சிதம்பரத்திலிருந்து காசி,கயா,அலகாபாத்,ஹரித்வார்,மதுரா….பகுதி 2

 சிதம்பரத்திலிருந்து காசி,கயா,அலகாபாத்,ஹரித்வார்,மதுரா….பகுதி 2

இருபதாண்டுகளில் சிதம்பரம் கடைத்தெரு நியான் விளக்குளில் மின்னலிட கோயிலின் தீஷிதர் நிர்வாகத்தில் பெரிய மாற்றம் தெரியவில்லை. 

கிழக்கு கோபுரம் வழியே உள் நுழைகையில் தீஷிதர் வீட்டுக்குழந்தைகள் ஒரு குட்டித்தேர் செய்து இழுத்துச்செல்வதையும் அவர்கள் அம்மாக்கள் பெருமிதம் பொங்க பின் செல்வதையும் பார்க்க நேர்ந்தது. குழந்தை பருவத்திலேயே பக்தியை ஊட்டி வளர்க்கும் அவர்களின் கலாசாரம் போற்றுதற்குரியது எனினும்  சிறு குழுக்களுக்குள்ளான குழந்தை திருமணங்களும் (தில்லைப்பெண் எல்லை தாண்ட மாட்டாள்)பையன்களை அதிகம் படிக்க வைக்காமையும் அவர்களின் எண்ணிக்கை ,வாழ்க்கைத்தரம் குறைவதற்கான காரணங்களை கூட்டுகிறது. 

கீழ கோபுர வாசலில் அமர்ந்திருக்கும் நண்பர்களில் இழந்த என் இளமைக்காலத்தை தேடுகிறேன். எழுபது,எண்பதுகளில் அங்கே அமர்ந்து உரையாடிய பொழுதுகளை காலம் களவாடியதை நினைத்து மனம் உருகுகிறது…பார்த்தசாரதி சார் தலைமையில் கனகசபை ,ராஜன்,பெருமாள்,என நண்பர்களின் அரட்டைகள் இரவு ஒன்பது வரை பசி மறந்து நீளும். 

கோபுரத்தை அண்ணாந்து பார்க்கிறேன் ...

அன்றைய காலகட்டத்திலேயே மக்கள் எப்படிப்பட்ட கோவில்களை எழுப்பி இருக்கிறார்கள் என்பதை கவனித்து பார்க்கிறேன் ... ராமேஸ்வரம், சிதம்பரம், மதுரை என்று எந்த கோவிலானாலும் அது பிரம்மாண்டமானதாகதானே இருக்கிறது. ஆயிரம் ஆண்டுகளுக்கு முன்பே மக்கள் இப்படிப்பட்ட பிரம்மாண்டமான வடிவமைப்புகளை உருவாக்கி இருக்கிறார்கள். கிட்டத்தட்ட, அரசனைத் தவிர அப்போது அனைவருமே குடிசையில் வாழ்ந்தவர்கள் தாம். 

எந்தவிதமான எந்திரங்களோ, வாகனங்களோ, பளு தூக்கும் சாதனங்களோ இல்லாதபோதும், தலைமுறைகளை தாண்டி மக்கள் ஒரே குறிக்கோளுடன் உழைத்திருக்கிறார்கள். கோவிலை உருவாக்குவதற்காகவே வாழ்ந்து மறைந்த அவர்கள் தங்கள் வாழ்க்கையை விட மதிப்பானதாக இந்த கோவில்களை எழுப்புவதை வைத்திருக்கிறார்கள். 

இதில், சிதம்பரம் கோவில் நம்பவே முடியாத அளவுக்கு ஆச்சரியமான ஒரு இடம். கோவிலில் கொஞ்சம் புதிதாக தெரியும் பகுதியானது சுமார் 1000 வருடங்களுக்கு முன் கட்டப்பட்டது. ஆனால் கோவிலின் புராதன உட்புறம் எப்போது கட்டப்பட்டது என்பதுபற்றி யாருக்குமே தெரியவில்லை. 3500 ஆண்டுகள் அல்லது அதற்கும் முற்பட்டதாக இருக்கலாம் என்று மக்களால் கருதப்படுகிறது. 

இருபது படிகள் இறங்கி உள் நுழைகிறேன். 

எங்களாத்து கட்டளை தீஷிதர் அமரும் வழக்கமான மேடையில் யாரோ அவர் வாரிசு…

அதே போல தாயார் சன்னதியில் அமைதியாக கைங்கர்யம் செய்து வந்த ஶ்ரீதர்  பட்டாச்சாரியரை( 50 வயது)

கொரானா காரணம் சொல்லி பகவான் தனக்கருகில் அழைத்து சென்றதும் கேள்விப்பட்டு மன வருத்தம். 

