மூன்று தலைமுறை 51 முதல் 55 வரை

 *மூன்று தலைமுறை-51* 

By N Krishnamurthy 

விசு பாம்பேயில் இறங்கி சென்னைக்கு வேறொரு விமானம் பிடித்தான். அவன் பயணித்த விமானம் காலை 6:30 க்கு மீனம்பாக்கம் ஏர்போட்டை தொட்டது. கிளியரன்ஸ் பார்மாலிட்டீஸ்களை முடித்து,லக்கேஜை எடுத்துக்கொண்டு வெளியே வரும் போது மணி 7:35.

பஞ்சுவும்,விசாலியும் வந்திருந்தார்கள். விசுவைக்கண்டதும் பஞ்சு அவனை ஆரத்தழுவிக்கொண்டார்.விசாலி எல்லா அம்மாக்களைப் போல"ஏண்டா செல்லம்.துரும்பா இளச்சூட்டயே" என்றாள்.வீட்டிலிருந்து பிளாஸ்க்கில் கொண்டு வந்திருந்த சூடான காபியை எவர்சில்வர்  டம்ளரில் விட்டு கொடுத்தாள் விசாலி. வெகு நாட்களுக்குப்பிறகு நல்ல காப்பியை குடித்தான் விசு.வாடகை கார் பிடித்து வீட்டுக்கு போக 8:15 ஆகிவிட்டது.வீட்டினுள் நுழைய இருந்த விசுவை விசாலி தடுத்து நிறுத்தி "ஒரு நிமிஷம் இருடா" என்றாள்.

உள்ளே இருந்து வந்த மங்களம் விசுவுக்கு ஆரத்தி காட்டி நெற்றியில் பொட்டு வைத்தாள்.மங்களம் வயதான காரணத்தால் இளைத்துப் போயிருந்தாள்.

"என்ன பாட்டி.ரொம்ப இளச்சூட்டயே" என்ற விசுவுக்கு மங்களம்

"என்ன பண்ணர்தடா குட்டி.கொஞ்ச நஞ்ச வயசா ஆறது" என்றாள்.

வீட்டுக்குள் நுழைந்தததும் விசு ராஜகோபலய்யர் படுத்துக் கொண்டிருப்பதை பார்த்தான்.

"என்ன ஆச்சு தாத்தா நோக்கு " என்றான்.

"பெரிசா ஒண்ணுமில்லைடா விசு. பனி அதிகமானதால ரெண்டு நாளா லேசா ஜுரம்.

மருந்து சாப்பிட்டுண்டு வறேன்.நீ வந்தூட்டயோல்யோ,இனிமே உடம்பு சொஸ்தமாயிடும்"என்று சொல்லி சிரித்தார்.

பஞ்சு அன்று ஆபிசுக்கு லீவு சொல்லியிருந்தார்.

விசு குளித்துவிட்டு சாப்பிட்டான்.

சின்னவெங்காய சாம்பார் வாசனை மூக்கை துளைத்தது.தொட்டுக்க உருளைகிழங்கு பொடிமாஸ்.

மைசூர் ரசம்.ஸ்பெஷல் ஸ்வீட் அய்ட்டமாக ரவா கேசரி.(இதை எழுதும் போது எனக்கே நாக்கில் ஜலம் ஊறுகிறது)

ரொம்ப நாள் கழிச்சு அம்மா கை சமயலை சாப்பிட்ட விசு கொஞ்சம் கூடவே சாப்பிட்டான்.

உண்ட மயக்கத்தினாலும்,ஜெட் லேகினாலும் உறங்க ஆரம்பித்தான்.

ஆழ்ந்த உறக்கமாதலால் விதவிதமான கனவுகள்.

சம்மந்தா சம்மந்தமில்லாத நபர்கள் கனவில் வந்தனர்.ஒரு கனவில் ராமும்,ராபர்ட்டும் தோள் மேல் கை போட்டுக்கொண்டு பேசிக் கொண்டு போகிறார்கள்.

மற்றொரு கனவில் மேகி ஒரு ஆண்மகனுடன் பார்க்கில் உலா போகிறாள்.

அவளுடன் இருக்கும் ஆணைப்பார்த்த மாதிரி இருக்கிறது விசுவுக்கு.

முதுகை யாரோ தட்டுவதை உணர்ந்ததும் விசு எழுந்து உட்கார்ந்தான்.

கல்லூரி ஹாஸ்டல் ரூமில் இருக்க வேண்டியவன் வேறு இடத்தில் இருக்கிறோமே என்று நினைத்தான்.

முழு நினைவு வந்தவுடன்தான் இந்தியா திரும்பியது நினைவுக்கு வந்தது.

