108 திவ்யதேசங்கள் - பதிவு 10 திருபுள்ளம்பூதங்குடி வல்வில் ராமன் திருக்கோவில்

 🌺🌺 108 திவ்யதேசங்கள் - பதிவு 10 🌺🌺

அருள்மிகு வல்வில் ராமன் திருக்கோவில்:-

திருபுள்ளம்பூதங்குடி :

மூலவர்: வல்வில்ராமன்

தாயார்: ஹேமாம்புஜவல்லி, பொற்றாமரையாள்

உற்சவர்: வல்வில்ராமன்

கோலம்: சயனத்திருக்கோலம் 

திசை: கிழக்கு

விமானம்: சோபன விமானம்

தீர்த்தம்: கிருத்ர தீர்த்தம்

மங்களாசாசனம்: திருமங்கையாழ்வார்

நாமாவளி: ஸ்ரீ பொற்றாமரையாள் ஸமேத ஸ்ரீ வல்வில்ராமாய நமஹ

ஊர்: புள்ளம்பூதங்குடி.

🌺🌺 தல வரலாறு:-

தர்மத்தை நிலைநாட்ட பூமியில் அவதரித்த அவதாரப் புருஷரான அருள்மிகு இராமபிரான் சயனக் கோலத்தில் காட்சி தரும் ஒரே திவ்யதேசம். "புள்" என்றால் பறவை, "பூத"என்றால் உடல்.

இராமாயண காவியத்தில், இராவணன் சீதையை கவர்ந்து வான்வழியே சென்றபோது, கழுகுகளின் அரசனான ஜடாயு தன்னுடைய பிரம்மாண்ட இறக்கையை கொண்டு இராவணனிடம் போர் செய்தது.

அப்போது இராவணன் இறக்கைகளை வெட்டி வீழ்த்தினான். ஜடாயு "ராமா ராமா" என முனகியபடி குற்றுயிராகக் கிடந்தார். அந்த வழியில் வந்த ராமன், லக்ஷ்மணன் முனகல் சத்தம் கேட்டு அருகில் சென்று பார்த்தனர். 

அப்போது ஜடாயு இராவணன் சீதையை கவர்ந்து சென்ற விசயத்தைக் கூறிவிட்டு உயிர் துறந்தார். இதைக் கண்டு வருந்திய ராமன் ஈமக்கிரியை செய்ய எண்ணிணார். ஆனால், அதை மனைவி அருகில் இருக்கும் போது செய்ய வேண்டும் என்பது விதி.

சீதை இல்லை என்பதால் மானசீகமாக மனதால் நினைத்தார். உடனே, உதவிபுரிய ராமனுக்கு மறு அம்சமாகிய பூமாதேவி காட்சியளித்தாள். அவளோடு சேர்ந்து ராமன் ஜடாயுவிற்கு வேண்டிய இறுதிசடங்குகள் அனைத்தையும் செய்து முடித்தார். 

இந்த நிகழ்வை நினைவு கூறும் வகையில் "திருப்புள்ளம் பூதங்குடி" எனும் திவ்யதேசம் அமைந்துள்ளது. 

🌺🌺 அற்புத காட்சி :-

பிற்காலத்தில், கிருத்ர ராஜன் என்ற மன்னன், இவ்வூரில் ஜடாயுவிற்கு கர்ம காரியங்களை செய்து மோட்சம் அளித்த இராமபிரானை சயனகோலத்தில் தரிசிக்க விரும்பி கடும் தவம் புரிந்தான்.

மன்னனின் தவத்திற்கு மனமிறங்கிய "அருள்மிகு நாராயணன்" "வல்வில் ராமன்" என்ற திருநாமத்தோடு காட்சி தந்தார். 

ஜடாயுவிற்கு மோட்சம் அளித்த ராமபிரான் என்பதால், இத்தல இராமபிரானை வழிபட்டால் பாவங்களை போக்கி மோட்சம் அளிப்பதாக நம்பப்படுகிறது.

🌺🌺 சிறப்புகள் :-

அருள்மிகு இராமபிரான் கிடந்த கோலத்தில் காட்சி தரும் திவ்யதேசம். இவர் நான்கு கரங்களுடன் சங்கு, சக்கரதாரியாக காட்சி தருகிறார்.

பெருமாளின் நவக்கிரக தலங்களில் இது புதன் தலமாக விளங்கும் திவ்யதேசம். திருமகள் தாயார் பொற்றாமரையாள் என்ற திருநாமத்தில் காட்சி தரும் திவ்யதேசம்.

திருமங்கையாழ்வார் 10 பாசுரம் பாடியருளிய திவ்யதேசம்.

🌺🌺 வழித்தடம் :-

சுவாமிமலை - திருவைகாவூர் கிராமம் செல்லும் சாலையில் 3 கி.மீ தொலைவில் அமைந்துள்ள திவ்யதேசம். 

அருள்மிகு வல்வில்ராமர் திருவடிகளே சரணம்.

அருள்மிகு பொற்றாமரையாள் திருவடிகளே சரணம். 

🌺🌺 நாளைய பதிவில் :-

அருள்மிகு ஆண்டளக்கும் ஐயன் திருக்கோவில் - திருஆதனூர் திருத்தலத்தை தரிசிப்போம்.