ஆன்மீக தகவல்கள்

 பயனுள்ள ஆன்மீக தகவல்கள்🚩🚩 

1. சமித்துக் குச்சிகளை மொத்தமாக ஹோமத்தீயில் இடக்கூடாது. அவற்றை ஒவ்வொன்றாகவே இடுவதே சரியான முறையாகும்.

2. ஹோமத்தீயில் உபயோகிக்கப்படுகின்ற மரக்கரண்டிகள், அதற்காகக் குறிக்கப்பட்டுள்ள மரங்களிலிருந்தே செய்யப்பட்டவையாக இருக்க வேண்டும்..

கடையில் விற்கின்ற மரக் கரண்டிகளைக் கொண்டு ஹோமத்தைச் செய்யக் கூடாது.

3. கோயில்களில் பலிப்பீடத்திற்கும் மூலஸ்தானத்திற்கும் இடையே நமஸ்கரிக்கக் கூடாது.

4. கோயிலில் சந்நிதிக்கு முன்பாகவும் ப்ராகாரங்களிலும் எதையும் சாப்பிடக்கூடாது.

5. சில ஜோதிடர்கள் கூறுவதைக் கேட்டு, நவக்ரஹங்களை அப்ரதக்ஷிணமாக வலம்வரக் கூடாது. நவக்ரஹங்களை ப்ரதக்ஷிணமாக வலம் வருவதே நன்மை பயக்கும்.

6. அபிஷேகத்திற்குப் பயன்படுத்தப் படுகின்ற பால், தயிர், தேன், பழச்சாறு, இளநீர் போன்றவற்றை உட்கொள்ளக்கூடாது.

அபிஷேக சந்தனத் தீர்த்தத்தை மட்டும் சிறிது உட்கொள்ளலாம்.

7. விஷ்ணு ஆலயங்களில் முதலில் தாயாரை நமஸ்கரித்துவிட்டே, பெருமாளை நமஸ்கரிக்க வேண்டும்.

8. சிவாலயங்களில் சிவனை வணங்கியபிறகே, அம்பாளை வணங்க வேண்டும்.

9. கற்பூரத்தை இரண்டு கைகளாலும் பக்தியுடன் கண்களில் ஒற்றிக்கொள்ள வேண்டும்.

10. ஒரு கையின் மேல் ஒரு கையை வைத்தே, பெருமாள் கோயில்களில் தீர்த்தத்தை ஏற்றுக்கொள்ள வேண்டும்.

11. கோயில்களை ப்ரதக்ஷிணம் வரும்போது, நிர்மால்யம்  செய்த புஷ்பங்களை மிதிக்கக் கூடாது.

12. அர்ச்சகரைத் தவிர மற்ற எவரிடமிருந்தும் விபூதி, குங்குமத்தை ஏற்றுக்கொள்ளக் கூடாது.

13. நீராடாமலும், ஈரத்துணியுடனும் கோயிலுக்குள் நுழையக் கூடாது.

14. கோயிலில் கொடுக்கப்படுகின்ற தீர்த்தத்தை முழுவதும் உட்கொள்ள வேண்டும்..சிறிதளவு எடுத்துக்கொண்டு, மீதியைக் கீழே விடுவது மிகவும் பாபமான செயலாகும்.

15. தெய்வ விக்ரஹங்கள் தெருக்களில் ஊர்வலமாக வரும்போது, அவற்றை நமஸ்கரிக்கலாம். ஆனால், வலம்வரக் கூடாது.

ஓம் சக்தி பராசக்தி 

ஸ்ரீயோகராமர்தரிசனம்_திருக்கோயில், நெடு்ங்குணம்

 அனைவருக்கும் இனிய ராமநவமி வாழ்த்துக்கள் 

ஸ்ரீயோகராமர்தரிசனம்_திருக்கோயில்

நெடு்ங்குணம் #நெடுங்குன்றம் 

மூலவர்: ஸ்ரீயோகராமர், சீதா, லக்ஷ்மணன்
தாயார்: ஸ்ரீசெங்கமலவல்லி தாயார்
பிற சன்னதிகள்: ஸ்ரீ சக்கரத்தாழ்வார், ஸ்ரீ பிரசன்ன வெங்கடாசலபதி
ஊர்: நெடுங்குணம்
மாவட்டம்: திருவண்ணாமலை

கோதண்டம் ஏந்தாத அமர்ந்த கோலத்தில்,  தபஸ் நிலையில், தன் அகன்ற மார்பினில் தனது வலது கரத்தினை வைத்து தியானம் செய்தபடி ஸ்ரீராமன்!! அண்ணனுக்கு காவலாக வில்லேந்தியபடி இலக்குவணன்!! சீதாவும் அமர்ந்த கோலத்தில்!! 

மூவரையும் வணங்கி நிற்கும் அனுமனை நம்மால் வணங்க முடியாது!! பிரகாரத்தில் ஒன்றுக்கு இரண்டாய் அனுமனைக் காணலாம்!! மிகப் பழமையான கோயில்! கிருஷ்ணதேவ ராயர் காலத்து கோயில்!! 

சுகப்பிரம்மத்திற்காக இராமன் இங்கே தபஸ்வியாய் அமர்ந்துள்ளார்

தரிசன நேரம்: வார நாட்களில் காலை 8:00 மணி முதல் 11:00 மணி வரை

சனி ஞாயிற்றுக்கிழமைகளில் காலை 8:00 மணி முதல் மத்தியானம் 01:00 மணி வரை 

மாலை 5:00 மணி முதல் 7:30 மணி வரை

தொடர்புக்கு: பத்ரி பட்டர் +91 9345528083

தர்ம சாஸ்திரம் பகுதி −46

 (தெரிந்து கொள்ளலாமா?..)

தர்ம சாஸ்திரம் பகுதி −46

(ஆசிரியர் −திரு.V.ராஜகோபால கனபாடிகள்..)

671. நல்ல பலன்களை முழுமையாக அடைய வேண்டுமானால், மற்ற அறைகளிலிருந்து பூஜை அறையானது தனியாக இருக்க வேண்டும்.

பூஜை அறையின் நுழைவாயிலின் அடிப்பகுதியில் ஒரு மரத்தடுப்பும் (வாசல்படி) அவசியம்.

672. எவ்வளவு செல்வந்தராக  இருந்தாலும், ஸோமயாகம், வாஜபேய யாகம் (ஸ்ரௌத்த கர்மா) போன்றவற்றை மற்றவரிடம் த்ரவியங்களை யாசகம் பெற்றே நடத்த வேண்டும்.

673. வேதம் அறிந்தவர்கள், தமது குழந்தைகளை வேடபாடசாலைக்கு அனுப்புவதற்கு முன், தாம் ஒரு சிறுபகுதியையாவது வீட்டில் சொல்லித்தர வேண்டும்.

674. வீட்டின் நுழைவாயில், அலமாரிகள் ஆகியவை கதவுகள் இல்லாமல் இருக்கக்கூடாது.

675. வீட்டைத் தூய்மைப்படுத்த உதவுகின்ற துடப்பத்தை சமையலறை, சாப்பிடும் அறை போன்ற இடங்களிலோ, மற்றவர்கள் பார்வையில் படுகின்ற இடங்களிலோ வைக்கக்கூடாது.அவற்றைக் கதவுகளின் பின்னே கண் மறைய வைக்க வேண்டும்.

676. இடிக்கப்பட்ட வீடுகளிலிருந்து எடுக்கப்பட்ட கதவுகள், ஜன்னல்கள், தலைவாசல் சட்டம் ஆகியவற்றைப் புதிதாகக் கட்டுகின்ற வீட்டில் உபயோகிக்கக்கூடாது.

677. தலைவாசல் கதவு உட்புறம் திறக்குமாறு அமைக்கப்பட வேண்டும்.

678. துணிமணிகள் வைத்துக் கொள்ளப் பயன்படுகின்ற அலமாரிகளுக்கான கதவுகள் வெளிப்புறம் திறக்கும்படியாக இருக்க வேண்டும்.

679. குழந்தையைப் பெற்ற தாயானவள், அறுவைச் சிகிச்சை செய்துகொண்ட காரணத்தினால், பதினோறாம் நாள் புண்யாஹவசனம் அன்று நீராட இயலாமல் போனால், குழந்தையின் தாத்தா−பாட்டி புன்யாஹவசன சாங்கியங்களைச் செய்துவிட வேண்டும். 

680. மந்திர உருவேற்றி ஜபிக்கப்பட்ட நீரில் தூசுகள் அல்லது வேறு பொருட்கள் விழுந்திருந்தாலும், அவற்றுள் கைகளை நுழைத்து, அகற்றக்கூடாது.

(சில முக்கியமான சொற்களின் எளிமையான பொருள்..)

1. அபிஷேகம் − பால், இளநீர் போன்ற பொருட்களைக் கொண்டு தெய்வ விக்ரஹங்களை நீராட்டுதல்.

2. ஆவாஹனம் − தெய்வங்களை அழைத்து எழுந்தருளச் செய்தல்.

3. ஹோமம் − கடவுளரையும், முன்னோர்களையும் நினைத்து அக்னியில் நெய், அரிசி போன்றவற்றை இடுதல்.

4. ஹோமகுண்டம் − மேற்சொன்னபடி ஹோமங்களைச் செய்வதற்கு தேவையான அக்னியை உண்டாக்குவதற்காக வடிவமைக்கப்பட்ட குண்டம்.

5. ஜபம் − மனதிற்குள் திரும்பத் திரும்பச் சொல்லிக்கொள்கின்ற இறை திருநாமங்களும், மந்திரங்களும்.

6. நிவேதனம் − இறைவனுக்கு அர்ப்பணம் செய்கின்ற உணவு வகைகள்.

7. தர்ப்பணம் − முன்னோர்களைக் குறித்து குறிப்பிட்ட காலங்களில் செய்யப்படுகின்ற சடங்கு.

8. உபசாரம் − இறைவனுக்கு/இறைவிக்குச் செய்கின்ற பலவகையான சடங்குகள்..

9. விஸர்ஜனம் − பூஜை முடிந்த பிறகு செய்கின்ற சடங்கு.

10. யதாஸ்தானம் − விஸர்ஜனம் ஆன பிறகு, இறைவனை/ இறைவியை பழையபடியே எழுந்தருளச் செய்தல்.

                           (நிறைந்தது)

காமாக்யா - 6

 காமாக்யா -  6

கோவில் உள்ளே நுழைகிறோம், ஏன் இந்த வரிசை இத்தனை மெதுவாக நகர்கிறது என்ற கேள்வி, ஒரு பெரிய மஹா மண்டபத்தில் நுழைகிறோம், அத்தனை பெரிய மண்டபம், அதன் வலப்பக்கம் திருப்பி விடப்பட்ட வரிசையில் செல்கிறோம், பொன்னால் வேநப்பட்ட ஒரு பீடத்தில் ஒரு ரூபம் இருக்கிறது, கையில் இருந்த தாமரையை அங்கே இடச்சொல்கின்றனர்,

ஏதோ உணர்ந்தவனாய் முதலாளியை நோக்கி கைகளை நீட்ட மற்றொரு தாமரை என் கரத்தில் சேர்கிறது, அதை அந்த பீடத்தில் சேர்ப்பிக்கிறோம், உடன் வந்த அஷ்ட வசுக்களும் சேர்க்கின்றனர், நான் ஜெபித்து வந்த மலர் என் கரங்களிலேயே நிலை பெறுகிறது!

ஆம் இது மூல சன்னதி அல்ல, அங்கே ஒரு பாண்டா என் கைகளில் குங்கும்ப்ரசாதம் தருகிறார்! வரிசை மேலும் தொடர்கிறது,

இரண்டு பெரிய தூண்கள் அதன் இடையே தான் வரிசை போகிறது, நான் நுழைந்த உடன் என் ஏழாவது அறிவு உயிர் பெற்று, பூபதி மாமாவும், முதலாளியும் இரண்டு தூண்களுக்குள் அகப்பட்டு விடக்கூடாது, ஏனோ கரும்புச்சாரு மிசின் ஞாபகத்துற்கு வருகிறது! 

நான் ஒல்லியாக இருப்பதால் எளிதில் கடந்துவிட்டேன், இந்த இரு புஷ்ட்டி வர்த்தனங்களும் சிக்கிக்கொண்டால் எவ்வாறு மீட்பது, நல்ல வேலை சற்று அகலம் இருந்தது, அநேகமாக ஒரு குட்டி யானை நுழையும் இடம் இருந்திருக்க வேண்டும்! இல்லை எனில் இவர்கள் கடந்து வருவது அசாத்தியம்!

புதுக்கோட்டை ராஜாவும் கடந்துவிட்டார், அப்படியானால் ஒரு டைனசர் போகவே இடமிருந்திருக்க வேண்டும், இதை மனதில் நினைத்துக்கொண்டேன், 

ஒருக்கால் சொல்லி இருந்தால் அடுத்த இரண்டுமணி நேரமும் என்னை என் காதுகளை சிவப்பாக்கி இருப்பர்!

அங்கே இடப்பக்கம் நான் ஒரு ரூபத்தை காண்கிறேன், குரங்கும் மனிதனும் கலந்த கலவையாய் ஒரு ரூபம் தன் தலையை இடப்பக்கம் திருப்பி இருக்கிறது, இந்த ரூபத்தை தாந்த்ரீகம் சார்ந்த வரு புத்தகத்தில் கண்டதுண்டு, ஆம் இது அதே தான், இது வாமாச்சாரத்தின் குறியீடு!

கீழே ஒரு எருமைத்தலை வெட்டி வைக்கப்பட்டுள்ளது, அருகருகே இரு ஆட்டுத்தலைகள், குடலிருந்து ஒரு அமிலம் வெளிப்பட்டு தொண்டையை நெருங்கி ஒரு வித அசூயையை ஏற்படுத்துகிறது! அந்த எருமைத்தலையின் கண்கள் எனக்கு பயம் தருகிறது! ஹே மாதா! இது என்ன கொடுமை! சண்டாளர்கள் கையிலல்லவா சிக்கி இருக்கிறாய்!

அறிவுக்கு சற்றும் பொருந்தவில்லை, அருகே உள்ள வாசல் தான் வாமாச்சார வாசல், அந்த வாசலின் வெளியே தலைவிரிக் கோலமாய் ஜடாமுடியுன் ஒருவர் ஏதோ மந்த்ரஜபம் செய்து கொண்டிருக்கிறார், பாவம் ஏதோ ஒரு சிறு தேவதையை சித்தி செய்ய எத்தனிக்கிறார், 

அடுத்த இடம் குறுகலாகிறது! நான்கு நபர்கள் மட்டுமே போகக்கூடிய சிறு குகை போலாகிறது,நடுவில் ஒரு கயிறு.,. இருவர் போகலாம், இருவர் வரலாம், மெல்ல படிகள் கீழிறங்குகிறது, இதனால் தான் வரிசை மெதுவாக நகர்கிறது! 

என் நினைவு சரி எனில் பத்து படிக்கட்டுகள்!

வரிசை நிற்கிறது!

மேலே பார்க்கிறேன், ஆஹா ஆஹா பரந்து விரிந்து விசாலமான மூலாலயம் அது! இதன் தொன்மை ஈராயிரம் ஆண்டுகள் உடையதாக இருத்தல் வேண்டும்,இருளான அந்த இடத்தில் ஒரு சிறு மதில் ஒன்று ஏற்பட்டு, லேசாக வலது புறம் திரும்புகிறது!

அவ்விடத்தில் நிற்கின்றோம்!

எனக்கு சிந்தாமணி க்ரஹம் ஞாபகம் வருகிறது! 

கண்பார்வைக்கு அப்பால் மேல் விதானம் இருக்கிறது, உடல் மயிற்கூச்செரிகிறது, உள்ளம் படபடக்கிறது, 

இரண்டு மாத தபஸ இல்லையில்லை வாழ்வின் தவம் பலிக்கப்போகிறது! தேவரும் மூவரும் வானோரும் ஏத்த நிர்மல ஜ்யோதிப்பிளம்பாய் அரூபியாய் மாயாவாக நின்ற அம்பிகையை அவளுக்கே உண்டான சக்தி பீடத்தில் தரிசிக்க இருக்கிறேன் என்ற உணர்வு உண்டாகிறது,

தாமரை மலரே நீ பிறந்ததன் மகத்துவத்தை பெறப்போகிறாய், அவளிடம் உன்னை சமர்ப்பித்து விடப்போகிறேன் உனக்கு முக்தி கிடைக்கப்போகிறது, அவளிடம் சொல், அஞ்ஞானியாய் இழிபிறப்பாய் ஊனனாய்,உயர் பிராமண குலத்தில் தப்பிப்பிறந்த இப்பாவிக்கு அவள் தாழ் நிழலில் இடம் கேள்! 

இன்னும் எத்தனை இடர்களை கடந்து அவளை அடையப்போகிறேன், என் கர்மாவை கழிக்க இன்னும் எத்தனை பிறவி இந்த அற்பனுக்கு!? அவளின்றி வேறேதும் அடைதல் இல்லை,

அவளின்றி எனை கடைதேற்ற யாருமில்லை, அவளை தரிசிக்கும் நேரத்தில் ப்ரார்த்திக்க இயலாது, அந்நேரத்தில் ஐம்புலன்கள் இயங்காது, நீ மறவாமல் அவளிடம் சொல் என கையில் இருந்த தாமரை மலரிடம் சொல்லி வைத்தேன்...

சன்னதியை நெருங்கிவிட்டேன், இப்போது எழுத என்னிடம் த்ராணி இல்லை, மனச்சிந்தனை அங்கே நின்றுவிட்டது,

அடுத்த பதிவில் தரிசிப்போம்!

அயோனிர் யோனி நிலயா கூடஸ்த்தா குல ரூபிணி....
அடைக்கலம் நீயே அம்மா அகிலாண்டேஸ்வரி.....

காமாக்யா - 5

 காமாக்யா -  5

கோவிலின் ப்ரம்மாண்ட நுழைவாயிலை கடந்து உள்ளே சென்றோம், உடனே போட்டோ எடுக்க ஆரம்பித்தனர் நம் குழுவினர்! அனைவரையும் திரட்டி கோவில் முன் பக்கத்தை அடைந்தோம், கோவில் சுவர்கள் இரண்டு வகையான கட்டட வேலைகளை கொண்டிருந்தது, 

கீழ் சுவர்கள் பழையதாகவும்,மேற் சுவர்கள் சற்று புதியதாகவும் இருந்தது, ஆம் மிலேச்ச துளுக்கர்களால்  அக்கோவில் இடிக்கப்பட்டதாக பலவேச குமார் சொல்லி இருந்தார், நினைவலைகள் எங்கோ சென்றது! உங்கள் மூர்க்கத்தனத்தை என் தலைமுறை வரை காண்கிறதே!? மனித ஜென்மங்களே அல்ல நீங்கள் என நினைத்துக்கொண்டேன்...