விசாலி கையில் காபியுடன் வந்து"விசு.சாயரக்ஷை ஆயிட்டுது. மூஞ்சி அலம்பிண்டு காபி குடி.முடிஞ்சா சந்தி பண்ணு"என்றாள். சந்தியை முடித்த விசு"எங்கம்மா- தாத்தா, பாட்டியை காணோம்" என்றான்.விசாலி அவனிடம்"அந்த கூத்தை ஏன் கேக்றே.நீ தூங்க ஆரம்பிச்ச அரைமணிக்கெல்லாம் உங்க தாத்தா ஏந்து உக்காந்துண்டு நேக்கு வேத்து கொட்டறது.ஜுரம் போய்ட்டுதுன்னார்".

பாட்டி, தாத்தா ரெண்டு பேரும் காசி விஸ்வநாதர் கோவிலுக்கு போயிருக்கா.

அனேகமா நீ அமெரிக்காவிலிருந்து வந்தூட்ட சேதி அவா ப்ரண்ட்ஸ் வழியா மாம்பலம் பூரா இவ்வளவு நேரம் பரவி இருக்கும்"

என்றாள் சிரித்தபடியே.

*மூன்று தலைமுறை-52* 

மறு நாள் காலை எழுந்தவுடன் விசு எல்லோருக்கும் வாங்கி வந்திருந்த  பொருட்களை எல்லாம் எடுத்து கொடுத்தான். அப்பாவுக்கு ஷர்ட்,  மற்றும் கேசியோ எல்.சி.டி வாட்ச், அம்மாவுக்கு புடவை,ஹேண்ட் பேக்(மேகி செலக்ட் பண்ணியது), தாத்தாவுக்கு சின்ன டிரான்சிஸ்டர் ரேடியோ, பாட்டிக்கு புடவை. கொஞ்ச நேரம் கழித்து ராமநாத சாஸ்திரிகள் வந்தார். அவரை பார்த்து விசு "என்ன மாமா. சௌக்கியமா இருக்கேளா" என்று கூறி நமஸ்காரம் செய்தான்.பின்பு அவருக்கு வாங்கி வந்த ஐட்டங்களை அவரிடம் கொடுத்தான். "சௌக்கியத்துக்கு ஒண்ணும் குறைச்சலில்லேடா விசு.நன்னா இருக்கேன். நீ எப்படி எப்படி இருக்கே? அமெரிக்கா எப்படி இருந்தது?" என்று கேட்டார். "மேக்கொண்டு என்ன செய்யப் போறே?"என்றார்.

 "இங்கே ஏதாவது ஒரு வேலை பாத்துண்டு அப்பா அம்மா கூடவே இருந்துடலாம்ணு பாக்றேன் மாமா" என்றான். 

"நல்ல முடிவு.ஸ்வாமி நோக்கு   துணை இருப்பான்" என்று கூறி,காபி குடித்து விட்டு விடை பெற்றார். அவர் கிளம்புவதற்கு முன் விசுவுக்கு ஞாபகம் வர அவரை பார்த்து "மாமா .சபேசன் எப்படி இருக்கான்?என்ன செய்கிறான்?"

என்று கேட்டான்."நானே சொல்லணும்னு இருந்தேன். மறந்துட்டேன்.

அவன் அப்புறம் பிரிசிடென்சி காலேஜில் P.G முடிச்சிட்டு அங்கேயே பிஎச்டி யும் பண்ணினான். இப்போ கும்பகோணம் ஆர்ட்ஸ் காலேஜில் லெக்சரரா   இருக்கான்" என்றார். "அவனுக்கு கல்யாணம் ஆயிடுத்து.எனக்கு ஒரு பேத்தி இருக்கா" என்றார் விசு 'ரொம்ப சந்தோஷமா இருக்கு மாமா. அவனை விசாரிச்சேன்னு சொல்லுங்கோ" என்றான். 

" பேஷா சொல்றேன். வர தீபாவளிக்கு அவன் இங்க வர்றதுக்கு வாய்ப்பிருக்கு" என்றார்.நான்கு  நாட்கள் வீட்டிலே ரெஸ்ட் எடுத்துக் கொண்டான் விசு.தினமும் அம்மாவின் கைபக்குவத்தில் அருமையான சாப்பாடு.

அடுத்த திங்கட்கிழமை காலை விசு மெட்ராஸ் ஐ.ஐ.டி க்கு  சென்றான். டைரக்டர் ஆபீஸை கண்டுபிடித்து  டைரக்டரை பார்க்க வேண்டும் என்று கூறினான்.  அரை மணி நேரத்தில் விசுவுக்கு டைரக்டர் ஏ.ராமச்சந்திரனை  பார்க்க நேரம் கிடைத்தது. தன்னை பற்றி அறிமுகம் செய்து கொண்டு தன்னுடைய சர்டிபிகேட்களை காண்பித்தான். அதையெல்லாம் பார்த்த டைரக்டர் 

"Mr.கார்த்திகேயன். உங்களை போன்றவர்களைத் தான் நாங்கள் தேடிக்கொண்டிருக்கிறோம்.எவ்வளவு சீக்கிரம் முடியுமோ அவ்வளவு சீக்கிரம் நீங்கள் எங்களுடைய எலக்ட்ரிகல் டிபார்ட்மெண்டில் நீங்கள் Faculty யாக  சேர்ந்துவிட வேண்டும்" என்றார் "ஒரு அப்ளிகேஷன் எழுதி கொடுத்துவிட்டு போங்கள். உங்களுக்கு அப்பாயின்ட்மெண்ட் ஆர்டர் அனுப்பி விடுகிறேன்"என்றார்.

