அன்னை மீனாக்ஷி நேரில் வந்து காப்பாற்றியவெள்ளைக்கார கலெக்டர்

அன்னை மீனாக்ஷி நேரில் வந்து காப்பாற்றியவெள்ளைக்கார கலெக்டர்

-------------------------------------------

       

    மதுரை மீனாட்சி அம்மன் கோயிலில் இருந்து பிரசாதம் எடுத்து வந்தார் ஒருவர். ரோஸ் பீட்டர் தெரியுமா ? என்று கேட்டார் காஞ்சி மகாபெரியவர். தெரியாது என்றார் அவர். 

       ரோஸ் பீட்டர் என்று ஒரு கலெக்டர் மதுரையில் இருந்தார். அந்தக் காலத்தில் கார் கிடையாது. குதிரையில் தினமும் பக்கத்து ஊர்களுக்கு எல்லாம் அந்த வெள்ளைக்காரக் கலெக்டர் போவார். அவர் ரொம்ப நல்லவர். ஜனங்களுக்கு எல்லாம் ரொம்ப உபகாரம் செய்தார். அவர் ஒரு நாள் தூங்கிக் கொண்டிருந்தார். இரவு சமயம் கோடை மழை நல்ல இடியுடன் பெய்தது. அப்பொழுது யாரோ தூங்கிக் கொண்டிருந்த அவரைத் தட்டி எழுப்பினார்கள். அவர் கோபத்துடன் எழுந்தார். அங்கு ஒரு அழகான பெண் குழந்தை நின்று கொண்டிருந்தது. அந்தக் குழந்தை கலெக்டரை வெளியில் வரச் சொல்லி அழைத்துப் போயிற்று. அடுத்த நொடி அந்த கலெக்டர் படுத்திருந்த இடத்தின் மீது இடி விழுந்தது.

       குழந்தையைத் தேடினார் கலெக்டர். குழந்தை மறைந்து விட்டது. கலெக்டர் யோசனை செய்தார். இந்த குழந்தை மீனாக்ஷிதான். நம்மை இடியிலிருந்து காப்பாற்றினாள் என்று மீனாக்ஷி அம்பாள் கோயில் வாசலில் மண்டியிட்டார். அழுது கொண்டே உட்கார்ந்து இருந்தார். மதுரை மீனாக்ஷி அம்பாள் கோயில் குதிரை வாகனம் செய்ய நிறைய உதவி மற்றும் நவரத்தினம் பதித்த தங்க பாதுகைகள் இரண்டு பண்ணிக் கொடுத்தார் அந்த வெள்ளைக்கார கலெக்டர் என்று சொன்னார் மகாபெரியவர். இப்பேர்ப்பட்ட கதைகளை சொல்ல இனி யார் இருக்கிறார்கள் நமக்கு மகாபெரியவரைத் தவிர ?

நன்றி :--

பெரியவா புராணம்--பாலு மாமா பக்கங்கள் என்ற நூல்.

இந்த நூலை ஸ்ரீ பாலு மாமாவின் அக்கா பிள்ளை ஸ்ரீ வெங்கடராமனின் மனைவி 

திருமதி கமலா அவர்கள் சிறந்த முறையில் தொகுத்து எழுதியுள்ளார்.

ஹரிஹரசுப்பிரமணியன்

வெங்கடசுப்பிரமணியன்