகமாளப் பெறுதல் இல்லை.

ஸ்தல வரலாறு:

எம்பெருமான் தானாக சுயம்புவாக எழுந்தருளியிருக்கும் இடமாகவும், மோட்சத்தைத் தரத்தக்க ஸ்தலங்களில் ஒன்றாகவும் அமைந்துள்ள இத்தலம். இங்குதான் பெருமாள் தாமே குருவாகவும், சீடனாகவும் இருந்து கொண்டு திருமந்திர உபதேசத்தை செய்தருளினான். ஓம் நமோ நாராயணாய என்ற மந்திரத்தை நாராயணன் என்ற திருநாமத்துடனே வந்து உலகத்திற்கு உகந்தருளின இடம் இந்த தலமாகும். திருமந்திரம் பகவான் மூலமாகவே வெளியான இடம். எம்பெருமானைச் சரண்புகுந்து மோட்சம்புகும் பக்தர்கட்கு மிக எளிய வழியான திருமந்திர உபதேசத்தை போதித்துத் தன்னை காட்டிக் கொடுத்த தலம். 

மகாலெட்சுமிக்கு மிகவும் பிடித்தமான பத்ரி (இலந்தை) எனப்படும் மரத்தின் கீழே அமர்ந்ததால் பத்ரிகா-ஆஸ்ரமம் - பத்திரகாச்ரமம் ஆயிற்றென்பர். உபதேசம் செய்வதற்கு ஆஸ்ரமம் அவசியமன்றோ. எம்பெருமான் திருமந்திரத்தை உபதேசிக்க இந்த இடத்தை ஒரு ஆஸ்ரமமாக தேர்ந்தெடுத்ததால் பத்திரகாஸ்ரமம் ஆயிற்றென்பர். இங்கு கோயிலைச் சுற்றிலும் பனிமலைகள் உள்ளன. இதற்கு எதிர்புறம் அமைந்துள்ள நீலகண்ட பர்வதம் காண்பதற்குப் பேரெழில் பொலிந்ததாகும்.

சிறப்பு:

108 திவ்ய தேசங்களிலேயே இங்குதான் பகவான் ஆச்சாரியன் ரூபத்தில் எழுந்தருளிய ஸ்தலமாகும். மற்றெல்லா ஸ்தலங்களிலும் அவனருள் காட்டி அவனது பலத்தைக் காட்டி நின்றாலும் இங்கு மட்டும்தான் ஆச்சார்ய திருக்கோலத்தில் திகழ்கின்றான். பக்தர்களுக்காகவும் இவ்வுலகிற்காகவும், பிராட்டிக்காகவும், பிற ஸ்தலங்களில் தன்னை வெளிக்காட்டிய எம்பெருமான் திருமந்திரத்தை உபதேசம் செய்ய தன்னை ஆச்சார்யனாக வெளிப்படுத்திய ஸ்தலம் இது ஒன்றுதான். எனவே தான் இங்கு தனது இடது கைகளை யோக முத்திரையாகக் கொண்டு ஒரு தபஸ்வியின் வடிவில் இலந்தை மரத்தடியில் பத்மாசனத்தில் எழுந்தருளியுள்ளார்.

பிரம்மதேவரின் ஐந்து தலையில் ஒன்றை கிள்ளிய சிவபெருமானுக்கு, பிரம்மஹத்தி தோஷம் காரணமாக பிரம்மாவின் தலை சிவபெருமானின் கையை விட்டு கீழே விழவில்லை. அவர் விஷ்ணுவிடம் சென்று கேட்க, பூலோகத்தில் பதிவிரதை ஒருவரிடம் பிச்சை ஏற்றால் "பிரம்மஹத்தி தோஷம்" நீங்கி விடும் என்று உபாயம் கூறினார். சிவபெருமானும் கைலாயத்தை விட்டு பூலோகத்திற்கு இறங்கி வந்தார். அச்சமயத்தில் பத்ரி காஸ்ரமத்தில் மானிடனுக்குத் தாரக மந்திரத்தை ஸ்ரீமந்நாராயணர் உபதேசித்துக் கொண்டிருந்தார். அச்சமயம் நாராயணணுக்குப் பணிவிடைகள் செய்து கொண்டிருந்த மகாலட்சுமியிடம் சிவபெருமான் பிச்சை கேட்க மகாலட்சுமி பிச்சையிட்டதும், சிவபெருமான் கையிலிருந்த பிரம்மதேவரின் தலை இங்கே விழுந்து விட்டது. இதைத் தான் "பிரம்ம கபாலம்" என்பர். எனவே, இங்கு பித்ருக்களுக்கு பிண்டம் இடுவது சிறப்பு. நமக்கு நாமே இங்கு ஆத்ம பிண்டமும் இட்டுக் கொள்ளலாம்.