மேற்கொண்டு நடந்தோம் இடது புறம் ஓரிடத்தில் தீபம் ஏற்றி பத்தி ஏற்றி வழிபட ஒரு இடம் உள்ளது அதை கடந்து கோவிலின் முன்பக்கம் உள்ளே சென்றோம் அங்கே கதவு பூட்டு போடப்பட்டு இருந்தது, உள்ளே ஒரு பீடம் அமைக்கப்பட்டிருந்தது, முதலில் இது தான் மூலாலயமோ என்று ஐயம் கொண்டேன், பின்னர் விசாரித்ததில் பின்புறம் உள்ள தீர்த்தமே மூலாலயம் என அறிந்தோம்...

சுலப எண்ட்ரி டிக்கெட் 500 ரூபாய் என்றனர், மனதில் ஏதோ தோன்ற க்யூவில் செல்வதாய் அனைவரும் சேர்ந்து முடிவெடுத்தோம், முதலாளியை சிரம்ப்படுத்தக்கூடாது என்று நினைத்தேன், நல்ல வேளையாக க்யூ நெடுகிலும் இரு புறமும் அமரும் வகையில் திண்டு செய்துள்ளனர்,க்யூ நகருவதற்கு வெகு நேரம் ஆவதை உணர்ந்தேன்...

க்யூவில் நுழைந்து உள்ளே போன உடன் வாங்க சாமி என என்னை வரவேற்றார் ஒருவர்! வணக்கம் என்றேன், எங்க இருந்து வறீங்க!? திருநெல்வேலி என்றேன்... அம்பாள் அடுத்த இரண்டு நாட்களுக்கான தூதனை அனுப்பி இருந்தாள்...போய் அமர்ந்த உடன் சஹஸ்ரநாமத்தை ஆரம்பித்தோம்.. ஶ்ரீ மாதா ஶ்ரீ மஹாராஞ்ஞீ என ஆரம்பித்த கனமே தேவ லோகத்திற்குள் செல்ல ஆரம்பித்தோம்...

ஐவர் சேர்ந்து சொன்னோம், உடன் வந்த நம்மவர்கள் மிகுந்த கன்னியத்தோடு அருகில் அமர்ந்து கேட்கலுற்றனர், அருகில் மலர் விற்றவர்களிடம் இருந்து பூக்களை வாங்கினார் முதலாளி, என் கைகளில் ஒரு தாமரை வந்தது, வாய் சஹஸ்ரநாமத்தை சொல்லிக்கொண்டே மனம் அம்பிகையின் வீடான.. சிந்தாமணி க்ருஹத்தை சிந்திக்கிறது, 

அடர்ந்த கதம்ப வனம் ஒன்று இருக்கிறது,மஹா பத்மாடவீ குளம் ஒன்று இருக்கிறது, ஆயிரம் இதழ் கொண்ட தாமரை மலர்கள் ஆயிரம் நிரம்பிய குளம் அது, அந்த தாமரைகளின் நடுத்தாமரையில் சிந்தாமணி க்ருஹம்(வீடு) அமைந்திருக்கிறது, அந்த வீட்டின் உள் நுழைந்தால் சூர்யர்களும் சந்த்ரனும் அவளை ஆராதித்து நிற்கின்றனர், தேவாசுரர்,சனாகாதியர் ஏனைய ரிஷகள்,அனிமாதிகள் தபஸ் கொண்டுள்ளனர்,அடுத்த பத்தியில் ப்ரம்ம விஷ்ணு மஹேஶ்வராள் இருக்கின்றனர், நடுவே மஹாமேரு இருக்கிறது, அறுபத்து நான்கு (கோடி)யோகினிகள் அறுபத்து நான்கு மேரு முகடுகளில் அவளை நோக்கி தபஸ் செய்கின்றனர், மஹா மேருவின் மத்தியில் பஞ்சப்ரம்மங்களால் ஆசனம் ஒன்று உள்ளது, தச மஹா வித்யாக்கள் உள்ளனர், நடுவில் கண்களால் காணக்கிடைக்காத, கோடி சூர்ய ப்ரகாசமாய் அம்பிகை ஜ்யோதி ரூபமாக இருக்கிறாள்...

என் கைகளில் வந்த தாமரை அந்த பத்மாடவி குளத்தில் உதித்த ஒரு சிறு பூவாக இருத்தல் வேண்டும்! அரளிப்பூக்களால் அவளை அர்ச்சித்து பழகிய எனக்கு இந்த தாமரை கொண்டு அர்ச்சிக்க இது வரை ப்ராப்தி இல்லை, இன்றே அந்த ப்ராப்தி வந்திருக்கிறது, முதலாளி வாங்கித்தந்த புஷ்பம்

சதீஷ் அண்ணா,செவல் அண்ணா,என் மாமா,பூபதி மாமா,அடியேன் ஒரே த்வணியில் சொல்லிக்கொண்டிருந்தோம், வரிசை மெல்ல நகர்கிறது, வலது புறம் அந்தக்கோவில் பண்டாக்கள் ஹோமங்கள் செய்கிறார்கள், இடது புறம் ஒரு எருது பல ஆடுகளை கட்டி வைத்துள்ளனர், அது பலிசாலையாக இருத்தல் வேண்டும்! 

சஹஸ்ரநாம ஜபம் முடிந்தது மனதில் ஒரு பூரிப்பு, எப்போது நான் சஹஸ்ர நாமம் சொன்னாலும் பட்டாம்பூச்சி ஒன்றை காண்பேன், அன்றும் வந்தது, அவள் இருக்கும் இடம் வசந்தமாகும், வசந்த காந்தி வந்தால் அதை அறிந்து அந்த பட்டாம்பூச்சி வரும் போலும்...

அருகில் ஒரு மாதரசி தேவி மஹாத்மியம் வாசிக்கிறாள்... ஆச்சரியம் இல்லை, வந்திருக்கும் இடம் மஹா மேரு....

கேடு கெட்ட மனித ஜென்மமாய் பிறந்துவிட்டோம் மனம் ஒன்றரை நாழிகைக்கு மேல் லயிக்க ஶ்ரம்ப்படுகிறது...

மற்ற பேச்சுகள் வருகிறது... அதை சிந்தித்த மருகணம், பெண்கள் சிலர் அவளை துதித்து பஜனை செய்ய ஆரம்பித்தனர்....

மரகத வடிவே சரணம் சரணம் மதுரித பதமே சரணம் சரணம்....

காமாக்யா அம்பிகை தரிசனத்தை அடுத்த பதிவில் காண இருக்கிறோம்... உடன் அழைத்துப்போகாதவர்களுக்கு இச்சிறுவனின் கிறுக்கள்களில் தரிசனம் செய்யுங்கள்....

மனிதரும் தேவரும் மாயா முனிவரும் வந்து சேவிக்கும் அவள் திருவடி தரிசனம் மனக்கண்களில் விரியட்டும்.... அதை விடவா ஒரு பயன் என் நட்பால் உங்களுக்கு கிடைத்திடும்

காமாக்யா - 4

 பாஸ்கர் கௌசிகன்

காமாக்யா -  4

அவள் அருகில்

கவ்ஹாத்தியில் இரவு தங்கிய அறையின் வாடகை அதிகம் அதைவிட அதிகம் சாப்பாட்டு பில்.... உணவளித்து உணவு தொண்டைக்குழியில் இறங்கும் முன் பில்லால் அதிரவைத்தான் அந்த குண்டோதரன்... கிட்டத்தட்ட எனக்கு தலையே சுற்றியது... இங்கிருந்து தங்குவதற்கு சரியான இடத்திற்கு செல்ல வேண்டும், திரும்பவும் ஏமாந்துவிடக்கூடாது, உடன் வந்தோரை சிரமத்தில் ஆழ்த்திவிடக்கூடாது என பரிதவித்தேன்....

மனதளவில் ஏற்கனவே ஏர்போர்ட் கொரானா கொள்ளைக்கூட்டத்தையும் பில்லால் அடித்த குண்டனாலும் பாதிக்கப்பட்டேன்... 

கவலையை வெளிக்காண்பிக்காமல் நண்பர்களோடு இயல்பாக பேசுவதாய் காட்டிக்கொண்டேன், என்ன செய்வது!? எங்கே தங்குவது!? எப்படி சமாளிப்பது!? எதை தொட்டாலும் விலை அதிகம் போலிருக்கிறதே!?

என கவலை கொண்டேன்...

நான் கவலை கொள்வதை அவள் பொருப்பாளா!? திடீரென ஒரு கால் வருகிறது! Ganesan Kapeyar பேசுகிறார்! இரவு 10 :57மணிக்கு ஒரு மெசேஜ்.. ஆம் அவரின் எண்ணை இன்பாக்சில் அனுப்பி இருந்தார்....

அழைத்தேன்... இத்தனை மணிக்கும், ஏனெனில் அவசரத்தேவை...

அண்ணா மணி ஆகறதே!? இத்தனை மணிக்கு கூப்பிடுறேன் !? தூங்கலையா!? 

இல்ல நான் தூங்க நேரமாகும்...

அண்ணா நான் காமாக்யாவில் இருக்கேன்...

ஆமா பேஸ்புக்கில் பார்த்தேன்

அண்ணா இங்க எங்க தங்கலாம்!?

அங்கே ஒரு ட்ரைவர் நம்பர் தரேன், அவன் உங்களை நான் வழக்கமா தங்கற இடத்துக்கு கூட்டீண்டு போவான், நம்பகமானவன் நல்லவன் அங்க தங்கிக்கலாம்... என அனைத்தையும் சொன்னார், அத்தனை கேள்விகளுக்கும் ஒரே போன் காலில் விடை கிடைத்தது..,

வெகு நேரம் பேசிவிட்டு, அண்ணா உங்களை இந்நேரத்தில் அதிக நேரம் எடுத்து தொந்தரவு பண்ணீட்டேன் மன்னிக்கனும் என்றேன்...உங்க வேலைய கெடுத்துட்டேன் என்றேன்

மறுமுனையில் “ காமாக்யா தான் முதல்ல மத்ததெல்லாம் அப்பறம் தான் என்றார்” 

எனக்கு மனதில் ஏதோ மின்னல் பாய்ந்தது...

அவர் அம்பாள் உபாசகர், அம்பாள் அவரை நியமித்திருந்தாள், 

காமாக்யா தான் முதலில் என்ற வாசகத்தை அவர் எந்த த்வணியில் சொன்னார் என்பதை நான் அறிந்திருந்தேன்....

அவர் அந்த சரியான நேரத்தில் தகவல் அனுப்பியது தற்செயல் அல்லவே அல்ல...

அந்த மெசேஜை கீழே இணைக்கிறேன், கவனியுங்கள், நேரத்தையும் கவனியுங்கள், 

இன்பாக்சில் ட்ரைவர் நம்பரும் ஒரு பண்டிட் நம்பரும் வந்து சேர்ந்தது...

காலை வாகனங்கள் வந்தது எங்களை அழைத்துச்செல்ல, வாடகை என்னான்னு விசாரிக்கச்சொல்லி என் மாமாவை உறுதி செய்யச்சொன்னேன்....அவன் சொன்ன விலை நாங்கள் விசாரித்த விலையில் பாதி...

அம்பிகை அனுப்பிய ஆம்னி ரதம் எங்களை அழைக்க வந்தது! லக்கேஜ் மூட்டைகளோடு காமாக்யா சென்றோம்! மலை மேடுகளில் பயணித்தோம், மண் மாறுகிறது, காட்சிகள் மாறுகின்றன, உணர்வுகள் மாறுகின்றன, ஆம் நான் அவளை நெருங்கிக்கொண்டிருக்கிறேன்...

ட்யூப் லைட்டை சுற்றி வரும் விட்டில் பூச்சி போல அவளின் அத்யத்புத கருணையால் ஈர்க்கப்படுகிறேன், இதோ இது காமாக்யாவா, அது காமாக்யாவா, என ட்ரைவரிடம் தொடர் விசாரணை... வண்டி வந்து ஒரு லாட்ஜில் நிற்கிறது.... மிகக் குறைந்த வாடகையில் ரூம்கள் கிடைத்தது... அந்த லாட்ஜும் என் உபாசனா மூர்த்தியின் பெயரிலேயே...

தங்கினோம், குளித்தோம், தரிசனத்திற்கு கிளம்ப வேண்டும்!! சிகப்பு வஸ்த்ரம் தருத்தேன், கச்சம் கட்டி, குங்குமம் இட்டு, மனதில் அவளை த்யானித்து கோவில் கிளம்பினேன், கீழே சகாக்களும் வந்தனர்...

கோவிலை விசாரித்து நடந்தோம், படிகள் ஏறினோம், கடை வீதிகளில் எங்கும் ருத்ராட்ச மயம், லிங்க பாணங்கள், ஆராதனை மூர்த்தங்கள், சிவப்பு வஸ்த்ரங்கள் என அந்தக்கடை வரிசை கூட தெய்வீகமாக இருந்தது,,

வாசலை அடைந்தோம், கல் வாசலில் மேற்பகுதியில் எதிரெதிர் பெண் சிங்கங்களை மரத்தில் செய்து வைத்திருந்தனர், (இந்த குறியீடு ரகஸ்யமானது) கால்களை மிக கவனமாக அடி எடுத்து வைத்து வலது காலை பயன்படுத்தி உள்ளே நுழைந்தேன்....

அறுபதடியில் கம்பீரமான கோபுரத்தின் உச்சியில் சூலத்தோடு நான் கண்ட அந்த முதல் காட்சி இந்த ஜென்மத்தின் சாபல்யங்களில் ஒன்று! மெய் சிலிர்க்கிறது, எங்கும் அஜ வாடை(ஆடு), இணையத்தில் கோவிலை கண்ட போது அது சுண்ணாம்பு அல்லது சிமெண்ட்டால் கட்டப்பட்டது என நினைத்திருந்தேன்...

கல்லால் அமைந்திருந்தது அவ்வாலயம்...

கண்ட சிற்பங்கள் வேறொரு உலகிற்கு என்னை அழைத்துச்சென்றன..., சொன்னால் நம்ப மாட்டீர்கள், இவற்றை என்றோ நான் கனவில் கண்டிருக்கிறேன்! அவை எனக்கே எனக்கு மட்டுமான சில உணர்வுகளை தந்துகொண்டு நிற்கின்றன...

சுமங்கலி ஒருத்தி நெற்றி நிறைய குங்குமம் இட்டு எதிர்படுகிறாள்...

உணர்வுகளை எனக்கு வெளிப்படுத்த வராது... ஒருக்கால் என்னால் வெளிப்படுத்த இயன்றாள் அது எவ்வாறு இருந்திருக்க வேண்டும் தெறியுமா!? என் எழுத்து இதை வாசிக்கும் ஒரு ஜீவனுக்காவது புரியட்டும்....

உள்ளத்தில் இருந்து எழும் அவள் மீதான அந்த ப்ரேமை, மெல்ல தொண்டையை அடைந்து, கண்களை கலங்கச்செய்து, உடலெல்லாம் சிலிர்த்து, நெற்றிக்கு நடுவே குறுகுறுத்து,இடது தலையில் ஒரு அதிர்வு பரவி, எல்லாவற்றையும் மறந்து நிர்குண நிஶ்சிந்தனை அடைந்து, நா தழுதழுக்க அம்மா என அவளை மனத்தால் அழைத்தேன்.....

அவளுக்கு சத்தியமாய் கேட்டிருக்க வேண்டும்....a

காமாக்யா - 3

 காமாக்யா 3

ஏர்போர்ட்டில் இருந்து வெளியேறிய நாங்கள் நேரமாகி விட்டதால் ஒரு லாட்ஜி்ல் தங்கினோம்!! அங்கு சாப்பாட்டு விலை பெட்ரோல் விலை போன்று மிக அதிகம், எனினும்” நானும் ரொட்டியும்”என சாப்பாட்டை ஒரு கை பார்த்தோம்,மறாநாள் காலை வாட்சப்பில் டொய்ங் என சத்தம் கேட்டு நான் எழுந்த போது மணி 8 !!அதற்குள்ளாக வெளியே போய் டீ டிபன் என ரணகளம் செய்து வாட்சப்பில் பகிர்ந்தனர் நம் அதிரடி குழுவினர்...

எழுந்து ஸ்நாநஞ்செய்து தயாராகி வெளியே சென்றோம், முந்தைய தினம் போல் அல்லாமல் ரோட்டுக்கடையில் பசியாற முடிவெடுக்கப்பட்டது...

அங்கே மிக சொற்ப விலையில் சாப்பாடு...நன்றாய் சாப்பிட்டோம்... டீ குடித்தோம்.. பில் 30 ரூபாய் ... அடடே ப்ரமாதம்..

அருகில் ஒரு சிறு சிவாலயம், 

அதனை திறந்து ஒரு ஆவர்த்தி ருத்ர ஜபம் செய்து அந்த லிங்கத்தை வழிபட்டோம்...

இறைவனின் திருநாமத்தை சொல்லி பாடிப்பரவினோம்...

வெள்ளி அன்று காலை பரமேஸ்வரனை வழிபட்டு ஆரம்பித்தது எங்கள் காமாக்யா தரிசண பயணம்...லிங்கத்தின் மேல் இருந்த தாரா பாத்திரமும் திரு ரூபமும் எங்கள் அபிஷேக தீர்த்தம் அதை ஏற்றது எங்கள் பாக்யம்...

கவ்ஹாத்தி அறையை காலி செய்து காளி அவளின் காமாக்யா மலைக்கு பயணமானோம்...

ஜன்னலில் அகன்று பரந்த ப்ரம்மபுத்ரா நதி எங்களை ஆச்சர்ய படுத்தியது... கடல் போன்ற தோற்றம் ப்ரம்மிப்பை தந்தது...

ஏற்ற இறக்கமான சாலைகளை கடந்து வண்டி பயணமானது!

காமாக்யா மலையை வந்தடைந்தோம்...

வீடுகளின் மாடிகள் கெஸ்ட் ரூம் என்ற பெயரில் ஹோட்டல்களாக இருந்தது!

ஒரு அறையை தேர்ந்தெடுத்து தங்கினோம்!!

வெள்ளி மாலை அவளை தரிசனம் செய்ய கொடுப்பினை இருக்குமா என மனம் ஏங்கியது!

நாங்கள் தங்கிய அந்த மஹாமேரு மலை எங்களுக்கு புதியதோர் அனுபவம் தர இருக்கிறது...

 குளித்து தயாராகி அவள் ஆலயம் நோக்கி நடக்க எத்தனித்தோம்....

அற்புதங்கள் நிகழ ஆரம்பித்தது...

அவளை காண வந்தோம், அவளை அழைத்து வாருங்கள்....

