ரகோபதேஸம்_19

 #ரகோபதேஸம்

எழுதியது பாஸ்கர் சத்யா 

#ரகோபதேஸம்_19

நமஸ்காரங்களையும் அபிவாதனத்தையும் குருநாதருக்கு சமர்ப்பித்து விட்டு அவருடைய ஆசிகளோடு அவருக்கு முன்னால் அமர்கிறேன்.

'இன்னிக்கு குறிப்பா ஏதாவது சொல்லித் தரதா சொல்லிருந்தேனா?'

'ஆமாம் மாமா. லக்ஷ்மி அஷ்டகம் சொல்லித்தரதா சொன்னேள்.'

'அப்படியா? தற்செயலா இன்னிக்கு வெள்ளிக்கிழமையாவும் இருக்கு. நீ அதிர்ஷ்டக்காரன் தான் போ.'

அவர் எப்போதுமே இப்படித்தான். எனக்கு சில சமயம் கர்வமே வரும் அளவுக்கு எதையதையோ முடிச்சுப்போட்டு புகழ்ந்து‌ விடுவார். அதிர்ஷ்டக்காரன், சமத்து, கெட்டிக்காரன் .... இப்படி ஏதாவது ஒன்று அவருடைய அபிலாஷை சேர்ந்த பாராட்டுகளாகவோ ஆசிகளாகவோ கிடைத்து என் மனதை சிறிது நேரம் உச்சாணிக் கொம்பில் வைத்துவிடும்.

பல வருடங்கள் கடந்தும் இன்று‌ கூட அவர் என்னை அடிக்கடி அன்று புகழ்ந்ததை நினைத்து எனக்குள் நானே சிரித்துக் கொள்வேன்.

'சரிடா ஆரம்பிச்சுடுவோம். அதுக்கு முன்னாடி அங்க ஒரு சின்ன மர ஷெல்ஃபுல புஸ்தகங்களை எல்லாம் அடுக்கி வெச்சிருக்கேன் பார்த்தியா. அந்த புஸ்தகங்களை கலைக்காமல் அப்படியே எடுத்துண்டு வா. எட்டலைனா அந்த சின்ன ஸ்டூல் போட்டுண்டு ஜாக்கிரதையா ஏறு.'

அப்படியே செய்கிறேன். அந்த புத்தகங்களை ஒவ்வொன்றாக பார்த்துக்கொண்டே கைக்கு அடக்கமான ஒரு புஸ்தகத்தை எடுத்து என்னிடம் தருகிறார். அந்த புத்தகத்தின் மேலே மஹாலக்ஷ்மி ஸ்தோத்திரங்கள் என்று எழுதப்பட்டிருந்தது.

'இந்தப் புஸ்தகத்துல லக்ஷ்மி அஷ்டகம் இருக்கும் பாரு. அத பிரிச்சி வெச்சுக்கோ ரெடியா.'

'ஸ்லோகங்களுக்குள்ள போறதுக்கு முன்னாடி இந்த அஷ்டகத்தை பத்தி தெரிஞ்சுக்கோ. அஷ்டகம் அப்படிங்கறதுக்கு எட்டுப் பொருள்களைக் கொண்டது என்பது பொருள். ஈரடி ஸ்லோகங்கள கொண்டது இந்த அஷ்டகம். இந்த ஸ்லோகங்கள் இந்திரனால் மஹாலக்ஷ்மியை துதித்து பாடப்பட்டதா பத்ம புராணம் சொல்றது.'

அவர் இப்படி சொல்லிக்கொண்டே இருக்க நான் அதைக் கேட்டுக்கொண்டே அந்த லட்சுமி அஷ்டகத்தில் எட்டு ஸ்லோகங்கள் இருக்கின்றனவா என்று எண்ணிக் கொண்டிருக்கிறேன்.

'மாமாஆஆஆ... எட்டு ஸ்லோகம்னு சொன்னேளே. ஆனா அதுக்கு மேல இருக்கே?'

'அவசர குடுக்க. அதுக்குள்ள ஸ்லோகங்கள எண்ணியாச்சாக்கும்?'

என் ஆர்வத்தில் இருக்கும் அவசரம் இன்று அவருக்கு புரியாதா என்ன? இருப்பினும் அவசரக்குடுக்கை பட்டத்திற்கு சிரிக்காமல் இருக்கமுடியுமா என்ன?

