புள்ளி மான் வேட்டை-34
சுநந்தாவை ஏதோ தேற்றி விட்டானே தவிர சுப்பிரமணியனுக்கு மனது மிகவும் பாரமாக இருந்தது. ஏதோ, எல்லாம் சரியாக போய்க் கொண்டிருக்கிறது என்று நினைத்ததற்கு மாறாக 'கிணறு வெட்ட பூதம் கிளம்பின கதையாக' புது பிரச்சனை வந்திருக்கிறது என்ற கவலை அவனை ஆட்டிப்படைத்தது. மொட்டை மாடிக்கு போய் தன்னுடைய ஆத்ம நண்பனான டாக்டர் ராஜனுக்கு போன் செய்தான். ராஜன்"என்ன மணி. ஏதாவது ப்ராப்ளமா" என்றான்."ஆமாம். நீ இப்போ ஃப்ரீயா இருக்கயா" என்று கேட்டான் சுப்பிரமணியன். "இப்பதான் பேஷன்ட் எல்லாம் போயிட்டாங்க. நானும் கிளம்பலாம்னு இருந்தேன்.வேணும்னா சொல்லு. நான் வெயிட் பண்றேன்"என்றார் டாக்டர். "கொஞ்சம் அர்ஜெண்ட் தான். உன்னால முடிஞ்சா கொஞ்சம் இரு. நான் வந்துட்றேன்" என்றான் சுப்பிரமணியன்.பத்து நிமிஷத்தில் டாக்டர் ராஜன் கிளினிக்கை அடைந்தான் சுப்பிரமணியன். சுப்ரமணியனை பார்த்த ராஜன்"என்ன மணி. என்ன பிராப்ளம்" என்றார். நடந்ததையெல்லாம் சுப்ரமணியன் கூறினான். சிறிது நேரம் யோசித்துக் கொண்டிருந்த ராஜன் "இதோ பார். இந்த ராஜன் உடம்புக்கு மட்டும் மருந்து கொடுக்கிறவன் இல்லை. கைவசம் எல்லாத்துக்கும் மருந்து இருக்கு. நீ கவலைப்பட வேண்டாம்.இரு" என்றார். பிறகு போனை எடுத்து ஸ்பீட் டயலிலிருந்து ஒரு நம்பரை டயல் செய்தார். எதிர் முனையில் பேச்சு குரல் கேட்டவுடன் "என்ன சகல. சௌக்கியமா"என்றார் டாக்டர். எதிர்முனையில் இருந்தவர்"நல்லா இருக்கேன் டாக்டர். என்ன திடீர்னு இவ்ளோ லேட்டா போன் பண்றீங்க" என்றார். உடனே டாக்டர் ராஜன் "உங்களுக்கு என் பிரண்டு மணியை தெரியும்னு நினைக்கிறேன். என் வீட்டு கிரகப்பிரவேசத்துல உங்களுக்கு அவர அறிமுகப்படுத்தி இருக்கேன். ஞாபகம் இருக்கா?"என்றதும் "ஆமா.நல்லா தெரியுமே" என்றார் அவருடைய சகலை முருகானந்தம். "அவருக்கு இப்போ ஒரு சின்ன ப்ராப்ளம். ஆமா அண்ணா யுனிவர்சிட்டி உங்க கண்ட்ரோல்ல வருதா" என்றார்.அவர் சகலை முருகானந்தம் போலீஸ் டிபார்ட்மெண்டில் எஸ் பி ஆக இருக்கிறார். "ஆமாம். என் கண்ட்ரோல் தான் வறது" என்றார் முருகானந்தம்.பின்பு டாக்டர் ராஜன் முருகானந்தனிடம் நடந்ததை கூறினார். உடனே முருகானந்தம் "போன மணி சார் கிட்ட குடுங்க" என்றார்.