இங்கு பெருமாளுக்கு நடைபெறும் சகல விதமான பூஜைகளும் (திருமஞ்சனம்) திருவாராதனம், சாத்துமரை மக்களுக்கு எதிரிலேயே நடைபெறுகின்றன. திரைபோடுவது இல்லை. இங்கு நடைபெறும் பூஜாமுறைகளை பக்தர்கள் நேருக்கு நேர் நின்று காணலாம்.

இத்தலம் 6 மாதங்களுக்கு மட்டுமே பக்தர்களின் தரிசனத்திற்குத் திறந்துவிடப்படும். அதாவது குளிர் காலமான 6 மாதத்தில் விடாது பனிபெய்து இத்தலத்தையே மூடுமளவிற்கு வருவதால் குளிர்காலமான 6 மாதத்திற்கு இத்தலம் மூடப்பட்டு சித்திரை மாதம் சித்ரா பௌர்ணமியன்று மீண்டும் திறக்கப்படும். பூட்டப்பட்ட 6 மாதத்தில் தினந்தோறும் இரவில் தேவர்கள் இங்கு வந்து பாரிஜாத மலர்களால் எம்பெருமானை அர்ச்சிப்பதாகக் கூறுவர். அதாவது பனிக்காலத்தில் கோவிலை அடைத்து விட்டு 6 மாதங்கழித்து திறந்து பார்க்கும்போது முதல்நாள் இரவில் பெருமாளுக்குச் சூட்டிய மலர் மாலைகள் மறுநாள் காலையில் பார்த்தால் எந்த அளவுக்கு லேசாக வாடியிருக்குமோ அந்த அளவிற்குத்தான் மலர்களின் வாட்டம் இருக்குமாம். அதனால் தான் மூடப்பட்ட 6 மாத காலமும் தேவர்கள் வழிபட்டுச் செல்கின்றனர் என்னும் ஐதீஹம் உண்டானது. மே மற்றும் ஜூன் மாதங்களே இந்த யாத்திரைக்கு மிகவும் உகந்ததாகும்.

இங்கு இரவில் பெருமாளுக்கு சாந்தி பஞ்சகம் என்னும் பூஜை நடைபெறும். இந்த பூஜைக்குரிய மந்திரங்களை வடநாட்டு பிராம்மணரே ஓதுவர். அப்போது எம்பெருமானின் ஆடைகளையும், மாலைகளையும் கலைவர். இந்த நிகழ்ச்சிக்கு கேரள தேசத்து நம்பூதிரிகளே தலைமை அர்ச்சகராக இருந்து செயல்படுவர். இவ்வாறு எம்பெருமானின் ஆடைகள் மற்றும் மாலைகளை களைந்துவிட்டு சிறிய துண்டு ஒன்றை அணிவிப்பர். இந்நிகழ்ச்சிக்கு கீதகோவிந்தம் என்று பெயர். மிகவும் நல்லொழுக்கம் வாய்க்கப் பெற்றவர்களும், சாஸ்திரங்களிலும், சமஸ்கிருதத்திலும் மிக்க தேர்ச்சி பெற்ற பிராம்மணர்களே இந்த நிகழ்ச்சிக்கு குழுவினராக நியமிக்கப்படுவர். இந்த பூஜை நடைபெறும் சமயம் பெருமாளின் பக்கத்தில் அமர்ந்தே பூஜை நிகழ்ச்சிகளை பக்தர்கள் தரிசிக்க முடியும். இதற்குத் தனிக் கட்டணம் உண்டு.

