தன்வினை....-25

 நேற்றய Post 24,25 களை 23,24 எனப்படிக்கவும்.

தன்வினை....-25

By N Krishnamurthy 

ஆமாம். அவர்களுக்கு ஆச்சர்யம் சிதம்பரத்தை அங்கே பார்த்ததும் ஏற்பட்டது. சிதம்பரம் அங்கு வருவதாக சொல்லவில்லை. 

"என்ன சிதம்பரம் சார். இப்படி சர்ப்ரைஸ் கொடுக்கறீங்க"என்றார் கணேசன். "எனக்கு ஏற்பட்ட  சர்ப்ரைஸ்னால உங்களுக்கு சர்ப்ரைஸ் கொடுத்தூட்டேன்"என்றார். "புரியலையே சார்"என்றான் ஜகன்.

சிதம்பரம் "இன்னிக்கு நான் ஒரு கல்யாணம் அடண்ட் பண்ண கோயம்புத்தூருக்கு  வர வேண்டியிருந்தது.

லாஸ்ட் மினிட்ல கல்யாணம் கேன்சலாய்ட்த்து. கல்யாண பொண் நிச்சயதார்த்தத்துக்கு தான் வாங்கி கொடுத்த சேண்டல் கலர் சட்டையை போட்டுக்காம, மாப்பிள்ளை பையன் அவளுக்கு அவ்வளவா பிடிக்காத ப்ளு கலர் சட்டையை போட்டுண்டூட்டானம்.

இப்பவே என் சொல்லுக்கு இவன் மதிப்பளிக்காம இருந்தா,கொற நாளும் இவன் கூட குப்ப கொட்ட முடியாதூன்னு கல்யாணத்தை கால் ஆஃப் பண்ணீட்டா அந்த பெண்.நான் பாத்தேன். ஏற்கனவே புக் பண்ணியிருந்து ட்ரெயின் டிக்கட்டை வேஸ்ட் பண்ணாம கோவைக்கு வந்து, அங்ககேந்து பஸ் பிடிச்சு, நேத்து சாயங்காலம் குருவாயூர் போய் உன்னி கிருஷ்ணனை மனசார தரிசனம் பண்ணிண்டு, ராத்திரி திருச்சூர்ல ஒரு ரூம் எடுத்து தங்கீட்டு, கார்த்தால குளிச்சு ரெடியாய்ட்டு ஸ்டேஷன் வந்திருக்கேன் "என்று நீண்டதொரு விளக்கம் அளித்தார். ஜகன் அவரிம் "சார். காபி சாப்பிடலாமா" என்றான். "Never say no to coffee" என்றார் சிதம்பரம். VLR ல் நுழைந்து காபி அருந்தினர். "எப்படிம்மா இருக்கே "என்றார் சிதம்பரம்.

அவரது அதிர்ஷடம் வினயா  நார்மலாக இருந்தாள். "நண்ணா இருக்கேன் மாமா"என்றார்.(வினயாவிற்கு பரிகாரத்திற்காக கேரளா போகிறோம் என்று சொன்னால் ரகளை பண்ணி விடுவாள் என்று பயந்த கணேசன் ஒரு வாரம் கேரளாவை சுற்றிப்பார்க்க போவதாக அவளிடம் பொய்  சொல்லியிருந்தார். ஞாபகமாக இதை ஜகனிடமும், சிதம்பரத்திடமும் அவர் கூறியிருந்தார்). சிதம்பரம் கணேசனிடம், வினயாவிற்கு கேட்குமாறு "வந்தது தான் வந்தேன். உங்க கூட ஒரு நாள் இருந்து கேரளா பாத்தூட்டு போலாம்னு நெனக்கிறேன்  "என்றார்.

." You are most welcome மாமா"என்றான் ஜகன். "முதல்ல எங்கே போறோம் "என்றாள் வினயா ஆவலாக. "முதல்ல பெருவனம்ன்ற கிராமத்தை பாக்க போறோம்" என்றான் ஜகன். 

