ரவா பூரி & ஆலு மசாலா

 ரவா பூரி & ஆலு மசாலா

250 கிராம் வறுக்காத ரவையை மிக்ஸியில் பவுடராக அரைத்து ஒரு கிண்ணத்தில் போடவும். 2 1/2 ஸ்பூன் ஆயில், சிறிது உப்பு சேர்த்து கையால் நன்கு கலக்கவும். பிறகு இதில் தேவையான நீர் ஊற்றி சப்பாத்தி மாவு போல நன்கு பிசையவும். மாவை சற்று தளர்வாகவே பிசையவும் இதை மூடி போட்டு 10 நிமிடங்கள் ஊறவிடவும். 

இந்நேரத்தில் அவித்து தோல் சீவிய 2 உருளைக்கிழங்கை கட்டிகள் இன்றி நன்கு மசித்து வைக்கவும். ஒரு வாணலியில் 2 tbs ஸ்பூன் ஆயில் விட்டு சூடானதும் 1/2 ஸ்பூன் சீரகம், கீறிய பச்சை மிளகாய் 2, வரமிளகாய் 2 கிள்ளிப் போட்டு பொரியவிட்டு, பின் 1/2 ஸ்பூன் இஞ்சி பூண்டு பேஸ்ட், & சிறிது பெருங்காயத்தூள் சேர்த்து நன்கு கலந்து 1 நிமிடம் வதக்கவும். 

இப்போது அடுப்பை மிதமாக எரியவிட்டு 1/2 ஸ்பூன் மிளகாய் தூள், 1/4 ஸ்பூன் மஞ்சள் தூள் சேர்த்து மசாலா போல கிளறவும், பின் இதில் மசித்த கிழங்கை போட்டு கிழங்கு முழுதும் மசாலா நன்கு கலக்கும் படி கலந்து கிளறிவிட்டு இதோடு 1 கிளாஸ் நீர் சேர்த்து ஒரு முறை நன்கு கலக்கிவிடவும். பின்னர் இதில் 1/2 ஸ்பூன் கரம் மசாலா, 1/2 ஸ்பூன் சாட் மசாலா..

உப்பு தேவையான அளவு போட்டு கலந்து கொதிக்கவிடவும் 2 நிமிடங்கள் கொதித்தால் போதும். மசாலா திக்காக குழைந்து இருக்கும், அதில் மல்லித் தழைகள் நறுக்கிப் போட்டு நன்கு கிளறி அடுப்பிலிருந்து இறக்கி வைக்கவும். சுஜி பூரிக்கு ஏற்ற அருமையான ஆலு மசாலா ரெடி! இப்போது ஊறிய மாவை திறந்தால் அது இறுகி இருக்கும்.

நன்றாக அதை அழுத்தி பிசைந்து மொத்த மாவிலிருந்து சிறு சிறு மாவாக பிரித்து அதை உருட்டி கோதுமை மாவில் பிரட்டி பூரிகளாக தேய்க்கவும். ஒரு வாணலியில் ஆயில் விட்டு அது நன்கு சூடானதும் பூரிகளை போட்டு பொரிக்கவும். நல்ல சூடான ஆயிலில் தான் பொரிக்கணும்! ஆயில் கொதித்துவிடவும் கூடாது அவ்வப்போது தீயை ஏற்றி..

இறக்கி சீரான சூட்டில் வைத்து பொரிக்கவும். இந்த பூரி கோதுமை மாவு போல இன்றி சட்டென உப்பலாக பொரியும். பூரி மீது கரண்டியால் ஆயிலை அள்ளி ஊற்றவும் மேற்புறம் பொன்னிறமானதும் எடுக்கவும், சூடான ஆயிலை ரொம்ப ஊற்றினால் பூரி மேலே பிரவுன் கலர் ஆகிவிடும்! இந்த பூரி மேலே மொறு மொறு என்றும் பிய்த்தால் சாஃப்ட் ஆகவும் இருக்கும். இந்த சுஜி பூரியை நாம் செய்து வைத்த ஆலு மசாலாவுடன் சேர்த்துப் பரிமாறுங்கள். மீண்டும்.. மீண்டும்.. வேண்டும்.. வேண்டும்.. என்ற குரல் இதை ருசிப்பவர்கள் வாயிலிருந்து வந்துகொண்டே இருக்கும்.