திருநெல்வேலி "பெரிய கட்டளை" :

திருநெல்வேலி "பெரிய கட்டளை" :

திருநெல்வேலி நெல்லையப்பரோட உச்சிகால பூஜையை  "பெரிய கட்டளை" என்றே சிறப்பித்து கூறுவார்கள். 

உச்சிகால கட்டளையினை சிறப்பாக ஏற்படுத்தினவர் பிள்ளையன் (பிறவிப்பெருமாள் பிள்ளையன் மற்றும் சகோதரர்கள்), திருநெல்வேலியிலிருக்கும் பத்து வேலி நிலத்தில் ஒன்று பிள்ளையனது. ஏராளமான சொத்துகளைக் கொடுத்து பல்வேறு கட்டளைகளை ஏற்படுத்தினாலும், உச்சிகால கட்டளை பெரிய கட்டளை என்றே சிறப்பாக நடத்தப்பெற்றது. 

இங்கு சுவாமிக்கு அனுதினமும் உச்சி வேளையில் அம்பாளே எழுந்தருளி பூஜை பண்ணி நிவேதனம் பண்ணுகிறதாக மரபு. ஆக அம்மையே எழுந்தருளுகிற விஷேசத்தை ஆர்ப்பாட்டமாகவல்லவா கொண்டாடனும் . அப்படி பிரம்மாண்டமாக நடந்தது தான் உச்சிகால பெரிய கட்டளை.

அம்மன் கோவில் மடப்பள்ளியிலே அன்னம்(யானைக்கொம்பன் அப்டின்ற வகை அரிசி பயன்படுத்தியதாகக் குறிப்பு, இன்றைய திருநெல்வேலி சந்திப்பு பகுதியில்அன்று விளைந்ததாம்), அவியல், துவரம், பச்சடி, கூட்டு வகைகளோட கத்திரிக்காய் கொஸ்து போன்றவற்றை சேர்த்து பல்லயம்னு சொல்லப்படுகிற நெய்வேத்யம் அம்மன் கோவில் பரிசாரகர் தலையால சுமந்து வர, அம்மன் சன்னதி பூஜைமுறைகாரர் சுவாமி சன்னதிக்கு மேள தாள,ஆலவட்ட,  பந்த, கட்டிய, சத்திர, சாமர மரியாதையோட வருவார்... நேரா ஆதிமூலமகாலிங்கமாகிய நெல்லையப்பருக்கு நெய்வேத்யம் பண்ணி பூஜை பண்ணின பிற்பாடே, வேணுவனேஸ்வரர் சன்னதிக்கு வருவார். ( சுவாமி தேரிலிருக்கும் காலங்களில் உச்சியில் தேர் நிறுத்தப்பட்டு, இரட்டை குடை மரியாதையோட அம்மன் கோவில் பூஜைமுறைகாரர் தேருக்கு வருவாராம் ) 

வேணுவனேஸ்வரர் சன்னதி முன்னால ஒரு பெரிய பலகைக்கல்லை(படகல்) எல்லோரும் பாத்திருக்கலாம் அதன் மேல இலை பரப்பி அது நிறைய சுடச்சுட சாதம் பரப்பி, சாம்பார், அதிரசம், முறுக்கு காய்கறிகள் பாயசம் முதலியன வைக்கப்பட்டிருக்கும்(சுவாமி கோவில் மடப்பள்ளியிலே தயார் பண்ணுகிற இது தனி). அந்நேரத்தில் அம்மன் கோவில் பூஜைமுறைகாரரோட வருகிற பரிஜாரகர்ட்ட இருந்து பல்லயத்த வாங்கி சுவாமி கோவில் அடுத்தமுறைக்காரர் சுவாமியிடம் வைப்பாங்க. இதற்கிடையிலே தங்க வாயிலும், தென்,வட வாசல்களும் அடைக்கப்படும். அம்மன் கோவில் பூஜைமுறைகாரர் சுவாமிக்கு தான் கொணர்ந்த நெய்வேத்யத்தை சுவாமிக்கு சமர்ப்பணம் பண்ணுவார். அதன் பின்னே படகல் முன்னால வந்து நின்னு அன்னத்திற்கும் பூஜை பண்ணுவார் (இது அன்னலிங்க பூஜை எனப்படும், இந்த பூஜை செய்த பின்னரே அம்மை சுவாமியை நோக்கி தவமியற்றும் வழிபெற்றாள், சுவாமி காக்ஷி கொடுத்த பின் சுவாமி முன்னர இதனை மீண்டும் செய்தார், அதனால் தான் தினமும் இதனை செய்ததாகப் பெரியோர் சொல்வர்) 

அதன் பின்பு வாயில்கள் திறக்கப்பட்டு தீபாராதனை ஆகும். இந்த காலத்தின் போதே மணி மண்டபத்தில் இருக்கும் மணி அடித்து பூஜை நடக்கும். ஏனெனில் இந்த மணி அடிக்கும் போது படகல் நிறைய அன்னம் வைக்கனும்கிறது விதி., ஆனால் இன்றோ இந்த "பெரிய கட்டளை" என்று அழைக்கப்பட்ட இந்த உச்சிகால பூஜை தற்போது சுருக்கமாகவே நடைபெற்று வருகிறது. அம்மை சன்னதியில் இருந்து பல்லயத்தில் நெய்வேத்ய பிரசாதம் சுத்தான்னமாக மட்டுமே இப்போது எடுத்து வரப்படுகிறது. 

மீண்டும் இந்த உச்சிக்கால பூஜை "பெரிய கட்டளை" ஆக சிறப்பாக நடைபெற அம்மை அப்பன் அருள்கூடிவர பிரார்த்திப்போம்.

நன்றி: கோமதி சங்கர் அவர்கள். 

-திருநெல்வேலிக்காரன்.