தன் கைப்பட ஒரு அப்ளிகேஷன் எழுதி அவரிடம் கொடுத்து விட்டு "தேங்க்யூ சார்" என்று சொல்லி  வீட்டுக்கு வந்து விட்டான். ஒரே வாரத்தில் விசுவுக்கு ஐ.ஐ.டி மெட்ராஸ்லிருந்து அசிஸ்டன்ட் லெக்சரர் போஸ்டுக்கு அப்பாயின்ட்மெண்ட் ஆர்டர் வந்தது. விசாலி  ராமனாத சாஸ்திரிகளை சென்று பார்த்து ஒரு நல்ல நாள் பார்த்து கொடுக்குமாறு கேட்டாள். "புதன்கிழமை நன்னா  இருக்கும்மா.

பொன் கிடைத்தாலும் புதன் கிடைக்காது. அன்னைக்கு காலையில பத்தரை மணிக்குள்ள வேலையில் சேர்ந்து கொள்ள சொல்லு. பன்னெண்டு ஒண்ரை ராகு காலம்" என்றார். அவர் சொன்னபடி புதன்கிழமை விசு ஐ.ஐ.டி சென்னையில்  வேலையில் சேர்ந்தான்.அவன் மாணவர்களுக்கு சொல்லிக் கொடுக்கும் விதமும் ,மாணவர்களை சுதந்திரமாக யோசிக்க விடும் திறமையும் ஐ.ஐ.டி முழுதும் சீக்கிரத்தில் பரவியது. அமெரிக்காவில் படிக்கும் போது ஆசிரியர்கள் மாணவர்களிடம்  அதிக வித்தியாசம் இல்லாமல் பழகுவது போலவே இங்கும் அவன் மாணவர்களிடம் பழகினான். மாணவர்களுக்கும், 

மற்றஆசிரியர்களுக்கும் இது ஒரு புது மாதிரியாகவே இருந்தது. தொடர்ந்து அதே பாணியில் பழக சில ஆசிரியர்களும் முற்பட்டார்கள்.

ஒரு நாள் டைரக்டர் ராமசந்திரன் விசுவை  கூப்பிட்டு எலெக்ட்ரிகல் டிபார்ட்மெண்டை புதுமைப்படுத்த வேண்டும்.உலக தரத்திற்கு அதனை உயர்த்த  வேண்டும். இதற்கான வழிமுறைகளை சொல்லுமாறு அவர்  அவனிடம் கேட்டார்.ஒரே வாரத்தில் ஒரு திட்ட அறிக்கையை தயார் செய்து டைரக்டரிடம் கொடுத்தான். அவன் கொடுத்த யோசனைகளை  உடனடியாக அமுல்படுத்த டைரக்டர் முனைந்தார்.

லேப்பிற்கு வேண்டிய உபகரணங்கள் அமெரிக்காவிலிருந்து வரவழிக்க ப்பட்டன.விரைவில் கம்ப்யூட்டிங் டெக்னாலஜி லேப் ஐ.ஐ.டி மெட்ராஸில் ஏற்படுத்தப்பட்டது. அதை கண்காணித்து நிர்வகிக்கும் பொறுப்பை ஏற்றுக் கொண்டான் விசு. வெகு விரைவில் ஐ.ஐ.டியில் ஆதர்ச ஆசிரியன் என்ற பெயர் பெற்றான் விசு.

*மூன்று தலைமுறை-53* 

 விசு மாத்தியானிகம்  செய்ய முடியவே இல்லை.

இது அவனுக்கு மனதுக்கு வருத்தமாக இருந்தது. டிபார்ட்மெண்டில் கூட இருந்த மற்றொரு  அசிஸ்டன்ட் ப்ரொபசரான அப்துல் கரீம் 12 மணிக்கு  ரூமுக்கு வந்து தினமும் தொழுகை நடத்துவதை பார்த்த விசு தானும் அப்படி ஏன் செய்யக்கூடாது என நினைத்தான்.

பொதுவாக முஸ்லிம்கள் 5 வேளை தொழுகை நிச்சயம் செய்கிறார்கள் என்று அவனக்கு தெரியும்.அன்று சாயங்காலமே பஞ்ச பாத்ரம்,உத்திரிணி கடையில்  வாங்கிக்கொண்டு வந்த விசு ஞாபகமாக தன்னுடைய ஆபீஸ் பேக்கில் அவற்றை வைத்து கூடவே ஒரு விபூதி சம்படத்தையும் வைத்தான். மறு நாள் ஐ.ஐ.டி யில் தன் ரூமிலுள்ள கப் போர்டில் அவைகளை  வைத்து விட்டான். மதியம் அவனுடைய வகுப்புக்களுக்கு  ஏற்ற மாதிரி ரூமில் வந்து மாத்தியானிகம் செய்ய ஆரம்பித்தான்.இது உங்களுக்கு கொஞ்சம் அதிகமாக படலாம்.

