புதீனா பொடி

 புதீனா பொடி ‌-------------------------                          ‌கம கமன்னு வாசனையா ஆளையே தூக்கும் புதினா கார பொடி எப்படி செய்வது பார்க்கலாம் வாங்க.

வாசனையோட நாம் அரைக்கக் கூடிய இந்த புதினா பொடியை சுட சுட சாதத்தில் போட்டு நல்லெண்ணெய் விட்டு பிசைந்து சாப்பிட்டாலும் நன்றாகத்தான் இருக்கும். இட்லி தோசைக்கு நல்லெண்ணெய் விட்டு தொட்டு சாப்பிட்டாலும் நன்றாக தான் இருக்கும். ஆளையை தூக்கும் அளவிற்கு அசத்தலான வாசனை கொடுக்கும் இந்த புதினா பொடி எப்படி செய்வது தெரிந்து கொள்வோம் வாருங்கள். ஆனால் இப்படி புதினா பொடியை அரைத்து வெளியில் ஸ்டோர் செய்து வைத்துக் கொள்ள முடியாது. இரண்டு நாட்கள் மட்டும் தான் நன்றாக இருக்கும். தேவை என்றால் பிரிட்ஜில் வைத்து ஸாடோர் செய்து கொள்ளலாம். தேவைப்படும்போது அப்பப்ப கொஞ்சம் கொஞ்சமா அரைச்சுக்கோங்க.

முதலில் அடுப்பில் ஒரு கடாயை வைத்து 1 ஸ்பூன் எண்ணெய் ஊற்றி வர மல்லி – 2 டேபிள் ஸ்பூன் போட்டு, அதை மணக்க மணக்க வாசம் வரும் அளவிற்கு வறுத்து தனியாக ஒரு தட்டில் வைத்துக் கொள்ளுங்கள். அதே கடாயில் மீதம் இருக்கும் எண்ணெயில் கடலைப்பருப்பு – 2 டேபிள் ஸ்பூன், உளுத்தம் பருப்பு – 2 டேபிள் ஸ்பூன், சேர்த்து இந்த இரண்டு பொருட்களையும் பொன்னிறமாக வறுத்து இதையும் வறுத்த மல்லியோடு கொட்டி வைத்து விடுங்கள்.

மீண்டும் அதே கடாயில் மிளகு – 1/2 ஸ்பூன், சீரகம் – 1/2 ஸ்பூன், வெந்தயம் – 1/4 ஸ்பூன், சேர்த்து வறுத்து இதையும் தட்டில் கொட்டி ஆற வைத்துக் கொள்ள வேண்டும். அடுத்தபடியாக 10 – வர மிளகாய்களைப் போட்டு நன்றாக வறுத்து எடுத்துக் கொள்ளுங்கள். அதே கடாயில் ஒரு கைப்பிடி அளவு புதினா தழைகளை போட்டு ஒரு நிமிடம் வதக்கி விட்டால் புதினா சுருங்கி வந்துவிடும். இதை எடுத்து தனியாக ஒரு தட்டில் வைத்துக் கொள்ளுங்கள். மற்ற பொருட்களோடு சேர்க்க வேண்டாம்.

மிக்ஸி ஜாரில் இப்போது நாம் வறுத்து வைத்திருக்கும் எல்லா பொருட்களையும் போட வேண்டும். வரமல்லி, உளுத்தம் பருப்பு, கடலைப்பருப்பு, மிளகு, சீரகம், வெந்தயம், மிளகாய், தேவையான அளவு உப்பு போட்டு, இதை கொரகொரப்பாக அரைத்துக் கொள்ளுங்கள். இறுதியாக வதக்கி வைத்திருக்கும் புதினா, பூண்டு பல் – 5, இந்த இரண்டு பொருட்களை போட்டு ஒரு ஓட்டு ஓட்டி மிக்ஸியை திறந்தால் மணக்க மணக்க காரசாரமான புதினா பொடி தயார்.

அவ்வளவு தாங்க. இந்த வாசத்திற்கு நம்ம வீட்ல இருக்கிறவங்க எல்லோரும் அடிமையாகி விடுவாங்க. இந்த ஸ்பெஷலான பொடி ரெசிபியை யாருமே மிஸ் பண்ணாதீங்க. ட்ரை பண்ணி பாருங்க.

சுட சுட சாதத்தை வடித்து வைத்துவிட்டு ஆற வைத்துக் கொள்ளுங்கள். ஒரு கடாயில் எண்ணெய் ஊற்றி கடுகு, வர மிளகாய், உளுத்தம்பருப்பு, கடலைப்பருப்பு, முந்திரி பருப்பு, போட்டு வறுத்து இந்த பொடியை அந்த எண்ணெயில் போட்டு உடனடியாக வடித்து வைத்த வெள்ளை சாதத்தை போட்டு அப்படியே கலந்து லஞ்ச் பாக்ஸில் கொடுத்து விட்டாலும் அம்புட்டு சுவையாக தான் இருக்கும். ட்ரை பண்ணி பாருங்க.