108 திவ்யதேசங்கள் - பதிவு 9 கஜேந்திர வரதன் திருக்கோவில்

 🌺🌺 108 திவ்யதேசங்கள் - பதிவு 9 🌺🌺

அருள்மிகு கஜேந்திர வரதன் திருக்கோவில் :-

திருக்கவித்தலம் என்ற கபிஸ்தலம்.

பஞ்ச கிருஷ்ண தலங்களில் இத்தலம் ஐந்தாவது தலம்.

மூலவர்: கஜேந்திர வரதப் பெருமாள்

யார்: ரமாமணி வல்லி, பொற்றாமரையாள்

உற்சவர்: கஜேந்திரவரதன்

கோலம்: சயனத் திருக்கோலம்

திசை: கிழக்கு

விமானம்: ககநாக்ருதி விமானம்

தலவிருட்சம்: மகிழம்பூ மரம்

தீர்த்தம்: கஜேந்திர புட்கைரணி, கபில தீர்த்தம்

மங்களாசாசனம்: திருமழிசை ஆழ்வார்

நாமாவளி: ஸ்ரீ ரமாமணி வல்லீ ஸமேத ஸ்ரீ கஜேந்த்ரவரதாய நமஹ

ஊர்: கபிஸ்தலம்

🌺 தல வரலாறு:-

‘கஜேந்திர மோட்சம்’ கதை தெரிந்திருக்கும். இந்த புராண சம்பவத்துக்குப் பிறகுதான் ‘வைகுண்டம் இங்கிருந்து எவ்வளவு தூரம்?’ என்ற அப்பாவித்தனமான கேள்வியும் ‘கூப்பிடு தூரம்தான்’ என்ற தத்துவார்த்தமான பதிலும் புழக்கத்துக்கு வந்தன. அதாவது, ஒரு பக்தனின் அழைப்பு ஒன்று போதும், பகவான் ஓடோடி வந்து அவனுக்கு அருள் புரிவார் என்பதுதான் இந்தக் கேள்வி-பதிலின் உள்ளீடு. ‘நீ என்னை நோக்கி ஒரு அடி எடுத்து வைத்தால், நான் உன்னை நோக்கி பத்தடி எடுத்து வைப்பேன்’ என்ற பேரருளின் திருக்கருணை அது. 

🌺🌺 இந்திரத்யும்னன் துர்வாசரிடம் சாபம் பெறுதல் :-

இந்திரத்யும்னன், பாண்டிய நாட்டு மன்னன். நிலையாமையை நன்கு உணர்ந்திருந்த அவன், உளன் என்பதற்கும் இலன் என்பதற்கும் காரணமான பரந்தாமனை உளமாறத் தொழுது வந்தான். நம்முடைய ஆறு மாதம் என்பது தேவர்களுக்கு ஒரு பகல் அல்லது இரவுப் பொழுது என்ற கால அளவை, தன் பக்தியால் உணர்ந்தவன் இந்திரத்யும்னன். அதாவது, திருமால் பக்தியில் அவன் ஆழ்ந்துவிட்டானானால் அவனுக்கு நேரம், காலம் தெரியாது; நேர் எதிரே நிற்பவரும் தெரியாது. தன்னை மறந்த ஏகாந்த நிலையில் திளைத்துவிடுவான். அந்த மன்னன் அரண்மனைக்கு துர்வாச முனிவர் வந்தார். 

தன் இயல்புப்படி, யாரையும் எதையும் கவனிக்காத மன்னன் இறை உணர்வில் அமிழ்ந்திருந்தான். இதை கவனித்த முனிவருக்குக் கோபம் மூக்கின் மேல் வந்தமர்ந்தது. அவனுக்கு ஒரு வாய்ப்பு கொடுக்கும் வகையில் அவன் முன்னே போய் நின்றார். சித்தமெல்லாம் ஸ்ரீதரன் மயமாக, உன்மத்த நிலையிலிருந்த இந்திரத்யும்னன் அப்போதும் அவரை கவனிக்கவில்லை. அவ்வளவுதான், துர்வாசர் கோபம் கொண்டு அவனை ஒரு யானையாக மாறும்படி சபித்துவிட்டார். துர்வாசர் போன்ற முனிவர்களின் சாபம், எதிர்கால நன்மைகளையும் பிறர் நலன்களையும் உத்தேசித்தே இடப்படுகிறது. 