என்ன பண்ணுவது.நடந்ததை எல்லாம் விவரிக்க வேண்டியாதால் இந்த உண்மையிலேயே நடந்த நிகழ்ச்சியையும் குறிப்பிட வேண்டியதாயிற்று. (இப்பொழுதெல்லாம் ஐ. ஐ.டியில்  வேலை செய்பவர்கள் எல்லோருக்கும் ஐ.ஐ.டிக்கு உள்ளே க்வார்டர்ஸ்  கிடைத்து விடுகிறது. மத்தியானம் செய்ய விரும்புவோர் மதியம் வீட்டிற்கு சென்று அதை முடித்து விட்டு பின்பு உணவு அருந்தி விட்டு திரும்பி வருவதை வழக்கமாகக் கொண்டிருக்கிறார்கள் சிலர். முன்பெல்லாம் இடவசதி அதிகமாக இல்லாத காரணத்தால் எல்லோருக்கும்க்வார்டர்ஸ்கொடுக்க முடியவில்லை)

ஒரு நாள் ஐ.ஐ.டி யில் எலக்ட்ரிகல் இன்ஜினியரிங் டிபார்ட்மெண்ட் சார்பில் ஒரு செமினார் நடந்தது. செமினாரில் விசு லேடஸ்ட் டெவலப்மெண்ட்ஸ் இன் எலக்ட்ரானிக்   இன்ஜினியரிங் பற்றி உரை ஆற்றினான்.

இந்த செமினாரில் அப்போது CEG யின் பிரின்ஸிபாலாகவும்,எலக்ட்ரானிக்   இன்ஜினியரிங் துறைக்கு தலைவராகவும் இருந்த ப்ரொபசர் K.S.Hegde கெஸ்ட்டாக அழைக்கப்பட்டிருந்தார்.செமினார் முடிந்ததும் அவர் விசுவைப்பார்த்து "நீ CEG  ஸ்டூடண்ட் தான் என நினைக்கிறேன்" என்றார். விசு பின்பு அவரிடம் தன்னைப்பற்றி முழு விவரத்தையும் கூறினான்.அவர் அவன் கையை குலுக்கி "எக்ஸலண்ட் ஸ்பீச் .வெல் டன் கார்த்திகேயன்" என்றார். 

"நீ ஏன் நம்முடைய கல்லூரிக்கு வந்து பைனல் இயர் மற்றும்  போஸ்ட் கிராஜுவேட்ஸ் டூடண்டுகளுக்கு வாரம் இரண்டு மூன்று கிளாஸ்கள் எடுக்கக்கூடாது" என்று கேட்டார் .

"வித் ப்ளஷர்.நீங்கள் எங்கள் டைரக்டரிடம் இது பற்றி பேசுங்கள்" என்றான். ப்ரொபசர் ஹெக்டே டைரக்டர் ராமச்சந்திரனிடம்  இது பற்றி பேசினார்.

"வகுப்புக்களை  கார்த்திகேயன் ஹானரரியாக   எடுக்கும் பட்சத்தில் எங்களுக்கு இதில் ஒன்றும் ஆட்சேபணை கிடையாது" என்றார் ராமசந்திரன்.இருவரும் விசுவைக் கூப்பிட்டு பேசினார்கள்"எனக்கு கிளாஸ் எடுப்பதில் சந்தோஷமே.CEG என் Alma Mater. இதைத் தவிர வேறு என்ன எனக்கு சந்தோஷம் இருக்க முடியும்" என்றான் விசு.அடுத்த வாரத்திலிருந்து வாரத்தில் 2 கிளாஸ்கள், ஒன்று E5 மற்றும் தேர்ட் இயர் ECEக்கும் ,மற்றொன்று  எம்.எஸ்.சி என்ஜினியரிங்(கம்ப்யூடர் டெக்னாலஜி) குக்கும் விசு கிளாஸ் எடுக்க ஆரம்பித்தான்.

ஒரு சனிக்கிழமை அன்று விசுவுக்கு திடீரென்று மீர் ஷபீர் ஹுசைனின்   நினைவு வந்தது.

அவரை சென்று பார்க்க நினைத்தான்.அவருடைய பழைய வீட்டு விலாசம் அவனிடம் இருந்தது.ஞாயிற்றுக் கிழமை காலை கிளம்பி ராயப்பேட்டைக்கு சென்று அவருடைய பழைய வீட்டை அடைந்தான்.அவர் வேறு வீட்டுக்கு சென்று விட்டிருந்தார்.நல்ல வேளை அவரது பழைய வீட்டில் குடியிருந்தவர்கள் அவரது புது வீட்டு அட்ரஸை கொடுத்தார்கள்.விசுஅவரதுபுது வீட்டின்உள்ளே சென்றான் ."அடேடே.

