108 திவ்யதேசங்கள் - பதிவு 11 ஆதனூர் ஆண்டளக்கும் ஐயன் திருக்கோவில்

 🌺🌺 108 திவ்யதேசங்கள் - பதிவு 11 🌺🌺

அருள்மிகு ஆண்டளக்கும் ஐயன் திருக்கோவில் :-

திருஆதனூர்.

மூலவர்: ஆண்டளக்கும் ஐயன்

தாயார்: அரங்கநாயகி, பார்கவி, மநேதிர பீடேஸ்வரி, கமலவாசினி

உற்சவர்: அழகிய மணவாளன்

கோலம்: சயனத் திருக்கோலம்

திசை: கிழக்கு

விமானம்: பிரணவ விமானம்

தீர்த்தம்: சூரிய புட்கரணி, சந்திர தீர்த்தம்

மங்களாசாசனம்: திருமங்கையாழ்வார்

நாமாவளி: ஸ்ரீ ரங்கநாயகீ ஸமேத ஸ்ரீ ஆண்டளக்குமையன் ஸ்வாமிநே நம:

ஊர்: ஆதனூர்

🌺🌺 பெயர்க் காரணம்:-

பரந்தாமனாகிய இறைவன் வீற்றிருக்கும் பாற்கடலை கடைந்த போது அதிலிருந்து வெளிப்பட்ட காமதேனுவாகிய பசுவிற்கு "ஆ" என்பது பெயராகும்.

ஆவிற்கு காட்சி தந்த தலமாதலால், இவ்வூர் 'திருவாதனூர்' எனப் பெயர் பெற்றது.

🌺🌺 தல வரலாறு :-

பாற்கடலில் சயனித்திருந்த பெருமாளைத் தரிசிக்க வந்த பிருகு முனிவருக்கு மகாலட்சுமி மாலை ஒன்றைத் தருகிறார். பிருகு முனிவர் அம்மாலையை இந்திரனுக்குத் தர அவனோ அதை தனது யானை ஐராவதித்தின் மீது வைக்க யானை அம்மாலையைத் தூக்கி வீசியெறிந்து விடுகிறது. பிருகு முனிவர் கோபங்கொண்டு இந்திரனை பூமியில் மானுடனாகப் பிறப்பான் எனச் சபித்து விடுகிறார்.

பின் அவரது ஆலோசனைப்படி, தனது சாபம் நீங்க மகாலட்சுமியை இந்திரன் வேண்ட, பூலோகத்தில் பிருகு முனிவரின் மகளாகத் தான் அவதரிக்கப் போவதாகவும், அந்த அவதாரத்தில் பெருமாளுடன் தனக்கு நடக்கும் திருமணத்தைக் காணும்போது இந்திரனின் சாபம் நீங்கும் எனவும் மகாலட்சுமி கூறுகிறாள். பிருகு முனிவரின் மகளாக பிறந்து வளர்ந்த மகாலட்சுமியின் திருமணக் கோலத்தை இத்தலத்தில் காணும் இந்திரன் சாபம் நீங்கப்பெற்றான் என மரபுவழி தலவரலாறு கூறுகிறது.

🌺🌺 தல சிறப்பு :-

திருவரங்கத்தில் அரங்கநாதருக்குத் திருமதில் கட்டும் பணியில் ஈடுபட்டிருந்த திருமங்கையாழ்வாருக்குப் பணத்தட்டுப்பாடு ஏற்பட்டது. அவர் பெருமாளை வேண்ட பெருமாள் அவர் கனவில் தோன்றி கொள்ளிடக்கரையில் வந்து பணம் வாங்கிக்கொள்ளும்படிக் கூறினார்.

திருமங்கையாழ்வாரும் அவ்விதமே கொள்ளிடக்கரைக்குச் செல்ல அங்கு தலைப்பாகையுடன் இருந்த ஒரு வணிகரைச் சந்தித்தார். அவ்வணிகரிடம் ஒரு காலி மரக்கால், ஏடு, எழுத்தாணி இருந்தது. அவர் ஆழ்வாரிடம் அரங்கநாதன் அவருக்கு உதவ தன்னை அனுப்பியிருப்பதாகக் கூறி, பணியாளர்களுக்கு கூலியாக அக்காலி மரக்காலால் மணலை அளந்து கொடுத்தால், உண்மையாக உழைத்தவர்களுக்கு அது பொன்னாகவும் உழைக்காமல் ஏமாற்றியவர்களுக்கு மணலாகவும் தோன்றும் என்றார்.

அவ்விதமே கூலியாக மரக்காலால் மணலை அளந்து கொடுத்தபோது பெரும்பான்மையோருக்கு அது மணலாகவும் சிலருக்குப் பொன்னாகவும் இருந்தது. மணலைப் பெற்றவர்கள் வணிகரை அடிக்க வர வணிகரோ ஓடினார்.

