புள்ளிமான் வேட்டை -39

 புள்ளிமான் வேட்டை -39

கிருஷ்ணன் தொடர்ந்தான்.

"பாரதி குள்ளச் சாமியை பார்த்து "நீ தெருவிலுள்ள சிறியவர்களோடும், தெரு நாய்களோடும் விளையாடுகிறாய். உன்னை பார்த்தால் எனக்கு ஒண்ணுமே புரியல.நீ யார்?

உனக்கு தெரிந்ததெல்லாம் நீ எனக்கு உணர்த்த வேண்டும் என்று கேட்டுக் கொண்டாராம். அந்த குள்ளச்சாமி பாரதியிடமிருந்து  தப்பி ஒடப்பார்த்தாராம். பாரதியாரா அவரை விட்டு  விடுவான். துரத்தி துரத்தி கொல்லையில் அவரை  பிடித்த உடன் குள்ளச்சாமி வேறு  வழி இல்லாமல் பாரதிக்கு  *ஞான உபதேசம்* செய்தான்.

அவன் பாரதிக்கு மூச்சை அடக்கச்சொல்லி உபதேசித்து மூன்று விஷயங்களை காட்டினாராம். ஒன்று குட்டிச்சுவர். அடுத்தது சூரியன். மூன்றாவது அருகிலிருந்த கிணற்றில் தெரிந்த   சூரியனின் பிரதிபிம்பம்.  இதெயெல்லாம் காண்பித்து" உனக்கு புரிகிறதா" என்று கேட்டாராம். பாரதிக்கு கற்பூர புத்தி. பெரும் வேதாந்தம் பளிச்சென புரிந்தது பாரதிக்கு. வேதாந்தம் என்னும் பெரிய மரத்தின் வேரை பாரதி கண்டானாம்.

‘வாசியை கும்பகத்தால் வலியக் கட்டச்’ சொல்கிறார் .இது பதஞ்சலி யோக சூத்ரத்தின் முதல் பாகத்தைத் தமிழாக்கி பாராதியார் தந்திருக்கிறார்.பகவத் கீதை ஆறாவது அத்யாயத்தில் கண்ணன்

 “சித்தத்தைக் கட்டி ஆத்ம யோகத்தில் கலந்து நிற்கும் யோகிக்கு, காற்றில்லாத இடத்தில் அசைவின்றி நிற்கும் விளக்கை முன்னோர் உவமையாகக் காட்டினர்” என்கிறார்.

இதற்கு பிறகு குட்டிச்சுவரை காட்டினாரே அது ஏன் தெரியுமா? குட்டிச்சுவர் மண்ணால் கட்டப்பட்டுள்ளது.ஓயாது நாம் சுவாசிக்கும் மூச்சுக் காற்றை உள்ளே இழுத்தவுடன், வெளியே விட்டு விடாமல் குறிப்பிட்ட வினாடிகள் வரை அதனை உள்ளே இருத்துவதைக் கும்பகம் என்பார்கள். அதாவது பிராணயாமம் என்று குறிக்கப்படுவது இதைத் தான். நீண்ட நேரம், நீண்ட காலம் இதைப் பயில்வதால் மனம் ஒடுங்கும். அந்த நிலையில் மழை விழுந்து கரைவது பற்றியும், வெயில் அடித்துக் காய்வது பற்றியும் கவலைப் படாமல் நிற்கும் குட்டிச் சுவர் போன்ற *ஸ்திதப் பிரக்ஞ* மனநிலை உண்டாகும். இரட்டைகள் என்று சொல்லப் பெறும் குளிர்ச்சி, உஷ்ணம்; சுகம், துக்கம்;மானம், அவமானம்; ஆகியவற்றை ஒன்றாக நோக்கும் சமப்பார்வை ஏற்படும். அந்த நிலை வந்த உடன் எங்கோ இருக்கும் பரமசிவம் நம் உள்ளத்தில் உள்ளே பர்மெனண்ட்டாக அமர்ந்து ஒளிர்வதைக் காணமுடியும்.