காலமும் காலனும் இறை தொண்டர்களையும் விட்டு வைப்பதில்லை..

திருப்பதி வெங்கடாஜலபதியின் கீழே சுப்ரமண்யர் என எழுதப்பட்ட படம் அதே இடத்தில் தொங்கிக்கொண்டிருக்க ஜல்ஜல் என்ற காண்டாமணியை இழுத்து விடும் ஓசை கேட்டு எட்டு மணி கால தரிசனத்திற்கு விரைகிறோம். 

உடலில் உள்ள இதயம் இடப்பக்கமாக இருப்பதால் பொன்னம் பலம் சற்று இடதுபுறமாக அமைக்கப்பட்டுள்ளது. இங்கு உள்ள கனகசபைக்கு வழி, பிற கோவில்களில் இருப்பது போல நேராக இல்லாமல் பக்கவாட்டில் வருகிறது. இதன் நான்கு தூண்கள் நான்கு வேதங்களையும். பொன்னம்பலத்தில் உள்ள 28 தூண்கள் 28 ஆகமங்களையும் குறிக்கிறது. இங்கு அமைக்கப் பட்டுள்ள 64 மேற்பலகைகள் 64 கலைகளை குறிக்கிறது. அர்த்த மண்டபத்தில் உள்ள ஆறு தூண்கள் ஆறு சாஸ்திர அங்கங் களையும், அதன் அருகில் உள்ள மண்டபத்தில் உள்ள 18 தூண்கள் 18 புராணங்களையும் குறிப்பதாகவும் தத்துவ விளக்கங்கள் உண்டு.

சிதம்பரம் கோவிலில், நடனக்கலையின் அரசனாக 'நடராஜன்' எனும் வடிவில் சிவன் இருக்கிறான். 'நடேசன்' அல்லது 'நடராஜன்' சிவன் எடுத்துள்ள குறிப்பிடத்தக்க வடிவங்களில் ஒன்று. 

நாம் சுவிட்சர்லாந்து நாட்டில் CERN என்ற பௌதீக ஆராய்ச்சிக் கூடத்திற்கு சென்றால் அணுக்களை ஒன்றோடு ஒன்று மோதச்செய்வது, பிளப்பது என அணுவை பற்றிய எல்லாவிதமான ஆராய்ச்சிகளும் இங்கேதான் நடைபெறுகின்றது. அந்த பரிசோதனைச் சாலையின் வாயிலில் நடராஜரின் சிலைவடிவம் வைக்கப்பட்டிருந்தது. ஏனெனில் இப்போது அவர்கள் செய்து வரும் செயல்களுக்கு மனிதர்களால் உருவாக்கப்பட்ட கலாச்சாரத்தில் உள்ள வேறுஎதுவும் அருகில்கூட வரவில்லை என்பதை அவர்கள் கண்டுள்ளனர்.

சிதம்பரம் கோவில் எப்படி உருவானது?,

நடராஜரின் வடிவம் தென்னிந்தியாவில், அதுவும் குறிப்பாக தமிழ்நாட்டில் இருந்தே தோன்றியது. காலமும் எல்லையும் இன்றி நீண்டிருந்த அசைவற்ற தன்மை, தன்னைதானே நடனவடிவில் படைத்துகொண்டு வெளிப்படுத்தும் பேரானந்த களிப்பையே நடராஜர் உருவம் குறிக்கிறது. 

சிதம்பரம் என்று நீங்கள் அழைப்பது முழுமையான அமைதியில் இருக்கும் அசைவற்ற நிலையே. இங்கே நின்ற நிலையில் அமைக்கப்பட்டுள்ள நடராஜர் குறிப்பால் இதை நமக்கு உணர்த்துகிறார். இங்கே முழுமையான அசைவற்ற தன்மை கோவிலாக குடிகொண்டுள்ளது. ஒவ்வொரு மனிதருக்குள்ளும் இந்த அசைவற்ற தன்மையை கொண்டு வருவதற்காகவே பாரம்பரிய கலைவடிவங்கள் உருவாக்கப்பட்டது. உள்ளுக்குள் அசைவற்ற தன்மை இல்லாமல் உண்மையான கலைத்திறன் வெளிப்படாது.

என்ன ரொம்ப குழப்பறேனா?...