ஓ...அமெரிக்கா - 8
இப்போது அங்கேயுள்ள மனிதர்களுக்கு வருவோம். ஹ்யூஸ்டன் நுழைந்ததிலிருந்து அமெரிக்கர்களைப் பார்த்துக்கொண்டிருந்தாலும், அவர்களை அவசரமாகத் தாண்டிப்போகும் ஒரு பயணியாகவேதான் நான் இருந்ததால் கூர்ந்து கவனிக்கும் அவகாசம் கிடைக்கவில்லை. ஆனால் அரிசோனா சென்றதிலிருந்து அவர்களைக் கொஞ்சம் நிதானமாகப் பார்க்கும் சந்தர்ப்பங்கள் கிடைத்தன.
பொதுவாக உயரம் அதிகமாகக் காணப்படும் அவர்கள் எல்லோருமே சிக்கென்று இல்லாமல் பலர் உடல் பருமனுடன் காணப்பட்டது நான் எதிர்பாராத விஷயம். இதனால் உடையும் காலணிகளும் எல்லா விதமான அளவுகளிலும் அங்கே கிடைக்கின்றன. உடல் பருமன் பெரியவர்களிடமும், குழந்தைகளிடமும் காணப்படும் கவலைப்பட வைக்கும் பிரச்னையாகத்தான் அங்கேயும் இருக்கிறது. பெரும்பாலானோர் கண்ணைப் பறிக்கும் அழகுடன் இருந்தாலும் சாதாரணமானவர்களையும் பார்க்க முடிகிறது.
தோலின் நிறம் ஏற்கனவே நமக்குத் தெரிந்ததுதான் என்றாலும் கண்கள், தலைமுடி இரண்டையும் பல நிறங்களில் கொண்டவர்கள் அவர்கள். தோல், கண்கள் மற்றும் தலைமுடியின் நிறம் நாம் சார்ந்திருக்கும் மண்ணையும், சுற்றுச் சூழலையும் சார்ந்திருக்கிறது என்று ஏற்கனவே ஒரு புத்தகத்தில் படித்திருக்கிறேன். திரைப்படங்களில் நான் பார்த்திருந்த நீல, பச்சை வண்ணக் கண்கள் எனக்கு எப்போதும் வியப்பை ஏற்படுத்துவது வழக்கம். ஆனால் அவை தவிர சாம்பல், பழுப்பு, கரும்பச்சை என்று பல வண்ணங்களில் நவரத்தினங்கள்போல ஜொலிக்கும் அவர்கள் கண்கள் மிக வித்தியாசமானவை. அவற்றை நாம் இங்கே கான்டாக்ட் லென்சில் மட்டுமே பார்க்க முடியும்.
இதேபோலத் தலை முடியும் கருப்பு, பழுப்பு, அடர்பச்சை, வெள்ளி, தங்கம், சிவப்பு, இளம் பொன்னிறம் (blond) என்று இயற்கையிலும், நீலம், பச்சை, ரோஸ், வயலட், இரத்தச்சிவப்பு இன்னும் பல செயற்கையிலுமாகக் கண்களைப் பறிக்கின்றன. தலைமுடி அலங்காரத்தில் அதிக அக்கறையும், ஆர்வமும் காட்டும் அமெரிக்கர்களை வேறெந்தக் கடைகளுக்கும் இணையாக முடியலங்கார நிலையங்களில் பார்க்கலாம். நான் அங்கே பார்த்த சிகை அலங்காரங்களை அதற்கு முன்னால் எங்கேயும் பார்த்ததில்லை. ஆண்களும் பெண்களுக்கு இணையாகத் தோற்றத்தில் அதிக அக்கறையும், ஆர்வமும் காட்டுகிறார்கள்.
மேற்கத்திய உடைகளைப் பற்றிய வேறுபட்ட கருத்துக்களைக் கேள்விப்பட்டு ஏறக்குறைய ஒரு அசௌகரியத்துடன் சென்ற எனக்கு அவர்கள் அணிந்திருந்த வரம்பு மீறாத, நேர்த்தியான உடை ஒரே சமயத்தில் நிம்மதியையும், இலேசான மனதையும், அவர்கள்மேல் மரியாதையையும் உண்டாக்கியது. அதிகபட்சம் இரு பாலாரும் ஷார்ட்ஸ் அணிகிறார்கள் என்றாலும் யாரும் அவர்களைப் பொருட்டாகப் பார்த்துக் கொண்டிராமல் இயல்பாக அவரவர் வேலைகளை கவனிப்பதால் அது சூழ்நிலையைப் பாதிப்பதில்லை. அவர்கள் உடலமைப்பு அத்தகைய உடைகளுக்குப் பொருத்தமாக இருப்பதும் இன்னொரு காரணம்.
வித விதமான வண்ணங்களில், டிசைன்களில் tattoos செய்துகொள்வது அங்கே மிக சாதாரணமான விஷயமாக இருக்கிறது. நான்கைந்து கடைகளுக்கு நடுவில் ஒரு டாட்டூ கடையைப் பார்ப்பது வெகு சகஜம். இங்கே எப்படி டாட்டூ செய்துகொள்பவர்களைப் பார்ப்பது அபூர்வமோ அவ்வளவு அபூர்வம் அங்கே டாட்டூ செய்யாதவர்களைப் பார்ப்பது. சிறிய டிசைன்களிலிருந்து உடல் முழுவதுமாகப் பல அளவுகளில் செய்துகொள்கிறார்கள். ஒவ்வொரு டிசைனும் ஒரு பொருளைக் குறிக்கக்கூடும் என்பதால் தேர்ந்தெடுக்கும் டிசைன்களில் கவனம் தேவை என்று கேள்விப்பட்டேன்.