இங்கு அமைந்துள்ள வசுதரா என்ற பனிமலையில் நீர்வீழ்ச்சி ஒன்று உள்ளது. இந்த நீர் வீழ்ச்சியின் பனித்திவலைகள் மிகவும் புனிதம் வாய்ந்தவை என்றும், இவைகள் மேனியில் படுதலால் புனிதம் உண்டாகிறதென்றும் நம்பிக்கை. இங்கு யாத்திரை செல்வோர் இந்த திவலைகளில் குளித்து வருவர்.

பத்ரிநாத் செல்லும் வழியில் ஹனுமான் கட்டி என்ற ஓர் இடம் உள்ளது. இங்கு பீமனும் அனுமனும் சண்டையிட்டதாகக் கூறுவர். ஹனுமான் கட்டியைத் தாண்டி சுமார் 4 கி.மீ. சென்றதும் பத்ரிகாஸ்ரமம் காட்சி தரும்.

இந்த திருத்தலத்தில் ஐந்து முக்கிய தீர்த்தங்கள் உள்ளன. "தப்த குண்டம், நாரத குண்டம், கூர்ம தாரா, பிரகலாதாரா, ரிஷிகங்கர்" ஆகியவையே இத்தலத்தின் ஐந்து தீர்த்தங்கள். இதில் கூர்மதாரா தீர்த்தம் அன்னதானத்திற்கு பயன் படுத்தப்படுகிறது. இங்குள்ள தப்த குண்டத்தில் நீராடிய பிறகே கோவிலுக்குள் செல்ல வேண்டும். இங்கு ஓடும் கங்கை நதியில் குளிப்பது இயலாத காரியம். எனவே, தப்த குண்டத்தில் பக்தர்கள் நீராடுகிறார்கள். சப்த புரிகளில் ஒன்றாகக் கருதப்படும் இத்தலத்தின் அருகில் "தப்த குண்டம்" எனறழைக்கப்படும், "வெந்நீர் ஊற்று" ஒன்று உள்ளது. குளிர் நிறைந்த பிரதேசத்தில் வெந்நீர் ஊற்று வருகிற இந்த அதிசய மாற்றம் எப்படி நடக்கிறது? என்பதை இதுவரை யாராலும் அறியப்படவில்லை. 

கங்கை நதியானது சிவபெருமானது திருமுடியில் இருந்து பெருகி வருவதாகப் புராணங்கள் கூறுகின்றன. அக்னி சொரூபமாக விளங்கும் இறைவன் சிவபெருமான் மீதிருந்து வருவதால் வெந்நீராக வருவதாகவும் கூறப்படுகிறது. தப்த குண்டத்தில் நீராடிவிட்டு சில படிகள் ஏறிச் சென்றதும் கருடாழ்வார் நமக்கு காட்சி தருகிறார். கருடாழ்வாரைத் தரிசித்துவிட்டுத் தான் பத்ரிநாராயணன் ஆலயத்திற்குச் செல்ல வேண்டும். இங்கு பத்ரி நாராயணன், கருடாழ்வார்,

நாரதர், நாராயணன் முதலானோர் மிக்க பேரெழில் பொங்க வீற்றிருக்கின்றனர். இங்கு பெருமாள் சாளக்கிராம மூர்த்தியாக (ஸாளக்கிராமச் சிலையாக) எழுந்தருளியுள்ளார்.

உபன்யாசம் வீடியோ இணைப்பு:

ஸ்வாமி உ.வே. வேளுக்குடி கிருஷ்ணன் அவர்களால் உபன்யாசம் செய்த திவ்யதேச வீடியோ இணைப்பு கீழே கொடுக்கப் பட்டிருக்கிறது.

https://youtu.be/EHjpp0uwb1w

ஃபேஸ்புக் பேஜ் இணைப்பு:

அடியேனுடைய ஃபேஸ்புக் பேஜ் இணைப்பை கீழே கொடுக்கப்பட்டிருக்கிறது.

https://www.facebook.com/102047988262304/posts/140686687731767/?sfnsn=wiwspmo&extid=ZdySqkPfauxXE7vs