'இது லட்சுமி அஷ்டகம் தான். எட்டு சுலோகங்கள் தான். அந்த எட்டு சுலோகங்களை தாண்டி வருகிற கடைசி மூன்று ஸ்லோகங்கள் இந்த லஷ்மி அஷ்டகத்தை படிக்கிறதால நமக்கு கிடைக்கக்கூடிய பலன்கள் என்னென்ன அப்படின்னு சொல்றது. இப்ப நோக்கு சந்தேகம் தீர்ந்துடுத்தோன்னோ?'

என் அசட்டு சிரிப்பிற்கு பிறகு அவரை தொடர்கிறேன்

'நான் பொதுவாவே இந்த லக்ஷ்மி அஷ்டகத்த எல்லாரும் கத்துக்க சொல்வேன் குறிப்பா குழந்தைகள. இதுல இருக்கற பெரும்பாலான சமஸ்க்ருத வார்த்தைகள் நாம எல்லோரும் அன்றாடம் சம்பாஷணைகள்ல பயன்படுத்தற வார்த்தைகளா இருக்கு. அப்படி இருக்கறதால இந்த ஸ்லோகங்கள சொல்லும்போது சமஸ்கிருதம் தெரியாதவா கூட யதார்த்தமாகவே அர்த்தங்களை உள்வாங்கிக்க முடியறது.'

'உதாரணமா முதல் ஸ்லோகத்தை எடுத்துக்கோயேன்:

நமஸ்தேஸ்து மஹாமாயே ஸ்ரீ பீடே ஸுரபூஜித

ஸங்க சக்ர கதா ஹஸ்தே மஹாலக்ஷ்மி நமஸ்துதே'

குருநாதருக்கே உண்டான கணீர் குரலில் நிறுத்தி நிதானமாக அவர் இதை சொல்லும்போது நான் மெய்மறந்து கேட்டேன் என்றால் கூட அது மிகையல்ல. அவர் இந்த ஸ்லோகத்தை ஒரு சிறிய ராகத்தில் சொன்னது எனக்கு வியப்பாக கூட இருந்தது.

'நமஸ்தே, மஹாமாயே, ஸ்ரீ பீடம், பூஜிதே, சங்கு, சக்கரம், கதை, மஹாலட்சுமி ... இப்படி வருகிற வார்த்தைகள் நாம தினமும் பயன்படுத்தற வார்த்தைகள் தானே? இதைத்தான் சொன்னேன். இந்த வார்த்தைகளை வெச்சிண்டே நம்மளால இந்த சுலோகத்துக்கு உண்டான அர்த்தத்தை ஈஸியா புரிஞ்சிக்க முடியும்.'

'இப்போ இந்த ஸ்லோகத்தோட அர்த்தத்தை சொல்றேன் கேளு.'

'படைப்பின் மூல காரணங்களாக விளங்குபவளும், ஸ்ரீபீடத்தில் வைத்து ஸூரர்களால் வணங்கப்படுபவளும், அழகிய கரத்தில் சங்கையும், சக்கரம், கதை வைத்திருப்பவளுமான மஹாலக்ஷ்மியை வணங்குகிறேன்.'

'ஹஸ்தம்னா கை அதாவது கரம்'

'இப்போ ரெண்டாவது ஸ்லோகம் சொல்றேன். நீயே அதுக்கான அர்த்தத்தை யூகிக்க முடியறதான்னு பார்க்கறேன்.'

இரண்டாவது ஸ்லோகத்தை அதே த்வனியில் அதே ராகத்தில் சொல்கிறார்.

நமஸ்தே கருடாரூடே கோலாஸுர பயங்கரி

ஸர்வபாப ஹரே தேவி மஹாலக்ஷ்மி நமஸ்துதே

'எங்க, நீயா கொஞ்சம் இந்த ஸ்லோகத்தின் வார்த்தைகள‌ வெச்சிண்டு அர்த்தத்தை யூகிச்சு சொல்லு பார்ப்போம்?'

