ஆத்மா நந்தா -20

 ஆத்மா நந்தா -20

By N Krishnamurthy 

தெக்ஷிணாமூர்த்தி நம்பூதிரியிடம்" எனக்கும் என் மனைவிக்கும் நெடுநாள் குழந்தை இல்லாமல் இருந்தது. குருவாயூரப்பன் அருளால் சில வருடங்களுக்கு முன்பு குழந்தை பிறந்தது. குழந்தைக்கு நந்த கிஷோர் என்று பெயரிட்டு இருக்கிறோம். இப்பொழுதுதான் அவன் மழலையில் மலையாளத்தில் சில வார்த்தைகளை பேச ஆரம்பித்திருக்கிறான். திடீரென்று தமிழ்நாட்டிலிருந்து வந்த குடும்பத்துடன் அவன் தமிழில் ஓரளவுக்கு நன்றாக பேச ஆரம்பித்தது எப்படி சாத்தியம் என்று எங்களுக்கு தெரியவில்லை. இதனால் குழந்தைக்கு பிற்பாடு ஏதாவது தொல்லை வருமோ என்று நினைத்து பயமாக இருக்கிறது. எதனால் அவன் இப்படி இருக்கிறான். இதற்கு தீர்வு உண்டா என்றெல்லாம் நீங்கள் சொல்ல வேண்டும்" என்று கேட்டுக்கொண்டார். இதைக் கேட்டவுடன் கணேசன்  நம்பூதிரி மீண்டும் கண்களை மூடிக்கொண்டு ஐந்து நிமிடம் தியானத்தில் இருந்தார் . சோழிகளை குலுக்கி,எதோ மந்திரம் ஜெபித்து ,தேக்குப்பலகையின் மேல் சோழிகளை போட்டார். நிமிர்ந்திருந்த சோழிகளின் எண்ணிக்கையை பார்த்துக் கொண்டு, மனத்தில் ஏதோ கணக்கு போட்ட மாதிரி செய்து கொண்டிருந்தார். பின்னர் அவர்  தெக்ஷிணாமூர்த்தியிடம் " நான் சொல்லப் போவதை கவனமுடன் கேளுங்கள். இதை யாரிடமும் நீங்கள் சொல்ல வேண்டாம். சொன்னாலும் யாரும் இதை நம்ப கூட மாட்டார்கள். உங்களது குழந்தை ஒரு அதிசய குழந்தை. அவனுக்கு போன ஜென்மத்து ஞாபகம்  இன்னும் இருக்கிறது . போன ஜென்மத்தில்  அவன்  தமிழ்நாட்டில் ஒரு பிராமணனாக பிறந்திருக்கிறான். அவன் இறக்கும் தருவாயில் அவன் நினைத்த தெய்வம் அவனை இந்த ஜென்மத்தில் தனக்கருகில், குருவாயூரிலே பிறக்கச்செய்திருக்கிறது. எனவே தான் இந்த ஜென்மத்தில் அவனுக்கு தமிழ் பாஷை பேச வருகிறது. இதனால் நீங்கள் ஒன்றும் கவலைப்பட வேண்டாம்" என்று கூறினார். இதைக் கேட்ட தெக்ஷிணாமூர்த்தி  மிகவும் ஆச்சரியமாகி கணபதி நம்பூதிரியிடம் மிகவும் பவ்யமாக "இதனால் அவனுக்கு ஏதேனும் ஆபத்து நேரிடுமா? மேலும் இதற்கு ஏதேனும் பரிகாரம் உள்ளதா" என்று கேட்டார். அதற்கு கணேசன்  நம்பூதிரி " நீங்கள் குருவாயூரில் பகவான் கிருஷ்ணனுக்கு பக்கத்தில் இருக்கிறீர்கள். அவருடைய காருண்யத்திற்கு   பாத்திரமாகி  இருக்கிறீர்கள் . எனவே உங்கள் குழந்தைக்கு இது விஷயத்தில் ஒன்றும் நடக்காது. சீக்கிரமே ஒரு நிகழ்ச்சி நடக்கும். அந்த நிகழ்ச்சியில் அவன் கலந்து கொள்வான். அந்த நிகழ்ச்சி ஒரு நல்ல நிகழ்ச்சியாக இருக்காது. ஆனால் உங்கள் மகனுக்கு அந்த நிகழ்ச்சியில் கலந்து கொள்வதால் எந்த தீங்கும் வராது. அந்த நிகழ்ச்சியில் அவன் கலந்து கொண்ட பிற்பாடு அவனுக்கு பூர்வ ஜென்மம் ஞாபகம் முற்றிலும் மறந்து விடும். அத்தோடு அவன் தமிழ் பாஷையை மறந்து விடுவான்" என்று கூறினார்.

இதைக்கேட்டு தெக்ஷிணாமூர்த்தி மிகவும் ஆறுதல் அடைந்தார். கணசேன்  நம்பூதிரியை  பார்த்து அவர் " தக்ஷிணை எவ்வளவு கொடுக்க வேண்டும் "என்று கேட்டார். அதற்கு நம்பூதிரி அவர்கள்" நான் இவ்வளவு தான் கொடுக்க வேண்டும் என்று யாரையும் நிர்பந்தப்படுத்துவதில்லை. உங்களுக்கு எவ்வளவு கொடுக்க வேண்டும் என்று தோன்றுகிறதோ அதை கொடுங்கள். அது தவிர கோவிலுக்கு அவசியம் ஏதாவது டொனேஷன் கொடுத்து விட்டு செல்லுங்கள்" என்று கூறினார்.ஒரு 500 ரூபாய் நோட்டை எடுத்து அங்கிருந்து தட்டில் வைத்த தெக்ஷிணாமூர்த்தி அவரை நமஸ்கரித்தார். அதை எடுத்துக்கொண்டு நம்பூத்ரி"ச்ரேயசா இருக்கணம்.  ரொம்ப சந்தோஷம் .சென்று வாருங்கள்" என்று கூறினார். கோவில் தேவஸ்தான அறைக்கு சென்று ஆயிரம் ரூபாய் நன்கொடையாக கொடுத்தார் தெக்ஷிணாமூர்த்தி.

வெளியே வந்து கிடைத்த பஸ்ஸில் திருச்சூருக்கு சென்றார்.இறங்கியதும் அருகிலிருந்த ஹோட்டலில் சாப்பிட்ட பின்னர்,கவலை தீர்ந்து,மிகவும் லேசான மனத்துடன் சந்தோஷமாக குருவாயூர் செல்லும் பஸ்ஸில் ஏறி அமர்ந்த அவருக்கு ஒரு ஆச்சர்யம் காத்துக்கொண்டிருந்தது.