ரகோபதேஸம்தொடர்ச்சி_17

 .#ரகோபதேஸம்தொடர்ச்சி

ரகோபதேஸம்தொடர்ச்சி_17

By பாஸ்கர் சத்யா

அடுத்த வகுப்பு.  வழக்கமான ஏற்பாடுகள் அன்றும்.  அவருக்கு முன் அமர்ந்து காத்துக் கொண்டிருக்கிறேன்.

'நேத்திக்கு சிக்ஷா வல்லிய பத்தி தானே பேசிண்டு இருந்தோம்?'

'ஆமாம் மாமா.  நீங்க கூட உங்கள ஞாபகப்படுத்தி பிரார்த்தனை ஸ்லோகத்தை வாங்கிக்க சொன்னேளே?  எழுதி வச்சுட்டேளா மாமா?'

'ஓ.... எழுதி வச்சுட்டேனே.  பாஸு விஷயத்துல மறப்பேனா?  அங்க இருக்கு பாரு ஒரு புத்தகம் அதுக்குள்ள மடிச்சு வச்சிருக்கேன்.  அதை எடுத்துண்டு வா.  கையெழுத்து கால் எழுத்து புரியலன்னா இப்பவே திருத்திண்டு போயிடலாம்.'

அவர் சொன்ன இடத்தில் இருக்கும் புத்தகத்திலிருந்து அவர் எழுதிய ஸ்லோக பேப்பரை எடுத்துக்கொண்டு வந்து மீண்டும் என் பலகையில் அமருகிறேன்.

'எங்க ஒரு தடவை கணீர்னு படி பாப்போம்.'

குரல் கணீர் என்று இருந்தாலும் தடுமாற்றத்தோடு தான் படிக்க முடிந்தது.  என் உச்சரிப்புகளை அவர் அவ்வப்போது திருத்திக் கொண்டிருந்தார்.

இரண்டு மூன்று முறை திரும்பத் திரும்ப படிக்க சொல்கிறார்.  கடைசி முறை அந்த ஸ்லோகத்தை படித்து காண்பித்த போது என் உச்சரிப்புகள் பெருமளவு சரியாக இருந்திருக்க வேண்டும்.

'சின்ன ஸ்லோகம் தானே.  ஸ்வாமிக்கு முன்னாடி சொல்ற மந்திரங்களோட இந்த மந்திரத்தையும் சேர்த்துக்கோ.  மனப்பாடம் ஆயிடுத்துன்னா பேப்பர மடிச்சு உள்ள வெச்சுடலாம்.  ஸ்லோகம் அத்துப்படி ஆயிடுத்துன்னா அரை நிமிஷம் கூட ஆகாது சொல்றதுக்கு.'

'சரி மாமா சொல்லிண்டு வரேன் நீங்க சொன்ன மாதிரி.'

'சரிடா இப்ப மேல போலாமா?  சிக்ஷா வல்லிய நேத்திக்கு பிரார்த்தனை மந்திரத்தோட ஆரம்பிச்சோம்.   அடுத்து வரக்கூடிய பகுதி வேதம் ஓதுதல் அதாவது  வேதம் சொல்லுதல்.  வேதத்தை எப்படி சொல்லணும் ஸ்லோகங்களை எப்படி படிக்கணும் மந்திரங்களை எப்படி உச்சரிக்கணும் ...  இது மாதிரியான விஷயங்களை சொல்லிக் கொடுக்கிறது தான் வேதம் ஓதுதல் அப்படிங்கிற டைட்டில்ல இங்க வர்றது.  வேதங்களை வேத மந்திரங்களை நான் இப்ப சொல்ல போறது இல்ல.  அவைகளை பிரயோகப்படுத்த தேவையான அடிப்படை விஷயங்களை இந்த சிக்ஷா வல்லி எப்படி விளக்கி இருக்கு அப்படின்னு பாக்கப்போறோம்.'

'நாம பேசிண்டிருந்த வாழ்க்கைக் கல்வியோட அடுத்த அம்சமா வர்றது வேத பாராயணம், அதாவது வேதங்களை ஓதுதல். வேதங்களை ஓதும்போது கவனத்தில்கொள்ள வேண்டிய அடிப்படை விஷயங்கள ஒரு ஸ்லோகத்தால சொல்லியிருக்கா.'