அவர் எனக்கு கொடுத்த லக்ஷ்மி அஷ்டகம் புத்தகத்தில் இருந்த இரண்டாவது ஸ்லோகத்தின் வரிகளை எழுத்துக்கூட்டி இரண்டு மூன்று முறை படிக்கிறேன். ஏதோ ஒரு தெம்பு என்னை தொற்றிக் கொண்டதாகவே உணர்ந்து அர்த்தத்தை சொல்ல முயற்சிக்கிறேன்.'

'கருடன் அசுரர்கள் பயங்கரம் பாவங்கள் போக்கும் மஹாலக்ஷ்மி நமஸ்கரிக்கிறேன். இப்படித்தான் எனக்கு புரிஞ்ச மாதிரி இருக்கு மாமா.'

துண்டு துண்டாக அந்த ஸ்லோகத்தில் நான் கண்ட வார்த்தைகளை நீட்டி இழுத்து சொல்கிறேன்.

'அவ்வளவுதான்டா. எல்லா வார்த்தைகளையுமே சுலபமா பிடிச்சுட்ட. இப்ப அந்த வார்த்தைகளை கோர்வையா‌ சேர்த்தா நமக்கு அர்த்தம் கெடச்சுட போறது.'

இப்படி என்னை ஊக்குவித்து விட்டு அவர் ஸ்லோகத்துக்கு உண்டான அர்த்தங்களை கூறுகிறார்.

'கருட வாகனத்தில் அமர்ந்திருப்பவளும், கோலாஸூரர்களுக்கு அச்சுறுத்தலாக இருப்பவளும், நம் சகல பாவங்களையும் நீக்குபவளுமான மஹாலக்ஷ்மியை வணங்குகிறேன்.'

நான் புரிந்து கொண்ட வார்த்தைகளை கோர்வையாக அவர் சேர்த்து அர்த்தம் சொன்னது எனக்கு ஒரு ஆனந்த சிரிப்போடு ஏதோ ஒன்றை சாதித்த உணர்வையும் சேர்த்தே கொடுத்தது.

'மாமா ஃபெண்டாஸ்டிக். இந்த லக்ஷ்மி அஷ்டகம் ரொம்ப பிரமாதமா புரியறது மாமா.'

'எல்லாருக்குமே புரியும். எங்க பாஸுவுக்கு புரியாம போயிடுமா என்ன?'

'சரி. இப்போ மூணாவது பாராவுக்கு போகலாம். இந்த புஸ்தகத்தை ஆத்துக்கு எடுத்துண்டு போயி ஆற அமர உட்கார்ந்து ஸ்லோகங்களில் இருக்கும் வார்த்தைகளை வெச்சிண்டு நீயா அர்த்தங்களை கோர்வையா கொண்டுவர முயற்சி பண்ணு. இப்ப நான் மேலோட்டமா அர்த்தங்களை மாத்திரம் சொல்லிண்டு போறேன். நான் சொன்ன மாதிரி நிறுத்தி நிதானமா அப்புறமா யோசிச்சு அர்த்தங்களை நன்னா க்ரஹிச்சுக்கோ.'

'இப்போ மூணாவது ஸ்லோகம்:

ஸர்வக்நே சர்வ வரதே ஸர்வதுஷ்ட பயங்கரி

ஸர்வதுக்க ஹரே தேவி மஹாலக்ஷ்மி நமஸ்துதே

அனைத்தையும் அறிந்தவளும், அணைத்து வரங்களைக் கொடுப்பவளும், துஷ்ட குணங்களை அழிப்பவளும், துக்கங்களை அழிப்பவளும் ஆகிய மகாலட்சுமியை நமஸ்கரிக்கிறேன்.