ஒரு ரூபாய் ஊழியர்

 தமிழர்கள் மறந்த, ஆனால் மறக்ககூடாத மனிதர்

ஒரு ரூபாய் ஊழியர்

திருவாரூரிலே ஒரு தாசில்தார் இருந்தார். ஒரு நாள் காலையில், வீட்டில் உட்கார்ந்து கொண்டு எதையோ படித்துக் கொண்டிருந்தார். அப்போது அங்கே சிலர் ஓடி வந்து,

“ஐயா, ஐயா, எங்கள் கிராமத்துக்குப் பக்கத்தில் இருந்ததே அணை. அதை வெள்ளம் அடித்துக்கொண்டு போய் விட்டது! உடனே வந்து கவனிக்க ஏற்பாடு செய்ய வேணும்” என்று வேண்டினர்.

இதைக் கேட்டதும் தாசில்தார் ஒரு சேவகனை அழைத்து, “நீ உடனே போய்,அலுவலகத்தில் யாராவது குமாஸ்தா இருந்தால் கையோடு கூட்டிக் கொண்டு வா. உம். சீக்கிரம்” என்று உத்தரவிட்டார்.

சேவகன் நேராகத் தாசில்தாருடைய அலுவலகத்திற்குச் சென்றான். அப்போது அங்கு முத்துசாமி என்ற ஒரு சிறுவன் மட்டுமே இருந்தான். வேறு யாரும் இல்லை. சேவகன் அவனிடம் செய்தியைச் சொன்னான். சொல்லிவிட்டு, “பெரியவர்கள் யாரும் வரவில்லையா?” என்று கேட்டான்.

“இல்லை. அதனால் என்ன? நான் வருகிறேன். வா. போகலாம்” என்று கூறித் துணிச்சலோடு தாசில்தாரிடம் வந்தான் முத்துசாமி.

தாசில்தார் முத்துசாமியை ஏற இறங்க ஒரு முறை பார்த்தார். பிறகு, சேவகனை நோக்கி,

“என்னடா இது, இந்தப் பொடியனை அழைத்து வந்திருக்கிறாயே! வேறு யாரும் இல்லையா?...” என்று சலிப்போடு கூறிவிட்டு, முத்துசாமியைப் பார்த்து, “சரி. சரி. ஏனப்பா,உனக்கு அந்த உடைப்பைப் பற்றி ஏதாவது தெரியுமா?” என்று கேட்டார்.

“நீங்கள் உத்தரவு கொடுத்தால், உடனேயே நான் அங்கே போய், விவரம் அறிந்து வருகிறேன்” என்றான் முத்துசாமி.

“சரி, போய் வா” என்று அரை மனத்துடன் அவனை அனுப்பி வைத்தார் தாசில்தார்.

முத்துசாமி உடைப்பு எடுத்த இடத்திற்குச் சென்று பார்த்துவிட்டுத் திரும்பி வந்தான். வந்தவன் கையில் ஒரு தாள் இருந்தது. அதைத் தாசில்தாரிடம் கொடுத்தான். அதை அவர் உற்றுப் பார்த்தார்

அதில், எவ்வளவு தூரம் அணை உடைந்திருக்கிறது. அணையைத் திரும்பக் கட்டுவதற்கு என்னென்ன சாமான்கள் வேண்டும். அந்தச் சாமான்கள் எங்கெங்கே கிடைக்கும். எவ்வளவு நாட்களாகும், எவ்வளவு ரூபாய் செலவாகும் என்ற விவரங்களெல்லாம் இருந்தன.

தாசில்தார் அதைப் பார்த்து வியப்படைந்தார். ஆனாலும், உடனே அதை அவர் ஏற்றுக்கொள்ளவில்லை. தலைமைக் குமாஸ்தாவிடம் அந்தத் தாளைக் கொடுத்து, “இந்தப்பையன் என்னென்னவோ இதில் எழுதிக் கொடுத்திருக்கிறான். நேராகப் போய்ப் பார்த்தால்தான் தெரியும். உடனே நீர் புறப்பட்டுச் சென்று, விவரம் அறிந்து வாரும்”என்றார்.

தலைமைக் குமாஸ்தா உடைப்பு எடுத்த இடத்திற்குச் சென்றார். நிலைமையை நேரில்அறிந்தார். சிறுவன் முத்துசாமி எழுதிய விவரங்கள் நூற்றுக்கு நூறு சரி என்பதைஉணர்ந்தார். அப்படியே தாசில்தாரிடம் போய்ச் சொன்னார். அதைக் கேட்டு தாசில்தார் ஆச்சர்யம் அடைந்தார். முத்துசாமியை மிகவும் பாராட்டினார்.

அதே முத்துசாமி தாசில்தாரை மற்றொரு முறை வியப்பிலே ஆழ்த்தினான்.

ஒருநாள், பெரிய மிராசுதார் ஒருவர் தாசில்தாரிடம் வந்தார். “என்னுடைய நிலங்களுக்கு நான் எவ்வளவு வரி செலுத்த வேண்டும்? தொகையைச் சொன்னால், உடனே கட்டிவிடுகிறேன்” என்றார்.

அந்த மிராசுதாருக்கு அந்தத் தாலுகாவில் பல இடங்களில் நிலம் இருந்தது. சுமார் இருபது கிராமங்களில் அவருக்கு நிலம் இருந்ததால் கணக்குகளைப் பார்த்துத்தான் சொல்ல வேண்டும்.

குமாஸ்தாக்களில் ஒருவரைக் கூப்பிட்டுக் கணக்கைப் பார்க்கச் சொல்லலாம் என்று தாசில்தார் நினைத்தார். அப்போது, அருகிலே சிறுவன் முத்துசாமி நின்று கொண்டிருந்தான்.

அவனிடம், அந்த மிராசுதாரின் பெயரைச் சொல்லி, “இவருடைய வரிப் பாக்கி எவ்வளவு என்று கேட்டுவா” என்றார் தாசில்தார்.

ஆனால், முத்துசாமி யாரிடமும் போய்க் கேட்கவுமில்லை; கணக்குப் புத்தகத்தைப் புரட்டிப் பார்க்கவுமில்லை. நின்ற இடத்தில் நின்று கொண்டே, ‘இவர் இவ்வளவு கொடுக்கவேண்டும்’ என்று ஏதோ ஒரு தொகையைச் சொன்னான். அதைக் கேட்ட தாசில்தார்,

“என்னடா இது! வாயில் வந்த ஒரு தொகையைச் சொல்கிறாயே! சம்பந்தப்பட்ட கணக்குப் பிள்ளைகளைக் கூப்பிடு. கணக்கைச் சரியாகப் பார்த்துச் சொல்ல வேண்டும்” என்றார்.

தாசில்தார் விருப்பப்படியே கணக்குப் பிள்ளைகளை அழைத்து வந்தான் முத்துசாமி.அவர்கள் கணக்குப் புத்தகங்களைப் புரட்டிப் பார்த்து, ஒரு காகிதத்தில் தொகையைக் குறித்துக் கொண்டார்கள்.

பிறகு எல்லாவற்றையும் கூட்டிப் போட்டு, மொத்தத் தொகையைச் சொன்னார்கள். அவர்கள்சொன்ன தொகையும், முத்துசாமி சொன்ன தொகையும், ஒன்றாகவே இருந்தன. தம்படிகூடவித்தியாசமில்லை! இதைக் கண்டு தாசில்தார் மிகுந்த வியப்படைந்தார். அவர் மட்டும் தானா? மிராசுதாரர், கணக்குப் பிள்ளைகள் எல்லாருமே அளவில்லாத ஆச்சரியமடைந்தார்கள்.

முத்துசாமியிடம் இப்படிப்பட்ட திறமையும், ஞாபக சக்தியும் இருப்பதைக் கண்ட தாசில்தார் வியப்படைந்ததோடு நிற்கவில்லை. அன்றே முத்துசாமியை அழைத்து,

“முத்துசாமி, இன்று முதல் உன் சம்பளத்தை மூன்று மடங்கு ஆக்கி விட்டேன்” என்று கூறினார்.

மூன்று மடங்கு! என்றால் பிரமித்துப் போய் விடாதீரிகள் அந்த மூன்று மடங்கு சம்பளம் எவ்வளவு தெரியுமா.மூன்று ரூபாய்தான் .

ஆம் அப்படியானால் அவர் வாங்கிக் கொண்டிருந்த மாத சம்பளம் ஒரு ரூபாய்.

அன்று ஒரு ரூபாய் சம்பளத்தில் கணக்குப் பிள்ளைக்கு உதவி ஆளாக இருந்த அந்த ஒரு ரூபாய் ஊழியர் யார் தெரியுமா?

பிற்காலத்தில் வெள்ளையர்கள் மட்டுமே வகித்து வந்த நீதிபதிபதவியை பெற்ற முதல் இந்தியர் சர். டி. #முத்துசாமி அய்யர்தான் அந்த ஒரு ரூபாய் ஊழியர்.

1877 இல் சென்னை உயர்நீதிமன்ற முதல் இந்திய நீதிபதி பதவியை வகித்தவர்.

1893 இல் சென்னைஉயர்நீதிமன்ற தலைமை நீதிபதியாகவும் இருந்தவர்.

நன்றி: குழந்தைக் கவிஞர் அழ. வள்ளியப்பா அவர்களின் பெரியோர் வாழ்விலே என்ற நூலில் இருந்து

இவர் தஞ்சாவூர் ஜில்லா மன்னார்குடி திருவாரூர் வழியில் உள்ள "உச்சிவாடி" என்ற கிராமத்தில் ஏழை பிராமணருக்கு பிறந்த குழந்தை வீட்டில் விளக்கு இல்லாத தால் தெரு விளக்கில் படித்து நீதிபதி ஆனார்.நமது ஜில்லாக்காரர் என்பதால் பெருமை கொள்வோம். (ஆதாரம்..தக்ஷினபாரத ஹிந்தி பிராசார சபா ஹிந்தி மத்யமாவதி nondetail book)  அரசு பாடதிட்ட குழு கவனத்திற்கு

தர்ம சாஸ்திரம் பகுதி −45

 (தெரிந்து கொள்ளலாமா?..)

தர்ம சாஸ்திரம் பகுதி −45

(ஆசிரியர் − திரு. V.ராஜகோபால கனபாடிகள்..)

656. சஷ்டியப்த பூர்த்தி சதாபிஷேகம் இரண்டிலும், கணவனுக்கு இடப்புறமாகத்தான் மனைவி அமரவேண்டும்.

657. சாஸ்திரத்தில் சொல்லப்பட்டுள்ள விதிமுறைகளுக்கு உட்பட்டே திருமணச் சடங்குகள் நடைபெறவேண்டும். "காலத்துக்கேற்ற கோலம்" என்று மனம் போனபடி சடங்குகளை மாற்றிவிடக்கூடாது.

658.கல்யாண மண்டபங்களில் இருக்கின்ற, அடுத்தவர்களால் அவர்களது திருமணம், உபநயனம், சீமந்தம் ஆகியவற்றுக்கு உபயோகிக்கப்பட்ட ஹோமகுண்டங்களைக் கொண்டு, நம் வீட்டு வைபவங்களை நடத்தக்கூடாது. புதிய ஹோமகுண்டத்தை வாங்கி, அதையே பயன்படுத்த வேண்டும்.

659. திருமண வரவேற்பு நிகழ்ச்சியை, திருமணம் முடிந்த பிறகே செய்ய வேண்டும். திருமணம் முடியாமலேயே, தம்பதிபோல் நின்று மற்றவரை வரவேற்பது கூடாது.

660. மஹாளய பக்ஷத்தில் திருமணம், சீமந்தம், உபநயனம், க்ரஹப்ரவேசம் போன்ற எந்த சுபகாரியங்களையும் செய்யக்கூடாது. ஒரு வேளை யாராவது செய்தாலும், நாம் அதில் கலந்து கொள்ளக்கூடாது.

661. திருமணமேடையில் காலணி அணிந்து செல்லக்கூடாது.  அவ்வாறு செல்வது மிகவும் தவறான செயலாகும்.

662. நவராத்திரியில் செய்யப்படுகின்ற "கன்யா பூஜை"யில், ஜாதியைக் காரணம்காட்டியோ, அங்கஹீனத்தைக் காரணம் காட்டியோ எந்தப் பெண் குழந்தையையும் ஒதுக்கி வைக்கக்கூடாது.

அத்தனைப் பெண்குழந்நைகளுமே,"பாலா த்ரிபுரசுந்தரி"யின் வடிவம் என்பதை உணர வேண்டும்.

663. ஹோமகுண்டத்தில் சேர்க்கப்படுகின்ற பொரியில்,  கல், நெல், உமி ஆகியவை இல்லாமல், சுத்தமாக இருக்கும்படி பார்த்துக் கொள்ளவேண்டும்.

664. திருமணங்களில் தம்பதிகளை ஸம்ஸ்க்ருத சொற்களைக் கொண்டு வாழ்த்தும்போது, அவற்றைப் பிழையில்லாமல் அறிந்துகொண்டு சொல்ல வேண்டும்.  கேள்வி ஞானத்தால் அறிந்ததை வைத்து, தவறாக வாழ்த்துவது கூடாது.

665. பூஜைகளில் ஹோமகுண்டங்களை ப்ரதக்ஷிணம்  செய்யும்போது வயதில் மூத்தவர் முதலிலும், இளையவர்கள் வயதுக்கேற்றபடி ஒருவர்பின் ஒருவராகவும் செய்ய வேண்டும்.

666. திருமணங்களில் மாங்கல்யதாரணமும், பாணிக்ரஹணமும் ஆனபிறகே மணமக்களைக் கைகுலுக்கச் செல்ல வேண்டும்.

667. சஷ்டியப்த பூர்த்தியிலும், சதாபிஷேகத்திலும், மந்திர உச்சாடனத்தினால் சேகரிக்கப்பட்ட கும்பஜலத்தை, மந்திரம் ஜபித்த அந்தணர்களே தம்பதிகளின் சிரசில் சேர்க்க வேண்டும்.

எக்காரணம் கொண்டும் குடும்ப அங்கத்தினர்கள் இந்தக் காரியத்தைச் செய்யக்கூடாது.

668. எந்தக் காரணத்துக்காகவும் சமித்து, தர்ப்பை, நெய், ஜலபாத்திரம், மண், சமைக்கப்பட்ட உணவு ஆகியவற்றை வைத்திருப்பவர்களை நமஸ்கரிக்கக் கூடாது.

669. சீமந்தம், உபநயனம் போன்றவற்றில் உதயசாந்தி அன்று ஜபிக்கின்ற மந்திரங்கள், அவரவர்கள் எந்த வேத சாகையைச் சேர்ந்தவரோ, அவற்றுக்குரிய மந்திரங்களாகவே இருக்கும்படி பார்த்துக் கொள்ளவேண்டும்.

அதாவது க்ருஷ்ணயஜுர், சுக்லயஜுர், ரிக், சாம வேதங்களைச் சார்ந்தவர்கள், அவரவர்கள் சார்ந்திருக்கின்ற வேதத்துக்கான மந்திரங்களையே ஜபிக்க வேண்டும்.

670. குழந்தைக்கு ஒரு ஆண்டு பூர்த்தியாகும்வரை, அதனிடம் முகம் பார்க்கும் கண்ணாடியைக் காண்பிக்கக் கூடாது.

(வளரும்..)

தர்ம சாஸ்திரம் பகுதி −44

 (தெரிந்து கொள்ளலாமா?..)

தர்ம சாஸ்திரம் பகுதி −44

(ஆசிரியர் − திரு. V.ராஜகோபால கனபாடிகள்..)

641. ஒரே இடத்தில் ஒன்றுக்கும் மேற்பட்ட குடும்பங்கள் ஸ்ரார்த்தம் செய்யும் போது, அதற்கான சமையல் தனித்தனியே செய்யப்பட வேண்டும்.

ஒரு இடத்தில் சமையல் செய்து அதை, அத்தனைப்பேரும் பங்கிட்டுக் கொள்ளக்கூடாது. ஒவ்வொருவரும் பிண்டம் வைக்கின்ற இடங்களும்,  தனித்தனியாகவே இருக்க வேண்டும்.

642. ஸ்ரார்த்த தினத்தன்று வாசலில் கோலம் இடக்கூடாது.

643. விரதமிருந்து சபரிமலை செல்பவர்களாக இருந்தாலும், விரத காலங்களில் வருகின்ற தர்ப்பணம், ஸ்ரார்த்தம் ஆகியவற்றைச் செய்யாமல் இருக்கக்கூடாது.

644. வருஷாப்திகத்திற்கு அடுத்த நாள் சுபஸ்வீகரணத்தை மட்டுமே செய்ய வேண்டும். வேறு எந்த ஹோமங்களையும் அன்றைய தினம் செய்யக்கூடாது.

645. ஸ்ரார்த்த உணவில் மாதுளம்பழம், வெள்ளைப்பூசணி, முந்திரிப்பருப்பு ஆகியவற்றைச் சேர்க்கக்கூடாது.

646. ப்ராமணார்த்தத்திற்கு அமருகின்றவர் அருகிலோ அவர்களுக்கு முன்னால் இருக்கின்ற இலைகளிலோ, "பலி"யை வைக்கக்கூடாது.

647. ப்ராமணார்த்தத்திற்கு அமருபவர்கள் சாப்பிட்ட பின்னர், "பித்ரு" இலையில் இருப்பவரே, முதலில் கை கழுவ வேண்டும்.

648. கரை இல்லாத வேஷ்டி, துண்டுகள், தைத்த துணிமணிகள் ஆகியவற்றை ப்ராமணார்த்தத்திற்கு வருபவர்களுக்கு அளிக்கக்கூடாது.

649. ப்ராமணார்த்தத்திற்கு அமர இருப்பவர்கள், அவர்கள் முதலிலேயே நீராடிவிட்டு வந்தாலும், ஸ்ரார்த்தம் நடக்கின்ற இடத்தில் மறுமுறை நீராடிவிட்டே அமர வேண்டும்.

650. ஸ்ரார்த்தங்களில் உபயோகிக்க இருக்கின்ற கிண்ணங்கள் புதியதான வாழை இலைகளில் செய்யப்பட்டவையாக இருக்க வேண்டும். கடைகளில் விற்கப்படுகின்ற உலர்ந்த சருகுகளால் ஆன கிண்ணங்களைப் பயன்படுத்தக்கூடாது.

651. ஸ்ரார்த்தம் நடக்க இருக்கின்ற தமிழ் மாதத்தில், ஒரு பக்ஷத்திற்கு (15 நாட்கள் − அமாவாசையிலிருந்து பௌர்ணமி வரை அல்லது பௌர்ணமியிலிருந்து அமாவாசை வரை) எண்ணெய் குளியலும், முகச்சவரமும் செய்யக்கூடாது.

652. ச்ரார்த்த உணவில் நெய், நல்லெண்ணெய் தவிர வேறு எண்ணெய்களைப் பயன்படுத்தக்கூடாது.

