108 திவ்யதேசங்கள் - பதிவு 78 அழகிய நம்பி திருக்கோவில்

 🌹🌹🌹 108 திவ்யதேசங்கள் - பதிவு 78 🌹🌹🌹

இன்று முதல் பாண்டி நாட்டு திவ்யதேசங்கள் ஆரம்பம்.

ஆறு மூர்த்திகளின் கோலத்தில் எம்பெருமான் ஸ்ரீமந்நாராயணன் காட்சி தரும் திவ்யதேசம். கொடிமரம் விலகிய நிலையில் அமைந்துள்ள அற்புதமான திவ்யதேசம். அருள்மிகு அழகிய நம்பி திருக்கோவில்:-

திருக்குறுங்குடி
மூலவர்: நின்ற நம்பி, குறுங்குடி நம்பி, பரிபூரணன், வடுகநம்பி
தாயார்: குறுங்குடிவல்லி நாச்சியார்
உற்சவர்: அழகிய நம்பி, வைணவ நம்பி
கோலம்: நின்ற திருக்கோலம்
திசை: கிழக்கு
விமானம்: பஞ்சகேதக விமானம்
தீர்த்தம்: திருப்பாற்கடல், பஞ்சதுறை, சிந்து நதி

மங்களாசாசனம்: பெரியாழ்வார், திருமழிசை ஆழ்வார், நம்மாழ்வார், திருமங்கையாழ்வார்

நாமாவளி: ஸ்ரீ குறுங்குடிவல்லீ ஸமேத ஸ்ரீ வைஷ்ணவநம்பி ஸ்வாமிநே நமஹ.

ஊர்: திருக்குறுங்குடி

🌺🌺 திருக்குறுங்குடி:-

உலகையே அளந்த உத்தமராம் இறைவன் நாராயணன், திருவிக்கிரம அவதார திருக்கோலத்தை குறுக்கி சிறிய திருமேனியாக காட்சி தந்து அருள்வதால் இத்தலத்திற்கு "திருக்குறுங்குடி" என்பது பெயர்.

இத்தலத்தைப் பற்றிய வரலாறு வராகபுராணம் மற்றும் கைசிக புராணத்தில் இடம் பெற்றுள்ளது.

🌺🌺 ஆறு நம்பிகள்:-

திருக்குறுங்குடி தலத்தை தரிசிக்கச் செல்பவர்கள் ஆறு மூர்த்திகளை தரிசிக்கலாம்.

1. நின்ற நம்பி
2. கிடந்த நம்பி
3. இருந்த நம்பி
4. திருப்பாற்கடல் நம்பி
5. வைணவ நம்பி
6. மலைமேல் நம்பி

நின்ற நம்பியே இங்கு மூலவ மூர்த்தியாகப் போற்றப்படுகிறார். முதல் மூன்று நம்பிகள் திருக்குறுங்குடி தலத்தின் உள்ளேயே தனியாக சன்னதி கொண்டு அருள்கிறார்கள்.

திருப்பாற்கடல் நம்பி சன்னதி, கோவிலிலிருந்து சுமார் 1 கி.மீ தொலைவில் "திருப்பாற்கடல்" என்னும் ஓடையின் கரையில் அமைந்துள்ளது.

இதற்கு அருகில் "திருப்பரிவட்டப்பாறை" என்ற இடத்தில் வைணவ நம்பி சன்னதி உள்ளது.

திருக்குறுங்குடியிலிருந்து 9 கி.மீ தொலைவில் உள்ள மலையின் மேல் "மலை மேல் நம்பி" சன்னதி அமைந்துள்ளது.

🌺🌺 விலகிய கொடிமரம்:-

இத்தலத்திற்கு மேற்கே உள்ள மகேந்திரகிரி என்னும் இடத்தில் ஆழ்வார்களில் ஒருவரான "திருப்பாணாழ்வார்" அவதரித்த, தாழ்ந்த வகுப்பாண பாணர் வகுப்பில் அவதரித்தவர் "நம்பாடுவான்" என்பவராவார்.

அவர் பல காலமாக ஏகாதசி விரதம் அனுஷ்டித்து வந்தார். ஏகாதசி விரதத்தின் மகிமை பாத்ம புராணத்தில் தெளிவாகக் கூறப்பட்டுள்ளது.

நம்பாடுவான் தாழ்த்தப்பட்டவர் என்பதால் கோவிலுக்குள் செல்ல அனுமதி இல்லை. இவரது பக்திக்கு மனமிறங்கிய இறைவன் ஒருநாள் கொடிமரத்தை விலக்கி நம்பாடுவான் முன்னே வந்து, நின்ற நம்பி பெருமாள் கிட்சி தந்து அருளினார்.

இதன் காரணமாகவே இன்றளவும் இக்கோவில் கொடிமரம் விலகிய நிலையில் உள்ளது.

🌺🌺 முக்தி கண்ட ஆழ்வார்:-

பன்னிரு ஆழ்வார்களில் ஒருவரான திருமங்கையாழ்வாரின் வேண்டுகோளுக்கு இணங்க, குறுங்குடி நம்பி முக்தி அளித்ததாக ஐதீகம்.

திருவரங்கம் சென்ற ஆழ்வாரிடம் அரங்கநாதப் பெருமாள் குறுங்குடி செல்லும்படி கட்டளையிட்டதாகவும், அவ்வாறே இங்கு வந்து பல காலம் தங்கி முக்தியடைந்ததாகவும் கூறப்படுகிறது.

🌺🌺 மங்களாசாசனம் :-

நம்மாழ்வார் - 13 பாசுரங்கள், பெரியாழ்வார் - 1 பாசுரம், திருமழிசை ஆழ்வார் - 1 பாசுரம், திருமங்கையாழ்வார் - 25 பாசுரங்கள் என மொத்தம் 40 பாசுரங்களால் இத்தல இறைவனை மங்களாசாசனம் செய்துள்ளனர்.

"கரண்ட மாடு பொய்கையுள் கரும்பணைப்
பெரும் பழம் புரண்டு வீழ வாளை பாய்
குறுங்குடி நெடுந்தகாய் திரண்டு
தோளி ரணியன் சினங்கொளாக
மொன்றையும் இரண்டு கூறு செய்துகந்த
சிங்க மென்ப துண்ணையே!!!"

- திருமழிசை ஆழ்வார்.

🌺🌺 சிறப்புகள்:-

கொடிமரம் விலகிய நிலையில் அமைந்துள்ள திவ்யதேசம்.

திருமகள் பிராட்டி குறுங்குடிவல்லி நாச்சியார் என்ற திருநாமத்தில் காட்சி தரும் திவ்யதேசம்.

நான்கு ஆழ்வார்களால் பாடல் பெற்ற திவ்யதேசம்.

🌺🌺 வழித்தடம்:-

திருநெல்வேலியிலிருந்து மேற்கு திசையில் 42 கி.மீ தொலைவில் இத்தலம் அமைந்துள்ளது. திருநெல்வேலியிலிருந்து நாகர்கோவில் செல்லும் பேருந்தில் வள்ளியூர் சென்று, அங்கிருந்து திருக்குறுங்குடி செல்லலாம்.

அருள்மிகு அழகிய நம்பி திருவடிகளே சரணம்.
அருள்மிகு குறுங்குடிவல்லி நாச்சியார் திருவடிகளே சரணம்.

🌺🌺 நாளைய பதிவில்:-

அருள்மிகு தோதாத்ரிநாதன் திருக்கோவில் - திருவரமங்கை திவ்யதேசத்தைத் தரிசிக்கலாம்.

"ஓம் நமோ நாராயணாய நம:!!!"