ஸித்தி புத்தி ப்ரதே தேவி புக்திமுக்தி ப்ரதாயினி

மந்த்ர மூர்த்தே ஸதாதேவி மஹாலக்ஷ்மி நமஸ்துதே

சாதனைகள் புரிந்து நல்ல முறையில் வாழ புத்தியை அளிப்பவளும், இந்த உலகில் செழிப்புடன் வாழ்ந்து அவளின் பாத கமலங்களை அடைய அருள்பவளும், மந்திரங்களின் சூட்சும ஸ்வரூபமாக எப்போதும் விளங்குபவளுமான மஹாலக்ஷ்மியை வணங்குகிறேன். இந்த மந்திரத்தில் வரக்கூடிய ஸதா தேவி அப்படிங்கறதுல ஒரு விசேஷம் இருக்கு. சதா சர்வ காலம் அப்படின்னு சொல்றோம் இல்லையா. அந்த வார்த்தைக்கு எப்போதும் அப்படின்னு தானே பொருள். அந்தப் பொருள்ளதான் ஸதா தேவி .. அதாவது எப்போதுமே சூட்சம ஸ்வரூபமா விளங்குபவள் அப்படின்னு புரிஞ்சுக்கணும். எப்போதும் அப்படி இருக்கறவள சதா நாம நெனச்சிண்டு சூக்ஷம சக்திகள பெறுவதற்கு உண்டான தகுதிகளை வளர்த்துக்க‌ முடியும்.

இப்போ அடுத்த வரிகள பாப்போம்.

ஆத்யந்த ரஹிதே தேவி ஆதிசக்தி மஹேஸ்வரி

யோகக்நே யோக ஸ்ம்பூ தேவி மஹாலக்ஷ்மி நமஸ்துதே

ஆதி அந்தம் இல்லாதவளும், சகல விஷயங்களுக்கு பின்னால் இருப்பவளும், யோகமாக பிறந்தவளும், யோகத்தால் இணைந்தவளுமான மஹாலக்ஷ்மியை வணங்குகிறேன்.

ஸ்தூல ஸூக்ஷ்ம மஹாரௌத்ரே மஹாசக்தி மஹோதரே

மஹாபாபஹரே தேவி மஹாலக்ஷ்மி நமஸ்துதே

அனைத்து விஷயங்களுக்கும் பின்னால் சூட்சும வடிவத்தில் ஆதார சக்தியாக விளங்குபவளும், பயங்கர வடிவத்தில் ருத்ரணியாக விளங்குபவளும், பெரும் சக்தியின் பிறப்பிடமாக விளங்குபவளும், அனைத்து பாபங்களையும அழிப்பவளும் ஆகிய மஹாலக்ஷ்மியை வணங்குகிறேன்.

பத்மாஸன ஸ்திதே தேவி பரப்பிரஹ்ம ஸ்வரூபினி

பரமே ஸி ஜகன்மாத: மஹாலக்ஷ்மி நமஸ்துதே

தாமரை ஆசனத்தில் சாந்தம் தவழும் முகத்துடன் அமர்ந்திருப்பவளும், உயர்ந்த ப்ராமணியாக விளங்குபவளும், இப்பிரஞ்சத்தின் உயர்ந்த கடவுளாக, தாயாக விளங்குபவளுமான மஹாலக்ஷ்மியை வணங்குகிறேன். இந்த இடத்துல பரப்பிரம்மம் அப்படிங்கிற வார்த்தை வர்றது இல்லையா? சமஸ்கிருதத்துல பர என்கிற சொல்லுக்கு மேலான அப்படிங்கிற பொருள். பிரம்மம் அப்படிங்கறதுக்கு அனைத்து அண்டங்கள். அதாவது பிரபஞ்சத்துல இருக்குற அனைத்து உயிரினங்களையும் படைத்து காத்து பின்னாடி அவைகள தன்னோடையே மறைத்து வைத்துக் கொள்ளும் 

ஸ்வேதாம் பரதரே தேவி நானாலங்கார பூஷிதே

ஜகத்ஸ்திதே ஜகன்மாத: மஹாலக்ஷ்மி நமஸ்துதே

தூய்மையின் அம்சமான வெள்ளை உடையை அணிந்திருப்பவளும், பலவித ஆபரணங்கள் அணிந்திருப்பவளும்,

பிரபஞ்சத்தில் தாய்க்கு தாயாக காப்பவளுமான மஹாலக்ஷ்மியை 

வணங்குகிறேன்.

'இத்தோட எட்டு ஸ்டான்ஸாக்களும் முடிஞ்சிடுத்து. இதுக்கு அப்புறம் வரக்கூடிய மூணு ஸ்லோகங்கள் நான் ஏற்கனவே சொன்னேனே ... இந்த அஷ்டகத்த படிக்கறனால ஏற்படக்கூடிய பலன்கள சொல்ற ஸ்லோகங்கள்.'