சபிக்கப்பட்டவர் அப்போதைக்கும், சாபம் நிவர்த்தி யாகும் காலம்வரையிலும் துன்புறுவார் என்றாலும், முனிவரின் உயரிய நோக்கம் நிறைவேற, இந்த அவஸ்தையைப் பொறுத்துக்கொள்வதும் பெரிய தர்மம்தான்! அதனால்தான் விஸ்வாமித்திரர் இந்திரத்யும்னன் ஒரு யானையாக மாறித் திரியும்படி சபித்தார். முனிவரின் கோபத்துக்கு ஆளானதால் வருத்தப்பட்ட இந்திரத்யும்னன், தான் எப்பிறவி எடுத்தாலும் பரந்தாமனைத் தொழுதபடியே வாழவேண்டும் என்று அவரிடம் வேண்டிக்கொண்டான். விஸ்வாமித்திரர் கொஞ்சம் அதிர்ந்துதான் போனார். சாபத்துக்கு என்ன விமோசனம் என்று கேட்பான் என்று நினைத்தால், அந்தத் துன்பத்திலும் பகவானை நினைக்கும் பேறு வேண்டும் என்று கேட்கிறானே என்று அதிசயித்தார். 

அவ்வாறே அவன் பெறுவான் என்று உறுதியளித்த முனிவர், ஒரு முதலையால் உன் சாபம் விலகும்; அப்போது பெருமாளே நேரில் உனக்கு தரிசனம் தருவார் என்றார். அதைக் கேட்டுப் பெரிதும் மகிழ்ந்தான் இந்திரத்யும்னன். இத்தனை நாள் தான் கொண்டிருந்த தவநிலை பக்திக்கு அடுத்த பிறவியில்தான் தனக்கு பகவான் தரிசனமா? பரவாயில்லை, அப்போதாவது அந்த அற்புதப் பேறு கிடைக்கிறதே என்று நெகிழ்ந்தான். 

🌺🌺 அகத்திய மகரிசியிடம் அரக்கனின் விளையாட்டு :-

முனிவரின் சாபத்தால் விளையப்போகும் இன்னொரு நன்மை, ஹுஹு என்ற அரக்கனுக்கும் விமோசனம் கிடைப்பதுதான். குளத்தில் நீருக்கடியில் மூச்சடக்கிக் காத்திருந்து, அந்தக் குளத்தில் குளிக்க வருபவர்களின் கால்களை அவர்கள் அறியாமல் பற்றி இழுத்து அவர்களைத் திக்குமுக்காடவைத்து, அதைப் பார்த்து மகிழ்வான், ஹுஹு.

இதே விளையாட்டை அவன் அகத்திய முனிவரிடம் நிகழ்த்தப் போக, அவர் சினந்து ‘நீருக்குள் ஒரு முதலைபோல அதிர்ச்சி விளையாட்டு நடத்திய நீ, இந்த நீருக்குள்ளேயே வாழும் முதலையாக மாறுவாயாகா’ என்று சபித்துவிட்டார். ஹுஹு விமோசனம் வேண்டினான். ‘நீ வாழும் குளத்தில் கஜேந்திரன் என்ற யானை வரும். அது, முற்பிறவியிலும் சரி, இப்போதும் சரி, பரந்தாமன் பக்தியில் ஆழ்ந்து தோய்ந்தது. அதைப் பற்றினால் உன் சாபம் விலகும்’ என்று வழி காட்டினார். ஹுஹு முதலையாகி நீருக்குள் கஜேந்திரனுக்காகக் காத்திருந்தான். யானையாக மாறிய இந்திரத்யும்னன், அந்த நிலையிலும் பரந்தாமனையே உளமாறப் போற்றிவந்தான். 

