வசந்த காலம் வருமோ?-36

 வசந்த காலம் வருமோ?

By N Krishnamurthy 

சாரங்கனின் வீட்டை கார் அடைந்ததும், எல்லோரும் இறங்கி வீட்டிற்குள் நுழைந்தார்கள்.

 ஹாலிலுள்ள சோபாவில் ராஜேஸ்வரியும், சங்கர க்ருஷ்ணனும் அமர்ந்தார்கள். ம்ருதுளா ட்ரஸ் மாற்றி வருவதற்கு அவள் ரூமுக்கு சென்றாள்.

ராஜேஸ்வரியை பார்த்து மைதிலி " சமைக்றதுக்கு முக்கா மணியாவது ஆகும்.கொஞ்சம் காபி சாப்படலாமே" என்றாள்.

"காபி சாப்ட்டா பசி அடங்கிடும் .வேணாம்" என்றாள்  ராஜேஸ்வரி.

அதற்குள் ஏதோ அரவம் கேட்கவே சக்கரவர்த்தியும்,கோமளாவும் ரூமிலிருந்து ஹாலுக்கு வந்தனர்."யார் வந்திருக்கா" என கோமளா மைதிலையை கேட்க,அவள் விவரத்தை சொன்னாள். அவர்கள்தாம் ம்ருதுளாவின் தாத்தா,பாட்டியாக இருக்கவேண்டும் என புரிந்து கொண்ட ராஜேஸ்வரி எழுந்து நின்று,கைகளை கூப்பி" நமஸ்காரம்" என்று சொன்னாள். ",உட்காரம்மா " என்று சொன்ன கோமளா " நீ எங்க இருக்க" என்றாள்.

" தற்சமயம் அமெரிக்காவில இருக்கோம்" என்றாள்.

சக்ரவர்த்தி " எது பூர்வீகம்" என்றார்.

"ஆத்துகாரருக்கு விரிஞ்சீபுரம்,நேக்கு மன்னார்குடி"என்றாள் ராஜேஸ்வரி. "ஸ்மார்த்தாளா" என்று கேட்டாள் கோமளா. அதற்கு "ஆமாம்.மாமி" என்று பதிலளித்தாள் ராஜேஸ்வரி. "சரிம்மா.சந்தோஷம்.நாங்க ரூமுக்கு போறோம்"என்று கூறி,தங்கள் ரூமை நோக்கி நடந்தார்கள்.

சமையல் ரூமுக்கு சென்ற ராஜேஸ்வரி.          " ரொம்பஒண்ணும் பண்ண வேணாம்.ரசஞ்சாதம் போறும்" என்றாள்."முதல் மொறையா சாப்ட வந்திருக்கேள். வெறும் ரசஞ்சாதம் போட்டு அனுப்ப முடியுமா" என்றாள் மைதிலி. அவளிடமிருந்து நறுக்க வைக்கப்பட்டிருந்த வெண்டைக்காயையும்,அருவாள் மணையையும் வாங்கி கொண்ட ராஜேஸ்வரி, வெண்டைக்காயை நறுக்க ஆரம்பித்தாள்.

இதற்குள் ஹாலில் என்ன செய்வதென்று அறியாமல் உட்கார்ந்து கொண்டிருந்த சங்கர க்ருஷ்ணன், ட்ரஸ் மாற்றியிருந்த ம்ருதுளா, சமையல் அறைக்கு போவதை பார்த்து அவளிடம் "Can you spare few minutes" என்றான். அதை கேட்டு ம்ருதுளா அவன் இருக்குமிடத்திற்கு வந்தாள். "ஏன்.தமிழிலே பேசலாமே.இங்க்லீஷ் கொஞ்சம் அன்னியமாயில்லையா" என்றாள். அதற்கு அவன்"ஆமாம்.எனக்கு புரியர்து. ஆனா என் தமிழ் எனக்கே சிரிப்பு வரும்" என்றான்.

" இந்தியாவில கொஞ்ச நாள் தங்கீனீங்கள்னா தமிழ் நண்ணா பேசலாம்" என்றாள். அதற்கு அவன் " Please call me by my name.I may be after all 3 to4 years elder to you" என்றான். இதன் பிறகு சிறிது இறுக்கம் குறைந்த ம்ருதுளா அவனிடம் சகஜமாக பேசி, பழக ஆரம்பித்தாள். இருவரும் சங்கீதத்தை பற்றி(மட்டும்) பேசினார்கள்.கடைசியில் அவன், "You seem to be a genius.So quickly you learn things" என்று சொல்லிய பின் "your singing Saranga today, was out of the world stuff" என்றான். "Tell me something frankly.After seeing my handling violin today, do you think i should seriously persue vocal or violin" எனக் கேட்டான். இதற்கு ம்ருதுளா சிரித்துக்கொண்டே"Certainly vocal" என்றாள்."So you indirectly say that my violin playing today was not up to the matk" என்றான். சிரித்துக்கொண்டே.

"உஹும்.நான் அப்படி சொல்லல " என்றாள் ம்ருதுளா.