653. இறப்பு வீட்டில் செய்யப்படுகின்ற காரியங்களைத் துவங்குவதற்குமுன், தலையில் குட்டிக்கொண்டு சொல்லுகின்ற "சுக்லாம்பரதரம் விஷ்ணும்" சொல்லக் கூடாது.

654. இறந்துவிட்டவர் கயைக்கு சென்று சில காய்கனிகளை விட்டுவிட்டார் என்பதைக் காரணம் காட்டி, ஸ்ரார்த்த உணவில் சேர்க்க வேண்டிய முக்கியமான காய்கனிகளைச் சேர்க்காமல் இருக்கக்கூடாது.

655. ஸ்ரார்த்தத்திற்குப் பதிலாக ஏழைகளுக்கு உணவிடுவது ஸ்ரார்த்தம் செய்வதால் வருகின்ற பலனை நிச்சயம் பெற்றுத் தராது

விருப்பப்பட்டால், ஸ்ரார்த்தம் முடிந்த பிறகு அந்த அன்னதானத்தைச் செய்யலாம்.

(வளரும்..)

தர்ம சாஸ்திரம் பகுதி −43

(தெரிந்து கொள்ளலாமா?..)

தர்ம சாஸ்திரம் பகுதி −43

(ஆசிரியர் −திரு.V.ராஜகோபால கனபாடிகள்..)

626. கோலங்கள் தினமும் வாசலில் அரிசிமாவைக் கொண்டு அன்றன்று இடவேண்டும்.பெயிண்டால் வரைந்தோ, ஸ்டிக்கர் கோலமோ வீட்டிற்கு சுபிட்சத்தை அளிக்காது.

627. வீட்டில் பூஜையறையிலும், வாசல் நிலைப்படி அருகிலும், சூரிய உதயத்தின்போதும், அஸ்தமனத்தின் போதும், பெண்களாலேயே திருவளக்குகள் ஏற்றப்பட வேண்டும். கணவரோ, வேலைக்காரரோ ஏற்றுவது சரியல்ல.

628. கர்ப்பிணிப் பெண்கள் மரம், செடி வெட்டுவதைப் பார்க்கவும் கூடாது. அந்த மாதிரி இடங்களில் இருப்பதும் கூடாது.

629. கர்ப்பிணிப் பெண்கள் எந்த கெட்டவார்த்தைகளையும் கேட்கக் கூடாது. தொலைக்காட்சி, திரையரங்கு இவற்றிலிருந்து வருகின்ற ஒலிகளும் குழந்தையின் புத்திசாலித்தனத்தைக் குறைக்கும் என்பதால், இவற்றை அறவே விலக்க வேண்டும்.

630. குழந்தை பிறந்து நாற்பது நாட்கள் வரையிலும், குழந்தையையும், தாயையும் வேறு வெளி இடங்களுக்கு அழைத்துச் செல்லக்கூடாது.

631. செவ்வாய், வெள்ளிக்கிழமைகளில் மகளைத் தாய்வீட்டிலிருந்தும், மருமகளைக் கணவன் வீட்டிலிருந்தும் அனுப்பி வைக்கக்கூடாது. அதுபோன்றே அவர்கள் இருக்கும் இடங்களிலிருந்தும் செவ்வாய், வெள்ளிக்கிழமைகளில் தாய்வீட்டிற்கோ, கணவன் வீட்டிற்கோ அனுப்பி வைக்கக் கூடாது.

632. குழந்தைக்குப் புண்யாவசனம் செய்கின்ற நாளில், தாய் சிறிது பஞ்சகவ்யம் சாப்பிடாமலும், தாலிச்சரட்டை மாற்றிக்கொள்ளாமலும் இருக்கக்கூடாது.

633. எண்ணெய் தேய்த்துக் குளிப்பதாக இருந்தாலும்கூட, பெண்கள் தாலிச்சரட்டைக் கழற்றி வைக்கக்கூடாது.

634. உபநயனங்களிலும், திருமணங்களிலும் பாலிகை தெளிக்கும் சுமங்கலிப் பெண்கள் விதையைத் தூவக்கூடாது.. தண்ணீரை மட்டுமே தெளிக்க வேண்டும்.

635. ஆரத்தி எடுத்து முடித்தபிறகு, வடக்குத்திசையில் நிற்கின்றவரே தட்டை எடுத்துச் செல்ல வேண்டும். தெற்குத்திசையில் நிற்பவரிடம் ஆரத்தி தட்டைக் கொடுக்கக்கூடாது.

636. வெளியில் கிளம்பிச் செல்பவரை, பின்னாலிருந்து கூப்பிடக்கூடாது.

637. தீபாவளி அன்று தர்ப்பணம் செய்ய வேண்டியிருந்தால், அன்றையதினத்தில் முதல்நாள் செய்த பலகாரங்களையும், லேகியத்தையும் சாப்பிடக்கூடாது. 

638. ச்ரார்த்தம், தர்ப்பணம் போன்றவை செய்து முடிக்கும் வரையில் தொலைகாட்சி பார்ப்பதும், தொலைபேசியில் பேசுவதும் கூடாது.

639. தர்ப்பணம் செய்பவர், அன்று இரவு பட்டினி இருக்கக்கூடாது.

640. ச்ரார்த்தமன்று அக்னியையும், புரோகிதரையும் வலம் வரும்போது, கர்த்தா, தனது தம்பிகளையும், மனைவியையும் முன்னால் செல்லவிட்டு, தான் பின்னே வரவேண்டும்.

(வளரும்..)

தாராசுரம்

 தாராசுரம் என்னும் மாயாலோகம்

   புலர்ந்தும் புலராத வைகறை பொழுதில், தாராசுரம் வந்து சேர்ந்தோம். கும்பகோணத்திலிருந்து சுமார் 10 கிமீதான். சோழர் காலத்தில் பழையாறையைச் சேர்ந்த ஒரு சிறு பகுதியாக இருந்ததாம். கிபி 1167 ல் இரண்டாம் ராஜராஜனால்(இரண்டாம் குலோத்துங்க சோழனின் குமாரன்) கட்டப்பட்ட கோயில். 

   இந்திய தொல்லியல் துறையினால்(ASI) இந்தக் கோயில் பராமரிக்கப்பட்டு வருகிறது. ஆலயம் ஒரு கோட்டை போல் காட்சி அளிக்கிறது. ஆலயத்தைச் சுற்றி அகன்ற புல்வெளி பச்சைநிறப் பாய் விரித்தது போல் தோன்றுகிறது. 

    கிழக்கு வாசலில் மொட்டை கோபுரம் காணப்படுகிறது. அதை ஒட்டிய இடிந்து போன சுவர்களில், சிதைந்து போன சிற்பங்களில் கூட சோழர் கால சிற்பிகள் கைவண்ணம் தெளிவாகத் தெரிகிறது.

    சுவாமி சந்நிதி நடை திறக்கவில்லையாதலால், அம்பாளின் தனிக்கோவிலுக்குச் சென்றோம். பிற்கால சோழர் கட்டமைப்பில் தான், அம்பாளுக்குத் தனி ஆலயம் அமைக்கும் வழக்கம் நடைமுறைக்கு வந்தது.

  'குறைவற முப்பத்திரண்டு அறம் வளர்க்கும் அம்பிகை' , அவளை நாடி வந்த எங்களை ஏமாற்றவில்லை. அன்னையல்லவோ அவள்!! குழந்தைகள் 'அம்மா' என அரற்றும் முன்பே, ஓடி வந்து அருள் புரிதல் அவளின் இயல்பன்றோ! தெய்வ நாயகியும் ஆலயக் கதவை மட்டுமல்ல, அவளின் சேலொத்த விழிகளையும் திறந்து வைத்து, எங்களை அழைத்து ஆட்கொண்டாள்.

    அந்த குளிர்விழிப் பார்வையிலே நாங்கள் கரைந்தே போனோம்.

  "வல்லபம் ஒன்றறியேன், சிறியேன்-நின் மலரடி செம்பல்லவம் அல்லது பற்றொன்றிலேன்; பசும் பொற் பொருப்பு வில்லவர் தம்மோடும் வீற்றிருப்பாய், வினையேன் தொடுத்த சொல், அவமாயினும் நின் திருநாமங்கள் தோத்திரமே."

   கண்கள் மட்டுமா? அவளின் முல்லை அரும்பை நிகர் மெல்லிய நாசிகளும், அவற்றில் ஜொலித்த நத்தும், புல்லாக்கும்...மாதுளம்பூ வர்ண அதரங்களும், அதில் ஜொலித்த இளநவ

முறுவலும், செந்நிற சேலையும் அதன் கீழ்த் தெரிகின்ற பாதசரம் அணிந்த செம்பஞ்சு சரணங்களும்...அடியாளுடைய வர்ணனைக்கு அப்பாற்பட்ட சௌந்தர்ய வதி, இந்த தெய்வநாயகி!  அவள் கொலுவிருக்கும் மண்டபம் யாளி தூண்களால் அமைக்கப்பட்டிருந்தது.

   அற்புதமான ஏகாந்த சேவைக்குப் பின்

தெய்வநாயகியின் தர்பாரிலிருந்து நீங்கி, தென்னாடுடைய சிவனின் சந்நிதிக்கு மீண்டோம். 

   வாசலில் அழகான நந்திகேஸ்வரர் சற்று தாழ்வான முற்றத்தில் காற்றாட அமர்ந்திருக்கிறார். அவரிடம் அனுமதி பெற்று, பலிபீடத்தையும் வணங்கிவிட்டு, ஆலயத்தினுள் நுழைகிறோம். நந்திக்குப் பின்னால் சப்தஸ்வர படிகள், கம்பிக்குள் சிறை வைக்கப்பட்டிருக்கின்றன.

   கோயிலுக்குள் காலடி எடுத்து வைத்ததும் சிற்பங்களால்(miniatures)

சமைத்த கோட்டைக்குள் நுழைவது போன்ற உணர்வு அனைவருக்கும்...

   கருங்கல்லில் ஒரு கலைக்கோயில்...

முன் மண்டபம் ஒரு தேர் போல் காட்சியளிக்கிறது. மேல் ஏறியவுடன் கருங்கல் சிற்பத் தூண்கள் நிரம்பிய தளம். ஒவ்வொரு ஸ்தம்பமும் அழகின் பிம்பம். மலர்கள், கொடிகள், தேவலோக காட்சிகள், நடனமாடும் அரம்பையர், அறுபத்து மூவரின் வரலாறுகள், கைலாயக் காட்சிகள், புராணங்கள்...அனைத்தையும் இந்த ராஜ கம்பீர மண்டபத்தில் சிற்பங்களாய் வடித்து விட்டனர் இந்தப் பொல்லாத சோழச் சிற்பிகள். 

    கங்கை கொண்ட சோழபுரத்தைப் போல அண்ணாந்து பார்த்து வியக்கும் கம்பீர சிற்பங்கள் அல்ல, இங்கிருப்பவை...குனிந்து பார்த்து குதூகலிக்கும், ஒன்றரை சாண் உயரம் உள்ள செவ்வகப் படிமங்களில் செதுக்கப்பட்டவை. நாட்டிய சாஸ்திரத்தில் சொல்லப்பட்டுள்ள கரணங்கள், முத்திரைகள், பயன்படுத்தப்படும் வாத்தியங்கள் அனைத்தையும் வடித்திருக்கின்றனர். அதைத் தவிர வெளிப்ரகாரத்தின் முடிவில், ஒரு சிற்பக்கூடத்தைக் காணலாம். சிதிலமடைந்த சிலைகள், உற்சவ மூர்த்தங்கள், பூர்த்தியாகாத கலை வடிவங்களை இங்கு வைத்திருக்கின்றனர். இந்த மண்டபத்தின் மேல் விதானத்தில் 12 ராசிகளும் புடைப்பு சிற்பங்களாகப் பொளிந்திருக்கின்றனர்.

    ஒரு நாள் போதுமா இந்த சிற்பக் கோட்டையை ரசிக்க?  கண்களை மூடிக்கொண்டு...யாளியின் சிலை மீது கை வைத்தால், அது உறுமும் சப்தம் கேட்கிறது..முன்னங்கால்களைத் தூக்கியபடி ஓடி வரும் குதிரை சிலைகளைப் பார்த்தால், நம் மேல் பாய்ந்து விடுமோ என அச்சம் வருகிறது. நடன மங்கையரைப் பார்த்தால் இந்திர லோகம் தெரிகிறது....நாதஸ்வரம், மேளம், சேமக்கலம், ஆலயமணியின் ஓசை எல்லாம் இயைந்து வருகின்றன..ஆடல் வல்லான் சபையில் சலங்கை ஒலி, உடுக்கை, பறை ஓசைகள் செவிகளை நிறைக்கின்றன. ...கைலாயம் இது தான் என்று காதில் யாரோ சொல்வது போல் இருந்தது..

  அம்மையும், அப்பனும் இந்த கொலு மண்டபத்தில் எளிமையாக காட்சி தருகின்றனர். விஷ்ணு மாயா தேவி, (மோகினி அவதாரம்) கையில் அமிர்த கலசத்துடனும், தாமரை மலருடனும் சிரிக்கிறாள். இந்தக் கோயில் பாடல் பெற்ற ஸ்தலமன்று..ஆனால் ஒட்டக்கூத்தரின் 'தக்கயாக பரணி'யில் இதைப் பற்றிய குறிப்புகள் காணப்படுகின்றன.

  ஒரே ஒரு குறை, ஏக்கம்...அந்த மன்னாதி மன்னர்கள் இருந்தபோது, இவ்வாலயங்களில் எந்த மாதிரி ஒரு கோலாகலம் இருந்திருக்க வேண்டும்?

ஆறுகால பூஜைகளும், அடியவர் திருக்கூட்டமும், வேத கோஷமும், திருமுறை ஓதலும், இன்னிசை வாணர்களும், நாட்டியப் பெண்களும், நாசிகளை வருடும் திருநீறு, சந்தனம், பன்னீர் கலந்த வாசமும், நறுமணம் நிறைந்த மலர்மாலைகளை சூடி அகமகிழ்ந்து அமர்ந்திருக்கும் இறைவனும், இறைவியும் அனைவருக்கும் அருளை அள்ளி அள்ளி வழங்கும் அழகும்...என்ன ஒரு அனுபூதி நிலை அது? 

கண்களைக் திறந்தால் இன்றைய வெறுமை நெஞ்சில் அறைகிறது.

இது வெறும் நினைவுச்சின்னம் என்ற நிலை மாறி, தெய்வீக அதிர்வலைகள் நிரம்பிய ஆலயமாக வேண்டுமெனில், பக்தர்கள் ஆறுகாலத்திலும் திரளாக ஆலயத்திற்கு சென்று, பூஜா விதிகள் செழுமை பெறச் செய்ய வேண்டும். 

அப்போதுதான் இந்த ஆலயம் இன்னுமொரு ஆயிரம் ஆண்டுகள் ஜீவனுடன் இருக்கும். 

கிளம்பும் சமயமாகி விட்டது. கதிரவன் மேலெழும்பி தன் கிரணங்களால் கோபுரத்துக்கு பொற்கூரை வேய்ந்திருந்தான். அந்த அழகையும் ரசித்தோம்...புகைப்படங்கள் எடுத்தோம்.சோகம், பெருமை, கழிவிரக்கம், கோபம், இயலாமை இத்தனை உணர்ச்சிகளும் ஒரு சேர்ந்து மனதில் ஒரு வண்டு போலக் குடைகிறது, விழிக்கடையில் ஒரு துளி நீர், பாரமாய் நெஞ்சில் இறங்குகிறது. 

   விடை கொடுப்பீர் அம்மையே, அப்பனே!

    அழைத்தால் மீண்டும் வருகிறோம்.

"நாயிற் கடையாய்க் கிடந்த அடியேற்குத்
தாயிற் சிறந்த தயாவான தத்துவனே
மாசற்ற சோதி மலர்ந்த மலர்ச் சுடரே
தேசனே தேனாரமுதே சிவபுரனே
பாசமாம் பற்றறுத்துப் பாரிக்கும

Gayathri

யாருக்கு? - சுஜாதா

 யாருக்கு? -  சுஜாதா சிறுகதை

(Shared by R.C. Natarajan) 

அடுத்த எம்.டி. பதவி யாருக்கு என்பதுதான் வெப்ஸ்டர் கார்ப்பரேஷனின் ஆயிரத்து நானூற்று எண்பது சிப்பந்திகளிட மும் முதல் கேள்வியாக இருந்தது. தற்போது அதன் தலைமையில் இருக்கும் ரிச்சர்ட் க்ரிஃபித் என்கிற வெள்ளைக்காரர் குணபாலன், அல்லது லீ, இருவரில் ஒருவரைத் தன் வாரிசாக நியமித்துவிட்டு ஓய்வு பெறப் போகிறார் என்பது பரவலான வதந்தியாக இருந்தாலும், இருவரில் யாரைத் தேர்ந்தெடுக்கப் போகிறார் என்பது பற்றிக் கம்பெனியில் கடுமையாகக் கருத்து வேறுபாடுகள் இருந்தன.

கம்பெனி இருப்பது சிங்கப்பூரில். தொண்ணூற்று ஐந்து சதம் சொர்க்கத்தை நினைவுறுத்தும் சிங்கப்பூரின் செல்வச் சிறப்புடனும் மேம்பாட்டுடனும் வளர்ந்த பெரிய வியாபாரக் கம்பெனி. வெ.கா சிங்கப்பூர் டாலர்களில் முன்னூறு மில்லியன் டர்ன் ஓவர். அவர்கள் வாங்காதது இல்லை. விற்காதது இல்லை. கைனகாலஜிஸ்டுகள் பயன்படுத்தும் ரப்பர் கையுறையிலிருந்து எலக்ட்ரானிக்ஸ், கம்ப்யூட்டர் உதிரிகள் டிஸ்க் தகடுகள், ‘பிஸி'க்கள். பாலித்தின் வகையில் கோடி ரசாயனப் பொருட்கள். ஏபி.எஸ். பிளாஸ்டிக்—எதற்கு ரொம்ப டெக்னிக்கலாகப் போக வேண்டும்? எந்தச் சந்தர்ப்பத்தையும் விடாமல் எதையும் வாங்கி விற்கும் ஒரு மகா மெகா நிறுவனம். 

சிங்கப்பூர் போன்ற சுதந்திர துறை முகத்தில் இம்மாதிரி கம்பெனிகளுக்கு பெரிய லாபம் ஈட்டும் சாத்தியம் உள்ளது. கொரியா, தாய்வான் ஜப்பான் போன்ற நாடுகளின் அண்மை செல்வாக்கில் மிகவும் பயனடைந்தது. சிங்கப்பூரில் மேலும் இந்நகரத்தில் கிடைக்கப் பெறும் சலுகைகள், தேர்ந்த தொழில்நுட்பங்கள் எல்லாமே நகரத்தின் செல்வாக்கையும் நகரத்தில் உள்ள கம்பெனிகளின் செல்வாக்கையும் உயர்த்தியிருப்பதை நேரில் பார்க்கலாம்.