சீக்ஷாம் வ்யாக்யாஸ்யாம: வர்ண; ஸ்வர: மாத்ரா பலம்

ஸாம ஸந்தான: இத்யுக்த: சீக்ஷாத்யாய:

சீக்ஷாம் - உச்சரிப்புபற்றி; வ்யாக்யாஸ்யாம: - விளக்குவோம்: 

வர்ண: - ஒலி; 

ஸ்வர: - ஏற்ற இறக்கம்: 

மாத்ரா - நீட்டல்-குறுக்கல்; 

பலம் - உச்சரிப்பதற்கான முயற்சி; 

ஸாம: - நிறுத்தம் விவரம்: ஸந்தான: -தெளிவான உச்சரிப்பு; 

இதி - இவ்வாறு: 

சீக்ஷா அத்யாய: - உச்சரிப்பு பற்றிய பாடம்: 

உக்த: - சொல்லப்பட்டது.

'இப்ப பதம் பிரிச்சு சொன்னத சேர்த்து புரிஞ்சுப்போமா?'

'ஒலி, ஏற்ற இறக்கம், நீட்டல்-குறுக்கல், உச்சரிப்பதற்கான முயற்சி, நிறுத்தும் விவரம், தெளிவான உச்சரிப்பு ஆகியவை உச்சரிப்பு பற்றிய பாடங்கள் ஆகும்.

ஒலி: ஒவ்வோர் எழுத்துக்கும் உரிய ஒலி சரியாக உச்சரிக்கப்படுதல்.

ஏற்ற இறக்கம்: ரிக், யஜுர், அதர்வண வேதங்களில் மூணு சுரங்கள் பயன்படுத்தப்படறது. ஸாம வேதத்தில் ஏழு சுரங்கள், அதாவது ஏழு விதமான ஏற்ற இறக்கங்கள் பயன்படறது.

நீட்டல்-குறுக்கல்: குறில் (ஹ்ரஸ்வம்), நெடில் (தீர்கம்) மற்றும் இரு மடங்கு நெடில் (ப்லுதம்) ஆகியவை வேத பாராயணத்தில் பயன்படுகின்றன.

உச்சரிப்பதற்கான முயற்சி: தேவையான இடங்களில் தேவையான எழுத்துக்களை அழுத்தி உச்சரிப்பதன்மூலம் வார்த்தையின் பொருளைச் சிறப்பாக வெளிப்படுத்துதல்.  உதாரணமா நீ என் பக்கத்தில் இருக்கும் போது உன்ன நான் சாதாரணமா சின்ன குரல்ல பாஸூ அப்படின்னு கூப்பிட்டா போதும்.  இதுவே நீ கொஞ்ச தூரத்துல இருந்தா டோன ரைஸ் பண்ணி கூப்பிடணுமோன்னோ?  சில சமயங்கள் பாஸு அப்படின்னு உங்க அம்மா கூப்பிடற தொனியிலேயே அம்மா உன் மேல கோபமா இருக்கா அந்த சமயத்துல அப்படின்னு கூட புரிஞ்சுக்க முடியறதோன்னோ?

'மந்திரங்களை சரியான முறையில உச்சரிப்பதற்கான பயிற்சி ரொம்ப முக்கியம்.  அதைத்தான் இந்த சிக்ஷா வல்லியில மாணாக்கர்களுக்கு சொல்லித் தரா.'

'அடுத்தது நிறுத்தும் விவரம். நிறுத்தம் இடங்களில் உரிய கவனம் செலுத்துதல்.  இங்கிலீஷ்ல பங்க்ச்சுவேஷன்ஸ் பத்தி நோக்கு சொல்லிக் கொடுத்திருக்கா இல்லையா?  கமா, ஃபுல் ஸ்டாப், கோலன் செமி கோலன் இப்படி ஏகப்பட்டது இருக்கே.  இவைகள் எல்லாம் எங்க நிறுத்தனும் எங்க தொடரனும் எங்க ஆச்சரியப்படணும் அப்படிங்கற விஷயங்கள் எல்லாத்தையும் சொல்லிக் கொடுக்கிறது இல்லையா?  அதே மாதிரி தான் மந்திரங்கள்லேயும் இப்படிப்பட்ட விஷயங்கள் இருக்கு.'

