ரெங்காமாமா ரெத்தினம் ஜோடி

 கோதண்டராமன் சுரேஷ்

ரத்தினத்துக்கு எழுதப் படிக்கத் தெரியாது. ஆனாலும் அவரின் டெக்னிகல் மூளை எங்களை ரொம்பவும் வியக்க வைக்கும். எப்போதும் தாடியுடன், உடம்பில் அங்கங்கே கிரீஸுடன் இருக்கும் ரத்தினத்துக்கு, அப்போதே வயது ஐம்பது இருக்கும்.  அதிகம் பேசமாட்டார். மணிரத்தினம் டயலாக் மாதிரி ஓரிரு வார்த்தைகள் பேசினாலே அதிகம். அதுவும் ரொம்பவும் சாந்தமாகத்தான். வடுவூர் டூரிங் டாக்கீஸில், சிங்கிள் ப்ரொஜக்டரை வைத்துக்கொண்டு, ரீல் மாற்றும்போது, நடுநடுவே கட் பண்ணாமல் லாவகமாக தொடர்ந்து ஓட்டிக்காண்பித்தவர் ரத்தினம். ஐடியா அவருடையதுதான். மத்த டூரிங் டாக்கீஸிலெல்லாம் இண்ட்டர்வல் தவிர ரண்டு ப்ரேக் விடுவார்கள். தொடர்ந்து ஓட்டினால், இதற்காகவே இன்னொரு ப்ரொஜக்டர் வாங்கிவைத்திருக்கிறார்கள் என்று அர்த்தம். 

வடுவூர் டூரிங் டாக்கீஸ் ஓனர், ரெங்கா மாமா எங்க எதுத்த ஆம்தான். எங்களுக்கு, சேர் போட்டு ஸ்பெஷல் கன்ஸெஷன்ஸ் உண்டு என்றாலும், எப்போதாவது தான் சினிமா போவோம். அதுவும், நான் எட்டாவது க்ளாஸ் வந்தபிறகு போனதில்லை. அதற்கு முன்னால், எம்ஜியார் சினிமான்னா, நான் மண்தரையில் முதல் ரோ! யாரும் மறைக்க முடியாது. அண்ணாந்து பாத்து கழுத்து வலிச்சதா ஞாபகமில்லை. பின்னாலிருந்து , "சீக்கிரம் போ வாத்தியாரே! இன்னும் வேகமாக போ! நம்பியார் பய வீட்டை கொளுத்த போறான், அவனையும், அந்த குண்டன் அசோகனையும் உடாத. குதிரைய அடிச்சு ஓட்டு......" என்று வரும் இன்ஸடரக்‌ஷன்ஸ் சினிமாவை விட சுவாரஸ்யமா இருக்கும். 'வீரபாண்டிய கட்டபொம்மன்ல, சிவாஜி நடிச்சதாலதான் வெள்ளக்காரன்கிட்டே மாட்டி, தூக்கில மாட்டிக்கிட்டார். எம்ஜியார் நடிச்சிருந்தா, வெள்ளக்காரன ஜெயிச்சுருப்பார்'னு நம்பர மக்கள் இன்னும் இருப்பாங்கன்னு நினைக்கிறேன். 

சிவாஜி படம்னா நான் பாதி நேரம் ஆப்பரேட்டர் ரூமில்தான் இருப்பேன். ஸ்க்ரீன் ஃபுல்லா, க்ளோஸப்பில், சிவாஜி அழறதைப் பார்க்க எனக்கு பயமாக இருக்கும். இல்லேன்னா, "ஏன் இப்படி செஞ்ச?" ன்ற டயலாக்கை, புருவத்தை மேலும் கீழும் ஆட்டி, ஒரு அரை மணி நேரம் பேசறதை கேக்கும் பொறுமை எனக்கு கிடையாது. 

பன்னெண்டுலேந்து பதினெட்டு சின்ன சின்ன ரீலில் வரும் ஃபிலிமை பெரிய ரீலுக்கு மாத்தி, படம் ஓடும்போது, அந்த ரோல் முடிவதற்க்கு கொஞ்சம் முன்னாடி, எல்லா ஃபிலிமையும் சட சடன்னு உறுவி, அஸிஸ்டண்ட்  அதை லாவகமாக feed பண்ணிக்கொண்டிருக்கும்போது, ரோலின் கடைசி ஃப்லிமை, அடுத்த ரோலின் முதல் ஃப்லிமோடு ஒட்டி, ....... அதெல்லாம் முழுவதும் வர்ணிக்க முடியாது.  நேர பாத்தாதான் ஜாலியா இருக்கும். கண்கூசர கார்பன் லேம்ப், கர்க்க்புர்க்க் ப்ரொஜக்ட்டர் சத்தம், அஸிஸ்ட்டன்டின் பீடி நாத்தம் இவை ஒரு பொருட்டாக இருக்காது. சிவாஜி நடித்த சினிமாவைவிட, ஆப்பரேட்டர் மற்றும் அஸிஸ்ட்டண்டின் இந்த ரீல் மாத்தர டீம்-வொர்க் பார்க்க அவ்வளவு ஸ்வாரஸயமாக இருக்கும்! 