மக்கள் தொகையில் வயதானவர்கள் அதிகம். எண்பதுகளிலும் திடமாக, தெளிவாக இருக்கும் அமெரிக்கர்களைப் பார்க்க ஆச்சர்யம் வருகிறது. அதிகப் புரோட்டீன் கொண்ட உணவு, உடற்பயிற்சி, மருத்துவக் காப்பீடுகளின் ஒரு பகுதியான ரெகுலர் மெடிக்கல் செக்-அப் தரும் முன்னெச்சரிக்கை டெஸ்ட்கள் தரும் நோய்த் தடுப்புகள், கண்டறியப்பட்டு உடன் தீர்க்கப்படும் நோய்கள் எல்லாம் சேர்ந்து அவர்கள் வயதான காலத்திலும் ஆரோக்கியத்துடனும், நல்ல கண் பார்வை, உடல் வலிமையுடனும் இருக்கிறார்கள். வயதானவர்களில் அதிகமான பேரைக் கைத்தடி, கண்ணாடி இல்லாமலும், காரோட்டிக்கொண்டும் இருப்பதைப் பார்க்க முடியும். உடற்பயிற்சியிலும் மிகுந்த ஆர்வம் கொண்டிருக்கும் அவர்களை பைக் ஓட்டிக்கொண்டோ, ஓடிக்கொண்டோ, நடந்து கொண்டோ, வாரக் கடைசியில் ட்ரெக்கிங்கிலோ பார்ப்பது சர்வ சாதாரணம்.
பொது இடங்களில் எல்லோரும் கண்ணியமாகவே நடந்துகொள்கிறார்கள். என்னுடைய இதுவரையிலான மூன்று முறைப் பயணங்களிலும் நான் ஒரே ஒரு தவறான காட்சியைக்கூடக் காணவில்லை என்பது எனக்கே ஆச்சர்யம் தருகிறது. உண்மையில் அதுபோன்ற cultural shocks ஐ எதிர்பார்த்தே நான் அங்கே சென்றிருந்தேன். ஊடகங்கள் மூலமாக நாம் காணும் உலகம் ஒன்று. உண்மை உலகம் மற்றொன்று.
அமெரிக்கா என்னும் நாடு பல நாடுகளிலிருந்து வந்த மக்களைக் கொண்டிருப்பது என்பதால் அநேகமாக எல்லா விதமான மக்களையும் அங்கே பார்க்க முடிகிறது. எல்லாவிதமான மொழிகளைக் கேட்கவும், கலாச்சாரங்களைத் தெரிந்துகொள்ளவும் முடிகிறது. அதிலும் இந்தியர்கள் ஏராளமாக இருப்பதால் எங்கே சென்றாலும் நம் ஊரில் இருக்கும் உணர்வே வந்தது. அங்கே இருக்கும் நம் இந்தியர்கள் இன்னும் மனதால் ஒன்றுபட்டு இருக்கிறார்கள்.
அரிசோனாவின் வெப்பத் தட்பவெப்ப நிலை அமெரிக்கர்களின் தோலை இயற்கையாகவே tan செய்ததுபோல வெளிர் நிறமில்லாத பொன்னிறமாகவும், புள்ளிகள் (freckles) இல்லாத தெளிவான சருமமாகவும் வைத்து அழகுக்கு அழகு சேர்க்கிறது. வெயிலைத் தாண்டிப்போகும் தருணங்களில் வெப்பப் பிரதேசமான இந்தியாவிலிருந்தே சென்றாலும், சுட்டெரிக்கும் வெயிலிலிருந்து தப்பிக்க, உடலை முழுமையாக மறைக்கும் ஆடையணிந்து வேகமாக நடந்து நாம் கடக்கும்போது, ஷார்ட்ஸூம், டீ ஷர்ட்டும் மட்டும் அணிந்த அமெரிக்கர்கள் தலையில் ஒரு தொப்பிகூட இல்லாமல், சூடே இல்லாத சூழ்நிலையில் இருப்பதுபோல, சாவகாசமாக வெயிலில் நடந்து செல்வது என்னை எப்போதும் ஆச்சர்யப்படுத்தும் விஷயம்.
எத்தனையோ விதங்களில் விமர்சிக்கப்பட்டாலும் அடிப்படையில் அமெரிக்கர்கள் நட்பையும், நன்னடத்தையையும் (good manners), புன்னகையையும், ஹாய், ஹலோ என்பதுபோன்ற சிறு நட்புப் பேச்சையும் விரும்புகிறார்கள். அதனால் மகிழ்ந்துபோகிறார்கள். உதவி தேவைப்படும் சமயங்களில் உதவவும் தயங்குவதில்லை. எங்கேயும் மனிதர்கள் மனிதர்கள்தான்.
No comments:
Post a Comment