ஆத்மாநந்தா-12

 ஆத்மாநந்தா-12

By N Krishnamurthy 

கார்த்தயாயினி வந்தது மிகவும் உபயோகமாக இருந்தது. சமையல் மற்றும் வீட்டு வேலைகளை அவள் பார்த்துக் கொண்டாள். பத்து பாத்திரம் துலக்குவதற்கும், துணிமணி துவைப்பதற்கும் ஒரு பெண்ணை ஏற்பாடு செய்திருந்தார்கள். 

கார்த்தயாயினி மகளுக்கு விதவிதமாக சமைத்து போட்டுக் கொண்டிருந்தாள். 

மாலை சுவாமி தரிசனம் முடித்த பின்னர் சீக்கிரமே உணவு அருந்திவிட்டு, தெக்ஷிணாமூர்த்தியும், வசந்தியும் கோவிலை சுற்றியுள்ள தெருக்களில் கோவிலை சுற்றி  பிரதக்ஷணமாக  வாக்கிங் போய்விட்டு வருவதை வழக்கமாகக் கொண்டிருந்தார்கள்.

டாக்டர் ருக்மணியிடம் வசந்தி ரெகுலராக செக்கப்புக்கு சென்று வந்தாள்.டாக்டர் குழந்தையின் வளர்ச்சி சரியாக இருப்பதாக கூறினாள்.வசந்தி குழந்தை வயிற்றில் எட்டி உதைப்பதை உணர ஆரம்பித்தாள்.

காலையிலும், மாலையிலும் தம்பதிகள் இருவரும் நாராயணீயம் பாராயணம் செய்ய மறப்பதே இல்லை. தெக்ஷிணாமூர்த்திக்கு காத்ரமான சாரீரம். அவரது அம்மா கர்னாடக சங்கீதம் முறையாக பயின்றிருந்ததால் வீட்டில் எந்நேரமும் பாட்டுதான். இந்த சூழலில் வளர்ந்திருந்ததால் 

தெக்ஷிணாமூர்த்திக்கும் ராகங்கள் தெரியும்.

நாராணீயம் நூறாவது சதகத்தில் வரும் "யோகீந்த்ராணம் த்வதங்கே ஷ்வதி கஸு மாதுரம்"ஸ்லோகத்தை வலஜியில் அவர் பாடினால் கேட்பவர்கள் மெய் மறப்பர். அவர் அதை பாடப்பாட வசந்தி 

"ஹே.குருவாயூரப்பா.

உன் பாதமூலமே யோகீஸ்வரர்களுக்கு மிக மிக ப்ரியமானது. பக்தர்கள் விரும்பவதை அளிக்கும் கற்பக விருக்ஷம் போன்ற உன் கமல பாதங்கள் எப்போதும் என் சித்தத்தில் இருந்து, பரமானந்தமான மோக்ஷத்தை எனக்கு அளிக்கட்டும்" என்ற அந்த ஸ்லோகத்தின் பொருளை எண்ணி எண்ணி ஆனந்தக்கண்ணீர் வடிப்பாள்.

காலம் ஓடியது.

ராமசந்திரனின் சீமந்தத்திற்கு நாள் குறித்தார்கள். அவன் சீமந்தத்தை குருவாயூரிலே வைத்துக் கொள்ளலாம் என்று தெக்ஷிணாமூர்த்தி அவிப்பிராயப்பட்டார். அதன்படியே குருவாயூரில் ஒரு சிறு மண்டபத்தை ஏற்பாடு செய்தார்கள். விஜயலட்சுமியை சேர்ந்தவர்கள் சுமார் 10 பேர் பாலக்காட்டில் இருந்து வந்திருந்தார்கள். சீமந்தம் விமர்சியாக கொண்டாடப்பட்டது.

 இது முடிந்த இரண்டு மாதம் கழித்து தெக்ஷிணாமூர்த்தி சீமந்தத்திற்கு நாள் குறிக்கப்பட்டது.

தக்ஷிணாமூர்த்திக்கு பெறோர்கள்  இல்லாததால், அவர் காலடிக்கு சென்று அவருடைய சித்தப்பா சதானந்தத்தை பார்த்து அவரையும், சித்தி சரஸ்வதியையும் சீமந்தத்தை நடத்தித்தறுமாறு  வேண்டிக்கொண்டார். அவர்கள் இருவரும் தெக்ஷிணாமூர்த்தி சீமந்தத்திற்கு வந்திருந்தார்கள். மற்றபடி ராதகிருஷ்ணன்  பக்கத்தில் இருந்து பத்திலிருந்து, பதினைந்து பேர் வரை உறவினர்கள் கூடி இருந்தார்கள். .தெக்ஷிணாமூர்த்தி சீமந்தமும்  விமர்சையாக கொண்டாடப்பட்டது.

அடுத்த வாரம் ஒரு நாள் ராமச்சந்திரன் போன் செய்தான். அவன் அக்காவிடம் " அக்கா இப்போ அஞ்சு நிமிஷத்துக்கு முன்னால் கல்பாத்தியிலிருந்து போன் வந்தது. விஜிக்கு பெண் குழந்தை பிறந்திருக்கிறது" என்றான். இதைக் கேட்ட வசந்தி "ரொம்ப சந்தோஷம் டா" என்று கூறி போனை அம்மாவிடம் கொடுத்தாள். கார்த்தயாயினி  அவனிடம் "ரொம்ப சந்தோஷமா இருக்குடா. குழந்தை யார் ஜாடை ?எவ்வளவு வெயிட்? பிரசவம் நார்மலா சிசேரியனா?" என்றெல்லாம் கேட்டாள். எல்லாவற்றிக்கும் பொறுமையாக பதில் சொன்னான் ராமச்சந்திரன்.

வசந்திக்கு டாக்டர் கொடுத்திருந்த நாள் நெருங்கிக் கொண்டிருந்தது.

ஒரு வியாழக்கிழமை சாயங்காலம் அவளுக்கு லேசாக வலி எடுத்தது. நேரமாக ஆக  வலி அதிகமாகி போகவே டாக்டர் ருக்மணி நர்சிங்

ஹோமில்  அவளை கொண்டு போய் சேர்த்தார்கள்.