சாங்கி விமான நிலையத்திலிருந்தே இந்தச் சிறப்பு உங்களைத் தாக்கும். அதன் வாக்வேயில் நடக்காமல் நடந்து கொண்டு செல்லும்போது கண்ணைப் பறிக்கும் கண்ணாடி சன்னல்களுக் குள் முழுசாக டொயோட்டா கார் நிற்பது முதல் தாக்க மென்றால், எக்ஸ்ப்ரஸ் வேயில் ஏஸி டாக்ஸியில் செல்லும்போது இருபுறமும் பசுமையைக் கடந்து மத்திய பிஸினஸ் பிரதேசத்தில் நுழைந்து 'ஷென்டன்வே' க்கு வந்தால் சாக்லெட் நிறத்தில் பளபளப்பான கிரானைட்டில் இருபத்தெட்டு மாடிக் கட்டடம் வருகிறதே, அதுதான் அடுத்த தாக்கம்; வெப்ஸ்டர் கார்ப்பரேஷனின் தலைமையகம். அதன் பதினெட்டாம் மாடிக்கு மிட்ஸுபிஷியின் இன்னிசைக் கனவும் கம்ப்யூட்டரும் இயங்கும் லிஃப்டில் விரைந்து வந்து தானாகவே திறந்து கொள்ளும் கண்ணாடிக் கதவுகளைத் தாண்டிக் காத்திருந்தால் அந்த மெல்லிய சீனப்பெண் உங்களை கான்பரன்ஸ் அறையில் உட்கார வைப்பாள். சுற்றிலும் பார்த்தால் அந்த நவீன அலுவலகத்தில் கணத்தில் நிலவிய டென்ஷனை நீங்கள் உணர முடியாது. பரபரப்பு உள்ளுக்குள் பொதிந்து இருந்தது.

அடுத்தது யார்? லீயா? குணபாலனா?

ரெண்டுபேரையும் பற்றி விவரித்தால் குணபாலனுக்குத்தான் அதிகத் தகுதி என்று உங்களுக்கு உடனே புரியும். குணபாலன் அந்தக் கம்பெனியில் பதினெட்டு வருஷம் உழைத்தவர். ஆரம்பத்தில் ஒரு சிறிய அறையில் ஒரு டெலிபோனைப் பகிர்ந்து கொண்டு ஒரே ஒரு கெமிக்கல் ஏஜென்ஸியாகத் துவங்கிய காலத்திலிருந்து லேஸ்ஸில் சேர்ந்து கம்பெனியுடன் வளர்ந்து வைஸ் பிரஸிடெண்ட்டுக்கு உயர்ந்தவர். படிப்பு பெரிசாக இல்லை. பி.ஏ. வரை படித்தவர். அதன்பின் எம்.பி.ஏ. போன்ற அடையாளங்களுக்கெல்லாம் தேவையின்றி க்ரிஃபித்தின் முழு நம்பிக்கைக்குப் பாத்திரமாகி அவர் இங்கிலாந்து போயிருந்த போது கம்பெனியை முழுசாகப் பார்த்துக் கொண்டவர். கம்பெனி இந்த நிலைமைக்கு வந்ததற்குக் காரணம் யார் என்று க்ரிஃபித்தைக் கேட்டால் தயங்காமல் குணபாலன் தான் என்று சொல்வார்.

மேலே கதையை நகர்த்துவதற்கு முன் குறிப்பு: இந்தக் கதை இன்றைய தினத்தைப் பற்றியது இல்லை. சில வருஷங்களுக்கு முன் நடந்தது. எத்தனை வருஷம் முன்பு என்பது கதையின் இறுதியில் தெரியும்.

லீயின் முழுப்பெயர் ரிச்சர்ட் லீ. ஆனால் கிறித்தவனல்ல. சிங்கப்பூரில் சீனர்கள் மேல்நாட்டுக்காரர்களுக்குச் சலுகையாக ரிச்சர்ட், மைக்கல் போன்ற கிறித்தவப் பெயர்களை முன்னால் ஒட்டிக் கொள்வது வழக்கம். லீ சீனாக்காரன். சிங்கப்பூரில் இருபத்தாறு இலட்சத்தில் இருபது லட்சம் மக்கள் சீனர்கள். அவர்களிடம்தான் பெரும்பாலான பணம் இருக்கிறது.

லீயுடன் ஒப்பிட்டுப் பார்த்தால் குணபாலன் கறுப்பு. குள்ளம். லீயின் நிறம் லேசான மஞ்சள் அல்லது வெள்ளை. குணபாலன் லீயைவிட எட்டுவயது அதிகமானவர். நேரில் பார்க்கும்போது வயது வித்தியாசம் அதிகம் தெரியும். இருந்தாலும் இந்த வெளித் தோற்றங்கள். எல்லாம் க்ரிஃபித்தின் தீர்மானத்தை எப்படியும் பாதிக்காது என்றுதான் பலரும் எண்ணினர். அண்மைக் காலத்தில் நடந்த கம்பெனி விருந்துகளில் எல்லாம் “எனக்கு அடுத்தது குணபாலன்தான்,”என்று க்ரிஃபித் அடிக்கடி சொல்லிக் கொண்டு வருவதை லீ புன்னகையுடன் கேட்டுக்கொண்டிருந்தான். 

ஒருக்காலும் லீக்கு சந்தர்ப்பம் வரும் என்று எவரும் எதிர்பார்க்கவில்லை. இருக்கிற வைஸ் பிரஸிடெண்டுகளிலேயே குணபாலன்தான் சீனியர். லீயை வேலைக்காக, இண்டர்வ்யூ பண்ணியதே அவர்தான். அப்படி இருக்க, லீ தனக்குப் பெரிய பதவிக்குப் போட்டியாக இருப்பான் என்று குணா நினைக்கவே இல்லை.

லீ கெட்டிக்காரன். புன்னகையிலேயே அத்தனையும் மழுப்பி விடுவான். போதாக்குறைக்கு, சீனத்தனமான சிறிய கண்களும் எப்போதாவதுதான் புன்னகைக்கும் சுபாவமும் அவன் உள்ளுக்குள் ஓடிய திட்டங்களைப் பூர்ணமாக மறைத்தன.

க்ரிஃபித் ரிடையர் ஆவதற்கு ஒரு மாதம் இருக்கும் போது அந்த யுத்தம் துவங்கியது. போர்டு மீட்டிங் முடிந்து ஒரு ஜப்பானிய டெலிகேஷன் வந்திருந்தபோது க்ரிஃபித் குணபாலனை யும் லீயையும் அழைத்து ஜப்பானியர்களுக்கு அறிமுகப்படுத்தி வைத்தார். 

"மிஸ்டர் லாக்க மோட்டா, மீட் மை சக்ஸஸர்" என்று சொல்லிக் குணபாலனைக் காட்ட, 

அவர் "வெரி வெரி ஹாப்பி” என்று கை குலுக்கியபோது, லீயின் முகத்தில் மாறுதலை குணபாலன்தான் கவனித்தார். 

ஜப்பான்காரன் போனவுடன் “குணா கொஞ்சம் இருங்கள்” என்று க்ரிஃபித் சொல்ல, லீ, 

"மிஸ்டர் கிரிஃபித், உங்களுடன் பேசலாமா?'

“என்ன ரிச்சர்ட்?''

"குணபாலன் நியமிக்கப்பட்டு விட்டாரா? போர்டு அனுமதித்து விட்டதா?"

"இல்லை போர்டில் இதை நான் இன்னும் பிரேரேபிக்கவில்லை. ஆனால் என்ன. நான் சொல்வதை அவர்கள் ஏற்கத்தான் போகிறார்கள். " 

"எப்படி அதற்குள் நீங்கள் தீர்மானிக்கலாம், அடுத்த வாரிசு குணாதான் என்று?"

"வேறு யாராவது இருக்கிறார்களா என்ன?”

"ஏன், நான் இல்லையா? எனக்குத் தகுதியில்லையா?"

 க்ரிஃபித் பெரிய ஜோக் கேட்டவர் போலச் சிரித்தார். "யூ மஸ்ட் பீ கிரேஸி ரிச்சர்ட்!" 

"ஐம் சீரியஸ் மிஸ்டர் க்ரிஃபித்!”

"நீ எங்கே, குணா எங்கே?'

“எனக்கு ஏன் தகுதியில்லை என்று முன்கூட்டியே தீர்மானித்தீர்கள்?”

"உன்னைப் பற்றிப் பேச்சே இல்லையே!"

“ஏன்?”

"நீ... நீ வந்து... இந்த வேலைக்கு அனுபவம், வயது போதாது, ரொம்ப சின்னவன்." 

"மிஸ்டர் க்ரிஃபித், நீங்களே எத்தனை முறை சொல்லியிருக்கிறீர்கள். இது இளைஞர்களின் காலம் என்று.”

"வேறு சந்தர்ப்பத்தில் சொல்லியிருக்கிறேன். லுக் நீ ஏதாவது பெரிசாக ஆசை வைத்துக் கொண்டிருந்தால் ஸாரி, அந்த சோப்புக் கொப்புளங்களை உடைக்க வேண்டியது என் பொறுப்பு. அடுத்த தலைமைப் பொறுப்பு குணாதான். அத்தனைதான். மேலே பேச வேண்டாம்" என்றார்.

"போர்டு தீர்மானிக்க வேண்டுமே”

"போர்டு என் முஷ்டிக்குள் இருக்கிறது. போ, போய் வேலையைப் பார். அதிகப் பேராசை வேண்டாம்.'' என்றார்.

குணா எதுவுமே பேசாது பதினெட்டாவது மாடி சன்னலுக்கு வெளியே தெரிந்த சிங்கப்பூர் நதிப் பாலத்தையும் துறைமுகத்தில் சாக்லெட் பெட்டிகள் போல அடுக்கியிருந்த கண்டெய்னர் களையும் பார்த்துக் கொண்டிருக்க...

'குணா, என்ன பெரிய ஜோக்! பார்த்தியா!" என்றார் க்ரிஃபித்.

“எனக்கு அப்படித் தோன்றவில்லை.”

லிஃப்ட்டில் லீயும் குணாவும் இறங்கும் போது, “ஒரு நிமிஷம் ரிச்சர்ட்."

“என்ன?”

"ஆர் யு சீரியஸ்?”

“ஆம்.”

“உனக்கு தலைமை ஏற்க ஆசையா?"

"ஆசையைப் பற்றிப் பேச்சில்லை. இது போர்டு தீர்மானிக்க வேண்டிய விஷயம். எப்படி க்ரிஃபித் தனியாக இந்தத் தீர்மானத்தை எடுக்க முடியும்?"

குணா அவனைப் பார்த்துப் புன்னகைக்க முயற்சிக்க, பதில் கிடைக்கவில்லை. ''உன் உள்ளத்தில் இருப்பது என்ன? நமக்குள் மறைவு வேண்டாம். ஏனெனில் நான் பதவி ஏற்றபின் உன் ஒத்துழைப்பு தேவை!”

"லுக் மிஸ்டர் குணா! உங்கள் தகுதி பற்றியோ திறமை பற்றியோ எனக்குச் சந்தேகமில்லை. ஆனால் கம்பெனி விதிமுறை இருக்கிறது. போர்டு தீர்மானித்த பின்தான் அடுத்த வாரிசை அறிவிக்க வேண்டும். க்ரிஃபித் போர்டில் ஒரு மெம்பர்! இன்னமும் எட்டுப்பேர் இருக்கிறார்கள். அவர்கள் சம்மதிக்க வேண்டாமா?"

"அவர்கள் க்ரிஃபித்தைத் தான் கேட்கப் போகிறார்கள். அவர் சொல்லும் பெயரை ஒப்புக் கொள்ள போகிறார்கள்."

“அப்படியா?" என்றான்.

“ரிச்சர்ட், ஏதாவது மனசில் இருந்தால் சொல்லி விடு."

“ஏதும் இல்லை." கொஞ்சம் பொறுத்து

"குணா, வீண் பேச்சு வேண்டாம். நீங்கள் தேர்ந்தெடுக்கப் பட்டால் அடுத்த கணமே நான் ராஜினாமா கொடுக்கப் போகிறேன்.''

குணா புன்னகைத்து, “அவ்வளவு தீவிரமாக இந்தப் பதவியை விரும்புகிறாயா? வைத்துக் கொள்ளேன்."

"தகுதியிருப்பதால், என் தன்னம்பிக்கையில்தான் சொல்கிறேன். எனக்கு யாரும் தர்மம் செய்ய வேண்டாம்.''

குணா மீண்டும் புன்னகைத்து விட்டுத் தன் வீட்டுக்குப் போனதும் சேர்மனுக்குப் போன் செய்தார்.

"மிஸ்டர் க்ரிஃபித், லிஃப்டில் இறங்குகையில் நான் லீயுடன் பேசினேன். அவன் இந்தப் பதவியை மிகவும் விரும்புகிறான்.” 

“நான்சென்ஸ். அவனைப் பற்றிப் பேச்சே இல்லை.”

"தனக்குக் கிடைக்காவிட்டால் ராஜினாமா செய்து விடுவானாம்!” 

"செய்யட்டும். உடனே அது ஒப்புக் கொள்ளப்படும் என்று சொல். இந்த மாதிரி என் கையை முறுக்க முடியாது. நான் பழைய சிங்கம்.”

குணா வீட்டுக்கு வந்து தன் மனைவியிடம் லீயின் ஆசையைப் பற்றிச் சொன்னார். 

“காவேரி. அவனுக்கு இந்த மாதிரி ஆசை இருக்கிறதே வேடிக்கைதான். நான் வளர்த்த பிள்ளை மாதிரி. நான் ரெக்ரூட் பண்ணிய ஆளு. எனக்கு பாஸா வர ஆசைப் படறான்னா, சீனத்துக்காரங்களுக்கே ஆசை அதிகம்தான்."

மாலை செரங்கூன் ரோடில் இருந்த பெருமாள் கோயிலுக்குச் சென்று சற்று நேரம் தியானத்தில் இருந்தார்.

"பெருமாளே, எனக்குத் தகுதியிருந்தால் இந்தப் பதவியைக் கொடு. லீமேல் எனக்குத் தோன்றும் ஆத்திரத்தை எரித்துவிடு. அவனுக்குத் தகுதியுள்ளது என்று போர்டு தீர்மானிக்குமானால், அதை நாகரிகமாக ஏற்றுக் கொள்ளும் மன அகலத்தை எனக்குக் கொடு."

மறுதினம் அலுவலகத்தில் பற்பல வதந்திகள் நுழைந்து விட்டன. அடுத்தது லீதான் என்று சிலர் பேசிக் கொள்வதாகவும் க்ரிஃபித்தைப் பற்றிய ரகசியங்கள் பல கம்பெனி செலவில் போனதும் ஸ்விஸ் வங்கியில் அக்கவுண்ட் வைத்திருப்பதும் தெரியும் என்றும், அதை வைத்து ப்ளாக்மெயில் பண்ணி லீ அவரைச் சம்மதிக்க வைக்கப் போகிறான் என்றும் வதந்திகள்... குணாவுடைய செக்ரட்ரி ப்ரியாதான் அதைச் சொன்னாள்.

குணபாலன் தன் பெருந்தன்மை இழக்காமல், “அப்படியா, அப்படியா!” என்று கேட்டுக் கொண்டிருந்தார். 

"உங்களுக்கு மட்டும் கெடைக்கல, இந்தக் கம்பெனியில உள்ள அத்தனைபேரும் ரிஸைன் பண்ணிருவோம் ஸார்.'

“அப்படியா?”

"மெய்யாலதான் சொல்றேன் ஸார். சீனத்துக்காரங்களுக்கே லீயைப் பிடிக்கலை. ரொம்பக் கோபக்கார ஆசாமி! பெண்களிடத்தில் மரியாதை கிடையாது."

"ஆபீஸ்ல பெண்கள், ஆண்கள்னு வித்தியாசம் பார்க்கக் கூடாது ப்ரியா.”

“என்ன நீங்க? உங்க போட்டிக்காரனுக்கே பரிஞ்சுக்கிட்டு வர்றீங்க?''

“அவன் போட்டிக்காரன் இல்லை. அதனாலதான்?” 

சேர்மன் தன் அறைக்கு வருமாறு விளித்திருந்தார். அவர்

உள்ளே நுழைந்ததும், "கமின் குணா, கங்கராஜூலேஷன்ஸ்” என்றார் க்ரிஃபித்.

"எதற்கு ஸார்?”

"நீங்கள் அடுத்த தலைவன் என்று போர்டு மெம்பர்கள் ஒவ்வொருவரையும் கூப்பிட்டுச் சொல்லிவிட்டேன். அவர்கள் கேள்வி கேட்காமல் ஒப்புக்கொண்டுவிட்டார்கள். புதன்கிழமை போர்டு மீட்டிங்கில் இதை அமல் படுத்திவிடலாம். நல்ல போட்டோ ஒண்ணு எடுத்துக் கொள், 'ஸ்ட்ரெய்ட் டைம்ஸ்’க்கு கொடுக்கவேண்டும்."

"முதலில் போர்டு மீட்டிங் நடக்கட்டும் ஸார்.”

"நீ இன்னமும் லீ வருவான் என்று எண்ணுகிறாயா?” என்று க்ரிஃபித் சிரித்தார். "காவேரி எப்படி இருக்கிறாள்? ரொம்ப நாளாச்சு பார்த்து, ஓய்வு பெற்ற பின் நிறைய கால்ஃப் ஆட போகிறேன். இங்கிலாந்து போய் ஒருமாதம் இருந்துவிட்டுத் திரும்ப வந்துவிடுவேன்.”

"சிங்கப்பூரில்தான் ஓய்வா?"

"ஆம். இந்த இடம் என்னுடன் ஒட்டிக்கொண்டு விட்டது. இதை விட்டுப் பிரிவது கஷ்டம். சைனிஸ், மலாய், தமிழ் என்று எத்தனை இனம் இருந்தும் எல்லோரும் சண்டை போடாமல் இருப்பதற்குக் காரணம் என்னவென்று நினைக்கிறாய்?"

குணா யோசித்தது, "விட்டுக் கொடுக்கும் தன்மை" என்றார்.

“தப்பு! காரணம் சுபிட்சம். விட்டுக் கொடுக்கும் தன்மை உனக்கு இருக்கலாம். லீயிடம் எதிர்பாக்காதே. அவன் இளைய சமுதாயத்தினன். முன்னுக்கு வர என்ன வேண்டுமானாலும் செய்வான். அதனால்தான் முன் கூட்டியே போர்டில் சொல்லி விட்டேன். குணா, எனக்கு லீயைப் பிடிக்கவில்லை. உனக்கு?”

"சொல்லத் தெரியவில்லை." என்றார் குணா.