டாக்டர் ராஜன் போனை சுப்பிரமணியனிடம் கொடுத்தார். முருகானந்தம் அவரிடம் "மணி சார். நீங்க எதுக்கும் கவலைப்பட வேண்டாம். நாளைக்கு உங்களால் லீவு போட முடியுமா. லீவு போட்டூட்டு நீங்களும் டாக்டர் ராஜனும் பத்து மணிக்கு அண்ணா யுனிவர்சிட்டி மெயின் கேட் கிட்ட வெயிட் பண்ணுங்க. நானே அங்க வரேன். அதுக்கப்புறம் நடக்கிறதை நீங்க வேடிக்கை பார்த்தா போதும். வேறு ஒண்ணும் நீங்க பண்ணவேண்டாம்"என்றார். "ரொம்ப தேங்க்ஸ் முருகானந்தம் சார்" என்றான் சுப்பிரமணியன். அதற்கு முருகானந்தம் "மணி சார். எனக்கு 12 வயசுல பெண் குழந்தை இருக்கா. இந்த காலத்தில் பெண் குழந்தைகளை வளக்கறது ரொம்ப கஷ்டம்னு ஒரு தந்தையா எனக்கு நல்லா தெரியும். ரொம்ப ஜாக்கிரதையா இருக்க வேண்டியிருக்கு. அதனால் தான் இதுபோல கேஸ்களை நான் ரொம்ப ஸ்ட்ரிக்ட்டா டீல் பண்றேன்" என்றார். அத்துடன் போனை துண்டித்தார்.பின்பு ராஜனிடம் பேசிய சுப்ரமணியன்"முருகானந்தம் சொன்னதை கூறிவிட்டு உனக்கு எப்படி நன்றி சொல்தூன்னு தெரியல" என்றார். ராஜன் "சரி.சரி.அத விடு. அது எல்லாம் சேர்த்து வைத்து நான் ஏதாவது கேட்டு வாங்கிக்கிறேன்" என்றார் ராஜன்.மறுநாள் ஆபீசுக்கு அரை நாள் லீவு போட்டு இருந்தான் சுப்பிரமணியன். காலை 10 மணிக்கு ராஜனுடைய காரில் சுப்ரமணியமும், ராஜனும் அண்ணா யுனிவர்சிட்டி மெயின் கேட் அருகில் போய் சேர்ந்தார்கள். அங்கிருந்த போலீஸ் ஜீப்பில் இவர்களுக்காக காத்துக் கொண்டிருந்தார் முருகானந்தம். இவர்கள் வந்தவுடன்" நீங்க ரெண்டு பேரும் நம்ம ஜீப்ல ஏறிக்கோங்க.காரை இங்கேயே பார்க் பண்ணிடுங்க"என்றார் முருகானந்தன். அவர்கள் இருவரும் ஏற்றிக் கொண்ட ஜீப் அண்ணா யுனிவர்சிட்டி உள்ளே "ஜீவரத்தினம். வைஸ் சான்சிலர்". என்று போர்டு போட்டிருந்த ரூம் அருகில் சென்று வாசலில் நின்றிருந்த ப்யூனிடம் " S.P. முருகானந்தம் வந்திருக்கிறேன்னு உங்க விசியிடம் சொல்லுங்க" என்றார் முருகானந்தம்.
இரண்டு நிமிடத்தில் வெளியே வந்த பியூன் "சார் உங்கள உள்ள கூப்பிடுகிறார்" என்றார். முருகானந்தம்,டாக்டர் ராஜன் மற்றும் சுப்பிரமணியன் வி. சி யின் ரூமுக்குள்ளே சென்றார்கள்."நான் முருகானந்தம்,எஸ்பி.,கோட்டூர்புரம்" என்று தன்னை அறிமுகப்படுத்திக் கொண்டார் முருகானந்தம்.வி.சி அவரிடம் "நைஸ் டு மீட் யு சார் .நான் உங்களுக்கு என்ன பண்ணணம் சொல்லுங்க" என்றார் வி.சி." சுருக்கமாக விஷயத்தை கூறினார்
முருகானந்தம். "கொஞ்சம் இருங்க" என்ற வி.சி போனை எடுத்து ரெஜிஸ்ட்ராரை வர சொன்னார். ரெஜிஸ்ட்ரார் உள்ளே வந்தவுடன் முருகானந்தத்திடம் "இவர் தான் ரெஜிஸ்ட்ரார் திருநாவுக்கரசு. இவர் உங்களுக்கு எல்லா உதவியும் பண்ணுவார். வேற எதுவா இருந்தாலும் நீங்க என்னை காண்டாக்ட் பண்ணலாம்" என்றார்.