🌺🌺 கஜேந்திர மோட்சம் :-

பக்கத்திலுள்ள நீர்நிலைகளிலிருந்து அன்றலர்ந்த தாமரை மலர்களைக் கொய்து வந்து பெருமாள் கோயில்களுக்குச் சென்று அவருக்கு சமர்ப்பித்து சந்தோஷமடைந்தான். இந்த வழக்கத்தில் ஒருநாள் ஹுஹு முதலை வாழ்ந்துவந்த குளத்துக்குள் இறங்கினான். அதற்காகவே காத்திருந்த ஹுஹு, ‘அதோ, கஜேந்திரன் வந்துவிட்டார்’என்று உற்சாகம் கொண்டான். பரமனின் பக்தி நெறிகொண்டு ஒழுகும் இந்தப் பாதங்களை நமஸ்கரிக்க வேண்டும், தொட்டு வணங்க வேண்டும் என்ற ஆவலில் அந்த பாதத்தை நீண்ட தன் வாயால் தொட்டான்.

ஹுஹுவின் நோக்கம் அறியாத இந்திரத்யும்னன், ஒரு யானையின் இயல்பில் தான் தாக்கப்படுகிறோம் என்று நினைத்து அந்தக் குளத்தை விட்டு அகல முயன்றான்.

இதைக் கண்டு திடுக்கிட்ட ஹுஹு "ஐயனே என்னை விட்டுப் போய்விடாதீர்கள்; உங்கள் பாதங்களைப் பற்றி வணங்கவே நான் முயற்சிக்கிறேன். என்னைக் கண்டு பயப்படாதீர்கள். உடல், பொருள், ஆவி அனைத்திலும் அந்த நாராயணனையே ஸ்வீகரித்திருக்கும் உங்கள் பாதம் பணிவது என் பேறு. அதற்கு மறுப்பு சொல்லாதீர்கள்’’ என்று மனதார வேண்டியபடி, மேலும் நெருங்கியது. ஆனால், இந்திரத்யும்னன் பயந்து மேலும் விலக, வேறு வழியில்லாமல் ஹுஹு பளிச்சென்று தன் வாய் திறந்து அந்தப் பாதத்தைப் பற்றியது. 

அதேசமயம், தன் சாபவிமோசன கட்டம் இதுதான் என்பதை உணர்ந்த இந்திரத்யும்னன், முனிவர் சொன்னதுபோல பரந்தாமன் தனக்கு இப்போது தரிசனம் நல்க வேண்டுமே என்று வானோக்கிப் பார்த்தான். வானம் நிர்மலமாக இருந்தது. முனிவர் சொன்னது பொய்த்துவிடுமோ, மோட்சம் கிட்டாது போய்விடுமோ என்று பதறினான். ‘‘ஆதிமூலமே, என்னை ஆட்கொள்ள மாட்டாயா..?’’ என்று கண்களில் நீர் பெருக, தும்பிக்கையை நீள உயர்த்தி இறைஞ்சினான். இறை தரிசனத்தைக் காட்டிலும், இறையடியார் பாதம் பற்றுவதே சிறந்த பக்தி என்றுணர்ந்த ஹுஹு, தன் கூரிய பற்களால் மேலும் இறுக இந்திரத்யும்னனின் பாதத்தைப் பற்றினான். 

பளீரென வானில் ஒரு பேரொளி தோன்றியது. கருடனின் ‘கீய்க்’. த்வனியும் வானத்தையே மறைப்பது போன்ற பிரமாண்ட சிறகுகளின் வீச்சும் கட்டியம் கூற, கோடி சூர்யப் பிரகாசராக பரம்பொருள் அந்த கருடனில் ஆரோகணித்திருந்தார். அவரது வலது கரத்தில் சுழன்றபடி மின்னிய சக்கரம் முதலையின் கழுத்தைக் கூறுபோட, யானையின் பாதம், முதலையின் வாயோடு விடுபட்டது. பளிச்சென்று யானையும் முதலையும் மறைந்து இந்திரத்யும்னனும் ஹுஹுவும் சுய உரு பெற்று பாற்கடல் நாதனை வணங்கி நின்றார்கள். இருவரையும் பகவான் அரவணைத்துக்கொண்டு அவர்களுக்கு மோட்சப்பேறு அளித்தார். மூலவர் "கஜேந்திர வரதர்" ஆனார். இரண்டு விலங்குகளுக்கு நாராயணன் தரிசனம் கொடுத்த ஒரே திவ்யதேசம் "கவித்தலம்" தான்.