புதன்கிழமை போர்டு மீட்டிங் ஒரு நாளுமில்லாமல் எட்டு மணி நேரம் நடந்தது. குணா தன் அறையில் கூட்டம் முடியும்வரை காத்திருந்தார். முடிந்த உடனே க்ரிஃபித் போன் செய்து தன்னறைக்கு வரச் சொன்னார்.

“குணா, ஸாரி .கொஞ்சம் சிக்கல்!" 

குணா மௌனமாகக் காத்திருக்க...

“எனக்கு ரொம்ப ஆச்சரியம். லீ போர்டு மெம்பர்களில் நால்வரை வளைத்துப் போட்டிருக்கிறான். எப்படி என்று புரியவே இல்லை. என்னையும் சேர்த்து நான்கு பேர் உனக்கு ஆதரவாகவும் நான்கு பேர் எதிராகவும் பேச, உன்னை நியமிப் பது இன்று முடியாத காரியமாயிற்று. ஒன்பதாவது மெம்பர் வராததால் இந்தப் பாடு. டோனி வந்திருந்தால் சிக்கல் இன்றோடு தீர்ந்திருக்கும். திங்கள் கிழமை மற்றொரு கூட்டம் கூட்டி இதைத் தீர்த்து விடுகிறேன். ஸாரி. ரொம்பத் தொந்தரவு இந்த லீயால்.”

குணா தன் அறைக்குத் திரும்பியபோது லீ காத்திருந்தான். 

“என்ன ஆயிற்றாம் போர்டு மீட்டிங்கில்?”

“லீ உனக்குத் தெரியாதா?”

"தெரியாது, அதனால்தான் கேட்கிறேன்.”

குணாவின் உதடுகள் துடித்தன. “லீ, நமக்குள் பாசாங்கு ஏதும் வேண்டாம், உனக்கு போர்டு மீட்டிங்கில் நடந்தது அத்தனையும் தெரியும்."

“மிஸ்டர் குணா, ஆனஸ்ட் ஐ தோன்னோ.”

“சரி சொல்கிறேன், போர்டில் பாதிப்பேர் சாதகமாகவும் பாதிப் பேர் எதிராகவும் ஒட்டளித்திருக்கிறார்கள். டோனி ஒருவர்தான் பாக்கி. இன்னும் தீர்மானமாகவில்லை." 

"டோனி ஒருவர்தானே பாக்கி! உங்களுக்கு நிச்சயம் கிடைத்துவிடும். டோனிக்கு என்னைக் கண்டால் ஆகவே ஆகாது.''

குணா அன்றிரவு படுக்கையில் தூக்கமில்லாமல் புரண்டார். 

"ஒரு வாரமாகவே சரியாத் தூங்கலைங்க நீங்க. ஏதாவது உடம்பு சரியில்லையா?" 

"இல்லை காவேரி. இந்த ஆபீஸ் சமாச்சாரம் ரொம்ப என்னைத் துளைக்குது.” 

காவேரி எழுந்து உட்கார்ந்து அவரைக் கண் கொட்டாமல் பார்த்தாள். 

"உங்களுக்கு இந்தப் பதவி நிசமாவே வேணாமா?"

"சொல்லத் தெரியலை காவேரி. லீக்கு சான்ஸே இல்லைன்னு நெனைச்சேன். இப்ப என்னடான்னா எனக்குச் சமமா போட்டியா வந்துட்டான். இப்ப ஒரு ஆளு டோனிடான்னு இருக்கார், ஒன்பதாவது மெம்பர். அவர் ஓட்டில் இருக்குது தீர்மானம்!” 

“ஏங்க லீக்குக் கெடைச்சா உங்களுக்கு ஏதாவது ஒரு விதத்தில் அவமானமா?'' 

“அவமானம் இல்லை காவேரி. வருத்தம். நான் இண்டர்வ்யூ பண்ண ஆளுக்கு நானே சேவகம் பண்றதா? அது தப்பில்லை?”

"லீ வந்தா நீங்க ராஜினாமா கொடுத்துரணுமா?”

“வேற பேச்சே இல்லை. தன்மானம் உள்ள எவனும் கொடுத்துருவான்.''

"வேற வேலை கெடைக்குமா?'

"அதைப்பத்தி யோசிக்கவே இல்லை. ஆரம்பத்தில் இருந்து இந்த கம்பெனியே மூச்சா இருந்துட்டேன். இந்த வயசில புதுசா ஒரு இடத்தில் வேலை பாக்கறது சாத்தியமில்லை."

"அப்ப ஒண்ணு செய்யுங்க. அந்த டோனிங்கற வரைப் போய்ப் பாருங்க. ஒரு காரியம் நடக்கணும்னு விருப்பப்பட்டா மட்டும் போதாது. அதுக்கேற்ற நடவடிக்கைகளும் எடுக்கணும். அவரைத் தெரியுமில்லை.''

"தெரியும்."

“அப்ப பார்க்கறதில என்ன தயக்கம்?”

“என் வாழ்நாளிலேயே செய்ததில்லையே? ஒரு ஆள் கிட்ட ஒரு ஃபேவருக்குப் போனதில்லை.” 

“சலுகை இல்லைங்க. உங்க தகுதியைப் பத்தி நியாயமா எடுத்துச் சொல்லப் போறீங்க, அவ்வளவுதான்!”

ஜுராங் டவுனில் எச்.டி.பியின் ஐந்து அறை ஃப்ளாட்டில் இருந்தார் டோனி. மணியடித்து ஒரு மலாய் வேலைக்காரி திறந்துவிட டோனிக்கு என்ன வயது என்று சொல்வது கஷ்ட மாக இருந்தது. பகுதி நேர டைரக்டராகப் பல கம்பெனிகளில் இருக்கிறார். பல காலமாகவே அவரை குணாவுக்குத் தெரியும்.

"என்ன குணா, இதற்காக இத்தனை தூரம் என்னைத் தேடி வர வேண்டுமா? ஒரு போன் பண்ணியிருந்தால் போதாதா?"

“இல்லை. போன் பண்ணுவது மரியாதையில்லை. மேலும் நேரில் பார்த்தால் சரியாக நிலைமையை எடுத்துச் சொல்லி விளக்கலாம் என்று..."

"தேவையே இல்லை குணா. உன் தகுதியைப் பற்றி எனக்கு எவ்விதச் சந்தேகமும் இல்லை. உனக்குத்தான் என் ஒட்டு! புதன் கிழமை நான் இருந்திருந்தால் விவகாரம் அன்றோடு தீர்ந்திருக்கும். என்னைப் பொறுத்த வரையில் சந்தேகமே இல்லை. ஆனால் மற்ற போர்டு மெம்பர்களைப் பற்றி என்னால் உத்தர வாதமாகச் சொல்ல முடியாது!”

“அவர்கள் நால்வர் எனக்குச் சாதகமாக ஓட்டுப் போட்டிருக்கிறார்கள்.”

“அதாவது க்ரிஃபித் உட்பட நான்கு பேர்!”

புதன்கிழமை போர்டு மீட்டிங் நடக்கையில் குணா ஆபீசில் இருக்க விருப்பமில்லாமல் காவேரியுடன் ஸெண்டோஸா போயிருந்தார். கேபிள் காரில் அந்தர நீலத்தில் தொங்கிக்கொண்டு போகும் போது ஆபீஸ்தான் அவரை ஆக்கிரமித்தது. 

“பதவி ஏற்ற உடனே் இந்தியா போக வேண்டியிருக்கும் காவேரி. ரொம்பப் பெரிய காண்ட்ராக்ட்டு ஒரு அமெரிக்க கம்பெனியோட சேர்ந்துக்கிட்டு.”

“பதவி வரட்டும் முதல்ல."

“அதானே!”

"எத்தனை வருஷமா கம்பெனிக்கு உழைச்சீங்க! இத்தனை வருஷம் சிங்கப்பூர்லே இருக்கோம். இதுதான் நாம ரெண்டு பேரும் தனியா செண்டோஸா வர்றது முதமுதலா.''

கோரல் பவழங்களிலும், கண்ணாடிப் பெட்டிக்குப் பின் அலைந்த வண்ண வண்ண மீன்களிலும், சிங்கப்பூர் சரித்திரத்தை விவரிக்கும் அருங்காட்சிகளிலும் அவர் கவனம் செல்லவே இல்லை, இன்னேரம் முடிந்திருக்க வேண்டும், தீர்மானித்திருப் பார்கள். க்ரிஃபித் உடனே கூப்பிடுவார். "குணா, எங்கே போயிட்ட?”

“என்னங்க, சொல்லச் சொல்லக் கேக்காம, கவனமில்லாம என்னவோ யோசனை! இதுக்கு வீட்டிலேயே இருந்திருக்கலாமே!”

“காவேரி என்னால பதட்டத்தைக் கட்டுப்படுத்த முடியலை. இங்க எங்கயாவது ஃபோன்... ஆபீசுக்குப் போன் பண்ணியே ஆகணும், இன்னேரம் தீர்மானிச்சிருப்பாங்க."

அவளை ஒரு 'ஃபன் வோர்ல்டு' நாற்காலியில் உட்கார வைத்துவிட்டு ரெஸ்டாரண்டிலிருந்து போன் செய்தார்.

"ஸாரி ஸார். மிஸ்டர் க்ரிஃபித் போர்டு மீட்டிங் முடிந்ததுமே வீட்டுக்குச் சென்று விட்டார்."

“மீட்டிங் எப்போது முடிந்தது.''

"பிற்பகல் இரண்டு மணிக்கே முடிந்துவிட்டது.” 

“என்ன தீர்மானமாயிற்றாம்?

''“ஏதும் மிஸ்டர் க்ரிஃபித் சொல்லவில்லை. ”

அடுத்தது ப்ரியாவுக்குப் போன் பண்ணினார்.

"ஸார், உங்களுக்கு மூன்று முறை ஃபோன் பண்ணி விட்டேன் வீட்டில."

"என்ன சொல்லு ப்ரியா?'

"மிஸ்டர் லீ உங்களோடு பேச விரும்பினார்.'

"அது கிடக்கட்டும், போர்டு மீட்டிங் என்னவாயிற்று சொல்!”

"சரியாக் தெரியவில்லை. ஆனால் பேசிக் கொள்கிறார்கள். மிஸ்டர் லீ தேர்ந்தெடுக்கப்பட்டுவிட்டதாக. எதற்கும் நீங்கள் க்ரிஃபித்தைக் கேட்கலாம். அவரும் ஒருமுறை உங்களுக்குப் போன் செய்தார்.''

போனை வைத்துவிட்டுப் பொம்மை போல அவர் நடந்து வருவதைக் காவேரி பார்த்து, "போனாப் போற துங்க இப்ப என்ன ஆச்சு? அது என்ன தலை போற விஷயமா?"

“லீக்கு ஆயிருச்சாம் காவேரி."

"போனாப் போவுதுங்க.''

அத்தனை சந்தோஷங்களுக்கு மத்தியில் தலையைப் பிடித்துக் கொண்டு உட்கார்ந்தார்.

"எப்படி அதை நான் ஒத்துக்க முடியும்! சொல்லு காவேரி? அனுபவம், திறமை இரண்டும் இருந்தும் என்னை அவங்க ஏத்துக்கலைன்னா என்ன அர்த்தம்? நான் ஒரு தமிழன்கிறதால தானே? சைனாக்காரன் கடைசியில புத்தியைக் காட்டிட்டானாம்! பார்த்தியா, இதில் ஒரே ஒரு நியாயமான ஆளு வெள்ளைக்காரன் க்ரிஃபித்தான் அவர்தான் நேர்மையுள்ளவர்.”

"அவரையே போய்ப் பார்ப்போம்.'

"நான் ராஜினாமா செய்யணும் காவேரி.'

"க்ரிஃபித்தைப் போய்ப் பார்த்தால் போதும். அதற்குப் பிறகு யோசிக்கலாம்."

=============================

கிரிக்கெட் கிளப்பில் பச்சைக் கம்பளம் விரித்தாற் போல மைதான விளிம்பில் பிரம்பு நாற்காலியில் அரை டிராயரில் க்ரிஃபித் உட்கார்ந்து கொண்டு பியர் அருந்திக் கொண்டிருந்தார். 

“ஆ குணா, கம், கம் ஜாய்ன் மி.”

குணா மரியாதையாக உட்கார, “போர்டு மீட்டிங்கில் நடந்தது தெரியுமோ? இட்ஸ் எ ஷேம்.''

"கேள்விப்பட்டேன்.”

“நான் ராஜினாமா செய்து விட்டேன்."

"ஸார், நீங்களா?"

''ஆம்! நான் சொல்வதைக் கேட்காத, என் வார்த்தைக்கு மதிப்புத் தராத இந்தப் போர்டு, என்னை அவமதித்த இந்தப் போர்டில் மேற்கொண்டு பணி செய்ய எனக்கு விருப்பமில்லை. சே! என்ன, இந்த லீ இருக்கிறானே மகா எத்தன்.'

“டோனி எனக்குச் சாதகமாக ஓட்டுப் போடவில்லையா?"

"டோனி போட்டான். ஆனால் மற்ற மெம்பர்களிலிருந்து இருவரைப் பிடித்து வளைத்துப் போட்டு விட்டான். கட்சி மாறி விட்டனர். எல்லாமே சைனிஸ் கிளிக். இந்தக் கம்பெனி குட்டிச்சுவராகப் போகிறது. குணா. அது எந்தவிதத்திலும் உன் உழைப்புக்கும் திறமைக்கும் குறை சொல்வது இல்லை. நவீன இயக்கங்கள் மாறிவிட்டன. மரியாதைக்கும் யோக்கியத்துக்கும் இடமில்லாமல் நாய் நாயைத் தின்னும் வியாபாரமாகிவிட்டது. இல்லாவிட்டால் இன்று போர்டு அவ்வாறு நடந்திருக்காது. குணா, நான் மிக வருத்தப்படுகிறேன். மன்னித்து விடு. என் மனச்சாட்சி இடம் கொடுக்காததால் ராஜினாமா செய்துவிட் டேன். முடிந்தவரை முயன்று தோற்றுவிட்டேன்.” 

காவேரியைப் பார்த்து, “காவேரி, உன் கணவன் திறமை மிக்கவன். ஆனால்...”

"அதிர்ஷ்டமில்லைன்னு சொல்லுங்க."

கிளப்பைவிட்டு விலகும்போது காவேரி, "உங்களுக்கு கிடைக்கலைன்னு இவர் எதுக்குங்க ராஜினாமா கொடுக்கணும்?"

"இவர்தான் நிசமாவே பெரிய மனுசன் காவேரி வா மனசு ரொம்பக் கலக்கமா இருக்குது. பெருமாள் கோயிலுக்குப் போய் வரலாம்.” 

கற்பூர வெளிச்சத்தில் பகவானைக் கேட்டார். “அய்யா, நான் என்ன தப்புத்தண்டா செய்தேன்? என்ன பாவம் செய்தேன்? மனச்சாட்சிக்கு விரோதமில்லாம கம்பெனிக்குக் கடுமையா உழைச்சதுக்கு இதுதான் பரிசா? மதிப்பு கொடுக்கலை அய்யா, ஏன் எனக்குக் கெடைக்காம பண்ணிட்டீங்க? நான் உன்னைச் சின்னப்பிள்ளையிலிருந்து வணங்கினத்துக்கு ஒரு எழவும் அர்த்தமில்லையா? வீணா? எல்லாமே வியர்த்தமா? சொல்லுய்யா! சும்மாப் பார்த்துட்டே இருக்கீங்களே!”

இருட்டில் பெருமாள் லேசாகச் சிரிப்பது போல இருந்தது. மறுதினம் ஆபீஸ் போனதும் பல பேர் அவரைப் பரிவுடன் பார்த்தார்கள். ப்ரியாவின் கண்களில் நீர் திரையிட அதைப் பார்க்க விருப்பமின்றி அவசரமாக அறைக்குள் நுழைந்து தன் லெட்டர் ஹெட்டில் ஒருவரி ராஜினாமாக் கடிதத்தை எழுதிக் கையெழுத்திட்டபோது போன் ஒலித்தது. 

"ஜஸ்ட் எ மினிட் சார், எம்.டி. மிஸ்டர் லீ பேச விரும்புகிறார்.''

''மிஸ்டர் குணா, லீ ஹியர், உங்களைச் சந்திக்க விருப்பம்.'' 

''நானே உன்னைச் சந்திக்க விரும்பினேன்."

"ப்ளீஸ் கம்."

க்ரிஃபித் இடத்தில் லீ. ஒரு குழந்தை பெரிய சோபாவில் உட்கார்ந்திருப்பது போல பொருத்தமில்லாமல் இருந்தது.

"வெல்'' என்று அவரைப் பார்த்துக் கையை நீட்டினான். 

குணா கையை நீட்ட மறுத்தார். 

"இன்னும் கோபமா? கங்கராஜுலேட் பண்ண விருப்பமில்லையா குணா? நடந்ததை மறப்போம். எனக்கு உங்களுடைய ஒத்துழைப்புத் தேவை. இந்த இந்தியக் காண்ட்ராக்ட்டுக்கு உங்களை விட்டால் யாரும் இல்லை. மிகப்பெரிய காண்ட்ராக்ட். நீங்கள் உடனே இந்தியாவுக்குப் பயணப் படவேண்டும்.''

குணா ராஜினாமாக் கடிதத்தை நீட்டிக் கொண்டிருந்ததை அப்போதுதான் லீ பார்த்தான்.

“என்ன இது?”

"பாரேன்."

படித்துவிட்டு, "திஸ் இஸ் ரிடிக்யுலஸ். நான் ஒப்புக் கொள்ள மாட்டேன். உங்கள் ஒத்துழைப்பு. உங்கள் அனுபவம் எல்லாமே எனக்குத் தேவையாக இருக்கிறது."

“ஸாரி, என்னால் தன்மானத்துடன் இந்தக் கம்பெனியில் இருக்க முடியாது.”

"குணா ஏன் இதை இத்தனை பெரிசா எடுத்துக் கொள் கிறீர்கள்? என்ன ஆகிவிட்டது இப்போது? வெல்வதும் தோற்பதும் வாழ்க்கையில் சகஜமில்லையா? ஒரு தேர்வு என்றால் ஒருத்தர்தான் வெல்ல முடியும். இரண்டு பேருக்கு முதல் ஸ்தானத்தில் இடம் கிடையாது அல்லவா?"

''லீ, என்னிடம் நீயே சொன்னாயே எனக்குக் கிடைக்க வில்லையென்றால், அந்தக் கணமே ராஜினாமா செய்துவிடுவேன் என்று.''

"அது விளையாட்டுக்காகச் சொன்னேன்.'