'தெளிவான உச்சரிப்பு அடுத்தது. ஒவ்வோர் எழுத்தையும் தெளிவா உச்சரிக்கணும்.  சில சமயங்களில் உச்சரிப்பு சரியா இல்லைனா வார்த்தைகள் அனர்த்தமா புரிஞ்சுக்க படலாம்

இது எவ்வளவு முக்கியம் அப்படிங்கிறத ராமாயணத்திலேருந்தே உதாரணம் காட்டி சொல்லுவா. கும்பகர்ணன் நித்தியத்துவம் கேட்க ஆசைப்பட்டான்.  , ஆனால் அவன் வேண்டி கேட்டது கேட்டது, உச்சரிப்பில் தெளிவில்லாமல் நித்திரத்துவம் அப்படின்னு ஆயிட்டுது. அதனால அவன் தொடர்ந்து தூங்க வேண்டியவனானான்.  இந்த சின்ன உதாரணம் உச்சரிப்பு  தெளிவாக இருக்கணுங்கறத நமக்கெல்லாம் உணர்த்தறதோன்னோ?'

வேதங்களை ஓதும் போது இவையெல்லாம் கவனத்தில் கொள்ளணும்.   இந்த விளக்கங்கள் ஆசிரியரிடமிருமிருந்து நேரடியா தெரிஞ்சுக்கணும்.'

'மனப் பயிற்சியும் முக்கியம். கல்வியின் சாரமே மன ஒருமைப்பாடுதான். உபநிஷதம் காட்டும் வாழ்க்கைக் கல்வியின் ஓர் அம்சமாக மனப்பயிற்சி வைக்கப்பட்டுள்ளது.'

'மன ஒருமைப்பாடு மனக்கட்டுப்பாடு மன உறுதிப்பாடு இவைகள் மூலமாக எதையும் சாதிக்க முடியும்.  மலைகளைக்கூட அணு அணுவாக உடைத்தெறிய முடியும்னு பெரியவாள்லாம் சொல்லியிருக்கா.'

'பாஸு, மனசு இருக்கே அது ஒரு விசித்திரமான வஸ்து.  தேவையற்ற எண்ணங்கள நூத்துக்கணக்குல கூட ஒரே சமயத்துல மனசால ஏத்துக்க முடியறது.  ஆனா பாரு ஒண்ண மாத்திரம் அதாவது ஒரு சிந்தனைல மாத்திரம் அதால கட்டுப்பாடோட நிக்க முடியல. அதனாலதான் மனசுக்கு பயிற்சி அவசியம் தேவைப்படறது.  மன ஒருமைப்பாடுதான் எல்லா அறிவின் சாரமா இருக்கு. மனம் குவியாமல் எதுவும் செய்ய முடியாது.  சாதாரண மனிஷாள்ல தொண்ணூறு சதவீதம் எண்ண ஆற்றல் வீணா போயிடறது. அதனால அவன் அடிக்கடி தவறு செய்யறான். பயிற்சி பெற்ற மனிதனோ மனமோ தவறே செய்வதில்லை. மனம் ஒருமுகப்பட்டு, தன்னை நோக்கித் திரும்பும்போது நாம எஜமானனாகி நம்முள் உள்ள எல்லாமே நமது பணியாளர்களாகி விடுகின்றன.  நமது எஜமானர்களாக இருப்பதில்லை. எனவே வாழ்க்கையில் உயர்ந்த எதையாவது சாதிக்க வேண்டுமானால் மனச ஒருமைப்படுத்தற சக்திய பயிற்சி மூலமா பெறணும்.'

'சாதாரண மனுஷாளால எடுத்த எடுப்பில் மனச ஒருமைப்படுத்த முயற்சி பண்ணினா அது பொதுவாக தோல்வியிலேயே முடிஞ்சுடும். ஏனெனில் மன ஒருமைப்பாடு படிப்படியாக மனத்தைச் சிறு சிறு எல்லைக்குள் கட்டுப்படுத்துதல் என்ற அடிப்படை விஷயத்தை நாம் மறந்துடறோம்.  இங்க தான் உபநிஷதம் மன ஒருங்கிணைப்பு, உணர்வின் விரிவு, தியானம் என்று மூன்று படிகளாக இதனைச் செய்யுமாறு சொல்லிக் கொடுக்கறது.  இந்த மூணுக்குமே அடிப்படையாக பிரார்த்தனையையும் வேள்வியையும் உபநிஷத்துல சொல்லிக் கொடுத்து படிகளை பலமாக்க கத்துக் கொடுக்கப்பட்டிருக்கு.'