ரத்தினத்துக்கு டாக்கீஸின் அத்தனை வேலையும் அத்துப்படி. நோட்டீஸ் ஒட்டறதிலேந்து, காம்ப்பௌண்டு கட்டுவது, ரோல்ஸ் மாத்துவது, ஆப்பரேட்டர் வரலேன்னா முழு படத்தையும் ஓட்டுவது, கலெக்‌ஷன் பணத்தை அப்படியே அடுத்த நாள் காலம்பற கொண்டு வந்து தருவது, ப்ரொஜக்டர் மக்கர் பண்ணினா அதை அக்கக்கா கழட்டி ரிப்பேர் செய்வது, திருச்சி போய் படப்பெட்டி வாங்கி வருவது, என எல்லாமே ரத்தினம்தான். நாங்கள், எங்கள் வீட்டு முற்றத்தில் கண்ணாடி வெச்சு,  ரேழி கதவிடுக்கு வழியா வரும் வெளிச்சத்தில், லென்ஸ் பிடிச்சு, அந்த பக்கம் வேஷ்டி கட்டி, புளியங்கொட்டை கலெக்ட் பண்ணி, சினிமா காண்பிப்பதற்கு, ஃப்லிம் சப்ளை ரத்தினம்தான்!  ரெங்கா மாமா காலேஜ் போகாத மெக்கானிக்கல் மற்றும் சிவில் என்ஜினியர்! கணக்கிலும் புலி. அவரிடமிருந்து எல்லா நுணுக்கங்களையும் ரத்தினம் கற்றுக் கொண்டிருந்தார். 

கோபர் கேஸ் வந்த புதிதில், எங்கேயோ ஒரு மாடல் பார்த்துவிட்டு வந்து, ரெங்கா மாமா வரைந்து கொடுத்த டிஸைன்படி, ரத்தினம் ஒரு பெரிய கிணறு வெட்டி, அதற்குள் ரண்டு பெரிய ட்யூப் வைத்து, பெரிய ட்ரம் போட்டு, கோபர் கேஸில் அடுப்பும், விளக்கும் எரிய வைத்து காண்பித்தார் ரத்தினம்!

படப்பெட்டி வாங்க திருச்சி போகும்போதெல்லாம்,  ரெங்கா மாமா எங்களுக்கும் மாவளிக்கெழங்கு தவறாமல் வாங்கி வருவார். ஊறுகாய் வாசனை பரவசமூட்டும். அது தவிர ஒவ்வொரு தடவையும், எங்களுக்கு தனியாக மேரி பிஸ்கட் பாக்கெட் வேறு உண்டு. எங்கள் மேல் அலாதி பிரியம் அவருக்கு. ஊறுகாய், கெட்டித்தயிர் சாதம், ரெகுலரா திருச்சி லாலா கடை அல்வா என்று சாப்பிட்டதில் ரெங்கா மாமாவுக்கு சீக்கிரமே டயாபடிஸ் வந்ததில் ஆச்சரியமில்லை. ஆனால் அதற்கு, அவரேதான் டாக்டர், லேப் டெக்னிஷியன் எல்லாம். "இன்னிக்கி டயானில் டேப்லெட் டபுள் டோஸ் சாப்பிடணும். கொல்லை பக்கம், மரத்தடியில்  யூரின் போன இடத்தில் நிறைய எறும்பு வந்திருக்கு" என்பார்!

1980களில், கீற்றுக்கு பதில், தகரக்கொட்டாய்தான் போட வேண்டும் என்ற அரசாணை வந்தபோது அதிலும் ஒரு பதுமையை புகுத்தினது ரெங்காமாமா ரெத்தினம் ஜோடி!மேற்கூரை சந்திக்கும் இடங்களிலும் மற்றும் சில இடங்களிலும் அலையலையாக உள்ள தகரஷீட்களை தட்டையாக்கி வைத்தால் ஒரு நல்ல ஆடியோ பூஸ்ட்டர் உண்டாகி,  தகரமும் நிறைய மிச்சப்படும் என்று ரெங்காமாமா தானாகவே யோசித்து சொல்ல, அதை ரத்தினம் நிறைவேற்றினார். 

