குருவாயூரப்பன் திருக்கோயில்

 தினம் ஒரு திருத்தலம்... 🛕 

குழந்தை வடிவில் கிருஷ்ணன்... பூலோக வைகுண்ட தலம்...!!              

அருள்மிகு குருவாயூரப்பன் திருக்கோயில்...!!

 இந்த கோயில் எங்கு உள்ளது? 

கேரளா மாநிலம், திருச்சூர் மாவட்டத்தில் உள்ள குருவாயூர் என்னும் ஊரில் அருள்மிகு குருவாயூரப்பன் திருக்கோயில் அமைந்துள்ளது.

 இந்த கோயிலுக்கு எப்படி செல்வது? 

திருச்சூரில் இருந்து சுமார் 22 கி.மீ தொலைவில் குருவாயூர் என்னும் ஊரில் இத்திருக்கோயில் அமைந்துள்ளது. குருவாயூரில் இருந்து நடந்து செல்லும் தொலைவில் இக்கோயில் உள்ளது.

 இந்த கோயிலின் சிறப்புகள் என்ன? 

பூலோக வைகுண்டமாகவும், பூமியில் இறைவன் இருக்கும் இடமாகவும் கருதப்படும் அற்புதமான திருத்தலம் இது.

இத்தலத்தில் உள்ள மூலவரான குருவாயூரப்பனின் விக்கிரகம் தனிச்சிறப்பு வாய்ந்ததாகும்.

ஏனெனில் இந்த விக்கிரகம் மிகவும் புனிதமான 'பாதாள அஞ்சனம்" என்னும் கல்லில் வடிக்கப்பட்டது.

குருவாயூரப்பனின் உருவமானது நான்கு கைகளைக் கொண்டுள்ளது. அவர் சங்கு, சக்கரம், கதை மற்றும் தாமரை ஆகியவற்றைத் தன் நான்கு கைகளில் சுமந்து அழகாய் காட்சி தருகிறார்.

 வேறென்ன சிறப்பு? 

குருவாயூர் கோயில் சதுர வடிவில், மலையாள கட்டிட பாணியில் வடிவமைக்கப்பட்டுள்ளது. இதன் கூரைகள் செப்புத் தகடுகளால் வேயப்பட்டுள்ளன.

இக்கோயில் கிழக்கு கோபுர வாசலில் இருந்தே குருவாயூரப்பனை பக்தர்கள் தரிசிக்கும் படியும், (சித்திரை விஷூ தினத்தன்று) காலைக் கதிரவனின் ஒளிக் கற்றைகள் குருவாயூரப்பன் திருவடிகளில் விழுமாறும் அமைக்கப்பட்டுள்ளது.

குழந்தைகளுக்கு முதல் அன்னமிடுதல் இங்கே சிறப்பு. குழந்தைகளுக்கு முதன் முதலாக இங்கே அன்னம் ஊட்டினால் வாழ்நாள் முழுதும் அந்தக் குழந்தைக்கு ருசியான உணவு கிடைக்கும் என்பதும், உணவுக்குப் பஞ்சம் வராது என்பதும், நோய் நொடிகள் எதுவும் வராது என்பதும் நம்பிக்கை.

கிருஷ்ண அவதாரத்திற்கு முன்பே தன் தாய், தந்தையருக்கு குழந்தை வடிவத்தில் கிருஷ்ணன் காட்சி கொடுத்த சிறப்பு இக்கோயிலுக்கு உள்ளது.

 என்னென்ன திருவிழாக்கள் கொண்டாடப்படுகிறது? 

சித்திரை விஷூ, விருச்சிக ஏகாதசி, ஓணம் பண்டிகை ஆகியவை இங்கு சிறப்பாக கொண்டாடப்படுகிறது.

 எதற்கெல்லாம் பிரார்த்தனைகள் செய்யப்படுகிறது? 

குழந்தைகளுக்கு ருசியான சாப்பாடு கிடைக்கவும், தம்பதியினர் தீர்க்க ஆயுளுடன் வாழவும், வெண்குஷ்ட நோய் உள்ளவர்களும் இங்கு வந்து பிரார்த்தனை செய்கின்றனர்.

 இத்தலத்தில் என்னென்ன நேர்த்திக்கடன்கள் செலுத்தப்படுகிறது? 

இக்கோயிலில் பிரார்த்தனை நிறைவேறியதும் இந்தியாவில் வேறு எங்கும் இல்லாத வகையில் பக்தர்கள் யானைகளை காணிக்கையாக வழங்குகின்றனர் மற்றும் சுவாமிக்கு துலாபாரம் கொடுத்தும் நேர்த்திக்கடனை நிறைவேற்றுகின்றனர்.

🌷🌷