நான் கனா காண்கிறேனா. கார்த்திகேயன் தானா இது. ரொம்ப நாளாச்சு பார்த்து. எப்படி இருக்க" என்றார் ஜனாப் மீர் ஷபீர் ஹுசைன். கார்த்திகேயன் எல்லா விவரத்தையும் கூறியவுடன் அவர் அவனை ஆரத் தழுவிக் கொண்டு "உன்னைப் போன்ற மாணவர்கள் கிடைத்தது நாங்கள் செய்த பாக்கியம்" என்றார்.

"இல்லை சார். அப்படி சொல்லாதீர்கள். உங்கள் கல்லூரியில் படித்தது

தான் நான் பிற்பாடு படித்த உயர் படிப்புக்கெல்லாம் அடித்தளமாக இருந்தது" என்று கூறினான்.கையோடு வாங்கிக்கொண்டு வந்த ஆப்பிள்,

மாதுளை பழங்களை அவரிடம் அளித்தான்.தான் இப்போது ரிட்டையர் ஆகி விட்டதாகவும்,அருகிலுள்ள ஏழைகளுக்கு தன்னால் முடிந்த உதவி செய்வதாகதாகவும் கூறினார்.அவரிடம் விடை பெற்றுக்கொண்டு வீடு திரும்பினான் விசு.

*மூன்று தலை முறை-54* 

---------------------

இதற்கிடையில் விசாலி பஞ்சுவிடம் "விசுவுக்கு வயசாயிண்டே  போறது. சீக்கிரம் ஏதாவது பொண்ணை பாக்கணம்.நீங்க பாட்டுக்கு

சும்மா இருந்தா என்ன அர்த்தம்" என்றாள். பஞ்சுவும் விசுவின் ஜாதகத்தை எடுத்துக்கொண்டு போய் மைலாப்பூரிலுள்ள ஜோசியரிடம் காண்பித்தார்(முன்பு மாதிரி கும்போணம் ஜோசியரை இப்போதெல்லாம் பஞ்சுவால் சென்று பார்க்க முடிவதில்லை.கும்கோணம் ஜோசியரே மைலாப்பூரிலுள்ள தனது சொந்தக்காரரை பஞ்சுக்கு ரெகமண்ட் பண்ணியிருந்தார்)  விசுவின் ஜாதகத்தைப் பார்த்த ஜோதிடர் குருபலன் வந்துவிட்டதாகவும் வெகு விரைவில் திருமணம் நடக்க வாய்ப்பு இருப்பதாகவும் கூறினார். அந்த வாரம் ஞாயிற்றுக்கிழமை காலை 9 மணி இருக்கும். ராமநாதன் சாஸ்திரிகள் பஞ்சு வீட்டிற்கு வந்தார். அவருடன் வேறு ஒரு புது மனிதரும் வந்திருந்தார். விசாலி, சாஸ்திரிகளுடன் புது மனிதரும் இருப்பதை பார்த்து "வாங்கோ மாமா" என்று கூப்பிட் விட்டு கிடு கிடு வென வீட்டினுள் சென்றாள்.

"சாஸ்திரிகள் மாமாவோட புதுசா யாரோ ஒத்தர் வந்திருக்கா.செத்த  என்னான்னு  பாருங்கோ" என்றாள் மெல்லிய குரலில்  விசாலி  பஞ்சுவிடம். மேலே பனியன் மட்டும் அணிந்திருந்த  பஞ்சு அவசர  அவசரமாக சட்டையை அணிந்து கொண்டு வெளியில் வந்து 'வாங்கோ மாமா" என்று ராமனாத சாஸ்திரிகளை வரவேற்று, புதியவரை பார்த்து "வாங்கோ" என்று கூப்பிட்டார்.  "என்ன பஞ்சு சார் காபி ரெண்டா சொல்லுங்கோ" என்றார் சாஸ்திரிகள்.

"விசு  ஆத்துல இருக்கானா" என்று கேட்டார். பஞ்சு "இல்ல மாமா.அவன் பிரண்டு ஆத்துக்கு காலைலே கிளம்பி போய்ட்டான். வர சமயந்தான்" என்றார். "என்ன விசேஷம் மாமா" என்றார் பஞ்சு. பஞ்சுவைப்  பார்த்து ராமநாத சாஸ்திரிகள் 

"நல்ல விஷயம் தான் " என்று கூறி பக்கத்தில் இருந்தவரை காண்பித்து " இவர்  ஆத்மநாத அய்யர். சொந்த ஊர் கோமல்.

இவா அப்பா வைத்தியநாதய்யர் பெரிய மிராசுதார்.ரொம்ப பிரபலம்.

தற்சமயம் ஜீவிதராக இல்லை.