"இல்லை, தீவிரமாகத்தான் சொன்னாய். அதைப் பற்றிக் கவலையில்லை. இந்தக் கம்பெனி மிகப் பெரியது. நாங்கள் எல்லாம் கண்ணீர் விட்டு வளர்ந்து விட்டோம். இது பெரிசாகி என் போன்றவர்கள் இருந்தாலும் பிரிந்தாலும் கம்பெனியின் சுபிட்சம் பாதிக்கப்படாது. 'கங்ராஜூலேஷன்ஸ்! உனக்கு என் நல்வாழ்த்துக்கள் !

. எனக்குப் பொறாமை ஏதும் இல்லை. வருத்தம்தான். என் தீர்மானம் அசைக்க முடியாதது. அதுகூடச் செய்ய வில்லையெனில் க்ரிஃபித் என்கிற மகானுக்கு நான் நம்பிக்கைத் துரோகம் செய்வதாகும்."

"பரவாயில்லை. ஒரு கன்ஸல்டண்டாகவாவது இருக்க விருப்பமா? ரீடெய்னர் போட்டுக் கொடுக்கச் சொல்கிறேன்." 

"இல்லை, இன்று மாலையோடு எனக்கும் இந்தக் கம்பெனிக்கும் உள்ள உறவு துண்டிக்கப்படுகிறது."

லீ அவரிடம், “இது ஒரு அவசரமுடிவு என்று எண்ணுகிறேன். இந்தக் கடிதத்தை நான் செயல்படுத்தாமல் ஒரு மாதம் வைத்திருக்கப் போகிறேன். அதற்குள் மனம் மாறினால் மீண்டும் தாராளமாக நீங்கள் வரலாம். அதுவரை உங்கள் அறை, மேசை எல்லாமே காத்திருக்கும். யோசித்து உங்கள் குடும்பத்துடன் கலந்தாலோசித்து முடிவு சொல்லுங்கள். மாற்றுங்கள்.”

"மாற்றமே இல்லை." என்றார் பிடிவாதமாக.

அன்றிரவு முதன் முதலாக ரொம்பநாள் வைத்திருந்த ஸ்காட்ச் பாட்டிலை எடுத்துக் கணிசமாக ஊற்றிக் கொண்டு குடித்தார்.

“என்னங்க இது!” என்று பிரமிப்புடன் காவேரி கேட்டாள்.

"தூக்கம் வரலை காவேரி. வேற வேலைக்கு மனுப் போடவா!" 

''இல்லை, நம்ம கிராமம் தஞ்சாவூர் பக்கத்தில் என்னவோ பேர் சொல்றாங்களே, அங்கேயே போயிரலாமா?"

“எங்க முப்பாட்டான் ராஃபிள்ஸ் காலத்தில் ரப்பர் தோட் டத்தில் வேலை செய்ய இங்க வந்தவராம். நம்ம தேசம் இதுதான்! காவேரி, இந்தியால நம்மால வாழ முடியாது. என்ன என்னவோ கனாக் கண்டுக்கிட்டு இருந்தேன். ஒரு பெரிய காண்ட்ராக்டுக்காக இந்த வாரம் இந்தியா போக வேண்டியிருந்தது. பதவி ஏற்ற உடனே முதல் காரியமா எம்.டியா. இண்டியா போய் வரலாம்னு எல்லாம் அதிக ஆசைப்பட்டேன், பெருமாளு நல்லால்ல குட்டிட்டாரு! அய்யா, இரு இரு! இந்த மாதிரி நீ துரோகம் செய்வேன்னு நான் கனவில்கூட நெனைக்கலை. அய்யா உன்னைத் தினம் தவறாம கும்பிட்டனில்லை..."

"போனாப் போவுதுங்க. அவரு ஏதாவது நல்லது வெச்சிருப் பாரு. கடவுளை நிந்தனை பண்ணாதீங்க."

"எல்லாம் பொய்யி, எல்லாம் வேஸ்டு, எல்லாம் கல்லு. சாமியாவது ஒண்ணாவது.?" 

"அப்படியெல்லாம் பேசாதீங்க. போதுங்க. நிறையவே சாப்ட்டுட்டிங்க.''

தள்ளாடிக் கொண்டிருந்தவரை ஸ்திரப்படுத்திக் காவேரி காட்டமாகக் காப்பி கொண்டு வந்து தர அதைக் குடித்ததும் சற்றுப் போதை தெளிந்து அவள் கூந்தலை வருடி ஆதரவாகப் பார்த்தார். "ஸாரி, ரொம்ப கன்னா பின்னான்னு பேசிட்டனில்லை. இப்ப சரியாப் போச்சு. விஷம் எறங்கினாப்பல ஏமாற்றம் எறங்கிப் போச்சு."

"போனாப் போவுதுங்க.'

“அந்த இண்டியா காண்ட்ராக்ட்டை நெனைச்சாத்தான் எனக்கு வருத்தமா இருக்குது. லீ குட்டிச் சுவராக்கிருவான். அவன் போயிருப்பான் இப்ப. ஒரு வருஷகாலமா டெண்டர் போட்டு, டிஸ்கஷன் எல்லாம் பண்ணி பெர்ட்டிலைஸர் கெமிக்கல் ஒண்ணுக்கு ரா மெட்டிரியல்...”

"மறந்துருங்க, அய்யோ, நீங்கதான் ராஜினாமா செய்துட்டிங்களே!”

''அதானே!'' 

சற்று நேரம் மௌனம் நிலவியது.

"இண்டியால எங்கங்க?” என்றாள்.

“போப்பால்ன்னு ஒரு இடத்தில் யூனியன் கார்பைடு கம்பெனியோடு டிஸ்கஷன்.”

"போனாப் போவுதுங்க! அவனே போய்ச் சேரட்டும்.'' 

இது நடந்தது...1984 நவம்பர் 3'ம் தேதி.

மிருகங்களுக்குக் கூட, ஒரு discipline இருக்கு

 குரங்குகள் போன்ற மிருகங்களுக்குக் கூட, ஒரு discipline இருக்கு!

லீடர் குரங்கு சொல்கிறபடி நடக்கின்றன

ஆனால், ஆறறிவு படைத்த மனிதர்கள் தான் குரு சொல்கிறபடி நடப்பதில்லை. நீங்களெல்லாம் ஆசார்யாள் பெரியவாள் என்றெல்லாம் சொல்கிறீர்கள்.  ஆனால் நான் சொல்வதை உங்களால் செய்ய முடிகிறதில்லை

சொன்னவர் - ஸ்ரீமடம் பாலு
தொகுப்பு - கோதண்டராம சர்மா.
தட்டச்சு - வரகூரான் நாராயணன்.

பெரியவாள் பக்தர்களுக்கு தரிசனம் கொடுத்து கொண்டிருந்தார்கள். எதிரே, ஒரு பெரிய மரம். தடினமான குரங்கு ஒன்று வந்து மரத்தில் ஏறியது. பின், இருபது – முப்பது குரங்குகள் அந்த லீடர் குரங்கை தொடர்ந்து மரத்தில் ஏறின. பெரியவாள், ஒரு கூடை மாம்பழத்தை மரத்தடியில் போட சொன்னார்கள். லீடர் குரங்கு என்ன உத்தரவு எப்படி போட்டதோ தெரியவில்லை! ஆனால், மற்ற குரங்குகள் ஒவ்வொன்றாக வந்து பழத்தை எடுத்துகொண்டு மேலே சென்றன. லீடர் குரங்கு மட்டும் ஒரு பழத்தை கூட தொடவில்லை!

பெரியவாள் சொன்னார்கள்: “குரங்குகள் போன்ற மிருகங்களுக்கு கூட ஒரு discipline இருக்கு! லீடர் குரங்கு சொல்கிறபடி நடக்கின்றன. “காட்டில், யானைகளுக்கு ஒரு தலைமை யானை இருக்கும். அந்த லீடர் யானையை follow பண்ணித்தான் மற்ற யானைகள் செல்லும். “ஒரு கட்டெறும்பு செத்துபோனால், மற்ற கட்டெறும்புகள் அதை இழுத்துச் செல்லும். “ஒரு காக்கை இறந்து போனால், மற்ற காக்கைகள் மரத்தில் உட்கார்ந்துகொண்டு துக்கமாய் கதறும். “ஆனால், ஆறறிவு படைத்த மனிதர்கள் தான் குரு சொல்கிறபடி நடப்பதில்லை.-

என்னை பார்த்து, நீங்களெல்லாம் ஆசார்யாள். பெரியவாள் என்றெல்லாம் சொல்கிறீர்கள். ஆனால், நான் சொல்வதை உங்களால் செய்ய முடிகிறதில்லை!”

 கவனமாக கேட்டுகொண்டிருந்த பக்தர்கள், ஒரே குரலாக, “பெரியவா என்ன உத்தரவு போட்டாலும் செய்கிறோம்” என்று பக்தியோடு பதிலளித்தார்கள்.

“சரி, காலையில் இரண்டு நிமிஷம், சாயங்காலம் இரண்டு நிமிஷம், எனக்காக ஒதுக்குங்கள். இருபத்திநான்கு மணி நேரத்தில், நாலு நிமிஷம் தான் கேட்கிறேன். “காலையில், இரண்டு நிமிஷம் “ராம, ராம” என்று சொலுங்கோ; சாயங்காலம் இரண்டு நிமிஷம் “சிவ, சிவ” ன்னு சொலுங்கோ…” 

“அப்படியே செய்கிறோம்” என்று சுமார் நூறு பேர்கள் தெரிவித்து கொண்டார்கள்.அமளி அடங்கியதும், பெரியவாள் அருகிலிருந்த தொண்டர்களிடம், “பத்து பன்னிரண்டு பேர்களாவது , சொன்ன சொல்லை காப்பாத்துவா” என்றார்கள். அந்த, யாரோ பத்து பன்னிரண்டு புண்ணியாத்மாக்களை உருவாக்குவதற்காகத்தான்., ஆழமான கருத்துடன், அரைமணி lecture!

குரங்கு, காட்டு யானை, கட்டெறும்பு, காக்கை – நமக்கு நல்ல வழிகாட்டிகள்; “ஆச்சார்யர்கள்”. அவர்களை (அவைகளை) யாவது follow பண்ணலாம் தானே?

நம்பிக்கையோடு நடந்து வந்த அந்த குழந்தையைக் கைவிடுவாரா என்ன!"

 "கருணாமூர்த்தியான பெரியவா,  தன் மீது நம்பிக்கையோடு நடந்து வந்த அந்த குழந்தையைக் கைவிடுவாரா என்ன!"

விநாயக்ராமின் பிள்ளை செல்வகணேஷ் டெல்லியில் ஒரு கச்சேரிக்குக் கஞ்சிரா வாசித்தார்.

செய்தித்தாள்களெல்லாம் அவரைப் பாராட்டி எழுதின.  அச்சமயம் சுற்றுப்புறச் சூழல் அமைச்சருக்கு, செல்வகணபதியின் கஞ்சிரா உடும்புத் தோலால் ஆனது என்று தெரியவர, பிராணிகளைப் பாதுகாப்பதில் குறியாக இருந்த அந்த அமைச்சர் .,'உடனே அவரை கைது செய்யுங்கள்!' என்று உத்தரவு இட்டுவிட்டார்.

விநாயக்ராம் வீட்டில் ஒரே அமர்க்களம். பிள்ளை எங்கோ கச்சேரிக்குப் போயிருந்த சமயம். கஞ்சிராக்கள்  காலம் காலமாக இப்படித்தான் தயாரிக்கப்பட்டு வருகின்றன. உடனடியாக வக்கீலை அணுகவும் நேரமில்லை.

உடனே, பெரியவாளை நினைத்து அழுது, 'நான் நடந்தே காஞ்சிபுரம் வருகிறேன்...காப்பாத்து'என்று வேண்டிக் கொண்டு, அவ்வாறே காஞ்சிபுரம் வரை நடந்து சென்றார்.

தேநீர் பருக ஓரிடத்தில் நின்றார். அங்கே இருந்த ரேடியோ, சுற்றுப்புறச் சூழல் அமைச்சராக இருந்தவருக்கு பதவி பறிபோன செய்தியைச் சொன்னது.

அது என்னவோ பெரியவாளே வந்து அவருக்கு ஆறுதல்தரவே சொன்னது போல் இருந்தது. அதற்குப் பிறகு கதை அப்படியே ஒடுங்கிவிட்டது.

கருணாமூர்த்தியான பெரியவா, தன் மீது நம்பிக்கையோடு  நடந்து வந்த அந்த குழந்தையைக் கைவிடுவாரா என்ன!

பாரதி பாடிய, 'கண்ணன் என் சேவகன்' என்ற பாடலைப் போல  பெரியவா,பக்தர்களுக்கு எத்தனை வகையில் சேவை செய்தார் என்பதை நினைக்க நினைக்க பக்தி மேலிடுகிறது.

சௌந்தரியவல்லி உடனுறை சாட்சி நாதர். திருஅவளிவநல்லூர்

 இன்றைய கோபுர தரிசனம் கோடி புண்ணியம் பாவ விமோசனம் இயற்கை எழில் கொஞ்சும் சூழலில் மிகவும் பழமையான தலம் அருள்மிகு சௌந்தரியவல்லி உடனுறை சாட்சி நாதர்.   திருஅவளிவநல்லூர்

*******************

அருள்மிகு சௌந்தரியவல்லி உடனுறை சாட்சி நாதர். 

திருஅவளிவநல்லூர்.கும்பகோணம் வட்டம்.

தஞ்சாவூர் மாவட்டம்

                காவிரி தென்கரை ஸ்தலங்கள்

********************

                  அருள்மிகு சௌந்தரியவல்லி உடனுறை சாட்சி நாதர். 

.திருவடிகள் போற்றி   போற்றி.....

**** திருச்சிற்றம்பலம்**********

       தென்னாடுடைய சிவனே போற்றி

எந்நாட்டவர்க்கும் இறைவா போற்றி

சாட்சி நாதர் கோவில், திருஅவளிவநல்லூர்
சிவஸ்தலம் பெயர்:- திருஅவளிவநல்லூர்
இறைவன் பெயர் :-சாட்சி நாதர்
இறைவி பெயர் :- சௌந்தர நாயகி, செளந்தர்யவல்லி
மரம்: பாதிரி
குளம்: சந்திரபுட்கரணி
பதிகம:- திருநாவுக்கரசர் - 1
திருஞானசம்பந்தர் - 1

கும்பகோணந்நில் இருந்து அம்மாபேட்டை செல்லும் நகரப் பேருந்துகளும், தஞ்சாவூரில் இருந்து அரித்துவாரமங்கலம் செல்லும் நகரப் பேருந்துகளும் அவளிவநல்லூர் வழியாகச் செல்கின்றன. கும்பகோணத்தில் இருந்து சுமார் 21 கி.மீ. தொலைவில் உள்ளது. திருஅரதைப் பெரும்பாழி என்ற மற்றொரு பாடல் பெற்ற சிவஸ்தலம் இங்கிருந்து 3.5 கி.மீ. தொலைவில் இருக்கிறது. நீடாமங்கலத்தில் இருந்தும் அம்மாபேட்டை வழியாக அவளிவநல்லூர் செல்லலாம்.

ஆலய முகவரி :-அருள்மிகு சாட்சி நாதர் திருக்கோயில்
திரு அவளிவநல்லூர்
அரித்துவார மங்கலம் அஞ்சல்
கும்பகோணம் வட்டம்
தஞ்சாவூர் மாவட்டம்
PIN - 612802

இவ்வாலயம் தினந்தோறும் காலை 7 மணி முதல் பகல் 12 மணி வரையிலும், மாலை 4 மணி முதல் இரவு 8-30 மணி வரையிலும் திறந்திருக்கும்.

தேவாரப் பாடல் பெற்ற தலங்களில் பஞ்ச ஆரண்ய தலங்கள் என்று ஐந்து தலங்கள் உண்டு. இவ்வைந்துமே காவிரியின் தென்கரையிலே அமைந்து இருப்பதுடன் ஒரே நாளில் விடியற்காலையில் புறப்பட்டு ஐந்தாவது கோயிலை அர்த்த ஜாம பூஜையின் போது வந்து வணங்கி முடித்துக் கொள்ளும் படியாக அருகருகே அமைந்தவையாகும். இந்த ஐந்து தலங்களை வரிசையாகச் சொல்வதானால் 1. திருக்கருகாவூர் (முல்லைவனம்) -விடியற்கால வழிபாட்டிற்குரியது. 2. அவளிவநல்லூர் (பாதிரி வனம்) - காலை வழிபாட்டிற்குரியது. 3. அரதைப் பெரும்பாழி (ஹரித்துவாரமங்கலம்) - வன்னிவனம் - உச்சிக்கால வழிபாட்டிற்கு உகந்தது. 4. ஆலங்குடி (திரு இரும்பூளை) - பூளை வனம் - மாலை நேரத்து வழிபாட்டிற்கு உகந்தது. 5. திருக்கொள்ளம்புதூர் (வில்வவனம்) - அர்த்தஜாம பூஜை வழிபாட்டிற்குரியது.

சைவ சமயக் குரவர் நால்வரில் திருஞான சம்பந்தர் தம் தல யாத்திரையின் போது இதே வரிசையில் ஐந்து கோயில்களையும் ஒரே நாளில் வழிபட்டதாகக் கூறப்படுகிறது.

தல வரலாறு: -

அவள் + இவள் + நல்லூர் = அவளிவணல்லூர்.

பழங்காலத்திலே இப்பதியில் எழுந்தருளியிருக்கும் இறைவனைப் பூசித்த ஆதிசைவ அந்தணர் ஒருவர்க்கு இரண்டு பெண்கள் இருந்தனர். அவர்களில் மூத்த பெண்ணை மணந்தவர் காசியாத்திரைக்குச் சென்றிருந்தனர். 

சென்றபின் அம்மூத்தபெண் அம்மைவார்க்கப்பெற்று உருவின் நிறம் மாறிக் கண் இழந்திருந்தனர். தந்தையார் இளைய பெண்ணை வேறு ஒருவர்க்கு மணஞ்செய்து கொடுத்திருந்தனர். 

சில ஆண்டுகளுக்குப் பின்னர் காசியாத்திரை சென்றவர் திரும்பிவந்தார். அக்காலம் இளைய பெண்ணும் கணவன் வீட்டிலிருந்து வந்திருந்தனர். மூத்த பெண்ணின் நிற வேறுபாட்டைக் கண்டு `இளையவளே தம் மனைவி. மூத்தவளைத் தம் மனைவி என்று சொல்லி ஆதி சைவ அந்தணர் ஏமாற்றுகின்றனர்`. எனக் கூறி மூத்த பெண்ணை மணந்தவர் வழக்கிட்டனர். 