அவர்கள் அனைவரும் ஸ்டேஷனை விட்டு வெளியே வந்ததும் ஜகன் பெருவனம் போக டாக்சி ஏற்பாடு பண்ணினான். ஒன்றரை  மணி  சுமாரான பாதையில் ஒடிய டாக்சி பெருமனம் கிராமத்தை அடைந்தது. அங்கிருந்த ஒருவரிடம்"கேசவதாஸ் க்ரஹம் எவ்விட"என்று கேட்க அவர் "அக்ராஹாரத்துல நுழுந்ததும்  வலப்புறம் மூணாமன்னம் வீடு"என்றார். வண்டி அக்ராஹாரத்தில் நுழைந்ததுதான் தாமதம், வினயா உடலை முறுக்கிக்கொண்டாள்.

கண்கள் சிவக்க கணேசனை பார்த்து "டேய். இங்க கூட்டிண்டு வந்தூட்டயா. நான் எறங்க மாட்டேன் "என்றவள், ட்ரைவரை பார்த்து "என்ன தைர்யம் இருந்தா என்ன இங்க கூட்டிண்டு வருவ. உன்னை கொல பண்ணிடுவேன்.வண்டிய திருப்புடா"என்று கத்தினாள். அவளை கணேசனும், விமலாவும் அழுத்திப்பிடித்தனர். ஒருவழியாக கேசவதாஸ் வீட்டை கண்டு பிடித்ததும், சிதம்பரம் வண்டியிலிருந்து இறங்கி வீட்டு வாசலில் நின்று கொண்டிருந்தவரிடம் "கேசவதாஸ் வீடு இதானே"என்றார். "அதே" என்ற அந்த நபர் "ஞான்தான் கேசவதாஸ்"என்றார்.

பரங்கிப்பழம் போன்ற நிறத்திலிருந்த அவர் காவி வேட்டி உடுத்தியிருந்தார். திறந்த மார்பில் பூணல் தொங்கியது. நெற்றியில் விபூதி பட்டையும், அதன் மேல் சிறிய ஒரு ரூபாய் நாணயம் அளவிற்கு கருப்பு சாந்து பொட்டும்  தரித்திருந்தார். மொத்தத்தில் பார்த்தால்  கும்பிடத்தோன்றும் தோற்றம்.

 சிதம்பரம் "நான் சிதம்பரம் "என்றவுடன் "வாங்கோ" என்றழைத்தவர் அங்கிருந்த இரு வாட்டசாட்டமான பெண்களிடம் மலையாளத்தில் ஏதோ சம்சாரித்தார். அவர்கள் இருவரும் கார் அருகே போய், வினயாவை இழுத்து,கட்டித்தூக்காத குறையாக உள்ளே கொண்டு சென்றனர்.  

சிதம்பரம் அவருக்கு  எல்லோரையும் அறிமுகம் செய்தார். "எல்லோரும் ஸ்னானம் பண்ணீட்டு வாங்கோ. ப்ராபளம் இருக்கற பெண் குட்டி  தவிர மீதி எல்லோரும் டிபன் சாப்பிடுங்கோ. இன்னிக்கே பூஜைஆரம்பிக்க போறேன்"என்றார். அவர்களுக்கு அலாட் பண்ணியிருந்த அறையில் நுழைந்தனர். 

"வினயா காணோமே" என்றாள் விமலா.

அங்கு வந்த கேசவதாசின் உதவியாள் அர்ஜுன் "ஆ பெண் குட்டியை ஸ்னானம் பண்ண அந்த பெண்கள் கூப்டுண்டு போயிருக்காங்க" என்றார்.

 பின்குறிப்பு: பெருவனம் என்பது உண்மையிலேயே திருசூர் அருகிலுள்ள மலையாள பிராமணர்கள் வசிக்கும் கிராமம். கேசவதாஸும் அவரை சேர்ந்தவர்களும் வெறும் கற்பனை. இனி வினயாவிற்கு பரிஹாரத்திற்காக செய்யப்படும் பூஜைகளும் கற்பனையே.