 இவா மெட்ராஸில் வந்து செட்டிலாகி ரொம்ப வருஷம் ஆறது.  பேங்கில் வேலை பண்றார்" என்றார். மேற்கொண்டு பேசிய ராமனாதா சாஸ்திரிகள்  "இவாத்துக்கு என் சகா மாத்ருபூத கனபாடிகள் தான் உபாத்யாயம். இவர் பெரிய  பொண்ணுக்கு வரன் பார்த்திண்டிருக்கார். இவருக்குரெண்டு பொண்ணு.அப்புறம் ஒரு ஆண் குழந்தை. பெண் ஜாதகத்தை என் கிட்ட கனபாடிகள் கொடுத்தார். நான் விசுவின்  ஜாதகத்தோடு சேர்த்து வைத்து பாத்தேன்.ரெண்டு ஜாதகமும் கனப்பொருத்தம்.

இவர்  தானே வந்து பொண் ஜாதகத்தை உம்ம கிட்ட முறையா  கொடுக்க வந்திருக்கிறார்" என்று பேசி முடித்தார். 

உள்ளிலிருந்து லேசாக எட்டிப்பார்த்த விசாலி பஞ்சுவுக்கு சைகை செய்ய அவர் உள்ளே சென்று ரெண்டு டம்ளர் காபியை  எடுத்து வந்து அவர்கள் முன் நீட்டினார்.முதன் முதலில் வாயை திறந்த ஆத்மநாதன் பஞ்சுவைப்பார்த்து "உங்களுக்கு காபி" என்றார்.

பஞ்சு "நான் காலை 6 மணிக்கு குடிக்கும் ஒரு காப்பியோட சரி" என்றார்

பஞ்சு சிரித்துக்கொண்டே. ஜாதகத்தை  வாங்கிக் கொண்ட பஞ்சு சாஸ்திரிகளைப்பார்த்து "நான் நம்பாத்து  ஜோசியரை  பாத்து ரெண்டு ஜாதகத்தையும்  காட்டி விட்டு சொல்கிறேன்.பின்பு பொருந்தினால் மேற்கொண்டு பேசலாம்" என்று கூறினார். "சரி.அப்ப நான் விடைபெத்துகிறேன்" என்று கூறினார் ஆத்மநாதன்.

"விவரம் தெரிஞ்சதும் நான் உங்களுக்கு சொல்றேன்"என்றார் சாஸ்திரிகள்.பஞ்சுவைப்பார்த்த ஆத்மநாதன் "அப்போ நான் போய்ட்டு வரேன்" என்றார்.பையனை பார்க்க முடியவில்லையே என்ற ஏமாற்றம் அவர் கண்களில் தெரிந்தது. வெளியில் நிறுத்தி வைத்திருந்த ஸ்கூட்டரில் ஏறி ஆத்மநாதன் சென்றுவிட்டார். ராமநாத சாஸ்திரிகள் பஞ்சு விடமும் விசாலியிடமும் "இது நல்ல இடம். நல்ல மனுஷாள். வசதியான குடும்பம். பிக்கல் பிடுங்கல் கிடையாது.

பொண்ணும் கிராஜீவேட்டுக்கு படிக்றாளாம். நான் பாத்தமட்டில் ரெண்டு ஜாதமும் பொருந்தறது. நீங்களும் பாருங்கோ .மேக்கொண்டு தேவைபட்டால் அவாகிட்ட பேசலாம்" என்று கூறினார். "சரி மாமா அப்படியே ஆகட்டும்" என்றார் பஞ்சு.இது வரை ராமனாத சாஸ்திரிகள் பஞ்சு குடும்பத்திற்கு பல நன்மைகளை செய்திருக்கிறார்.இந்த கல்யாண விஷயமும் பஞ்சு குடும்பத்துக்கு நன்மையில் முடியுமா?

காலம் தான் பதில் சொல்ல வேண்டும்.

*மூன்று தலைமுறை- 55* 

பஞ்சு, விசு மற்றும் ஆத்மநாதனுடைய பெண் சுப்புலக்ஷ்மி என்கிற ராகினியின் ஜாதகத்தை எடுத்துக்கொண்டு மைலாப்பூர்

ஜோசியரிடம்  சென்றார். அவரிடம் இரண்டு ஜாதகத்தையும் கொடுத்து பொருத்தம் பார்க்கச் சொன்னார்.இரண்டு ஜாதகத்தை சேர்த்து பார்த்த ஜோசியர் பஞ்சுவிடம் "பத்துக்கு ஒன்பது பொருத்தம் நன்றாக இருக்கிறது.நீங்கள் மேல்கொண்டு ஆகவேண்டியதை பார்க்கலாம்" என்று கூறினார். வீட்டிற்கு வந்த பஞ்சு ராஜகோபால அய்யரிடமும்  மங்களமிடமும்  விஷயத்தை சொல்லி பின்பு விசாலியிடம் சொன்னார்.அடுத்த நாள் காலை ராமநாத சாஸ்திரிகள் வழக்கமாக காபி குடிக்க வரும் பொழுது பஞ்சு ஜாதகம்  பொருந்துவதாக கூறினார். சாஸ்திரிகள் பஞ்சுவிடம் 

"அப்ப நான் அவாத்துக்கு சொல்லிட்றேன்" என்றார்.

