அறுசுவை அரசர் நடராஜன் கல்யாண வத்தக்குழம்பு

#அறுசுவை அரசர் நடராஜன் கல்யாண வத்தக்குழம்பு#

சமையல் கலை நிபுணர் என்று தமிழகத்தில் சொன்னால் அது நம் அறுசுவை அரசர் திரு நடராஜன் அவர்களைத்தான் சாரும். மிகவும் எளிமையான ஏழை குடும்பத்தில் இருந்து சமையல் மட்டுமே தெரிந்து வைத்து, "விரக்தியின் உச்சத்தில், காஞ்சி பரமாச்சாரியாரை சந்தித்து, "அவர் உத்தரவுபடி அவர் கொடுத்த சிறு தொகையுடன் சென்னை வந்தேன். அவர் ஆசியால் சமையல் உலகில் மிகப்பெரிய ஜாம்பவானாக கோலாச்சியது அவர் கருணை" திரு. அறுசுவை நடராஜன் அவர்கள் சொன்ன வார்த்தைகள். 

இந்தியாவில் அந்த காலத்திலிருந்து அவர் இரண்டு வருடம் முன்பு இறக்கும் வரை அவர் சமைக்காத விவிஐபி வீட்டுக் கல்யாணங்களே இல்லை என்று சொல்லலாம். மியூசிக் அகடமியில் அந்த காலத்திலேயே அறுசுவை நடராஜன் கான்டீன், டிசம்பர் சீசன்களில் களைகட்டும்.

அவர் முப்பது வருடம் முன்பு விகடனில் தன்னைப்பற்றி ஒரு தொடர் கட்டுரை எழுதினார். அங்கங்கு சில ரெசிபிக்களை கொடுத்துள்ளார். அவற்றில் ஒன்று கல்யாண வத்தக்குழம்பு. இதற்குத் தேவையானவை என்ன? எப்படி செய்வது என்று கீழே எழுத்து மூலமும் காணொளியில் கொடுத்திருக்கிறேன்.

தேவையான சாமான்கள் :-

- 1 எலுமிச்சை அளவு புளி

- 3 டேபிள் ஸ்பூன் சாம்பார் பொடி

- 15 கறிவேப்பிலை இலை

- 1 1/2 டேபிள் ஸ்பூன் துவரம் பருப்பு

- 2 சிகப்பு காய்ந்த மிளகாய் 

- 1 டீஸ்பூன் வெந்தயம் 

- 1 டீஸ்பூன் கடுகு 

- 2 கொத்துக்கடலை அளவுபெருங்காயம்

- 1 கோலிகுண்டளவு வெல்லம் 

- 1 உளுந்து அப்பளம் சதுரமாக நறுக்கியது.

- 15 சுண்டைக்காய் வற்றல்

- 1 1/2 ஸ்பூன் மணத்தக்காளி வற்றல்

- 3 ஸ்பூன் தேங்காய் பேஸ்டாக அரைத்தது

- 4 டேபிள்ஸ்பூன் நல்லெண்ணை 

செய்முறை : 

* முக்கால் முக்கால் டம்ளர் தண்ணீரில் மூன்று முறை புளியை நன்கு கரைத்து சக்கையை எடுத்து தண்ணீரை வைத்துக் கொள்ளவும்.

* தேங்காயை தண்ணீர் சேர்த்து எவ்வளவு நைஸ் பேஸ்டாக அரைக்க முடியுமோ, அரைத்துக் கொள்ளுங்கள்.

* முதலில் வாணலியில் மிளகாயை கிள்ளிப்போட்டு, பின்பு, கடுகு, பெருங்காயம் போட்டு பொறியனும், துவரம்பருப்பு, பாதி கறிவேப்பிலை போட்டு,அப்பளம் பிட்ஸைப் போட்டு பொறிந்தவுடன், புளித் தண்ணீர் விட்டு உப்பு மஞ்சள் பொடி, 3 ஸ்பூன் சாம்பார் பொடி, வெல்லம் போட்டு நன்கு கொதிக்க விடவும். 

* புளி வாசனை சாம்பார் பொடி வாசனை போய் பாதி வத்தியஉடன், ஒரு தாளிக்கும் கரண்டியில் அல்லது சின்ன வாணலியில் ஒரு ஸ்பூன் நல்லெண்ணெய் விட்டு சுண்டைக்காய் போட்டு பாதி பொரிந்தவுடன் மணத்தக்காளியை போட்டு பொரித்து, இரண்டும் பொரிந்ததும் அரைத்து வைத்த தேங்காய் பேஸ்ட்டை போட்டு ஒரு நிமிடம் நன்றாக வதக்கி அதை அப்படியே வற்றிய குழம்பில் கொட்டவும். 

* இப்போது ஒரு கொதி வந்தவுடன் உப்பு, உரப்பு, புளிப்பு சுவை பார்த்து அட்ஜஸ்ட் செய்து தேவையான கன்சிஸ்டன்ஸியில் இறக்கிவிடவும். ஆறினால் கொஞ்சம் இருகும்.

* மீதமுள்ள கருவேப்பிலையை கையால் பித்துப் போட்டு இரண்டு ஸ்பூன் நல்லெண்ணெயை மேலாக மிதக்க விடவும்.

* மிகவும் சுவையான அறுசுவை நடராஜன் அவர்களின் கைப்பக்குவத்தில் தயாரான கல்யாண வத்தக் குழம்பு Chandoo's kitchen மூலமாக தயார் செய்துள்ளேன்.. சாதத்திற்கு பிசைந்து சாப்பிடவும், வத்த குழம்பு சாதம் கிளரவும், தயிர் மோர் சாதத்திற்கு தொட்டுக் கொள்ளவும் தேவாமிர்தமாக இருக்கும்.

குறிப்பு :-

- சாம்பார்பொடி இல்லாதவர்கள் இரண்டு அல்லது மூன்று ஸ்பூன் காரத்திற்கு ஏற்ப, மிளகாய் பொடி இரண்டு ஸ்பூன் தனியா பொடி சேர்த்தால் போதும். அதனுடன் உங்களிடம் இருந்தால், கால் டீஸ்பூன் மிளகு சீரகப் பொடியும் சேர்த்தால் போதும்.

- இதற்கு தொட்டுக்கொள்ள உருளைக்கிழங்கு வெங்காயம் பட்டாணி காரம் போட்டு வதக்கல், அல்லது உருளைக்கிழங்கு/வாழைக்காய் பொடிமாஸ், சுட்ட அப்பளம், டாங்கர் பச்சடி, கேரட் தயிர் பச்சடி போன்றவை நல்ல காம்பினேஷன்.

ஸ்பெஷல் தேங்க்ஸ் என் மனைவி சுஜா விற்கு.

⚘⚘🙏நன்றி🙏⚘⚘

#Chandoos_Kitchen#

https://www.facebook.com/groups/Madhyamar/permalink/1306206229567188/