கிணற்று நீரில் சலனம் இருந்தால்  சூரியனின் ரிப்ளக்க்ஷனை சரியா பார்க்க முடியாது.நீர் சலனமின்றி  இருந்தால்தான் சூரியனது பிம்பத்தை நாம்  பார்க்க முடியும். இது போலவே மனதில் சலனத்தை நீக்கி மனதை ஒருமுகப் படுத்தினால் சூரியனான ஜோதிர்மயமான இறைவனை உங்கள் அகத்துக்குள்ளே பார்க்கலாம்.சின்ன வயசுல அப்பா அம்மா எல்லாம் நம்ப ஒண்ணும் செய்யாது நிக்கற போது "ஏண்டா குட்டிச்சுவராட்டம் நிக்கற" என்று சொல்வார்கள். குட்டிச்சுவராக நிற்பது பெரிய ஞானத்தின் குறியீடு என்பது அவர்களும் அறிந்திருக்கவில்லை. நமக்கும் தெரிந்திருக்கவில்லை.

i want to digress here.தமிழ்ல *கழுதை கெட்டா குட்டிச்சுவர்* அப்படின்னு ஒரு பழமொழி இருக்கு. நம்ப இப்போ குட்டிச்சவர்ன்னு சொன்னதால இந்த பழமொழிக்கு என்ன அர்த்தம்னு பாக்கலாமா. நம்முடைய அழுக்கு மூட்டையெல்லாம் எல்லாம் கழுதை சுமக்கிறது.(நம்ம மனசுல நிறைய அழுக்கு மூட்டை இருக்கு. அதெல்லாம் நாம் சுமக்கிறோம். அதனால் நம்பளும் கழுதை தான். இதைப் பற்றி பாரதியும் குறிப்பிடரான். அப்புறம் உங்களுக்கு நான் இத சொல்றேன்) கழுதைய குளிப்பாட்டு, சரியான நேரத்துக்கு,சரியான ஆகாரம் கொடுத்து பராமரிக்கணும். அப்படி செய்யாது போனோ கழுதைக்கு உடல் சுகவீனம் ஆயிடும். அதுதான் கழுதை கெட்டுப் போகுதுன்னு சொல்றோம். அப்படி ஆகும்போது அது தனக்கு  சுறுசுறுப்பு ஏற்படுத்திக் கொள்வதற்கு சொரசொரப்பா இருக்கிற குட்டிச்சுவர்ல போய் உடம்பை தேச்சுக்குமாம். இதுதான் கழுதை கெட்டா குட்டிச்சுவர்ன்னு சொல்லுவாங்கன்னு ஸ்கூல்ல படிக்கும்போது எனக்கு என்  தமிழ் வாத்தியார் சொல்லி கொடுத்திருக்கார்" என்றான் கிருஷ்ணன்.

கிருஷ்ணன் இதை சொன்னவுடன் அங்கு எழுந்த சிரிப்பொலியும், கரஒலியும் வெகு நேரம் ஒலித்துக் கொண்டிருந்தது.

இதைத் தொடர்ந்து எழுந்த தாரிணி "எனக்கு தெரிந்து விஷயத்தை நான் இப்போ சொல்லலாமா" என்றாள். "தாராளமாக சொல்லலாம் தாரிணி. தி ஸ்டேஜ் ஈஸ் யுவர்ஸ்"என்றான் கிருஷ்ணன். மைக்கை கிருஷ்ணனனிடமிருந்து வாங்கிக் கொண்ட தாரிணி"மூக பஞ்ச சதியில் வரும் ஒரு ஸ்லோகத்தில் அம்பா காமாக்ஷிசியின்  முழு கடாக்ஷம் கிடைக்கப் பெற்றவர்கள்களை எப்படி அறியலாம் என்று சொல்கிறார் கவி. அவர்கள் அரண்மனையையும், காட்டையும் ஒன்றாக பாவிப்பார்களாம். இச்சையை தூண்டுகிற பெண்களின் உதடை ஓட்டஞ்சில்லியாக கருதுவார்களாம். நண்பன், நண்பன் இல்லாதவன் இருவரும் அவருக்கு சமமானவர்களாம். இவர்களைத்தான் ஸ்திதப்பிரக்ஞன் என்று சொல்வார்கள் என்று நினைக்கிறேன்" என்றாள். இதற்கும் பெருத்த கர ஒலி எழுந்தது. ஆடியன்சிலிருந்து  சம்பத் என்பவர் எழுந்து "கிருஷ்ணனுடைய இன்ஃப்ளுவென்ஸ் எல்லோரையும் ஆட்கொண்டிருக்கிறது" என்றார்.ஹரிஷ் எழுந்து நின்று "கிருஷ்ணன் சீக்கிரத்தில் *கிருஷ்ணானந்தா* என்ற சாமியாராக போய்விடுவானோ என்று பயமாய் இருக்கிறது. இதனால் யாருக்கு என்ன லாபமோ தெரியாது.ஆனால் ஒருவருக்கு மட்டும் நிச்சயம் நஷ்டம்" என்றான். அங்கிருந்தவர்களில் இதை புரிந்து கொண்டவர் ஹரீஷையும் சேர்த்து மொத்தம் நான்கு பேர் தான்.