தகரஷீட்களை தட்டையாக்குவது அவ்வளவு சுலபமான வேலையில்லை. ஆனால், அதையும் எளிமையாக்கினர். இதுபோல், சிறிய சிறிய திறமையான கண்டுபிடிப்புகளுக்கு இந்த ஜோடி பேட்டன்ட் உரிமைகள் வாங்காமல் விட்டுவிட்டார்கள்! 

ஒரு சிலர் டிக்கெட் வாங்காமல் காம்பௌண்ட் வேலியை பிய்த்து, உள்ளே நுழைந்தாலும்,

ரெங்கா மாமா, “போனால் போறது போ. இனிமே இப்படி பண்ணாத” என்று மன்னித்து விட்டுவிடுவார். கடைசி சில வருடங்கள் ரெங்கா மாமாவிற்கு காட்டராக்டில் மொத்தமாக கண்தெரியாமல் போனபோதும், அவரால் திறமையாக தொடர்ந்து டாக்கீஸை நடத்த முடிந்தது! 

டாக்கீஸை  விற்ற பிறகு, ரத்தினம் உதவி இல்லாமல், வயலில் பெரிய போர்வெல் போட்டார் ரெங்கா மாமா. முடிக்கும் சமயத்தில் ஒருநாள் திடீர்னு ரொம்ப அப்ஸெட் ஆயிட்டார்.  தொப்பாமாமா என்று நாங்கள்  பாசத்துடன் அழைக்கும் பக்கத்தாத்து சீனிவாசய்யங்கார், "என்னடா ஆச்சு ரெங்கா, அன்னிக்கி,  ஆஹா! ஒண்ணுக்கு ரெண்டா கருடன் பறக்கறது. வேலைய ஆரம்பச்சுடலாம்"னு சொன்னியேடா?" 

"கொஞ்சம் பேராசை பட்டு, சைடு பைப்பை போடாமல், இருபது அடி எக்ஸ்ட்ரா ஆழம் போனதில் rod மண்ணில பொதஞ்சுடுத்து. சப்ஜாடா இப்ப எல்லாம் போயிடுத்து. எல்லாத்தையும் மூட வேண்டியதுதுதான்"

"அதுக்காக, இப்படியா இடிஞ்சு போய் உக்காறது? ரத்தினம் இல்லாம தனியா பண்ணாதேன்னு சொன்னேனே, கேட்டியா? அன்னிக்கு, திருச்சில நல்லெண்ணை விலை கம்மின்னு, தனியா போய் இருபது லிட்டர் டின் வாங்கி, மூணு மண்ணேரம் பஸ்ல பத்திரமா கொண்டு வந்து, ஆத்து வாசல் வரைக்கும் தூக்கிண்டு வந்து, வாசல்ல தடுக்கி எல்லாத்தையும் கொட்டிட்ட. தாசில்தார் ஆஃபிஸில் டீ ட்ரேயை தட்டிவிட்டு அவ்ளோ க்ளாஸையும் உடைச்சு அம்பது  ரூபாய் தெண்டம் கட்டினே. இப்போ, இது ஒரு கூத்து. சரி சரி விடு. ரத்தினத்தை கூப்பிடு. எல்லாம் சரியாயிடும்"

ரத்தினம் என்ன பண்ணினாரோ தெரியாது. அடுத்த வாரம் போரில் தண்ணி கொட கொடவென்று கொட்டியது. 

ஆப்பரேட்டர் வேறு ஒருவர் என்றாலும், நடுவில், படம் கட்டானால், "டேய், .....தொள்ள காது ரங்கா, ரத்தினத்தை எழுப்புடா, ......டேய் ரத்தினம், தூங்காதடா, .....எழுந்து, படத்தை ஓட்டு......" இன்னும் காது கூசும் கெட்டவார்த்தைகளால் படம் பார்க்க வந்த பலர் கூச்சல்  போடுவார்கள். 

ஒருநாள், ரத்தினம், ஆப்பரேட்டர் ரூமில் ஃப்லிம் ரோல் மாத்தும்போது, "எப்படீங்க, ஃப்லிம் கட் ஆகாம, இவ்ளோ வேகமா உருவி, சிக்கிக்காம அழகா மாத்தறீங்க?"ன்னு ஆச்சரியமா கேட்டேன். ரத்தினம், மீதி ரோலையும் உறுவிவிட்டி, அடுத்த ரோலுடன் ஒட்டும்போது, நிதானமாக என்னை பார்த்து சொன்னார், "இந்த ஊர்லியூ உங்கள மாதிரி கொஞ்ச பேர்  மட்டும்தான் தம்பி, என்னை  'நீங்க, வாங்கன்னு' சொல்றீங்க".