ஆழ்வாரும் அவர் பின்னே ஓடினார். வணிகர் இத்தலத்தில் வந்து நின்று வணிகராக வந்தது தானே என்று உணர்த்தி எழுத்தாணியால் ஏட்டில் எழுதி ஆழ்வாருக்கு உபதேசித்தருளினார்.

இதனைக் குறிக்கும் விதமாக இத்தலப் பெருமாள் மரக்காலை தலைக்குக்கீழ் வைத்து ஏடு, எழுத்தாணியைக் கையில் கொண்டவாறு பள்ளிகொண்ட கோலத்தில் உள்ளார். இலங்கைக்கு செல்லும் போது ஸ்ரீராமரும், ஆஞ்சநேயரும் இங்கு வந்து தங்கிச் சென்ற இடம்.

🌺🌺 மூலவர் :-

இத்தலத்தில் பள்ளி கொண்ட கோலத்தில் காட்சி தரும் பெருமாள் "ஸ்ரீ ஆண்டளக்கும் ஐயன்"என அழைக்கப்படுகிறார். கருவறையில் பெருமாள், ஸ்ரீதேவி மற்றும் பூதேவியுடன், தமது நாபிக் கமலத்தில் இருந்து பிரம்மா மேல் எழ, பள்ளி கொண்ட தோற்றத்தில் காட்சி அளிக்கிறார். மரக்காலைத் தலைக்கு வைத்து இடதுகையில் எழுத்தாணியும் ஏடும் கொண்டுள்ளதால் பெருமாளின் இத்தோற்றம் "உலகுக்குப் படியளந்த பெருமாள்" "ஓய்வாகப் பள்ளிகொண்ட கோலம்" என அழைக்கப்படுகிறது.

🌺🌺 தாயார் :-

இக்கோவிலில் அரங்கனின் நாயகி, தாயார் பார்கவியாக எழுந்தருளியுள்ளார்.

🌺🌺 மோட்சத் தூண்கள்:-

பரமபதத்தில் மகாவிஷ்ணுக்கு முன்பாக இரு தூண்கள் இருக்கும். மனித உடலிலிருந்து விடுபடும் ஆன்மா இவ்விரு தூண்களையும் தழுவ மோட்சம் பெறும் என்பது ஐதீகம்.

இதே போன்ற இரு தூண்கள் இத்தலத்தில் கருவறைக்கு எதிரில் உள்ள அர்த்தமண்டபத்தில் பெருமாளின் பாதம் மற்றும் தலைக்கு எதிரில் உள்ளன.

இரட்டைப்படை எண்ணிக்கையில் வலம் வந்து இத்தூண்களைப் பற்றிக்கொண்டு பெருமாளின் பாதத்தையும் திருமுகத்தையும் தரிசனம் செய்தால் மோட்சம் கிடைக்கும் என்றும் திருமணம் ஆகாதவர்களுக்குத் திருமணம் நடக்கும் என்ற நம்பிக்கையும் வழக்கத்தில் உள்ளது.

🌺🌺 சிறப்புகள் :-

இறைவனின் தலையின் கீழ் மரக்காலும், இடது தரத்தில் ஓலை எழுத்தாணியுடன் பள்ளி கொண்ட திவ்யதேசம்.

திருமகள் தாயார் கமலவாசினி என்ற திருநாமத்தில் காட்சி தரும் திவ்யதேசம்.

காவிரி, கொள்ளிடம் ஆகிய இரு ஆற்றின் நடுவே அமைந்துள்ள திவ்யதேசம்.

திருமங்கையாழ்வார் ஒரு பாசுரம் பாடியருளிய திவ்யதேசம்.

🌺🌺 பாசுரம் :-

திருமங்கையாழ்வார் பெரிய திருமடலில் ”ஆதனூர் ஆண்டளக்கும் ஐயன்” என்று ஒரு வரியில் குறிப்பிடுகிறார்.

முன்னவனை - மூழிக்களத்து விளக்கினை

அன்னவனை ஆதனூர் ஆண்டளக்கும் ஐயனை …

- திருமங்கையாழ்வார்

🌺🌺 வழித்தடம் :

கும்பகோணத்திலிருந்து 8 கி.மீ தொலைவிலும், சுவாமிமலையிலிருந்து 3 கி.மீ தொலைவிலும் இத்திருத்தலம் அமைந்துள்ளது.

அருள்மிகு ஆண்டளக்கும் ஐயன் திருவடிகளே சரணம்.

அருள்மிகு கமலவாசினி தாயார் திருவடிகளே சரணம்.

🌺🌺 நாளைய பதிவில் :-

அருள்மிகு சாரங்கபாணி திருக்கோவில் - திருக்குடந்தை திருக்கோவிலைத் தரிசனம் பண்ணலாம்.

"ஓம் நமோ நாராயணாய நம:".