 "பேஷா" என்றார் பஞ்சு. அன்று மாலை மணி ஆறு இருக்கும். விசு அப்போதுதான் ஐ.ஐ.டி யிலிருந்து வந்து சாயம் சந்த்யாம் செய்ய உட்கார்ந்திருந்தான்.

வாசலில் ஏதோ நிழல் ஆடுவது கண்டு விசு வாசலுக்கு சென்றான். யாரோ ஒருவர் நின்று கொண்டிருந்தார். 'என்ன வேண்டும்' என்று கேட்டான் விசு. 'பஞ்சாபகேசன் சாரை பாக்கணம்" என்றார் வந்தவர்.  "உள்ள வாங்கோ" என்று கூறிய விசு  அவரைப் பார்த்து "யாரென்று நான் அப்பாவிடம் சொல்லட்டும்" என்று கேட்டான். "ஆத்மநாதன் என்று சொல்லுங்கள்" என்றார் அவர். அதைக்கேட்டதும் விசுவுக்கு வந்திருப்பது யார் என்று புரிந்து விட்டது. உள்ளே சென்று அப்பாவிடம் ஆத்மநாதன்  வந்திருக்கிறார் என்று கூறினான்.  ஹாலுக்கு வந்த பஞ்சு ஒரு சேரை எடுத்துப் போட்டு அவரை உட்காரச் சொல்லி  தானும் மற்றொரு சேரில் உட்கார்ந்தார். ஆத்மநாதன் பேச ஆரம்பித்தார். "ராமநாத சாஸ்திரிகள் எங்கிட்ட விஷயத்தை சொன்னார்.ரொம்ப சந்தோஷம்.நீங்க ஒரு நல்ல நாள் பார்த்து பெண் பார்க்க வந்தா தேவலை" என்றார்.

 "சரி அப்படியே செஞ்சுட்டா போச்சு" என்றார் பஞ்சு.அதற்குள் ஆத்மநாதன் "வர வெள்ளிக்கிழமை கூட நல்லா நாளா இருக்கு. சாயங்காலம் 3 மணிக்கு  நீங்க  வந்துட முடியுமா"என கேட்க பஞ்சு உள்ளே சென்று விசுவிடம் உனக்கு வெள்ளிக்கிழமை மத்தியானம் அரை நாள் லீவு போட முடியுமா என்று  கேட்டார்.

"நான் நாளை காலேஜ் போனாதாம்பா தெரியும்" என்றான் விசு. கூடத்திற்கு வந்த பஞ்சு ஆத்மநாதனிடம் "நான் நாளை  உங்களுக்கு சொல்லிட்றேன்" என்று கூறினார். சட்டை பாக்கெட்டிலிருந்து ஒரு விசிடிங் கார்டை  எடுத்துக் கொடுத்த ஆத்மநாதன் "இதல ஆபிஸ்,ஆத்து அட்ரஸ், போன் நெம்பரெல்லாம் இருக்கு" என்றார். மறுநாள் மாலையில் பஞ்ச வீட்டுக்கு  வந்ததும் விசுவிடம் கேட்க அவன்

"சரிப்பா. வெள்ளிக்கிழமை சாயங்காலம் போகலாம்.நான் அரை நாள் லீவு போட்டுட்டேன்" என்று கூறினான். அன்று சாயங்காலம் ஆத்மநாதன் வீட்டுக்கு  பஞ்சு போன் பண்ண, போனை எடுத்தது ஆத்மநாதன் மனைவி. "ஹலோ சொல்லுங்கோ யார் வேணும்" என்று கேட்டாள். "ஆத்மநாதன் சார் இருக்காரா. அவர் கிட்ட கொஞ்சம் பேசணும்" என்றார் பஞ்சு. "பக்கத்துல இருக்க கச்சாலீஸ்வரர் கோவிலுக்கு போயிருக்கா. வந்துடுவா. நீங்கள் யாரென்னு  சொல்லணும்" என்றாள்.

"மாம்பலத்திலிருந்து இருந்து பஞ்சாபகேசன் பேசறேன்னு  சொல்லுங்கோ' என்று பஞ்சு சொன்னார். மறு முனையில் மாமி அவசரம் அவசரமாக 'மன்னிக்கணும்.முதல்ல நீங்க யார்ன்னு நேக்கு புரியலை..நா அவா ஆத்துகாரி பேசறேன்

அவர் வந்ததும் நான் சொல்லிடேறேன்.என்ன சொல்லணம் சொல்லுங்கோ' என்று கேட்டாள்  ஆத்மநாதனின் மனைவி சுந்தரி. அவளுக்கு அவர்கள் வெள்ளிக்கிழமை பெண் பார்க்க வர போகிறார்களா

என்று தெரிந்து கொள்ள ஆர்வமாக இருந்தது. "வெள்ளிக்கிழமை சாயங்காலம் 3 மணிக்கு பெண் பார்க்க வரலாமா என்று கேட்டிருந்தார்.சரி ன்னு சொல்லிடுங்கோ" என்றார் பஞ்சு. "ரொம்ப சந்தோஷம்.அவர் வந்ததும் அவரையே உங்களுக்கு போன் பண்ண சொல்றேன்.வெச்சுடட்டமா" என்றாள்.