🌺🌺 மங்களாசாசனம் :-

கூற்றமும் சாரா கொடுவினையும் சாரா, தீ
மாற்றமும் சாரா வகை அறிந்தேன் ஆற்றங்
கரை கிடக்கும் கண்ணன் கடல்கிடக்கும் மாயன்
உரை கிடக்கும் உள்ளத்து எனக்கு

- திருமழிசை ஆழ்வார்.

🌺🌺 ஆஞ்சநேயருக்கு காட்சி கொடுத்த ராமர் :-

தலத்தின் பெயரும் ஒரு விலங்காலேயே உருவானதுதான். அது என்ன விவரம்? சொல்லின் செல்வனான ஆஞ்சநேயர் இந்தத் தலத்துக்கு வந்தபோது கஜேந்திர வரதர், அவருக்கு ராமனாகவே காட்சியளித்தார். இப்படி ஒரு கபி (குரங்கு) வந்து தரிசித்த தலம் என்பதாலேயே கபித்தலம் என்று வழங்கப்பட்டது. தன் நாயகன் ராமனைப் பட்டாபிஷேக கோலத்தில் ஆஞ்சநேயர் காண விரும்பியதால்தான் இங்குள்ள உற்சவர் கையில் செங்கோலுடன் விளங்குகிறார் என்றும் ஒரு நயமான விளக்கம் கிடைத்தது. இந்த ஆஞ்சநேயர் தவக்கோலத்தில் காட்சியளிக்கிறார். 

அவரருகே கஜேந்திர மோட்ச காட்சி, சுதைச் சிற்பமாக விளங்குகிறது. கஜேந்திரனோடு முதலைக்கும் மோட்சம் அளித்த சக்கரத்தாழ்வாரின் அழகுமிகு சிற்பம் தனிச் சந்நதியில் கொலுவிருக்கிறது. மூலக் க ருவறையில் எம்பெருமான் பாம்பணையில் துயில் கொண்டிருக்கிறார். (வருடத்தில் ஒருநாள் கஜேந்திர தீர்த்தத்துக்கு பெருமாள் எழுந்தருளி, தீர்த்தம ருளி, கஜேந்திர மோட்ச சம்பவத்தை நினைவூட்டி வருகிறார்) ஸ்ரீதேவி- பூதேவி இருவரும் அவருக்குப் பக்கவாட்டில் அமர்ந்திருக்கிறார்கள்.

🌺🌺 சிறப்புகள் :-

கஜேந்திர மோட்சம் நிகழ்ந்த திவ்யதேசம். திருமகள் தாயார் பொற்றாமரையாள் என்ற திருநாமத்தில் காட்சி தரும் திவ்யதேசம்.

ஆழ்வார் கண்ணனாக உருவகம் செய்து பாடிய திவ்யதேசம்.

🌺🌺 வழித்தடம் :-

கும்பகோணத்தில் இருநேது 8 கீ.மீ தொலைவிலும், சுவாமிமலையிலிருந்து 3 கி.மீ தொலைவிலும் இத்திருக்கோவில் அமைந்துள்ளது.

அருள்மிகு கஜேந்திரவரதர் திருவடிகளே சரணம்.

அருள்மிகு பொற்றாமரையாள் தாயார் திருவடிகளே சரணம்.

🌺🌺 நாளைய பதிவில் :-

அருள்மிகு வல்வில்ராமன் திருக்கோவில் - திருபுள்ளம்பூதங்குடி திருக்கோவிலைத் தரிசிக்கலாம்.

"ஓம்நமோ நாராயணாய நம:"