இரு பெண்களையும் பெற்ற ஆதிசைவர் மனங்கலங்கி இத்தல இறைவனைப் பிரார்த்திக்க, இறைவன் காட்சி தந்து மனந்தடுமாறிய மருமகனைப் பார்த்து, மூத்தவளே அவர் மனைவி என்னும் பொருளில் "அவள் இவள்" என்று சுட்டிக் காட்டி மறைந்தார். மேலும் இறைவன் அருளியவாறு மூத்தவளும் இத்தலத்துத் தீர்த்தத்தில் மூழ்கிப் பண்டைய உடலும் கண்களும் பெற்றாள்; கணவனுடனும் சேர்ந்து இன்புற்று வாழ்ந்தாள். அவள் இவள் என்று சாட்சி கூறியதால் இத்தல இறைவன் சாட்சிநாதர் என்ற பெயர் பெற்றார். தலத்தின் பெயரும் நல்லூர் என்பது மாறி அவளிவநல்லூர் என்றாயிற்று.

 இறைவனது பின்பக்கத்தில் இவ் வரலாற்றை உணர்த்தும் பிரதிமைகள் உள்ளன. இவ் வரலாற்றுக்கு ஆதாரமாக அவற்றைக் காட்டுவர்.

1. தம்பரிசுடையார். இப்பெயர் இவ்வூர்க்குரிய திருஞானசம்பந்தர் பதிகத்தில் குறிக்கப்பெற்றுள்ளது. சேக்கிழாரும் இப்பெயரைத் ``தம் பரிசுடையார் என்னும் நாமமும் நிகழ்ந்திட ஏத்தி`` எனக் குறித்துள்ளனர்.

2. சாட்சிநாதர். (திருப்புறம்பயத்துப் பெருமானக்குச் சாட்சிநாதர் என்ற பெயர் உண்டு.)இறைவன் ஆதிசைவ அந்தணரின் மூத்த மகளின் பொருட்டுச் சான்று பகர்ந்தமையின் இப்பெயர் பெற்றார். இறைவியின் திருப்பெயர் சௌந்தரிய வல்லி. 

வராகமூர்த்தியும் காசிப முனிவரும் இறைவனை வணங்கிப் பேறு பெற்றனர். அம்மையால் வருந்தி உடல் நிறம் மாறிக் கண் இழக்கப்பெற்ற ஆதிசைவ அந்தணரது மூத்த மகள் இவ்வூர்த் தீர்த்தத்தில் மூழ்கப் பெற்றதன் காரணமாக உடல் வனப்பும், கண்ணும் பெற்றுள்ளனர். இவ் ஊர்க்குத் திருஞானசம்பந்தர் பதிகம் ஒன்றும், திருநாவுக்கரசர் பதிகம் ஒன்றும் ஆக இரண்டு பதிகங்கள் இருக்கின்றன.

இவ்வாயத்திற்கு இராஜகோபுரமில்லை. ஒரு கிழக்கு நோக்கிய முகப்பு வாயில உள்ளது. உள்ளே நுழைந்தவுடன் வெளிச்சுற்றில் அம்பாள் சந்நிதி தெற்கு நோக்கியுள்ளது. அம்பாள் நின்ற திருக்கோலத்தில் காட்சி தருகிறாள். வழிபட்டுச் சென்றால் முகப்பில் விநாயகர் காட்சி தருகிறார். . உள்ளே நுழைந்தால் நேரே மூலவர் சுயம்பு லிங்க உருவில் கிழக்கு நோக்கி காட்சி தருகிறார். கருவறை வாயிலின் இருபுறமும் துவாரபாலகர்கள் உள்ளனர். மூலவருக்குப் பின்னால் தலவரலாற்றின்படி சாட்சி சொன்ன நிலையில் சாட்சிநாதராக சிவன் பார்வதி காட்சி தருகின்றனர்.

உள்சுற்றில் விநாயகர், நால்வர் சந்நிதிகள், கண்வ முனிவர், வீரபத்திரர், சப்தகன்னியர், அறுபத்துமூவர் மூலத்திருமேனிகள் ஆகிய சந்நிதிகள் உள்ளன. சோமாஸ்கந்தர், விநாயகர், சிவகாமி, நால்வர், ஆறுமுகர், மகாலட்சுமி ஆகிய உற்சவத் திருமேனிகள் பாதுகாத்து வைக்கப்பட்டுள்ளன. நடராசர் சந்நிதி உள்ளது. பக்கத்தில் குமாரலிங்கம், காசிவிசுவநாதர், விசாலாட்சி, தபஸ் அம்பாள் திருமேனிகள் உள்ளன. எதிரில் நவக்கிரக சந்நிதிகள் உள்ளது. கால பைரவர், சூரியன் சந்நிதிகள் உள்ளன. கோஷ்டமூர்த்தங்களாக அகத்தியர், தட்சிணாமூர்த்தி, லிங்கோத்பவர், பிரமன், துர்க்கை ஆகியோர் உள்ளனர். எதிரில் சண்டேஸ்வரர் சந்நிதி உள்ளது.

பதிகங்கள்:2.

1. கொம்பிரிய -3 -82 திருஞானசம்பந்தர்

2.தோற்றினான் -4 -59 திருநாவுக்கரசர்

1. கொம்பிரிய -3 -82 திருஞானசம்பந்தர்.

திருஅவளிவணல்லூர்

பண் :சாதாரி

பாடல் எண் : 1

கொம்பிரிய வண்டுலவு கொன்றைபுரி நூலொடுகு லாவித்
தம்பரிசி னோடுசுடு நீறுதட வந்திடப மேறிக்
கம்பரிய செம்பொனெடு மாடமதில் கல்வரைவி லாக
அம்பெரிய வெய்தபெரு மானுறைவ தவளிவண லூரே.

பொழிப்புரை :

இறைவர் வண்டுகள் மொய்க்கும் கொன்றை மாலை அணிந்தவர் . முப்புரிநூல் அணிந்த திருமார்பினர் . திருவெண்ணீறு பூசியவர் . இடப வாகனத்தில் ஏறி வீற்றிருப்பவர் . ஆகாயத்தில் திரிந்த பொன் , வெள்ளி , இரும்பு ஆகிய கோட்டைகளின் மதில்களை , மேருமலையை வில்லாகக் கொண்டு அம்பு எய்து எரித்தவர் . அப்பெருமான் வீற்றிருந்தருளும் தலம் திருஅவளிவணல்லூர் ஆகும் .

2.தோற்றினான் -4 -59 திருநாவுக்கரசர்.

திருஅவளிவணல்லூர்.

பண் :

பாடல் எண் : 1

தோற்றினா னெயிறு கவ்வித் தொழிலுடை யரக்கன் றன்னைத்
தேற்றுவான் சென்று சொல்லச் சிக்கெனத் தவிரு மென்று
வீற்றினை யுடைய னாகி வெடுவெடுத் தெழுந்த வன்றன்
ஆற்றலை யழிக்க வல்லா ரவளிவ ணல்லூ ராரே.

பொழிப்புரை :

தீத்தொழிலை உடைய இராவணன் கோபத்தால் தன் பற்கள் உதட்டைக் கவ்வ வெகுட்சியடைந்த போது அவன் கோபத்தைத் தணிக்க வேண்டித் தேரோட்டி உறுதியாகக் கோபத்தை விடுக்குமாறு சொல்ல , தற்பெருமை உடையவனாகிக் கயிலையைப் பெயர்க்க விரைந்து எழுந்த அவனுடைய ஆற்றலை அழித்த பெருமான் அவளிவணல்லூரில் உறைகின்றார் .

திருச்சிற்றம்பலம்

********************

அருள்மிகு சௌந்தரியவல்லி உடனுறை சாட்சி நாதர். 

.திருவடிகள் போற்றி   போற்றி.....

**** திருச்சிற்றம்பலம்**********

தர்ம சாஸ்திரம் பகுதி −42

 (தெரிந்து கொள்ளலாமா?..)

தர்ம சாஸ்திரம் பகுதி −42

(ஆசிரியர் −திரு. V.ராஜகோபால கனபாடிகள்..)

611. தர்ப்பண தினங்கள், ஏகாதசி, பௌர்ணமி ஆகிய நாட்களில் முகச்சவரம் செய்யக்கூடாது.

612. திருமணமானவர்கள் தகுந்த காரணமில்லாமல் நாற்பந்தைந்து நாட்களைக் கடந்து முகச்சவரம் செய்யாமல் தாடி, மீசை ஆகியவற்றை வளர்க்கக்கூடாது.

613. பிறப்பு இறப்பு தீட்டுகள் கழிகின்ற நாளாக இருந்தாலும், பிதா உயிரோடு இருப்பவர்கள் வெள்ளிக் கிழமைகளில் முகச்சவரம் செய்யக்கூடாது.

614. மந்திரம் சொல்லிப் பூணூல் அணிவதால், தவறுதலாகக்கூட அவற்றைக் கழற்றி வைக்கக்கூடாது.

615. ஈரவேட்டியை உலர்த்தாமல் காலையில் சந்தியாவந்தனம் செய்யக்கூடாது.

616. மதிய வேளைகளில் குளித்து விட்டு சந்தியாவந்தனம் செய்வதாக இருந்தால், ஈர வேட்டியை மாத்யாஹ்னீகம் செய்தபிறகே உலர்த்த வேண்டும்.

617. பூணூலை மாற்றும்பொழுது தலையை முதலில் நுழைத்து, அதன்பிறகு வலது கையை நுழைப்பது தவறான செயலாகும்.

618.  ஆவணி அவிட்டமன்று, சூரியன் அஸ்தமித்த பிறகு, வேதம் கற்கக்கூடாது.

619. உபநயனம் ஆனவர்கள், குறைந்த அளவிலாவது காயத்ரி ஜபம் செய்தபிறகே, ஸ்லோகங்கள் சொல்வதும், மற்ற பூஜைகளையும் ஜபத்தையும் செய்வதையோ தொடர வேண்டும்.

620. சந்த்யாவந்தனம் செய்ய வேண்டிய நேரமாகிய சூரிய உதய/அஸ்தமன நேரங்களில் எந்த விதமான பஜனை, ஆன்மீகக் காரியங்கள், கூட்டு ப்ரார்த்தனைகள், உபன்யாசங்கள் ஆகியவற்றைச் செய்யக் கூடாது. இடைப்பட்ட நேரத்திலோ,  முன்போ, பின்போ செய்வது தவறாகாது.

621. சந்த்யாவந்தனத்தை ஒரே இடத்தில் முழுமையாகச் செய்ய வேண்டும்..பாதி வீட்டிலும் பாதி நதி/ஆற்றங்கரைகளிலும் செய்வது தவறான செயலாகும்.

622. சந்த்யாவந்தன மந்திரங்களை குருமுகமாகவே அறிய வேண்டும். CD மூலமாக அறிந்து பழகுவது தவறாகும்.

623. தங்க நகைகளை இடுப்புக்குக் கீழே இருக்கின்ற பகுதிகளில் (உ.ம். மெட்டி) அணிவது, மஹாலக்ஷ்மியை அவமதிப்பதாகும். அதனால் அவ்வாறு அணிவதைத் தவிர்க்க வேண்டும்.

624. உதய/அஸ்தமன நேரங்களில் பெண்கள் அழுது கொண்டிருப்பது, அந்த வீட்டில் மஹாலக்ஷ்மி கடாக்ஷத்தை தடை செய்யும். அதனால் அவ்வாறு செய்வதை முற்றிலும் தவிர்க்க வேண்டும்.

625. தலையை விரித்துப் போட்டுக் கொண்டும், கருப்பு ஆடை அணிந்து கொண்டும், கணவன் அனுமதி இல்லாமலும் திருமணமான பெண்கள் பூஜை செய்யக்கூடாது.

(வளரும்..)

தர்ம சாஸ்திரம் பகுதி −41

 (தெரிந்து கொள்ளலாமா?..)

தர்ம சாஸ்திரம் பகுதி −41

(ஆசிரியர் − திரு. V.ராஜகோபால கனபாடிகள்..)

596. பிறப்புஇறப்பு தீட்டு உள்ளர்கள் தீட்டுக் கழியும் காலம் வரையிலும், முகச்சவரம், முடித்திருத்தம் செய்து கொண்டவர்கள் நீராடித் தூய்மை அடையும் வரையிலும், அடுத்தவரைத் தீண்டக்கூடாது.

597. இரும்பு, ப்ளாஸ்டிக், அலுமினியம், எவர்சில்வர் ஆகியவற்றால் செய்யப்பட்ட வளையல்களை அணியக்கூடாது.

598. ருத்ராக்ஷம், ஸ்படிகம், துளஸி மாலைகளை அணிந்துகொண்டு இயற்கை உபாதைகளைக் கழிக்கச் செல்லக்கூடாது.ஆனால் அவை தாமிரம், பித்தளை, வெள்ளி, தங்கம் ஆகியவற்றுள் ஏதோ ஒன்றினால் கோர்க்கப்பட்டிருந்தால், தவறில்லை.

599. ஸம்ஸ்க்ருத வார்த்தைகளைச் சரியாகத் தெரிந்துகொண்டே உச்சரிக்க வேண்டும்.. தவறாக உச்சரிப்பதால் கெடுதல் நேரவும் வாய்ப்பிருக்கிறது.

600. ஜபம் செய்து முடிக்கும்வரையிலும் மௌனத்தைக் கடைபிடிக்க வேண்டும்.ஜபத்தை இடைஇடையே நிறுத்தி மற்றவருடன் பேசிவிட்டு மீண்டும் தொ டருதல் தகாத செயலாகும்.

601. குழுவாக ஜபம் செய்யும்பொழுது, ஒருவர் பின் ஒருவராக அமர்ந்துகொண்டு ஜபம் செய்யக்கூடாது. அருகருகே அமர்ந்தே ஜபம் செய்ய வேண்டும்.

602.தொலைகாட்சியைப் பார்த்துக்கொண்டோ, தொலைபேசியில் பேசிக்கொண்டோ சந்த்யாவந்தனம், காயத்ரி ஜபம் போன்றவற்றைச் செய்யக்கூடாது.

603. தீபாவளி அன்று, தர்ப்பணத்தைக் காரணம் காட்டி எண்ணெய் ஸ்நானம் செய்யாமல் இருக்கக்கூடாது. சூரிய உதயத்திற்கு முன் எண்ணெய் ஸ்நானம் செய்வதால், அது முதல்நாள் கணக்கில் வந்துவிடும்.

604. நதிகளில் நீராடும்பொழுது, நதிகளின் நீர்போக்குத் திசையில் ஸ்நானம் செய்யாமல், நதிகளின் நீர்போக்கை எதிர்கொள்ளும்வண்ணம் நின்று கொண்டு, சிரம் முழுவதும் அமிழ்ந்திடுமாறு மூழ்கி ஸ்நானம் செய்ய வேண்டும்.

605. இரத்த சம்பந்தம் உள்ளவர்களைத் தவிர, மற்றவர் மீதம் வைக்கின்ற பால், நீர், பழரசம் போன்றவற்றைப் பருகக்கூடாது.

606. தர்ப்பண தினங்களில் புழுங்கலரிசியால் செய்த இட்லி, தோசை போன்றவற்றைச் சாப்பிடக்கூடாது.

607. காலணிகளை அணிந்துகொண்டு உண்ணுதல், அன்னலக்ஷ்மியைப் பழிக்கும் செயல் என்பதால், அதைத் தவிர்க்க வேண்டும்..

608. வைகுண்ட ஏகாதசி அன்று எட்டு வயதுக்கு மேற்பட்டவரும், எண்பது வயதுக்குக் கீழுள்ளவர்களும் உணவில் அரிசி, உளுந்தைக் சேர்க்கக்கூடாது.

609. உணவருந்தி முடித்த பிறகு நிச்சயம் கால்களையும் கழுவ வேண்டும்.

610. பூணூலில் சாவி, டாலர் ஆகியவற்றைக் கோர்க்கக் கூடாது..

(வளரும்..)

தர்ம சாஸ்திரம் பகுதி −40

 (தெரிந்து கொள்ளலாமா?..)

தர்ம சாஸ்திரம் பகுதி −40

(ஆசிரியர் −திரு. V.ராஜகோபால கனபாடிகள்..)

581. இறை விக்ரஹங்கள், காராம்பசு, பெற்றோர், குருமார்கள் ஆகியோரின் நிழலின் குறுக்கே நடந்து செல்லக்கூடாது.

582. குழந்தைக்கு முதல் முறை முடிஇறக்காமல், குழந்தையின் முடியை நேர்செய்வதற்குச் சீப்பை உபயோகிக்கக் கூடாது.

583. விருந்தினர்களுக்கு சர்க்கரை, சந்தனம், வெற்றிலை ஆகியவற்றைக் கொடுக்கும் போது தெற்கு, மேற்கு திசைகளில் முடிவடையக்கூடாது.

584. விளக்கில் இருக்கின்ற எண்ணெய்/நெய் ஆகியவற்றை விரல்களால் தீண்டி, பின்னர் தலையில் தேய்த்துக் கொள்ளக்கூடாது.

585. சமைப்பதற்காகச் சூடு செய்யப்பட்ட எண்ணெயை, விளக்கேற்றப் பயன்படுத்தக்கூடாது.

586. எரிகின்ற விளக்கு, கற்பூரம் ஆகியவற்றை வாயினால் ஊதி அணைக்கக்கூடாது.

587. உட்கார்ந்திருக்கும்போது, கால்களையும் தொடைகளையும் ஆட்டக்கூடாது. அவ்வாறு செய்வது பெற்றோர்களுக்குக் கெடுதலைச் செய்யும்.

588. மூன்று முறை களையாமல் அரிசியை உபயோகிக்கக்கூடாது.

589. இடதுகை பழக்கமுள்ளவர்களைத் தவிர மற்றவர்கள் எதையும் யாருக்கும் இடது கையால் கொடுக்கவும் கூடாது. வாங்கவும் கூடாது.

இடதுகை பழக்கமுள்ளவர்களும், வலது கையால் கொடுத்து வாங்கப் பழகிக்கொள்ள வேண்டும்.

590. அன்னப்ராசனம் செய்யாமலும், ஐந்து மாதங்கள் முடியாமலும், குழந்தைக்கு சாதம் கொடுக்கக்கூடாது.

591. துக்க வீட்டிற்குச் செல்லும்போது ஸ்படிக, ருத்ராக்ஷ மாலைகளை அணிந்து செல்லக்கூடாது.

592. துக்க வீட்டிற்குப் பனிரெண்டு நாட்களுக்குள் சென்று வந்தால், அவசியம் பூணூல் மாற்ற வேண்டும்.

593. ப்ரதான நுழைவாயிலுக்கு நேரே கால்களோ, தலையோ இருக்கும்படி படுக்கக்கூடாது.

594.நெருப்பும், தண்ணீரும் ஒன்றுக்கொன்று பகை என்பதால், அவை சமையலறையில் அருகருகே இல்லாமல் பார்த்துக்கொள்ள வேண்டும்.

595. நுழைவாயிலுக்கு முதுகுப்புறத்தைக் காட்டிக்கொண்டும், வெற்றுச்சுவரைப் பார்த்துக்கொண்டும் அமரக்கூடாது.

(வளரும்..)