ஒரு மணி கழித்து ஆத்மநாதன்  போன் செய்து செய்தி கிடைத்ததாகவும் மிகவும் சந்தோஷம் என்றும் கூறினார். மறுநாள் காலை ராமநாதன் சாஸ்திரிகளிடம்  பஞ்சு விவரத்தை கூறி அவர் அவசியம் வரணம்னு கேட்டுக்கொண்டார்.

அதைக்கேட்ட ராமநாத சாஸ்திரிகள் 

"வர வெள்ளிக்கிழமைதானே.அன்னிக்கு ராயப்பேட்டேல  ஒரு சீமந்தம். பண்ணி வெச்சூட்டு,சாப்டூட்டு ஒரு பஸ்ஸை பிடிச்சு நேரத்துக்கு வந்துட்றேன். அட்ரஸ் குடுங்கோ" என்றார். ஆத்மநாதன் விசிடிங் கார்டின் பின்புறம்  அவர் வீட்டு அட்ரஸ் கொடுக்கப்பட்டிருந்தது.பஞ்சுவுக்கு கண்ணாடி இல்லாமல் அட்ரஸை படிக்க முடியவில்லை. விசுவை கூப்பிட்டு படிக்கச்சொல்லி 'நான் எழுதிக் கொள்கிறேன்'

என்றார் பஞ்சு.விசு படித்தான். "ஆத்மநாதன்.268, தம்பு செட்டி தெரு, மண்ணடி, ஜார்ஜ் டவுன், மெட்ராஸ்-1" என்று.

சாஸ்திரிகள் "ஜார்ஜ்டவுனா. பரவாயில்லை. நேர பிராட்வே பஸ் ஸ்டாண்ட் வந்து அங்கிருந்து ரிக்க்ஷா வெச்சுண்டு வந்துட்றேன்"

என்று கூறி சென்றார். விசு தன் நண்பன் கணேசனுக்கு போன் செய்து  பெண்பார்க்கும் விஷயத்தை கூறி அவனால் லீவ் போட்டுவிட்டு வர முடியுமா என்று கேட்டான். கணேசன் "இல்லடா விசு. வெள்ளிக்கிழமை எங்க ஆபீஸ்ல முக்கியமான ஒரு இன்ஸ்பெக்ஷன் இருக்கு. நான் வருவதற்கு ரொம்ப சிரமம்" என்றான்.

ராஜகோபல ஐயரும்,மங்களமும் தாங்கள் வரவில்லை என்றும்,

அதிக ஜனங்கள் பெண் பார்க்க போனா நன்றாக இருக்காது என்றும் கூறிவிட்டார்கள். மங்களம் பஞ்சுவிடம் "பொண்ணு பிடிச்சுதுன் னு தீர்மானம் ஆனா பொண் போட்டா வாயிண்டு வா" என்றாள். வெள்ளிக்கிழமை 2 மணிக்கு பஞ்சு டாக்ஸி சொல்லியிருந்தார். விசுவுக்கு என்ன டிரஸ் போட்டுக்கொள்வதென்று குழப்பமாக இருந்தது.விசாலி "ப்ரவுன் கலர் டெரிகாட்டன் பேண்ட் போட்டுக்கோ. வெள்ள டெர்லின் முழுக்கை ஷர்ட் போட்டுண்டு இன் பண்ணிக்கோடா. ராஜா மாரி இருப்பே" என்றாள். காக்கைக்கு தன் குஞ்சு பொன் குஞ்சு. 

விசாலி M.S.Blue கலர் பட்டு புடவையும் மேட்சிங் ரவிக்கையும் அணிந்து கொண்டாள்.கழுத்தில் சின்ன செயினும் ஒவ்வொரு கையிலும் இரண்டு தங்க வளையலும் அணிந்திருந்தாள்.

கொண்டையை சுற்றி வைத்திருந்த ஜாதி மல்லி பூவின் வாசம் மூக்கைத்

துளைத்தது.பஞ்சு விசாலியை பார்த்து "அவாள்ளாம் பையனோட அக்கா வந்திருக்கான்னு நினச்சுக்க போறா" என்று கிண்டல் அடித்தார்.விசாலிக்கு உள்ளூர இந்த கிண்டல் பிடிச்சிருந்தாலும்

"போறும்.போறும் உங்கப்பாவுக்கு வர என்ன பேசறதுன்னு விவஸ்தையே

இல்லை" என்றாள் பொய் கோபத்துடன். 2 மணி 10 நிமிஷத்துக்கு டாக்ஸி வீட்டு வாசலில் வந்து நின்றது. பஞ்சு,விசாலம் மற்றும்  விசு  டாக்ஸியில் ஏறி அமர்ந்தார்கள். ட்ரைவரிடம் விசு அட்ரஸ்  சொல்ல டாக்சி பறந்தது.