மஹாலக்ஷ்மியஷ்டகம் ஸ்தோத்ரம் ய : படேத் பக்திமான் நர :

ஸர்வ ஸித்தி மவாப்னோதி ராஜ்யம் ப்ராப்னோதி ஸர்வதா

யார் ஒருவர் இந்த மஹாலக்ஷ்மி அஷ்டகத்தை பக்தியுடன் சொல்கிறார்களோ அவர்கள் சகலவிதமான சம்பத்துக்களையும் பெற்று அன்னையின் காலடிகளை அடைவார்கள்.

ஏக காலே படேந் நித்யம் மஹா பாப விநாஸணம்

த்விகாலம் ய : படேந்நித்யம் தனதான்ய ஸமன்வித:

இந்த ஸ்லோகத்தை தினமும் ஒரு முறை சொல்லிக் கொண்டு வந்தால் அனைத்து பாவங்களும் நீங்கும்.

இரு முறை சொல்லிண்டு வந்தா தனங்களையும், தான்யங்களையும் அடைவோம்.

த்ரிகாலம் ய படேந்நித்யம் மஹா ஷத்ரு விநாஷனம்

மஹாலக்ஷ்மீர் பவேந்நித்யம் ப்ரஸன்ன வரதா பவ

மூன்று முறை சொன்னால் நம்முடைய எதிரிகள் அழிவார்கள்.

தினம் இதை கூறி மஹாலக்ஷ்மியின் பரிபூரண அருள் பொங்கிய சாந்த வடிவத்தில் நாம் சகல அனுக்ரஹங்களையும் பெறுவோம்.

'மாமா. யூ ஆர் க்ரேட். இது லக்ஷ்மி அஷ்டோத்ர ஸ்தோத்திரத்த விட ரொம்ப ஈசியா இருக்கு மாமா. நான் வேணு மாமா கிட்ட சொல்லி இந்த அஷ்டகத்தையும் நாங்க தினமும் லட்சுமி நாராயணன் கோவில்ல சொல்ற மந்திரங்களோட சேர்க்க சொல்லப்போறேன்.'

'நீ சொல்றது சரிதான். நானும் வேணுவ பாக்கும்போது இதையும் சேர்க்க சொல்றேன்.'

'எனக்கு இந்த ஸ்லோகம் ரொம்ப பிடிச்சிருக்கு மாமா. வேணு மாமா இத சேர்க்கறாரோ இல்லையோ நான் தெனமும் சொல்லப்போறேன்.'

'ரொம்ப சந்தோஷம். இந்தப் புஸ்தகத்தை நீயே வச்சுக்கோ. மனப்பாடம் பண்ற வரைக்கும் பார்த்து பார்த்து சொல்லிண்டு வா. நானும் அப்பைக்கப்ப இங்க நீ வரச்சேயெல்லாம் சரியா சொல்றியான்னு பார்த்துண்டு வரேன்.'

புஸ்தகத்தை அவர் கையால் வாங்கும் போது அதை கண்ணில் ஒற்றிக்கொண்டு அவரிடமிருந்து பெற்றுக்கொள்கிறேன்.

'தனித்தனியா மந்த்ரங்களுக்கு பொருள் புரிஞ்சாலும், ஒட்டு மொத்தமா பாக்கும் போது, ஸ்வரூப, ரூப, விபவ, லீலா, விபூதி குணங்களை காட்டுவதாக உள்ளது. இது இப்போது உனக்கு புரியறது கஷ்டம். சில மந்திரங்கள் லக்ஷ்மியை விவரிக்கிறது. சிலது அவள் செய்யும் காரியங்களை சொல்றது. சிலது , நமக்கு நல்ல பலன்களை தருவதாகவும், சிலது தீய சக்திகள் அழிவதாகவும் சொல்லி இருக்கு. இதெல்லாத்தையும் மனசுல வச்சுண்டு தினமும் ஸ்லோகத்தை படிடா பாஸு. க்ஷேமமா இருப்ப.'

'சரிடா பாஸு. இத்தோட போதும் இன்னிக்கி. நாம கிளம்பலாம்.'

'சரி மாமா'

வழக்கம்போல் நமஸ்காரம் ஆசீர்வாதம் பரிமாற்றங்கள்.

தொடரும்...