'அடுத்த கட்டம் சங்கல்பம். ஆசிரியரும் மாணவரும் செய்கின்ற சங்கல்பத்துடன் இந்தப் பயிற்சிகள் உபநிஷத்துல குறிப்பா இந்த சிக்ஷா வல்லி பகுதியில தொடங்குகின்றன.'

'அன்றாட வாழ்க்கையில் நாம் தவறுகள் செய்யறோம்.  அந்த தவறுகளால தோல்விகளையும் சந்திக்கிறோம். இந்த தவறுகள் வருவதற்கு பொதுவாக மூணு காரணங்கள சொல்லலாம் -.

முதல் காரணம் தன்னறிவு அல்லது சுய அறிவு இல்லாதது.  அதாவது சுய அறிவு இல்லாத போது தவறுகள் சரளமா ஏற்படறது.  இந்த சிக்ஷா வல்லியில் இருக்கிற சங்கல்ப ஸூக்தம், சுக்ல யஜுர்வேதம், வாஜஸனேயீ ஸம்ஹிதை, வேத மந்திரங்கள் இவைகளெல்லாம் நம்மளுடைய சுய அறிவ நன்னா வளர்த்துக்கறதுக்காக பாடமா வெச்சிருக்கா.'

'அடுத்த காரணம் ஒரு லட்சியத்திற்காக அல்லாமல் ஏனோதானோன்னு ஒரு காரியத்தைச் செய்யறது தவறிழைக்க காரணமாகிறது.  நாம கூட பேச்சு வாக்குல கடனேன்னு வேலை செய்யக்கூடாது அப்படின்னு சொல்லுவோமே.'

'மூணாவதா திட சங்கல்பம் இல்லாம காரியங்களை செய்தோமானால் தோல்வி அடஞ்சுடறோம்.   எனவே திட சங்கல்பம் முக்கியம்.  இதற்கான போதிய பாடங்கள்  யஜுர்வேதத்துல இருக்கு.  இதுல என்ன விசேஷம்னா சொல்லிக் கொடுக்கிற ஆசிரியரும் கற்றுக் கொள்கிற மாணவரும் எனவே ஆசிரியரும் சங்கல்பத்தை இந்த உபநிஷத்த மந்திரங்கள்ல  செய்துகொள்கிறார்கள்.

'ஸஹ நௌ யச: 

ஸஹ நௌ ப்ரஹ்ம வர்ச்சஸம் அதாதஸ்-

ஸக்ம்ஹிதாயா உபநிஷதம் வ்யாக்யாஸ்யாம:

ஸஹ நௌ - நாம் இருவரும்; யச; - பெருமை பெறுவோம்; ஸஹ நௌ - நாம் இருவரும்; ப்ரஹ்ம வர்ச்சஸம் - புனிதப் பேரொளி; அத அத: - இப்போது; ஸம்ஹிதாயா - சேர்க்கைபற்றிய (உபநிஷதம் -பயிற்சிகளை) வ்யாக்யாஸ்யாம; - விளக்குவோம்.

நாம் இருவரும் (அதாவது ஆசிரியரும் மாணவரும்) பெருமை பெறுவோம், நாம் இருவரும் புனிதப் பேரொளி பெறுவோம் என்று மாணவர்கள் கூறுகின்றனர். பிறகு ஆசிரியர், இப்போது நாம் பயிற்சிகளை விளக்கத் தொடங்குவோம் என்கிறார்.

'உயர்ந்த சிந்தனைகளும் தூய வாழ்வுமே பெருமையையும் புனிதப் பேரொளியையும் தர முடியும். எனவே அத்தகைய வாழ்க்கை வாழ்வோம். என்று ஆசிரியரும் மாணவர்களும் சங்கல்பம் செய்துகொள்வதாக இந்த மந்திரம் அமஞ்சிருக்கு பாத்துக்கோ.'

'ரொம்ப நாழி வகுப்பு ஓடிண்டிருக்காப்போல தெரிகிறது.  இன்னைக்கு இத்தோட முடிச்சுப்போமா பாஸூ?'

'இல்ல மாமா.  ஆர்வத்தோட கேட்டுண்டிருக்கேன் மாமா.  கொஞ்ச நாழி ரெஸ்ட் எடுத்துண்டு வேணா சொல்லிக் கொடுங்கோ மாமா.'

'அதுவும் சரிதான்.'

சிறிது நேரம் அவர் வேறு வேலைகளில் கவனம் செலுத்துகிறார்.

தொடரும்...