பின்பு மீண்டும் பேசிய வி.சி. "சார். ஒரு ஸ்மால் ரெக்வெஸ்ட். பையனுடைய ரிலிஜியன் என்னன்னு உங்களுக்கு தெரியும். அதனால இது கொஞ்சம் டெலிகேட் மேட்டர். கேர்ஃபுல்லா ஹேண்டில் பண்ணுவீங்க நினைக்கிறேன்" என்றார். அதற்கு. முருகானந்தம் "நீங்க பேசறது கேட்க வேடிக்கையா இருக்கு. அந்தப் பையன் ஒரு பெண்ண பிளாக்மெயில் பண்ணிண்டு இருக்கான். அது உங்களுக்கு பெரிய மேட்டரா தெரியல. இல்லையா என்றார்" கொஞ்சம் குரலை உயர்த்தி. "அதுக்கு சொல்லல சார். ஆக்ஷன் சிவியரா எடுத்தீங்கன்னா பொலிட்டிக்கல் பிரஷர் வர சான்ஸ் இருக்கு சார்"என்றார் வி.சி. முருகானந்தம் "என்ன ஆக்ஷன் எடுக்கணும்னு எனக்கு தெரியும் மிஸ்டர் வி.சி. பொலிட்டிக்கல் பிரஷருக்கெல்லாம். நான் பயப்படுறவன் இல்ல. அதே சமயத்துல எந்த ஸ்டூடன்ட்டுடைய வாழ்க்கையும் நான் கெடுக்கிறவன் இல்லை" என்று கூறி வி.சி யிடம் விடை பெற்றார் முருகானந்தம். அனைவரும் ரிஜிஸ்ட்ரார் ரூமூக்கு சென்றார்கள். பின்பு திருநாவுக்கரசிடம் விஷயத்தை கூறினார் முருகானந்தம். "சரி சார் நான் கம்ப்யூட்டர் சயின்ஸ் எச்.ஓ.டி கிட்ட பேசறேன். நீங்க அவர் ரூமுக்கே போயிட்டு அந்த பையனை கூப்பிட்டு பேசலாம்" என்றார் திருநாவுக்கரசு. பின்பு அவர் தன்னுடைய அசிஸ்டன்ட் ஒருவரை கூப்பிட்டு. இவங்க எல்லாரையும் கம்ப்யூட்டர் சைன்ஸ் எச்.ஓ. டி. தாமரைக்கண்ணன் ரூமுக்கு கூப்பிட்டு போங்க என்றார். எல்லோரும் தாமரைக்கண்ணன் ரூமுக்கு சென்றார்கள். முருகானந்தம் தன்னையும் சேர்த்து எல்லோரையும் தாமரைகண்ணனுக்கு அறிமுகப்படுத்தினார். வந்த விஷயத்தை கூறி அந்த பையனுடன் பேச வேண்டும் என்று முருகானந்தம் கூறினார். எச்.ஓ.டி. தன்னுடைய ப்யூனை அழைத்து அந்த பையனை அழைத்துக் கொண்டு வருமாறு கூறினார். ஐந்தே நிமிடத்தில் அந்த பையனுடன் திரும்பினார் ப்யூன். நல்ல உயரம். சிகப்பு நிறம். பார்ப்பதற்கு இந்தி பட ஹீரோ மாதிரி இருந்த அந்தப் பையன் உள்ளே வந்தான்.
No comments:
Post a Comment